Ditrọnọmi 8 - Ika

Isi Nke Ẹsatọ Azọkwọlẹ Osolobuẹ

¹ Dọnrin ni ẹnya mẹsọnmẹ ihiẹn ndịnị ile m rị a gwa ụnụ tannị kẹni ụnụ rị ndụn, mụba, banye d'e weri alị ahụn Osolobuẹ kun enwẹn ẹ n'o k'e ye ndị nẹdi ụnụ kanị.

² Nyanhankwọ nị kẹ Osolobuẹ wụ Chuku ụnụ dọn du ụnụ hụn ahụn ile ụnụ rị imẹ atụ ọrọgbọ ahụa ọgụnnaịnị, gi ẹ welụa ụnụ isi alị, gi ẹ lele ụnụ, n'ọ hụn ụzọ marịn ihiẹn rị ụnụ obi, marịn kẹni ụnụ mẹ ihiẹn ọ sị ụnụ mẹ ra ụnụ emẹkọ a.

³ O gi ẹgụn welụa ụnụ isi alị, yemẹ ụnụ mana ri, ihiẹn ụnụ lẹ ndị nẹdi ụnụ marịnlẹni, kẹn'o gi ẹ kuzi ụnụ nị ẹlẹ ihiẹn-oriri sụọ kẹ ịhịan gi a rị ndụn kanị ihiẹn ile gha Osolobuẹ ọnụ pụha.

⁴ Ọrọgbọ ahụa ọgụnnaịnị, ẹkwa ụnụ afanị, ụkụ ụnụ e funni.

⁵ Gi n'ẹ nwan marịn nị Osolobuẹ wụ Chuku ụnụ a zụn ụnụ kẹ ịhịan dọn a zụn nwa a.

⁶ E mẹ ni ihiẹn Osolobuẹ wụ Chuku ụnụ sị ụnụ mẹ, a gha ụzọ a ile, a gbaye ẹ.

⁷ Makẹni Osolobuẹ wụ Chuku ụnụ wela ụnụ alị rị mma, alị mirin iyi e huni lẹ mirin rị ụzọ-ohu jun, hụn mirin nọ e hu kẹ imẹ ọdanmgbugbu kẹ elu òke;

⁸ alị ọka-witi lẹ ọka-bali jun; alị vaịnị lẹ osisi-figi lẹ osisi pomegraneti lẹ ofigbọn-olivu lẹ mirin-ẹnwụn jun, e hu;

⁹ alị o mẹ ni ihiẹn-oriri akọkọ ụnụ, ihiẹn ọwụlẹ akọkọ ụnụ; alị hụn ọmụma rịn'a mẹ igwe-igwe, w'a nọdẹ elu òke ndị rịn'a e gupụha igwe-kọpa.

¹⁰ Ụnụ jẹnkọ d'e ri ihiẹn-oriri rijun ẹfọ, ụnụ a kpanmịn Osolobuẹ wụ Chuku ụnụ makẹ alị-ọma o ye ụnụ.

¹¹ Kpachanpụkwọ ẹnya amamgbe y'a zọ Osolobuẹ wụ Chuku ụnụ, mẹbehi ihiẹn ndị ọ sị ụnụ mẹ lẹ iwu ẹ lẹ uhi ẹ hụn m rị e ye ụnụ tannị.

¹² Amamgbe ụnụ rijunmẹ ẹfọ, tụngụ ụlọ rị mma birisọnmẹ,

¹³ efin lẹ atụnrụn lẹ ewu ụnụ a bagụ ụba, siliva lẹ goru ụnụ a barahị, ihiẹn ile ụnụ nwọn a barahị,

¹⁴ isi e bumẹ ụnụ, ụnụ a zọ Osolobuẹ wụ Chuku ụnụ, hụn gha Ijiptu, alị ụnụ nọ wụ igbọn, wepụha ụnụ.

¹⁵ O dughachanrịn ụnụ atụ ahụn shịagbu enwẹn ẹ hụn a tụ egun; alị ahụn kpọ nkụn mirin rịlẹni, hụn agwọ lẹ akpị nwọnsọnmẹ eje-ẹdide jun; ọ gha imẹ ọmụma zegbu enwẹn ẹ wepụhanị ụnụ mirin ra;

¹⁶ o ye ụnụ mana ri imẹ atụ, ihiẹn-oriri ndị nẹdi ụnụ marịnlẹni, gi ẹ welụa ụnụ isi alị, lele ụnụ kẹni ọ rịnị ụnụ mma.

¹⁷ Ikẹnkwọ y'a sị enwẹn i, “Ẹka m mẹni m.”

¹⁸ Ka nyanhankwọ Osolobuẹ wụ Chuku i, makẹni ịya e ye i ikẹn i gi e hi ọdanfịn kẹni o mẹzu nkwa a hụn o gi kunni ndị nẹdi ụnụ kanị enwẹn ẹ, k'o dọn nwan rị e mẹ tannị.

¹⁹ Ụnụ ma-ama zọ Osolobuẹ wụ Chuku ụnụ, sọnmẹ mmọn-lẹ-iyi, femẹ wẹ, kụmanị wẹ isi alị, m rị nwan a gwatọ ụnụ tannị nị Osolobuẹ k'e tikpọchanrịn ụnụ.

²⁰ Kẹ Osolobuẹ dọn tikpọ alị ndị ahụn bu ụnụ ụzọ bi ebahụn k'ọ k'a dọn tikpọ ụnụ makẹni ụnụ emẹni ihiẹn Osolobuẹ wụ Chuku ụnụ sị ụnụ mẹ.