Ditrọnọmi 7 - Ika

Isi Nke Ẹsa Ịchụpụsọnmẹ Alị Ichẹn-ichẹn Rị Kenaanị

¹ Osolobuẹ wụ Chuku ụnụ webangụ ụnụ alị ahụn ụnụ bankọ d'e weri, chụpụgụnị ụnụ ndị alị bu ọda: ndị Hẹti, ndị Gẹgashị, ndị Amọ, ndị Kenaanị, ndị Pẹrẹzi, ndị Hivu lẹ ndị Jebusu, alị ẹsa ka ụnụ ọda, ka ụnụ ikẹn,

² o wegụ wẹ che ụnụ ẹka mẹri, gbuchanrịnkwọ nị wẹ ru alị. Y'e nwọnkwọlẹ ihiẹn k'e kwọngbama ụnụ lẹ wẹ! Emẹkwọlẹ ni omikẹn wẹ!

³ Ụnụ lẹ wẹ alụtarịkwọlẹ. Eyekwọlẹ ni wẹ ụmụ ụnụ ikpoho lụrụ; alụyekwọlẹ ni ụmụ ụnụ ikẹnnyẹ ikpoho wẹ —

⁴ makẹni wẹ jẹnkọ d'e mẹ ụmụ ụnụ gbakitọ m azụụn d'e femẹ mmọn-lẹ-iyi, e gi m ọnụma Osolobuẹ sọn ụnụ, tikpọ ụnụ ozigbo.

⁵ Lee ni ihiẹn ụnụ jẹnkọ d'e mẹ wẹ: tikpọpụ nị ukpo ndị wẹ n'a chụn ẹjan; kụkpọpụ nị ọmụma-nsọ wẹ, gbutu ni osisi wẹ zumẹsọnmẹ wẹ gi a rụa Ashẹra, ụnụ a dụn mmọn-lẹ-iyi wẹ ọkụn.

⁶ Makẹni ụnụ wụ ndị rị nsọ ẹnya Osolobuẹ wụ Chuku ụnụ. Imẹ ndị ile rị elu-ụwa, ụnụ kẹ Osolobuẹ họrị nị ụnụ wụrụ ndị nke ẹ pụ-ichẹn.

⁷ Ẹlẹkwọ ni ụnụ ka ndị ọzọ ọda haịn Osolobuẹ gi we ụnụ che ẹhụ, họrị ụnụ — ụnụ te kachanrịnkwọ ntịn imẹ alị ile.

⁸ Kanị, makẹni ụnụ rị Osolobuẹ obi lẹn'ọ chọ n'o mẹ ihiẹn o kun enwẹn ẹ kwe ndị nẹdi ụnụ kanị nkwa a haịn o gi gi ẹka-ikẹn wepụha ụnụ, gha imẹ alị ụnụ nọ wụ igbọn, ẹka Fẹro eze alị Ijiptu, gbarị ụnụ.

⁹ Marịn nị nwan nị Osolobuẹ wụ Chuku ụnụ wụ Chuku nke-esi; Chuku wẹ gi e dọn ẹnya k'ọ wụ: o gisọnmẹ ihiẹn-ọsụsụọ o kwe nkwa a e sọn ụmụ ndị ihiẹn ẹ a sụọ, ndị e mẹ ihiẹn o ku, o gi ẹ e sọn wẹ agbọ nnụ ole-lẹ-ole.

¹⁰ Nke ndị hụn ize ẹ e ze, o mẹgwarị wẹ idẹnya wẹ hụn o gi tikpọ wẹ; ẹghẹẹ, o mẹgwarị ndị ahụn ize ẹ e ze idẹnya wẹ, a ra lee ẹnya azụụn.

¹¹ Kpachanpụ nị nwan ẹnya mẹ ihiẹn ndịnị m rị a gwa ụnụ tannị, ihiẹn ndị ọ sị ụnụ mẹ lẹ uhi lẹ iwu ndịnị.

Ngọzi K'e Sọn Ihumẹ-isi

¹² Ụnụ gọn ntịn iwu ndị ahụn o ye ụnụ, kpachanpụ ẹnya sọn wẹ, Osolobuẹ wụ Chuku ụnụ k'e mẹ nke ẹ, gi ihiẹn-ọsụsụọ a ahụn sọn ụnụ, hụn ahụn o kun enwẹn ẹ kwe ndị nẹdi ụnụ kanị nkwa a.

¹³ Ihiẹn ụnụ k'a sụọ a, ọ gọzi ụnụ, mẹ ụnụ ba ụba. O k'e gi ụmụ gọzi ẹkpa-nwa ụnụ, gi ihiẹn-ugbo gọzi alị ụnụ — kẹ ọka kẹ manya ọhụn kẹ ofugbọn-olivu, gi ụmụ-efin gọzi igunrun efin ụnụ, gi ụmụ atụnrụn gọzi igunrun atụnrụn ụnụ, imẹ alị ahụn o kunni ndị nẹdi ụnụ kanị enwẹn ẹ n'o k'e ye ụnụ.

¹⁴ O k'a gọzi ụnụ karị ndị alị ọzọ ile; onwọnni okẹnnyẹ mọbụ okpoho ụnụ k'a wụ agan, ụmụ akọkọ anụ ụnụ.

¹⁵ Osolobuẹ anịkọ ọrịa ọwụlẹ ru ụnụ ẹhụ. Ọ tụkọ ụnụ eje-emu ndị ahụn ụnụ hụn alị Ijiptu; kama, ndị ile e we iwe ụnụ k'o k'a tụ eje-emu ndị ahụn.

¹⁶ Gbuchanrịn nị ndị ile Osolobuẹ wụ Chuku ụnụ k'e buche ụnụ ẹka mẹri. Emẹlẹ ni omikẹn wẹ mọbụ femẹ mmọn-lẹ-iyi wẹ, makẹni ọhụn k'a wụrụnị ụnụ ọnyan.

¹⁷ Ikẹnkwọ ụnụ hụ a sị enwẹn ụnụ, “Ndị alị ndịnị wẹ ka ẹnyi ikẹn. Nanị ẹnyi a dọn nwan s'ẹka chụpụ wẹ?!”

¹⁸ Ka atụlẹ ni egun wẹ; nyanhankwọ nị ihiẹn Osolobuẹ wụ Chuku ụnụ mẹ Fẹro eze Ijiptu lẹ ndị Ijiptu ile.

¹⁹ Ụnụ e gighọ ẹnya ụnụ hụn okẹn nlele lẹ ihiẹn-nghọsị lẹ ahụnlele ndị ahụn a tụ ẹnya lẹ ẹka-ikẹn lẹ ịkpa-ikẹn hụn Osolobuẹ wụ Chuku ụnụ gi wepụha ụnụ. Ẹrịra kẹ Osolobuẹ wụ Chuku ụnụ k'e mẹzi ndị alị ndị ahụn ile ụnụ rị nwan a tụ egun wẹ.

²⁰ Ẹlẹdẹ ọhụn sụọ, Osolobuẹ wụ Chuku ụnụ k'e zi ẹkpa-ẹnwụnmẹnwụn ye igunrun wẹ d'e runi ndị te wanahịngụ ụnụ, warị, a gụchanrịn.

²¹ Atụkwọlẹ ni egun wẹ, makẹni Osolobuẹ wụ Chuku ụnụ, hụn rị imẹ igunrun ụnụ, wụ Chuku hi-ogbe, hụn e mẹ ihiẹn a tụ egun.

²² Osolobuẹ wụ Chuku ụnụ k'e gi ẹkẹrẹ-ẹkẹrẹ chụpụnị ụnụ ndị alị ndị ahụn. Ọ nịkọ ụnụ gbupụchanrịn wẹ mgbe ohu, makẹ eje-anụ gha a barahị ebe ụnụ rị.

²³ Kanị Osolobuẹ wụ Chuku ụnụ k'e wekwọ wẹ che ụnụ ẹka mẹri, o ru, o bu okẹn isusu tọnị wẹ d'e ru ni ụnụ e tikpọchanrịn wẹ.

²⁴ O k'e bu ndị-nze wẹ che ụnụ ẹka, ụnụ e finchanpụ ẹfan wẹ elu-ụwa. Onwọnni onyẹ k'a s'ẹka wuzo che ụnụ ọgụn ụnụ e we tikpọgụ wẹ.

²⁵ Dụnpụ nị mmọn wẹ ile wẹ kpụ ọkụn. Anịlẹ ni siliva lẹ goru rị mmọn ndị ahụn ẹhụ la ụnụ ẹnya; ewelẹ ni wẹ, makẹni ọnyan rọ, makẹni arụ k'ọ wụ ẹnya Osolobuẹ wụ Chuku ụnụ.

²⁶ Ewebanhanlẹ ni ihiẹn Osolobuẹ a sọ iwe ụnụ, amamgbe ụnụ e sọn ẹ wụrụ ihiẹn Osolobuẹ jẹnkọ d'e tikpọ. Wẹ wụrụnị ụnụ ihiẹn rụchanrịnnị, ụnụ a sọchanrịn wẹ, makẹni ihiẹn Osolobuẹ jẹnkọ d'e tikpọ kẹ wẹ wụ.