Ditrọnọmi 6 - Ika

Isi Nke Isin Ihiẹn Osolobuẹ Wụ Chuku I Ya Sụọ Ị

¹ Ihiẹn ndịnị kẹ Osolobuẹ wụ Chuku ụnụ sị ụnụ mẹ lẹ uhi ẹ lẹ iwu ẹ: ịya k'ọ sị m kuzi ụnụ nị ụnụ gi bi imẹ alị ahụn ụnụ fetukọ Iyi Jọdanị d'e weri,

² kẹni ụnụ lẹ ụmụ ụnụ lẹ ụmụ-ụmụ ụnụ hụn ụzọ a tụ egun Osolobuẹ wụ Chuku, ụnụ e we nwụn, e sọn uhi ẹ ile lẹ ihiẹn ile m rị a gwa ụnụ n'ọ sị ụnụ e mẹ, lẹzi ni ụnụ hụn ụzọ tọ.

³ Euu ndị Izrẹlụ, gọnkwọ nị ntịn, dọnrin ni ẹnya mẹ ihiẹn ndịnị, kẹni ọ rịnị ụnụ mma, ụnụ a ba ụba ọda-ọda, alị ahụn a wụrụnị ụnụ alị mirin-ẹran anụ lẹ mirin-ẹnwụn jun, e hu, nọkẹ kẹ Osolobuẹ wụ Chuku ndị nẹdi ụnụ dọn kwe ụnụ nkwa.

⁴ Ụnụ ndị Izrẹlụ, gọn ni ntịn: Osolobuẹ wụ Chuku ẹnyi; Osolobuẹ sụọ.

⁵ Gi obi i ile, enwẹn i ile lẹ ikẹn i ile nwọn ihiẹn-ọsụsụọ Osolobuẹ wụ Chuku i.

⁶ Bu ni iwu ndịnị m rị e ye ụnụ tannị che obi ụnụ.

⁷ A gwa nị ụmụ ụnụ ya a gwashi wẹ ya ikẹn. E kusọnmẹ ni oku wẹ: kẹ ebe ụnụ nọdị alị imẹ ụlọ kẹ ebe ụnụ ghakọ ụzọ kẹ ebe ụnụ dinẹ kẹ ebe ụnụ lihi ọtọ.

⁸ Kẹn ni wẹ ye ẹka lẹ ezimezi ihun nị wẹ wụrụ ihiẹn a nyanhannị ụnụ.

⁹ De ni wẹ ye elu ọnụmụzọ iwe ụnụ lẹ ọnụ-mgbọn ụnụ.

¹⁰ Ogẹn Osolobuẹ wụ Chuku ụnụ e gi weban ụnụ imẹ alị ahụn o kun enwẹn ẹ kwe ndị nẹdi ụnụ wụ Ebraham, Aziki lẹ Jekọpụ nkwa n'o k'e ye ụnụ, alị obodo rị mma shịa ẹfọ rịsọnmẹ, obodo ndị ụnụ tụnlẹni,

¹¹ ogẹn o k'e ye ụnụ ụlọ ndị ezigbo ihiẹn rị ichẹn-ichẹn ụnụ buchelẹni junsọnmẹ, ọmị ndị ụnụ gulẹni, alị vaịnị lẹ alị olivu ụnụ kụnlẹni, nị ụnụ e rijunmẹ ẹfọ,

¹² kpachanpụkwọ nị ẹnya makẹ ụnụ gha a zọ Osolobuẹ hụn gha alị Ijiptu, alị ahụn ụnụ nọ wụ igbọn, wepụha ụnụ.

¹³ A tụ nị egun Osolobuẹ wụ Chuku ụnụ; e fe ni ịya sụọ; e kun ni ẹfan a sụọ.

¹⁴ Esọnkwọlẹ ni mmọn-lẹ-iyi chen'ẹ, mmọn-lẹ-iyi alị ndị ahụn nọkunmẹni ụnụ e fe;

¹⁵ Osolobuẹ wụ Chuku ụnụ hụn rị imẹ igunrun ụnụ wụ Chuku ẹnya a fụ; o k'e gi olulu mẹ ụnụ ihiẹn, kpọnchanpụ ụnụ alị hụ.

¹⁶ Achọkwọlẹ ni ihiẹn rị Osolobuẹ wụ Chuku ụnụ ọnụ kẹ ụnụ dọn mẹ imẹ alị Masa.

¹⁷ Hụnkwọ n'a nị ụnụ mẹ ihiẹn Osolobuẹ wụ Chuku ụnụ sị ụnụ mẹ lẹ usọnrọn ile o tumẹ lẹ uhi o yisọnmẹni ụnụ.

¹⁸ Mẹ ni ihiẹn rị Osolobuẹ mma ẹnya, kẹni ọ rịnị ụnụ mma, nị ụnụ hụn ụzọ banye d'e weri alị ọma ahụn Osolobuẹ kun enwẹn ẹ kwe ndị nẹdi ụnụ kanị nkwa a,

¹⁹ lẹ ni ụnụ hụn ụzọ chụpụ ndị iṅẹnrẹn ụnụ ile kẹ Osolobuẹ dọn ku.

²⁰ Ihun-ihun, nwa ị jụ ị sị, “Kị haịn Osolobuẹ wụ Chuku ẹnyi gi tumẹsọnmẹni ẹnyi usọnrọn lẹ iwu ndịnị, yisọnmẹni ẹnyi uhi ndịnị?”

²¹ Sị a, “Ẹnyi te wụ igbọn Fẹro eze alị Ijiptu, Osolobuẹ nọ gi ikẹn hi-ogbe ọ kpa gha Ijiptu wepụha ẹnyi,

²² nọ idẹnya ẹnyi mẹsọnmẹ ihiẹn-nghọsị lẹ ahụnlele, okẹn-ihiẹn a tụ egun o gi mẹshi alị Ijiptu lẹ Fẹro lẹ ikpụlọ a ile ikẹn.

²³ Ọ gha ebahụn wepụha ẹnyi kẹn'o wẹhẹ ẹnyi ebeni, d'e ye ẹnyi alị o kun enwẹn ẹ kwe ndị nẹdi ẹnyi kanị nkwa a.

²⁴ Osolobuẹ sị ẹnyi sọnchanrịn iwuni ile, ẹnyi tụ egun Osolobuẹ wụ Chuku ẹnyi nị ẹnyi hụn ụzọ a gha ihun, a rị ndụn, k'o dọn nwan rị tannị.

²⁵ Omẹni ẹnyi a kpachanpụ ẹnya dọnmẹchanrịn iwuni ile kẹ Osolobuẹ wụ Chuku dọn chọ lẹ k'ọ dọn gwa ẹnyi, ẹnyi e gi ẹ wụrụ ndị rị mma ẹnya Osolobuẹ.”