Ditrọnọmi 5 - Ika

Isi Nke Isẹn Iwu Iri Ahụn

¹ Mozizi kpọzu Izrẹlụ ile, sị wẹ, “Izrẹlụ, gọn ni ntịn uhi lẹ iwu ndịnị m k'e tumẹni ụnụ tannị. Mụ nị wẹ, ụnụ a hụn a ni ụnụ e gi wẹ e bi.

² Osolobuẹ wụ Chuku ẹnyi nọ Horẹbụ ye ẹnyi Iwu kwọngbama ẹnyi lẹ ịya.

³ Ẹlẹ ndị nẹdi ẹnyi kẹ Osolobuẹ gi Iwu hụ kwọngbama ịya lẹ wẹ, kanị ẹnyi — ẹnyi ile hụn rị ndụn ebeni tannị.

⁴ Osolobuẹ gha imẹ ọkụn ahụn rị elu-ugu gwa ụnụ oku elee-m elee-i.

⁵ (Mmẹ wuzo ẹgbata ụnụ lẹ Osolobuẹ ogẹn ahụn, a gwa ụnụ ihiẹn Osolobuẹ ku, makẹni egun ọkụn hụ rị a tụ ụnụ, ụnụ nọlẹni jẹn elu-ugu ahụn.) Ihiẹn Osolobuẹ ku wụ:

⁶ “Mmẹ wụ Osolobuẹ, Chuku ụnụ hụn gha alị Ijiptu, alị ụnụ nọ wụ igbọn, wepụha ụnụ.

⁷ “Efekwọlẹ ni mmọn-lẹ-iyi cheni m.

⁸ “Emẹmẹrinkwọlẹ ni mmọn-lẹ-iyi ọwụlẹ: kẹ hụn yi ihiẹn rị igwere kẹ hụn yi ihiẹn rị akpakalị mọbụ imẹ mirin.

⁹ “Akpọkwọlẹ ni ni wẹ isi alị mọbụ fe wẹ, makẹni mmẹ, Osolobuẹ hụn wụ Chuku ụnụ, wụ Chuku ẹnya a fụ; m'e gi njọ ndị hụn ize m e ze e sọn ụmụ wẹ d'e ru ụmụ-ụmụ lẹ ụmụ ụmụ-ụmụ wẹ,

¹⁰ kanị m'e gi ihiẹn-ọsụsụọ e sọn ụmụ ndị ihiẹn m a sụọ, ndị e mẹ ihiẹn m ku, d'e rukwọrị agbọ ‘nnụ-nnụ’.

¹¹ “Egikwọlẹ ni ẹfan Osolobuẹ wụ Chuku ụnụ mẹ ihiẹn furulẹni, makẹni Osolobuẹ ahatukọkwọ onyẹ gi ẹfan a mẹ ihiẹn furulẹni.

¹² “Zu ni ikẹn gi dọnmẹ Ụhụọhịn Ezumikẹn nsọ kẹ Osolobuẹ wụ Chuku ụnụ dọn gwa ụnụ.

¹³ Akp'ọhịn isin kẹ ụnụ e gi rụn ọrụn, rụn ọrụn ile ụnụ k'a rụn,

¹⁴ kanị, nke akp'ọhịn ẹsa rịn'a wụ Ezumikẹn wẹ gi e ye Osolobuẹ wụ Chuku i ọghọ. Arụnkwọlẹ ọrụn ọwụlẹ ụhụọhịn hụ — kẹ yụ kẹ ụmụ ị ikẹnnyẹ lẹ ikpoho, kẹ igbọn i okẹnnyẹ lẹ ikpoho, kẹ anụmanụ ị kẹ abịamabịa rị alị ọnụ; kẹni odibo i okẹnnyẹ lẹ odibo i okpoho zu ikẹn k'i dọn zu.

¹⁵ Nyanhankwọ nị igbọn kẹ ụnụ te wụ imẹ alị Ijiptu, Osolobuẹ wụ Chuku ụnụ nọ gi ẹka a zeni lẹ ikẹn ọ kpa wepụha ụnụ. Ya haịn Osolobuẹ wụ Chuku ụnụ gi nwan sị ụnụ zu ikẹn Ụhụọhịn Ezumikẹn.

¹⁶ “Gbaye nẹdi i lẹ nnẹ i, kẹ Osolobuẹ wụ Chuku ụnụ dọn gwa ụnụ, n'ị hụn ụzọ tọ lẹ n'ọ hụn ụzọ masịn'ị imẹ alị ahụn Osolobuẹ wụ Chuku ụnụ rị e ye ụnụ.

¹⁷ “Egbukwọlẹ ọchụn.

¹⁸ “Aghẹrẹkwọlẹ.

¹⁹ “Ezunkwọlẹ ohin.

²⁰ “Ebuokinkwọlẹ ibe i ọnụ.

²¹ “Anịkwọlẹ nwunyẹ ibe i la ị ẹnya. Anịkwọlẹ ụlọ mọbụ alị ibe i mọbụ odibo ẹ okẹnnyẹ mọbụ odibo ẹ okpoho mọbụ efin ẹ mọbụ jaki ẹ mọbụ ihiẹn ọzọ ọwụlẹ o nwọn la ị ẹnya.”

²² Osolobuẹ gi olu rị a han imẹ ọkụn lẹ orukpu lẹ ẹkpa-ishi ahụn rị elu Ugu ahụn gwa ụnụ ndị Izrẹlụ ile oku ndịnị; onwọnzini ihiẹn o buchen'ẹ. Ya ọ nọ de wẹ ye ibe ọmụma ẹbụọ, weye m.

²³ Ogẹn ụnụ gi nụ olu ahụn k'ọ gha imẹ ẹkpa-ishi a hanpụha, ogẹn ọkụn gi rị e nwun elu Ugu ahụn, ndị-ichẹn ebọn ụnụ ile lẹ ndị-isi ụnụ ile nọ bịa d'e kunrun m.

²⁴ Ụnụ nọ gha ọnụ wẹ sị, “Osolobuẹ wụ Chuku ẹnyi a ghọsịgụọ ẹnyi ọghọ a lẹ ikpẹn ẹ; ẹnyi a nụgụọzị olu ẹ rị a gha imẹ ọkụn a hanpụha. Ẹnyi a hụngụọ a nwan tannị nị ịhịan k'a s'ẹka rị ndụn, ọsụọn'a nị ya lẹ Osolobuẹ wị kutarị.

²⁵ “Nị ẹnyi nwụnhụn nwan? Okẹn ọkụnnị k'a dụnpụ ẹnyi! Ẹnyi nụkarị olu Osolobuẹ wụ Chuku ẹnyi ẹnịna, ẹnyi k'a nwụnhụnkwọ!

²⁶ Onyẹ nụtu olu Chuku hụn rị ndụn kẹ ọ gha imẹ ọkụn a hanpụha kẹ ẹnyi dọn nụ a, hụnyẹ nọ rị ndụn?!

²⁷ Dodo, nọkunmẹ nwan Uguni, n'i gọn ntịn ihiẹn ile Osolobuẹ wụ Chuku ẹnyi rị e ku. Omẹgụ y'a gwa ẹnyi ihiẹn ọwụlẹ ọ gwa ị, nị ẹnyi gọnghọ ntịn, mẹ ẹ.”

²⁸ Osolobuẹ a nụ kẹ ụnụ rị a gwa m'a, ọ nọ sị m, “A nụgụọ m ihiẹn ndịnị gwa ị. Ihiẹn ile wẹ ku hụghọ mma.

²⁹ K'o furu egun m a rịsọnmẹ wẹ nwan obi ẹnịna, e gi w'ẹ e mẹ ihiẹn ile m sị wẹ mẹ, n'ọ hụn ụzọ masịnị wẹ lẹ ụmụ wẹ jẹnrin-ejẹn.

³⁰ “Jẹnmẹ nwan, d'a sị wẹ lakinsọnmẹ ọdụ wẹ.

³¹ Yụ nwẹn, sọn m nọdị ebeni nị m gwa ị ihiẹn ile m chọ nị w'e mẹ, uhi lẹ iwu ile ị k'a kuzi wẹ, hụn w'e gi bi imẹ alị ahụn m rị e ye wẹ nị wẹ weri.”

³² Dọnrin ni nwan ẹnya mẹ ihiẹn Osolobuẹ wụ Chuku ụnụ sị ụnụ mẹ; akụyelẹ ni ẹka-nni mọbụ ẹka-ekpẹn;

³³ ghasọnmẹ ni ụzọ ile hụn Osolobuẹ wụ Chuku ụnụ sị ụnụ gha, kẹn'ọ masịnị ụnụ, ụnụ e nwọn isi-nka imẹ alị ahụn ụnụ k'e weri.