Ditrọnọmi 34 - Ika

Isi Nke Mmẹnọ Kwasị Ọgụn Ọnwụn Mozizi

¹ Ya Mozizi nọ gha alị aradan Mụabụ nyinrin Ugu-Nebo, shi Mkpọnụnụ Pisga, hụn rị nfetu Jẹriko. Osolobuẹ nọ gha ebahụn ghọsịchanrịn a alị ahụn, gha Gilẹdị d'e ru Danị;

² alị Naf'tali ile, ẹgbẹrẹ Ifrem lẹ Manasẹ, alị Juda ile d'a pụkwọrị Ohimin Mẹditerenia hụn rị ẹbamịn ọdịdan ẹnyanwụn;

³ atụ Nẹgẹvụ lẹ ẹgbẹrẹ Ọdanmgbugbu rị ihun Jẹriko, obodo hụ nkụ jun, d'e rukwọrị Zụa.

⁴ Ya Osolobuẹ nọ sị a, “Ọnwan wụ alị ahụn m kun enwẹn m kwe Ebraham, Aziki lẹ Jekọpụ nkwa, ogẹn m gi sị, ‘M k'e ye ụmụ ị ya.’ A nịgụọ m'ị hụn a, kanị y'e fetukọ d'a banye ẹ.”

⁵ Ya Mozizi wụ odibo Osolobuẹ nọ nwụntọ alị Mụabụ ebẹhụ kẹ Osolobuẹ dọn ku.

⁶ O li ẹ tọ Mụabụ, imẹ ọdanmgbugbu rị nchetarị ihun Bẹt-Pioru, kanị onwọnkwọnị nwan onyẹ marịn ebe o liye ẹ d'e ru tannị.

⁷ Mozizi rị nwa ahụa ọgụn isin k'ọ nwụn, kanị ọ kayeni ẹnya, ndụn agụn'a.

⁸ Ndị Izrẹlụ nọ gi akp'ọhịn iri kwasị ọgụn kwan Mozizi imẹ aradan Mụabụ, kwan a ọrọgbọ wẹ gi a kwan ozun.

Ihiẹn Wẹ Gi A Nyanhan Mozizi

⁹ Mmọn amamihiẹn jun imẹ Joshụa nwa Nọnụ, makẹni Mozizi e bugụọ ẹka kwasị a. Ya ndị Izrẹlụ nọ gọnmẹ ẹ ntịn, e mẹ ihiẹn ndị ahụn Osolobuẹ gwa Mozizi.

¹⁰ O ke nwọnzi onyẹ-amụma nọ kẹ Mozizi imẹ Izrẹlụ, hụn ya lẹ Osolobuẹ e mẹ ihiẹn elee-m elee-i,

¹¹ hụn rụn ihiẹn-nghọsị ndị hụ ile lẹ ọrụn-atụmẹnya ndị ahụn ile Osolobuẹ zi ẹ rụn imẹ alị Ijiptu, ihiẹn ndị ahụn ọ sị a mẹ Fẹro lẹ ịhaịmẹ ẹ lẹ alị a ile.

¹² Makẹni onwọnni onyẹ ghọsịtu ikẹn ahụn hi-ogbe mọbụ rụn ọrụn atụmẹnya ndị ahụn ile a tụ egun Mozizi rụn idẹnya ndị Izrẹlụ ile.