Ditrọnọmi 33 - Ika

Isi Nke Mmẹtọ Kwasị Ọgụn Ngọzi Mozizi Gọzi Ndị Izrẹlụ

¹ Ọnwan wụ ngọzi Mozizi wụ odibo Osolobuẹ gọzisọnmẹ ndị Izrẹlụ n'o d'a nwụn.

² Ọ sị: “Osolobuẹ gha Ugu Saịnaị bịa; Ugu Sẹẹ k'ọ gha tikpu ndị nke ẹ rịkẹ ebe eki nọ fọn; Ugu-Paranị kẹ ọghọ a gha nwunpụha. Ịya lẹ ndị-nsọ a nnụ ole-lẹ-ole wị gha azụụn ndịdan-mirin bịa; nkpọtu ugu Osolobuẹ kẹ wẹ gha bịa.

Ijẹn Osolobuẹ Bịanị Izrẹlụ

³ Eziẹ, ịyụ nwọn ihiẹn ọsụsụọ ndị nke i; ndị nsọ ile rị ị ẹka. Ụkụ ị kẹ wẹ ile a bịa d'e e gbu osekpu, oku i kẹ wẹ gi e dọn —

⁴ iwu ahụn Mozizi ye ẹnyi, ukuu ndị nke Jekọpụ.

⁵ Osolobuẹ họnrin eze Jẹshurunu, eze Izrẹlụ hụn o mẹ kụrụ ọtọ. Ogẹn ndị-ndu wẹ gi zugbama, wẹ lẹ ebọn ile rị Izrẹlụ.

Ngọzi Mozizi Gọzi Ebọn Izrẹlụ Ichẹn-ichẹn Rubẹni

⁶ “Rubẹni ya rị ndụn, y'a nwụnlẹ, kẹ ndị ebọn ẹ mẹhanlẹ ẹkẹrẹ.”

Juda

⁷ Nke Juda, Mozizi sị: “Euu, Osolobuẹ, nụkwọ ẹkwan Juda; y'e yen'ẹ ẹka lụaburu ndị nke ẹ. Ọ lụgụọnị enwẹn ẹ ọgụn; dodo, yen'ẹ ẹka lụsọn ndị-iṅẹnrẹn ẹ ọgụn!”

Livaị

⁸ Nke Livaị, ọ sị: “Osolobuẹ, Utẹn i hụn wụ Tumim lẹ Urim wụ nke onyẹ hụn i mẹ ọhụnma ye ẹ. Masa k'i nọ lele ẹ, mirin Mẹriba kẹ ịyụ lẹ ịya nọ dọ.

⁹ Ọ nọ ku oku nẹdi ẹ lẹ nnẹ ẹ, sị, ‘Etukọ m wẹ.’ O tukwọnị umunẹ ẹ, o ledẹni ụmụ a ẹnya ihun; kama e kwọnkẹnmẹ wẹ oku-ọnụ ị, e chemẹ wẹ Iwu i, nkwerigbama ị.

¹⁰ Ọ rị nwan a kuzi ebọn Jekọpụ ụzọ ị, a kuzi Izrẹlụ iwu i. Ọ chụnyesọnmẹ n'i ẹjan nsẹnsi, a chụnyen'i ẹjan w'a dụn ọkụn elu ukpo nchụn-ẹjan ị.

¹¹ Euu, Osolobuẹ, dodo gọzi ẹ imẹ ihiẹn ile ọ ma mẹ, ya nị ọrụn-ẹka a sụọ ị ụsụọ. Kpagichanrịn ogelemazụụn ndị ile a lụsọn ẹ ọgụn lẹ ndị ize ẹ e ze makẹ wẹ ghazị e lihi ọtọ.”

Bẹnjamini

¹² Nke Bẹnjamini, Mozizi sị, “Onyẹ Osolobuẹ gi e mẹ ẹhụ jẹnkọ d'e bi udọn lẹ ndọnkwa, makẹni o k'e chemẹ ẹ uhinhin lẹ efinaị; obi kẹ Osolobuẹ a pa onyẹ ihiẹn ẹ a sụọ a.”

Josẹfụ

¹³ Nke Josẹfụ, Mozizi sị, “Osolobuẹ ya gọzi alị Josẹfụ, ngọzi okẹn-oyiye wụ mirin igwere, lẹ mirin rị imẹ alị;

¹⁴ ngọzi kachanrịn mma anwụn a mụpụha lẹ ngọzi kachanrịn mma ifọn e tipụha;

¹⁵ ngọzi kachanrịn mma ugu ndị rị ẹdẹi e ye lẹ mkpụrụ kachanrịn mma elu-òke ndị rị ẹdẹi a mị;

¹⁶ ya ye ẹ ihiẹn kachanrịn mma hụn alị lẹ ihiẹn rịn'a e ye lẹ ọhụnma Onyẹ ahụn rị akụ-ọfịa ahụn rị e nwun ọkụn. Ngọzi ndịnị ile ya d'a nọkwasị Josẹfụ isi, ya nọkwasị etintin isi onyẹ hụ wẹ dọnmẹ ichẹn imẹ umunẹ ẹ.

¹⁷ Ọghọ rị a ẹhụ nọkẹ okẹn-efin ibuzọ, okẹn-efin ibuzọ nnẹ-efin mụ; mpịn a wụ mpịn efin-ọfịa rị a lụ ọgụn. O k'e gi wẹ lụsọn alị ichẹn-ichẹn ọgụn, d'e rudẹ ndị rị ebe ụwa ru. Ọhụn wụ okeri ẹbozo Josẹfụ: kẹ nnụ-uku iri nnụ-uku iri Ifrem mụ kẹ nnụ-uku nnụ-uku Manasẹ mụ.”

Zẹbulọnụ Lẹ Isaka

¹⁸ Nke Zẹbulọnụ, Mozizi sị, “Zẹbulọnụ, ihiẹn ịghọghọ jẹnkọ d'e sọn i ijẹn i. Nke i, Isaka, ihiẹn ịghọghọ jẹnkọ d'e sọn i iwe i.

¹⁹ Wẹ k'a kpọgbama ndị alị ichẹn-ichẹn ye elu ugu, nọ ebahụn chụnyesọnmẹ ẹjan rị mma ẹnya Osolobuẹ; wẹ k'e ri ihiẹn ndị ahụn bu ọda ohimin e ye, ihiẹn w'a chọ achọ hụn jun mkpẹnrẹn ohimin.”

Gadị

²⁰ Nke Gadị, Mozizi sị, “Ọjịja-mma ya rịnị onyẹ ahụn e weshịa alị Gadị! Gadị jẹnkọ d'e bi kẹ ẹwọrọ ebẹhụ, a tabepụsọnmẹ ẹka lẹ akpụkpọ-isi.

²¹ Alị kachanrịn mma k'ọ họrị; hụn ru onyẹ-isi kẹ wẹ latọn'a. Ogẹn ndị-isi Izrẹlụ gi zu, ọ nọ mẹ ihiẹn ahụn furuni Osolobuẹ chọ, dọnmẹ iwu Osolobuẹ yesọnmẹ Izrẹlụ.”

Danị

²² Nke Danị, Mozizi sị, “Danị nọ kẹ okoro ẹwọrọ, hụn gha Bashanị a tụpụha a maye wẹ.”

Naf'tali

²³ Nke Naf'tali, Mozizi sị, “Ọhụnma Osolobuẹ jun i ẹhụ, Naf'tali, ngọzi-ngọzi k'o gi e sọn i; weri alị ẹbamịn ndịdan-mirin d'e ru mirin Galili.”

Asha

²⁴ Nke ebọn Asha, Mozizi sị, “Asha kẹ wẹ kachanrịn a gọzi imẹ umunẹ ẹ ikẹnnyẹ; umunẹ wẹ gikwọ ẹnya rị mma lee ẹ; ya gi udẹn-olivu chan ụkụ.

²⁵ Igwe-igwe kẹ w'e gi fidọn ọnụ-mgbọn i, kẹ igwe mmaka kẹ igwe-bronzu; ndụn k'a rịferi i y'e we nwụn.

²⁶ Onwọnni onyẹ rịkẹ Chuku Jẹshurunu, Chuku Izrẹlụ, hụn e nyinhẹn orukpu igwere rịkẹ ẹshin d'e yeni ụnụ ẹka, onyẹ hụn ikpẹn eze jun ẹhụ k'o nyinla orukpu.

²⁷ Chuku rị ẹdẹi wụ igungun, ẹka itẹbitẹ ẹ hụ okpuru. O k'a chụpụnị ụnụ ndị iṅẹnrẹn ụnụ, a sị, ‘Tikpọ a!’

²⁸ Izrẹlụ e bi udọn lẹ ndọnkwa; Izrẹlụ, isi-mirin hụn Jekọpụ mụpụha, e bi alị ọka lẹ manya ọhụn jun, alị hụn igwere e ziẹnye igirigi.

²⁹ Osolobuẹ a gọzikẹkwọ ị, Izrẹlụ! Onyẹ nọzị nwan kẹ ụnụ, ndị Osolobuẹ zụọpụha? Ịya wụ akpaịn ụnụ lẹ Onyẹ-eyemẹka ụnụ, lẹ okẹn ọpịa-agha ụnụ. Ndị iṅẹnrẹn ụnụ jẹnkọ d'a manị ụnụ piripiri; ụnụ jẹnkọ d'a zọkpụkpọ ebe ile wẹ gi dọn ẹnya.”