Ditrọnọmi 32 - Ika

Isi Nke Mmẹbụọ Kwasị Ọgụn

¹ Igwere, gọn ntịn nị m ku; elu-ụwa, nụ oku-ọnụ m.

² Nkuzi m jẹnkọ nwan d'e zue kẹ mirin, oku-ọnụ m jẹnkọ d'e ziẹn kẹ igirigi, nọkẹ mbụmbụ-mirin bụye elu irurue ọhụn, nọkẹ ezigbo mirin zueye elu ihiẹn pu nke ọhụn.

³ Makẹni m jẹnkọ d'a ja ẹfan Osolobuẹ mma. Ku n'ẹ nị Osolobuẹ ẹnyi e hikẹ ogbe!

⁴ Ịya wụ Ọmụma; ọrụn a zuchanrịn oke, ụzọ a ile zin ezin. Chuku furu wẹ gi e dọn ẹnya k'ọ wụ, hụn ghalẹni e mẹfie; Onyẹ rị mma lẹ Onyẹ kụrụ ọtọ k'ọ wụ.

⁵ Kanị, ndị nke ẹ e mẹgụọ a arụ, ifẹnrẹn ya mẹgbu wẹ makẹni ẹlẹ wẹ ezigbo ụmụ a; agbọ rụnị, zinlẹni kẹ wẹ wụ.

⁶ Ẹnịna kẹ ụnụ gi a kụ Osolobuẹ ụgwọ, ndị nzuzuni marịnlẹni ihiẹn?! Ẹlẹ ịya wụ Nẹdi ụnụ, Onyẹ hụn ke ụnụ, mẹmẹ ụnụ, kpụ ụnụ?

⁷ Nyanhan ogẹn mbụ; leban ẹnya ogẹn ndị mbụ; jụ nẹdi i — n'ọ gwaghọ ị, jụ ndị-ichẹn nị wẹ kọwaghọnị ị:

⁸ Ogẹn Onyẹ Ahụn Kachanrịnnị gi yesọnmẹ ndị alị rị ichẹn-ichẹn ihiẹn o ye wẹ, ogẹn o gi kebe ịhịan ile, o keyesọnmẹ alị ile rị ichẹn-ichẹn ebe o keye wẹ — kẹ ụmụ Osolobuẹ han.

⁹ Kanị, hụn Osolobuẹ lẹ enwẹn ẹ keri wụ ndị nke ẹ, ndị Izrẹlụ, Jekọpụ lẹ ụmụ a wụ ukuu ẹ.

¹⁰ Alị ịhịan rịlẹni k'ọ nọ hụn a, alị gbachanrịn okpokoro, alị ufere nọ a zụn okẹn-ụzụn. Ọ nọ chemẹ ẹ, lepụ a ẹnya; o gbọnhunmẹ ẹ nọkẹ nwa-ẹnya a,

¹¹ Kẹ ugọn dọn e mẹhunmẹ ẹkụ a n'o zin ụmụ a ufe, ẹrịra kẹ Osolobuẹ mẹ ẹ: e fehunmẹ elu wẹ, e gi nku ọ shịapụ a ghọdọn wẹ, e bu wẹ.

¹² Osolobuẹ sụọ du Jekọpụ, onwọnni mmọn-lẹ-iyi dun'ẹ.

¹³ Ọ nọ mẹ ẹ sa ẹka ghasọnmẹ ebe kachanrịn elu e jẹn, gi ihiẹn rị ọfịa yejun ẹ ẹfọ. O gi mirin-ẹnwụn gha imẹ ọmụma pụha zụn a lẹ ofugbọn-olivu gha ọmụma zegbu enwẹn ẹ pụha ọmụma hụn rị ebe jọgbudẹ enwẹn ẹ,

¹⁴ wẹ lẹ mirin-ẹran anụ hụn kpụkpụrụnị lẹ mirin-ẹran anụ hụn kpụkpụrụlẹni — nke efin lẹ nke atụnrụn lẹ nke ewu; o gizi ụmụ atụnrụn lẹ ewu wẹ zụntọ lẹ ebulu Bashanị rị mma lẹ mkpụrụ ọka-witi rị mma. Ụnụ a razịghọ mirin vaịnị rị a gbọ ụfọfọ.

¹⁵ Kanị Jẹshurunu ẹ hụn wụ Izrẹlụ hụn o mẹ kụrụ ọtọ, e tutu, nupụma isi; o rijun ẹfọ, a nyịn, e dẹn. Ọ la Chuku mẹmẹn'ẹ tọ, jụ Ọmụma hụn a zụọpụhan'a tọ.

¹⁶ E gi wẹ ife mmọn-lẹ-iyi mẹ ẹnya fụma a, gi ihiẹn ndị ahụn rụnị wẹ kpụ kpasu ẹ iwe.

¹⁷ A chụnyeni wẹ eje-mmọn ẹjan, eje-mmọn wụlẹni Chuku — mmọn-lẹ-iyi ndị wẹ marịnlẹni, mmọn-lẹ-iyi ndị ahụn pụhahụ ikpanzụụnnị, mmọn-lẹ-iyi ndị nẹdi ụnụ gbayelẹni.

¹⁸ Ụnụ a la Ọmụma ahụn tọ — Ọmụma ahụn hụn mẹni ụnụ kẹ nẹdi; ụnụ a zọ Chuku, Onyẹ hụn mụnị ụnụ.

¹⁹ Osolobuẹ a hụn ihiẹnni, jụ wẹ tọ — makẹni ụmụ a ikẹnnyẹ lẹ ikpoho kpasu ẹ iwe.

²⁰ Ọ sị, “M k'e bupụ wẹ ihun, nị m hụn kẹ w'a dọn ban ihiẹn; makẹni agbọ isi-ikẹn kẹ wẹ wụ, ụmụ furulẹni w'e gi dọn ẹnya.

²¹ E gigụọ wẹ ihiẹn ahụn wụlẹni Chuku mẹ ẹnya fụma m, gi ihiẹn nwọnlẹni isi wẹ kpụ kpasu m iwe. M k'e gi ndị wụlẹni ihiẹn ọwụlẹ mẹ ẹnya fụma wẹ; m k'e gi alị nwọnlẹni nghọta kpasu wẹ iwe.

²² Makẹni ọnụma m a mụyeọlẹ ọkụn, hụn a dụnrudẹ alị mmọn. O k'a dụnpụ ụwa lẹ mkpụrụ ọ mị, dụnrudẹ ebe ugu ile gha suepụha.

²³ M k'e bu elumelu ihiẹn-ikẹn kwasị wẹ, tụchanrịn wẹ obo m ile.

²⁴ M k'e zihẹni wẹ eje-ụnwụn hụn e wiwi ihiẹn, emu e rikpọ ịhịan ẹhụ lẹ eje-emu e gbuni. M k'e zijẹnni wẹ eje-anụ eze tụ nkọ, agwọ nwọnsọnmẹ eje-ẹdide.

²⁵ Ọpịa-agha k'a nọ ogbe a napụ wẹ ụmụ wẹ, egun e kwọn wẹ imẹ ụlọ a tụgbu wẹ. Ikorọbịa lẹ ịgbagba k'a nwụnla iwi — kẹ ụmụ-mkpodu kẹ ndị ẹgẹdi isi-ẹwọ.

²⁶ M te sị nị m k'e feyịya wẹ, kpọnchanpụ wẹ, ịhịan anyanhankọzị wẹ.

²⁷ Kanị egun ẹmụ ndị-iṅẹnrẹn anịnị m, amamgbe ndị iwe a ghọtafie, sị, ‘Ẹka ẹnyi e mẹriọlẹ, ẹlẹkwọ Osolobuẹ mẹ hụnnị ile.’ ”

²⁸ Wẹ wụ alị nwọnlẹni uche, enwọn wẹ nghọta.

²⁹ K'ọ rị m wẹ nwọn uche hụn w'e gi ghọta ihiẹnni, marịn ihiẹn jẹnkọ d'e mẹ wẹ:

³⁰ Nanị kẹ onyẹ ohu dọn s'ẹka chụ ndị Izrẹlụ ọgụn-iri kwasị nnụnaị ọsọ, mmadụ ẹbụọ a han mmadụ nnụ-uku iri wẹ gbama ọsọ — mmanị Onyẹ wụ Ọmụma wẹ e regụọ wẹ, mmanị Osolobuẹ e wegụọ wẹ ye wẹ mẹri.

³¹ Ẹghẹẹ, makẹni ọmụma wẹ gi dọn ẹnya anọnị kẹ Ọmụma ẹnyi, kẹ uwẹ wụ ndị-iṅẹnrẹn ẹnyi a marịngụọ.

³² Vaịnị eje-alị Sodọm mẹ kẹ wẹ wụ, vaịnị ugbo eje-alị wụ Gomora; Ogbe wẹ wụ nshi-nshi, ọhịọ wẹ e lu ilu.

³³ Manya wẹ wụ ẹdide agwọ, eje-ẹdide owu.

³⁴ E bugụọnị m ihiẹn ndịnị tọnị wẹ ihun, kpọkin wẹ ye ebe m'e dọnmẹ ihiẹn?

³⁵ Mmẹ nwọn mẹgwarị; m k'a kụ wẹ ụgwọ ihiẹn wẹ mẹ. O ru ogẹn hụ, ụkụ wẹ k'e kpori; ụhụọhịn w'e gi tikpọ wẹ a rịgụọ nsue, ọnwụn wẹ gbala ọsọ.

³⁶ Osolobuẹ k'a tụnnị ndị nke ẹ ụya, mẹ omikẹn idibo ẹ, ọ hụn a nị ndụn a gụgụọ wẹ, nị onwọnni onyẹ họdụnị — kẹ igbọn kẹ ndị nwọn enwẹn wẹ.

³⁷ O k'a sị, “Elebe mmọn-lẹ-iyi wẹ rị nwan, ọmụma nwẹn wẹ gbagbọnni?

³⁸ Mmọn-lẹ-iyi ndị nwẹn hụn ri ụtọrọ anụ ndị wẹ gi chụn ẹjan, ra manya wẹ gisọnmẹ ye oyiye-manya? Wẹ lihi nwan d'e yeni ụnụ ẹka! Wẹ d'e ye nwan ụnụ igungun!

³⁹ Lee n'ẹ nwan, nị mmẹ lẹ enwẹn m rọ! Wezụka m onwọnni Chuku rịnị. Mmẹ e gbu, mmẹ e ye ndụn; Mmẹ a rụ ịhịan ẹhụ, mmẹ a zụọ ịhịan; onwọnni onyẹ a s'ẹka a napụ m ihiẹn m kwọndọn.

⁴⁰ M rị nwan e bu ẹka e zinmẹ igwere, a sị: Ebe m rị ndụn jẹnrin-ejẹn,

⁴¹ ogẹn m'e gi sụọnchanpụgụ ọpịa-agha m hụn e be nwanran-nwanran, kwọndọn ẹ hụn m'e gi mẹ wẹ ihiẹn wẹ chọ, m k'e mẹgwarị ndị-iṅẹnrẹn m; m k'a kụ ndị ize m e ze ụgwọ ihiẹn w'e mẹ.

⁴² M k'e mẹ ọbara ụta m rajun ẹdeke ẹfọ. Ọpịa-agha m e ri uru: ẹdeke ndị wẹ gbu lẹ ndị wẹ kwọndọn, isi ndị-ndu ndị-iṅẹnrẹn.”

⁴³ Alị ndị ọzọ rị ichẹn-ichẹn, sọn ni ndị nke ẹ ghọghọ, makẹni o jẹnkọ d'e mẹgwarị ndị gbu idibo ẹ; o jẹnkọ d'e mẹgwarị ndị-iṅẹnrẹn ẹ, mẹ ihiẹn gi gbarị alị a lẹ ndị nke ẹ.

⁴⁴ Ya Mozizi lẹ Joshụa nwa Nọnụ nọ bịa d'a gwachanrịn wẹ oku ile rị ẹbụnị.

⁴⁵ Ogẹn Mozizi gi gwachanrịngụ ndị Izrẹlụ ile okuni ile,

⁴⁶ ọ nọ sị wẹ, “Bucharịnkwọ nị okuni ile m rị e ku tannị e kushi ikẹn che obi, nị ụnụ gwa ụmụ ụnụ dọnrin ẹnya sọnchanrịn oku ile rị imẹ iwuni.

⁴⁷ Ẹlẹkwọ wẹ oku mmaka kaka: ndụn ụnụ kẹ wẹ wụ. Uwẹ kẹ ụnụ e gi tọ imẹ alị ahụn ụnụ fetukọ iyi Jọdanị d'e weri.”

Olegha Kẹ Mozizi K'e Leghahụ Alị Kenaanị

⁴⁸ Ụhụọhịn ohu ahụn kẹ Osolobuẹ sị Mozizi,

⁴⁹ “Shi elu ugu Abarim ndịnị, y'e nyinrin Ugu Nebo rịn'a hụn rị alị Mụabụ, nfetu obodo Jẹriko, d'e legha Kenaanị, alị ahụn m rị e ye ndị Izrẹlụ n'ọ wụrụ ukuu wẹ.

⁵⁰ Elu Ugu ahụn i k'e nyinrin kẹ y'a nwụntọ laburu ndị nke i, nọkẹ kẹ Ẹrọnụ nwẹnẹ i dọn nwụntọ Ugu Họ laburu ndị nke ẹ.

⁵¹ Ẹrịra k'ọ rị makẹni ụnụ ẹbụọ latọ ihiẹn m ku d'e mẹ nke ụnụ idẹnya ndị Izrẹlụ ebahụn mirin nọ pụha imẹ Mẹriba-Kadẹshi hụn rị atụ Zini, ụnụ aghọsịzịkwọnị ndị Izrẹlụ nị m rị nsọ.

⁵² I jẹnkọ nwan d'a ghahụ ebe teni lecheni alị ahụn; y'a banyekọ alị ahụn m rị e ye ndị Izrẹlụ.”