Ditrọnọmi 31 - Ika

Isi Nke Mmanaị Kwasị Ọgụn Joshụa K'a Nọkin Ẹnya Mozizi

¹ Ya Mozizi nọ pụha d'a gwa ndị Izrẹlụ ile oku:

² ọ sị wẹ, “M rị nwan nwa ahụa ọgụn-isin, asazị m ẹka du ụnụ. Osolobuẹ a sịgụọ m, ‘Y'e fetukọ Iyi-Jọdanị.’

³ Osolobuẹ wụ Chuku ụnụ lẹ enwẹn ẹ sikọ d'e buruni ụnụ ụzọ, ụnụ fetukọnị. O k'e tikpọnị ụnụ ndị alị ndịnị, ụnụ e weri alị wẹ. Joshụa nkẹ k'e buruzikwọnị ụnụ ụzọ, we ụnụ fetu, kẹ Osolobuẹ dọn ku.

⁴ Osolobuẹ k'e mẹ wẹ ihiẹn o mẹ Sihọnụ lẹ Ọgụ ndị-nze Amọ, hụn o tikpọ wẹ lẹ alị wẹ.

⁵ Osolobuẹ k'e we wẹ ye ụnụ mẹri. Mẹkwọ nị wẹ ihiẹn ile m gwa ụnụ.

⁶ Kakẹnmẹ ni; rikin ni obi! Atụlẹ ni egun, amalẹ ni ni piripiri, makẹni ụnụ lẹ Osolobuẹ wụ Chuku ụnụ wị jẹnkọ, ọ hapụkọ ụnụ mọbụ la ụnụ tọ.”

⁷ Mozizi nọ kpọ Joshụa, nọ idẹnya ndị Izrẹlụ ile sị a, “Kakẹnmẹ; rikin obi, nị ịyụ jẹnkọ d'e duban ndịnị alị ahụn Osolobuẹ kun enwẹn ẹ gwa ndị nẹdi wẹ kanị n'o k'e ye wẹ, i k'e kezikwọnị wẹ ya n'ọ wụrụ ukuu wẹ.

⁸ Osolobuẹ lẹ enwẹn ẹ k'e buruni ụnụ ụzọ; o k'a nọyeni ụnụ; ọ hapụkọ ị mọbụ la ị tọ. Atụlẹ egun; anịlẹ ndụn gụ ị.”

Ịgụnpụhanị Ịhịan Ile Iwu Ahụa ẹsa-ẹsa

⁹ Ya Mozizi nọ detu iwuni, w'ẹ ye ndị nchụn-ẹjan, ụmụ Livaị, ndị e bu Ẹkpẹti-nkwerigbama Osolobuẹ, uwẹ lẹ ndị ichẹn Izrẹlụ ile k'o w'ẹ ye.

¹⁰ Mozizi nọ sị wẹ, “Njẹndemẹ ahụa ẹsa ọwụlẹ, ahụa hụ wẹ gi a kagbu ụgwọ, o ru ogẹn Mmẹmmẹ Ibi imẹ Ọdụ ahụa hụ,

¹¹ ebe ndị Izrẹlụ ile zu ihun Osolobuẹ wụ Chuku ụnụ ebahụn o k'a họrị, ụnụ sikọ d'a gụnnị wẹ Iwuni — gụn a hụn wẹ ile a nụ.

¹² Ịhịan ile kẹ ụnụ sikọ d'a kpọkikomẹ: kẹ ikẹnnyẹ kẹ ikpoho kẹ ụmụ-ndu kẹ abịamabịa ndị bi imẹ obodo rịsọnmẹ alị ụnụ, kẹni onyẹ ọwụlẹ hụn ụzọ nụ a, mụrụn ịtụ-egun Osolobuẹ wụ Chuku ụnụ, dọnrin ẹnya e sọn oku ile rị imẹ iwuni.

¹³ Ogẹn ahụn, ụmụ wẹ marịnlẹni iwuni a nụ a, a mụrụn wẹ ịtụ-egun Osolobuẹ wụ Chuku ụnụ ụnụ e we nwụn, imẹ alị ahụn ụnụ fetukọ Iyi Jọdanị d'e weri.”

Osolobuẹ E Tumẹ Joshụa

¹⁴ Osolobuẹ nọ sị Mozizi, “Ogẹn y'e gi nwụn e rugụọ. Kpọ Joshụa, ụnụ a bịa Ọdụ-ozuzu kẹni m nọ ebahụn ha ọrụn ye ẹ ẹka.” Ya Mozizi lẹ Joshụa nọ bịa Ọdụ-ozuzu kẹ Osolobuẹ dọn gwa wẹ.

¹⁵ Osolobuẹ nọ họnrin orukpu mawuruni, pụha, ọ nọdị imẹ elu ọnụmụzọ Ọdụ hụ.

¹⁶ Osolobuẹ nọ sị Mozizi, “Y'e d'a nwụnhụn laburu ndị nẹdi i wẹ. Ị pụgụ, o biekọ ndịnị e we enwẹn wẹ ye kẹ ịgbaraja, kwamanị mmọn-lẹ-iyi alị ahụn wẹ banyekọ. Wẹ jẹnkọ d'a la m tọ, tikpọ Iwu m hụn kwọngbama mmẹ lẹ wẹ.

¹⁷ Wẹ mẹ ẹ, m k'e gi olulu sọn wẹ, la wẹ tọ; m k'e bupụ wẹ ihun, e tikpọ wẹ wẹ. Ihiẹn-ikẹn lẹ nsọngbu ichẹn-ichẹn jẹnkọ d'a bịanị wẹ. O ru ogẹn ahụn, a jụma wẹ, ‘Osolobuẹ a lagụọnị ẹnyi tọ haịn ihiẹn-ikẹn ndịnị gi bịanị ẹnyi ra?’

¹⁸ Kanị o ru, efeyekọ m ẹnya yeni eje-ihiẹn ile wẹ mẹ ebe wẹ nọ sọnmẹ mmọn-lẹ-iyi.

¹⁹ “Detu ni nwan ẹbụnị, ụnụ a kuzi ndị Izrẹlụ ya, mẹ wẹ bụ a, kẹn'ọ shịagbuni m wẹ ẹri ụhụọhịn ahụn.

²⁰ M webangụ wẹ alị ahụn mirin-ẹran anụ lẹ mirin-ẹnwụn jun, e hu, alị hụ m kun enwẹn m kwe ndị nẹdi wẹ kanị nkwa nị m k'e ye wẹ; wẹ rijungụ ẹfọ, du, wẹ jẹnkọ d'e sọnmẹ mmọn-lẹ-iyi, fe wẹ, la m tọ, tikpọ Iwu m gi kwọngbama mmẹ lẹ wẹ.

²¹ Ogẹn ihiẹn-ikẹn lẹ nsọngbu bu ọda e gi bịanị wẹ, ẹbụnị k'a shịagbu wẹ ẹri, makẹni ụmụ wẹ azọk'a. A marịnghọ m kẹ wẹ nọ, kẹ hụnnị m kelẹni weban wẹ alị hụ m kun enwẹn m kwe wẹ nkwa a.”

²² Ụhụọhịn ahụn daị, Mozizi nọ detu ẹbụ hụ, kuzi ndị Izrẹlụ ya.

²³ Osolobuẹ nọ tumẹ Joshụa nwa Nọnụ, sị a, “Kakẹnmẹ; rikin obi; makẹni ịyụ sikọ d'e weban ndị Izrẹlụ alị ahụn m kun enwẹn m kwe wẹ nkwa a; mmẹ lẹ enwẹn m k'a nọyeni i.”

²⁴ Ogẹn Mozizi gi dechanrịngụ oku ile rị imẹ Iwu hụ gha mbidọn d'e ru njẹndemẹ ẹ ye ẹhụhụọ,

²⁵ ọ nọ sị ndị Livaị hụn e bu Ẹkpẹti-nkwerigbama Osolobuẹ,

²⁶ “We ni Ẹhụhụọ Iwuni che ẹhụ Ẹkpẹti-nkwerigbama Osolobuẹ wụ Chuku ụnụ. O k'a rịsọnmẹ ebẹhụ a shịagbu ụnụ ẹri, omẹni ụnụ a la a tọ,

²⁷ makẹni a marịnghọ m kẹ ụnụ mẹhan ndị nnupụ-isi lẹ ndị isi-ikẹn. Ụnụ hụ e nupụnị Osolobuẹ isi ẹnịna hụnnị m rị ndụn, ọrịwụ m nwụnhụngụ!

²⁸ “Kpọkikomẹ ni ni m ndị-ichẹn lẹ ndị gi ọkwa ebọn ụnụ rị ichẹn-ichẹn, nị m hụn ụzọ ku oku ndịnị nị wẹ nụ, a kpọ m igwere lẹ ụwa ọshẹri, nị wẹ hụn ụzọ shịagbu wẹ ẹri o ru ogẹn ahụn.

²⁹ Makẹni, a marịnghọ m nị m nwụnhụngụ, nị ụnụ jẹnkọ d'a rụchanrịn, la ụzọ m sị ụnụ gha tọgbọ. O ru ihun, ihiẹn-ikẹn sikọ d'a bịanị ụnụ makẹni ụnụ jẹnkọ d'e mẹ ihiẹn rịlẹni mma ẹnya Osolobuẹ, gi ife-mmọn, ihiẹn ẹka ụnụ mẹmẹ, kpasu ẹ iwe.”

Ẹbụ Mozizi Gi Ku Oku Nnupụ-isi Lalanị

³⁰ Ya Mozizi nọ bụ ẹbụnị gha isi ẹ d'e ru njẹndemẹ ẹ, bụ a nị ndị Izrẹlụ ile nụ a: