Ditrọnọmi 30 - Ika

Isi Nke Iri Kwasị Ọgụn Ngọzi Ndị K'e Bihutọ Ẹka

¹ Mgbe ngọzi ndịnị ile m gwa ụnụ e gi rumẹ ụnụ ẹhụ, nị ọnụ-ẹsọn ndịnị ile m gwa ụnụ e kunrun ụnụ, ụnụ ro wẹ ebe ile Osolobuẹ feyịya ụnụ imẹ alị ndị ọzọ,

² nị ụnụ lẹ ụmụ ụnụ e gbehutọ buru Osolobuẹ wụ Chuku ụnụ, gi obi ụnụ ile lẹ umẹ-ndụn ụnụ ile mẹmẹ ihiẹn ile m gwa ụnụ tannị,

³ Osolobuẹ wụ Chuku ụnụ sikọ d'e mẹ ndị gini ụnụ hatu ụnụ, mẹ omikẹn ụnụ, gha alị ndị ọzọ ile ọ kpụnshi ụnụ welụa ụnụ.

⁴ Ọsụọkwọn'a nị alị kachanrịn e te elu-ụwa k'o te chụshi ụnụ, Osolobuẹ wụ Chuku ụnụ k'a gha ebahụn kokomẹ ụnụ wekinhẹn.

⁵ O k'e wẹhẹ ụnụ imẹ alị ahụn wụ nke ndị nẹdi ụnụ kanị, ụnụ e nwọnrinzi ẹ. O k'e mẹ ụnụ gha ihun, ba ụba, karị ndị nẹdi ụnụ kanị.

⁶ Osolobuẹ wụ Chuku ụnụ k'a kwa obi i lẹ obi ụmụ ị ugun, mẹ wẹ rị mma, n'ị hụn ụzọ gi obi i ile lẹ umẹ-ndụn ị ile lẹ ndụn ị ile nwọn ihiẹn-ọsụsụọ Osolobuẹ.

⁷ Osolobuẹ wụ Chuku ụnụ k'e bu ọnụ-ẹsọn ndịnị ile kwasị ndị-iṅẹnrẹn ụnụ hụn e we iwe ụnụ, e kpokpo ụnụ.

⁸ Ogẹn ahụn, ụnụ a gbayemẹzi Osolobuẹ, sọnmẹ iwu ẹ ile m rị e ye ụnụ tannị,

⁹ Osolobuẹ wụ Chuku ụnụ e mẹ ihiẹn ile ụnụ buche ẹka ghachanrịn ihun ọda-ọda, mẹ ụmụ ụnụ bu ọda, mẹ anụ ụnụ barahị, mẹ ihiẹn-ugbo ụnụ mẹ ọda-ọda, makẹni oku ụnụ k'a ghazị e ye Osolobuẹ anwịnrịn kẹ nke ndị nẹdi ụnụ kanị dọn ye ẹ anwịnrịn, o mẹ ụnụ gha ihun:

¹⁰ omẹkwọnị ụnụ a gbayeghọ Osolobuẹ wụ Chuku ụnụ, dọnmẹ iwu ẹ lẹ uhi ẹ hụn wẹ deye imẹ Ẹhụhụọ Iwuni, gi obi ụnụ ile lẹ umẹ-ndụn ụnụ ile gbehutọ sọnmẹzi Osolobuẹ wụ Chuku ụnụ.

Ihiẹn Osolobuẹ Sị Ẹnyi Mẹ Afụkakọ Ọrụn

¹¹ Ihiẹn m rị a gwa ụnụ tannị nị ya kẹ ụnụ k'e mẹ afụkakọ ụnụ ọrụn, o teni ebe ụnụ rị.

¹² Ẹlẹ elu-igwere k'ọ rị, hụn ụnụ e gi jụma, “Onyẹ jẹnkọ elu-igwere d'e wẹhẹ ẹ d'a gwa ẹnyi, kẹni ẹnyi mẹ ẹ?”

¹³ Ẹlẹ ọ rị nfetu Ohimin, hụn ụnụ e gi jụma, “Onyẹ k'e fetu ohimin d'e wẹhẹ ẹ d'a gwa ẹnyi, kẹni ẹnyi mẹ ẹ?”

¹⁴ Mba; oku-Osolobuẹ rị ụnụ nsue ọda-ọda, ọ hụ ụnụ ọnụ lẹ obi, kẹni ụnụ hụn ụzọ mẹ ẹ.

Imẹ Ọnwụn Lẹ Ndụn, Hanrịn Ohu

¹⁵ Lee n'ẹ, m rị e butọnị ụnụ ndụn lẹ aghamihun tannị, e butọzịnị ụnụ ọnwụn lẹ ntikpọ.

¹⁶ Makẹni, m rị a gwa ụnụ tannị nị ụnụ sikọ d'e nwọnrịrị ihiẹn-ọsụsụọ Osolobuẹ wụ Chuku ụnụ, e sọn ụzọ a, e mẹ ihiẹn ọ sị ụnụ mẹ, e sọn uhi ẹ lẹ iwu ẹ; ogẹn ahụn, ụnụ a rị ndụn, ba ụba, Osolobuẹ wụ Chuku ụnụ a gọzi ụnụ imẹ alị ahụn ụnụ banyekọ d'e weri.

¹⁷ Kanị obi i gha ebe Osolobuẹ rị pụ, y'a gbayezin'ẹ, nị a dọrị wẹ i d'a kpọmanị mmọn-lẹ-iyi isi alị, femẹ wẹ,

¹⁸ m rị a gwa ụnụ tannị nị wẹ k'e tikpọrịrị ụnụ; ụnụ ebibiekọ alị ahụn ụnụ fetukọ Iyi Jọdanị d'a banye, weri.

¹⁹ M ri a kpọ elu-igwee lẹ elu-ụwa ọshẹri tannị nị e butọgụọnị m ụnụ ndụn lẹ ọnwụn, ngọzi lẹ ọnụ-ẹsọn. Hanrịn nị nwan ndụn nị ụnụ lẹ ụmụ ụnụ hụn ụzọ rị ndụn

²⁰ lẹ ni ụnụ hụn ụzọ nwọn ihiẹn-ọsụsụọ Osolobuẹ wụ Chuku ụnụ, e gọn ẹ ntịn, kwọnkẹnmẹ ẹ. Makẹni Osolobuẹ wụ onyẹ e ye ụnụ ndụn, e mẹ isi e ru ụnụ ẹnyasị imẹ alị ahụn o kun enwẹn n'o k'e ye ndị nẹdi ụnụ kanị wụ Ebraham, Aziki lẹ Jekọpụ.