Ditrọnọmi 3 - Ika

Isi Nke Ẹtọ E Mẹri Wẹ Ọgụ Hụn Wụ Eze Bashanị

¹ Ẹnyi nọzị gbehutọ, ghashi ụzọ Bashanị hụn rị elu ugu. Ọgụ wụ eze Bashanị lẹ ndị agha a ile nọ rupụha d'a lụsọn ẹnyi agha imẹ Ẹdrẹi.

² Osolobuẹ nọ sị m, “Atụlẹ ni egun ẹ, makẹni e wegụọ m kẹ ịya kẹ ndị-agha a ile lẹ alị a ye ụnụ mẹri. Mẹn'ẹ ihiẹn ụnụ mẹ Sihọnụ eze Amọ nọ Hẹsh'bọnụ kị.”

³ Osolobuẹ wụ Chuku ẹnyi nọzị bu Ọgụ wụ eze Bashanị lẹ ndị-agha a ile che ẹnyi ẹka. Ẹnyi nọ gbu wẹ; ẹnyi egbuhọdụnị kaka akpụ onyẹ ohu.

⁴ Ogẹn ahụn kẹ ẹnyi gi werisọnmẹ obodo ile te rị okpuru Ọgụ. Onwọnni kaka akpụ obodo ohu ẹnyi latọnị wẹ imẹ obodo ọgụn-ẹtọ: kẹ ẹgbẹrẹ Agobu ile kẹ ebe ile rị alị-eze Bashanị eze wụ Ọgụ te kị.

⁵ Mgbọn ndị jẹngbu enwẹn wẹ elu kẹ wẹ gi gbọnhunmẹ obodo ndịnị, gi ẹhue higbu enwẹn wẹ ogbe yikinsọnmẹ ọnụ-mgbọn wẹ, fidọnsọnmẹ wẹ; ụmụ-alị bu ọda nwọnlẹni mgbọn rịsọnmẹzi ẹ.

⁶ Ẹnyi nọ tikpọchanrịn wẹ ru alị kẹ ẹnyi dọn mẹ Sihọnụ wụ eze Hẹsh'bọnụ, gbupụ ndị ile rịsọnmẹ obodo-obodo, kẹ ikẹnnyẹ kẹ ikpoho kẹ ụmụ-ẹka.

⁷ Kanị, ẹnyi kpụnrụnsọnmẹ anụ wẹ ile, kwarịsọnmẹ ihiẹn wẹ imẹ obodo ndịnị ẹnyi mẹri.

⁸ Ẹrịra kẹ ẹnyi dọn narịn ndị-nze Amọ ẹbụọnị alị ahụn ile rị ẹbamịn ọwụwa ẹnyanwụn Iyi Jọdanị: gha Iyi Anọnụ d'e rukwọrị Ugu-Hẹmọnụ.

⁹ (Siriọnụ kẹ ndị Sidọnụ a kpọ Hẹmọnụ; ndị Amọ a kpọ a Sẹnịru).

¹⁰ Ẹnyi e werizighọ obodo ile rị alị-aradan hụ rị elu ugu, werizi ẹgbẹrẹ Gilẹdị ile lẹ Bashanị ile d'e rukwọrị obodo ndị rị Salẹka lẹ Ẹdrẹi, hụn rịsọnmẹ alị-eze Bashanị hụn eze wụ Ọgụ te kị.

¹¹ (Ọgụ wụ eze Bashanị sụọ te họdụ imẹ ndị Rẹfa ile, ebọn adụn-aran hụ. Igwe kẹ wẹ gi mẹmẹ bẹdi ẹ — hụn suekarị ụbụkụ mmẹtọ, shịakarị ụbụkụ isin. Bẹdi ahụn hụkwọ nwan Raba, isi-obodo ndị Amọnụ.)

Kẹ Wẹ Dọn Ke Alị Bashanị Nfetu Iyi Jọdanị

¹² M nọ gha alị ndị ahụn ẹnyi weri ogẹn ahụn we azụụn sikọ ugu alị Arụa, ẹhụ Iyi udu-mirin Anọnụ, wecheni azụụn ohu imẹ alị rị ugu Gilẹdị lẹ obodo ndị rịsọnmẹn'ẹ, we wẹ ile ye ebọn Rubẹni lẹ ebọn Gadị.

¹³ M nọzị we hụn họdụ imẹ alị Gilẹdị hụ cheni Bashanị ile hụn eze wụ Ọgụ te kị ye mgbube ebọn Manasẹ. (W'a kpọ ẹgbẹrẹ Agobu ile rị Bashanị “alị ndị Rẹfa” mbụ.

¹⁴ Jaịrị onyẹ ẹbozo Manasẹ gi agha weri ẹgbẹrẹ Agobu ile d'e rukwọrị okẹn ndị Gẹshọ lẹ ndị Maaka. Ọ nọ gụn a ẹfan ya lẹ enwẹn ẹ, ịya kẹ wẹ gi a kpọ ẹgbẹrẹ Bashanị Ụmụ-alị Jaịrị d'e rukwọ tannị.)

¹⁵ Hụn m ye Makiri wụ Gilẹdị.

¹⁶ Nke ndị Rubẹni lẹ ndị Gadị, ẹgbẹrẹ ahụn gha Gilẹdị bidọn, jẹnsọnmẹ d'e ru Iyi udu-mirin Anọnụ ahụn etintinnaị, ghapụha d'e ru Iyi Jabọkụ ebe alị ndị Amọnụ ru.

¹⁷ Ebe o ru ru ẹbamịn ọdịdan-ẹnyanwụn a wụ Iyi Jọdanị hụn rị ẹgbẹrẹ Araba, gha mirin odiyiri Kinẹrẹti wụ Galili d'e ru Ohimin Nnu rị Araba (Ohimin-Nwụnnị), d'e ruzi ebe Ugu Pisga ru.

Ọnọdị Wẹ Gi Ye Wẹ Alị Ahụn

¹⁸ M gwa ụnụ ndị Rubẹni lẹ ndị Gadị lẹ mgbube Manasẹ hụn wẹ ile wị oku ogẹn ahụn, sị, “Osolobuẹ wụ Chuku ụnụ e yegụọ ụnụ alịnị weri. Kanị ndị ile ka ẹhụ imẹ ụnụ sikọ d'e kọnrinrịrị agha, buruni umunẹ ụnụ ndị Izrẹlụ họdụnị ụzọ, wẹ fetukọnị Iyini d'e werisọnmẹ alị nke wẹ.

¹⁹ Kanị inyẹnmẹ ụnụ lẹ ụmụ ụnụ nwọn ikẹn nọdịsọnmẹ imẹ obodo ndị ahụn m ye ụnụ, uwẹ lẹ anụ ụnụ, n'a marịnghọ m nị ụnụ nwọn anụ ọda-ọda.

²⁰ Osolobuẹ yegụ umunẹ ụnụ alị nke wẹ w'a nọ zu ikẹn k'o dọn ye ụnụ, nị wẹ nwẹn e werigụ alị hụn Osolobuẹ wụ Chuku rị e ye wẹ nfetu Jọdanị, onyẹ-onyẹ imẹ ụnụ nwọn nwan ikẹn kinhẹn ebeni m ye ụnụ.”

Osolobuẹ Ajụchanrịn Nị Mozizi Abanyekọ Alị Ahụn

²¹ A gwa m Joshụa ogẹn ahụn, sị a, “Ụnụ e gigụọ ẹnya ụnụ hụn ihiẹn ile Osolobuẹ wụ Chuku ụnụ mẹ ndị-nze ẹbụọnị. Ẹrịra kẹ Osolobuẹ k'e mẹ alị-eze ile rị ebahụn ụnụ jẹnkọ.

²² Atụlẹ ni egun wẹ; Osolobuẹ wụ Chuku ụnụ lẹ enwẹn ẹ k'a lụnị ụnụ ọgụn.”

²³ M nọ rịọ Osolobuẹ ogẹn ahụn, sị,

²⁴ “Euu, Osolobuẹ nwọn ihiẹn ile, y'a ghọsịmagụọ odibo i kẹ i hihan ogbe lẹ kẹ i zehan. Elee mmọn rị elu-igwere mọbụ elu-ụwa k'a s'ẹka mẹ ihiẹn ndị i mẹ mọbụ rụn ọrụn-atụmẹnya ndị ị rụn?

²⁵ Dodo, nị m nwan fetu d'a hụn alị ọma ahụn hụn rị nfetu Jọdanị, alị ọma ahụn rị elu òke lẹ ẹgbẹrẹ Lẹbanọnụ.”

²⁶ Kanị olulu m rị e bu Osolobuẹ ogẹn ahụn makẹ ufiri ụnụ, o gọndẹni m ntịn. Ọ sị, “Ọhụn e higụọ! Agwazịlẹ m oku ihiẹnni!

²⁷ Shi elu Ugu Pisga, y'a nọ ebẹhụ lehunmẹ ẹnya azụụn ile: ibẹka ndịdan-mirin lẹ ibẹka ugu, ibẹka ọwụwa ẹnyanwụn lẹ ibẹka ọdịdan ẹnyanwụn. Gi ẹnya ị lee alị ahụn, nị ẹlẹ i k'e fetu Iyi Jọdanị-nị.

²⁸ Kama, tumẹ Joshụa, y'a gba a umẹ, ku ikẹn ye ẹ obi, makẹni ịya k'e duru ndịnị fetu Iyi Jọdanị, mẹ wẹ weri alị ahụn ị jẹnkọ d'a hụn.”

²⁹ Ẹnyi nọ dịnọ ọdanmgbugbu nọkunmẹ Bẹt-Pioru ogẹn ahụn.