Ditrọnọmi 29 - Ika

Isi Nke Itenẹi Kwasị Ọgụn Ndị Izrẹlụ E Biyezi Ẹka Nkwerigbama Osolobuẹ

¹ Ndịnị wụ ihiẹn ndị rị imẹ iwu Osolobuẹ sị Mozizi ye ndị Izrẹlụ imẹ ẹgbẹrẹ Mụabụ, cheni hụn ọ nọ Ugu-Horẹbụ ye wẹ.

² Mozizi nọ kpọzu ndị Izrẹlụ ile, sị wẹ: Ụnụ e gigụọ ẹnya ụnụ hụn ihiẹn ile Osolobuẹ nọ Ijiptu mẹ eze Ijiptu wụ Fẹro lẹ ịhaịmẹ ẹ lẹ alị a ile.

³ Ụnụ e gigụọ ẹnya ụnụ hụn okẹn ihiẹn nlele ndị ahụn mẹni, ihiẹn-ahịma ndị ahụn a tụ ẹnya lẹ okẹn ahụnlele ndị ahụn.

⁴ Kanị Osolobuẹ eke yekwọ nwan ụnụ obi a ghọtanị mọbụ ẹnya e leghanị mọbụ ntịn a nụnị.

⁵ Ọrọgbọ ahụa ọgụnnaị m gi du ụnụ imẹ atụ, ẹkwa ụnụ avẹni, akpụkụ rị ụnụ ụkụ avẹni.

⁶ Ụnụ erini brẹdi, ụnụ aranị manya mọbụ ihiẹn ọwụlẹ wẹ bama abama. Wẹ ile mẹ kẹni ụnụ marịn nị mmẹ wụ Osolobuẹ wụ Chuku ụnụ.

⁷ Kẹ ụnụ ru ebeni, Sihọnụ wụ eze Hẹsh'bọnụ lẹ Ọgụ wụ eze Bashanị nọ pụha d'a maye ẹnyi ọgụn, kanị ẹnyi nọ mẹri wẹ.

⁸ Ẹnyi nọ weri alị wẹ, w'ẹ ye ebọn Rubẹni, ebọn Gadị lẹ mgbube ebọn Manasẹ n'ọ wụrụ ukuu wẹ.

⁹ Dọnrin ni nwan ẹnya sọn ihiẹn ndị rị imẹ Iwuni, nị ihiẹn ile ụnụ buche ẹka hụn ụzọ ghanị ụnụ.

¹⁰ Ụnụ ile wuzo nwan ihun Osolobuẹ wụ Chuku ụnụ tannị — kẹ ndị-ndu ebọn ụnụ kẹ ndị-ichẹn ụnụ, kẹ ndị gisọnmẹ ọkwa imẹ ụnụ, kẹ ikẹnnyẹ Izrẹlụ ile họdụnị,

¹¹ kẹ ụmụ-ẹka ụnụ kẹ inyẹnmẹ ụnụ lẹ itumunyẹ bisọnmẹ imẹ igunrun ụnụ, ndị hụn e gbuni ụnụ osisi lẹ ndị hụn a kpanị ụnụ nkụn lẹ ndị hụn a kwọnị ụnụ mirin.

¹² Ụnụ wuzo ebeni nị ụnụ hụn ụzọ kun ẹfan Osolobuẹ, kwe nkwa, nị ụnụ k'e dọnmẹ Iwu Osolobuẹ rị e gi e kwọngbama ụnụ lẹ ịya tannị,

¹³ gi ẹ ghọsịchanrịn tannị nị ụnụ wụ ndị nke ẹ, lẹni ya nwẹn wụ Chuku ụnụ, nọkẹ k'o dọn kwe ụnụ nkwa lẹ k'o dọn kun enwẹn ẹ gwa ndị nẹdi ụnụ wụ Ebraham, Aziki lẹ Jekọpụ.

¹⁴ Nkwerigbamanị m rị e tumẹ tannị lẹ nkwa rịn'a wẹ jẹnkọ e gi ẹfan Osolobuẹ kwe ẹlẹkwọ ẹgbata mmẹ lẹ ụnụ sụọ,

¹⁵ mba, kẹ ndị ẹnyi lẹ wẹ wuzo ebeni tannị ihun Osolobuẹ wụ Chuku ẹnyi kẹ ndị rịlẹni ebeni imẹ igunrun ẹnyi tannị.

Ihiẹn Inupụ-isi E buhẹ

¹⁶ Ụnụ lẹ enwẹn ụnụ a marịnghọ kẹ ẹnyi dọn bi imẹ alị Ijiptu lẹ kẹ ẹnyi dọn gha alị ndị ahụn ile ẹnyi ghafe d'e ru ebeni.

¹⁷ Ụnụ a hụnghọ ihiẹn ndị ahụn e ze ize wẹ kpụtọsọnmẹ lẹ mmọn ndị ahụn wẹ gi osisi pịn lẹ ndị wẹ gi ọmụma tụ, ndị wẹ gi siliva kpụ lẹ ndị wẹ gi goru kpụ.

¹⁸ Hụnkwọ n'a nị onwọnni okẹnnyẹ mọbụ okpoho mọbụ ẹbozo mọbụ ebọn ọwụlẹ rị imẹ igunrun ụnụ tannị obi ẹ gha ebe Osolobuẹ wụ Chuku ẹnyi rị pụ d'e femẹ mmọn-lẹ-iyi ndị alị ndị ahụn; hụnkwọ n'a nị onwọnni eje-mkpọgụn rị imẹ igunrun ụnụ a mị eje-mkpụrụ e lu ilu, e gbuni.

¹⁹ Onyẹ nọ ẹrịra nụ ihiẹn ndịnị wẹ rị e kun ẹfan Osolobuẹ e ku, ọ tụma enwẹn ẹ ntụ, sị, “Onwọnni ihiẹn k'e mẹni m, ọsụọn'a nị m gbasọnmẹ isi-akwanran.” Ọnwan k'e buhẹni alị Izrẹlụ ile ntikpọ, kẹ ndị rị mma kẹ ndị rịlẹni mma.

²⁰ Osolobuẹ e kwerikọ gbagharị onyẹ hụ, o k'e gi okẹn ọnụma a sọn onyẹ ahụn, ọnụ ile wẹ bụtọ imẹ ẹkụkwọnị k'e ru ẹ ẹhụ, Osolobuẹ k'e finchanpụ ẹfan hụnyẹ elu-ụwa.

²¹ Osolobuẹ k'a gha imẹ ebọn ile rị Izrẹlụ sepụha hụnyẹ d'e tikpọ a, mẹ ihiẹn wẹ ku ebe ile wẹ nọ bụtọ ọnụ imẹ Ẹkụkwọ Iwuni.

²² Ụmụ ụnụ ndị lala ogẹn ụnụ ghafegụ lẹ ndị itumunyẹ ghasọnmẹ ebe teni bịa sikọ d'a hụn nsọngbu kunrun alị ahụn lẹ emu Osolobuẹ tụ a.

²³ Alị ahụn ile sikọ d'a la iwi, họnrin alị nnu lẹ nsịn-ẹnyanwụn, alị e wiwi ihiẹn, alị wẹ ghalẹni a kụnye ihiẹn, ihiẹn ghalẹni e pu mọbụ e sue imẹ ẹ. O k'a nọ kẹ ntikpọ wẹ tikpọ alị Sodọm lẹ Gomora lẹ Adima lẹ Zẹbo, hụn Osolobuẹ gi okẹn-ọnụma a tikpọpụ.

²⁴ Ndị alị ile rị ụwa k'a rị a jụ, “Kị Osolobuẹ mẹni alịnị ihiẹnni?! Kị buhẹ okẹn-ọnụmanị a dụn kẹ ọkụn?!”

²⁵ Azịza k'a wụ: “Makẹni ndịnị latọ Iwu Osolobuẹ wụ Chuku ndị nẹdi wẹ, Iwu hụn o gi kwọngbama ya lẹ wẹ ogẹn o gi wepụha wẹ alị Ijiptu.

²⁶ Wẹ nọ pụ d'e femẹ mmọn-lẹ-iyi, a kpọnị wẹ isi alị, mmọn ndị wẹ marịnlẹni, mmọn ndị o yelẹni wẹ.

²⁷ Ya kẹ ọnụma Osolobuẹ nọ nwan kunrun alịnị, o gi abụmọnụ ile wẹ deye imẹ ẹkụkwọnị sọn ẹ.

²⁸ Osolobuẹ gi okẹn-olulu lẹ okẹn-ọnụma bụkpọpụ wẹ alị wẹ, ma wẹ ye alị ọzọ, k'o dọn nwan rị.”

²⁹ Ihiẹn ndị zuerini wụ nke Osolobuẹ wụ Chuku ẹnyi, kanị ihiẹn ndị pụha ifọn wụ nke ẹnyi lẹ ụmụ ẹnyi jẹnrin-ejẹn, nị ẹnyi hụn ụzọ sọn oku ile rị imẹ iwuni.