Ditrọnọmi 28 - Ika

Isi Nke Ẹsatọ Kwasị Ọgụn Ngọzi Hụn K'a Rịnị Onyẹ K'e Humẹ isi

¹ Ụnụ humẹchanrịn nị Osolobuẹ wụ Chuku ụnụ isi nke-esi, dọnrin ẹnya mẹchanrịn ihiẹnni ile ọ sị ụnụ mẹ hụn m rị a gwa ụnụ tannị, Osolobuẹ wụ Chuku ụnụ k'e bushi ụnụ elu karị ndị alị ile rị elu-ụwa.

² Ngọzi ndịnị ile k'e jun ụnụ ihun lẹ azụụn, omẹni ụnụ e humẹni Osolobuẹ wụ Chuku ụnụ isi:

³ Osolobuẹ k'a gọzi ụnụ kẹ imẹ obodo uku kẹ alị nta.

⁴ O k'e gi ụmụ bu ọda lẹ ihiẹn-ugbo bu ọda gọzi ụnụ, gizikwọ ụmụ gọzi efin lẹ atụnrụn lẹ ewu ụnụ.

⁵ Osolobuẹ k'a gọzi ụkpalị ụnụ lẹ afẹrẹ ụnụ gi a gwọ ihiẹn-oriri.

⁶ O k'a gọzi ọpụpụ ụnụ lẹ mbanhan ụnụ.

⁷ Osolobuẹ k'e mẹrini ụnụ ndị iṅẹnrẹn ụnụ ndị k'e bunụmanị ụnụ. Ụzọ ohu kẹ wẹ k'a gha bịa, kanị wẹ k'a gbayịya ụzọ ẹsa ebe wẹ gbakọnị ụnụ.

⁸ Osolobuẹ k'a gọzi ọban ụnụ lẹ ihiẹn ile ụnụ buche ẹka. Osolobuẹ wụ Chuku ụnụ k'a gọzi ụnụ imẹ alị ahụn ọ rị e ye ụnụ.

⁹ Osolobuẹ k'e mẹ ụnụ weri ọnọdị rịkẹ ndị-nsọ a k'o dọn kun enwẹn ẹ kwe ụnụ nkwa, omẹni ụnụ e mẹghọ ihiẹn Osolobuẹ wụ Chuku ụnụ sị ụnụ mẹ, gha ụzọ a.

¹⁰ Ogẹn hụ, ndị alị ile rị ụwa k'a hụn Ẹfan Osolobuẹ hụn ụnụ rị a za, a tụ wẹ egun ụnụ.

¹¹ Osolobuẹ k'e mẹ ụnụ gha ihun ọda-ọda: kẹ ebe ụmụ rị kẹ ebe ụmụ anụ rị kẹ ebe ihiẹn-ugbo rị, imẹ alị ahụn o kun enwẹn ẹ kwe ndị nẹdi ụnụ kanị nkwa n'o k'e ye ụnụ.

¹² Osolobuẹ k'e kpupụ igwere, ebahụn o butọ ihiẹn bu ọda, zi mirin zueye alị ụnụ udu-mirin, gọzi ọrụn-ẹka ụnụ ile. Ụnụ k'e zinye ndị alị bu ọda, kanị ụnụ ezinnarịnkọ alị ọwụlẹ.

¹³ Osolobuẹ k'e mẹ ụnụ wụrụ isi, ẹlẹ ọdụndụn. Ụnụ gọn ntịn ihiẹn ndịnị Osolobuẹ wụ Chuku ụnụ sị ụnụ mẹ, hụn m rị a gwa ụnụ tannị, dọnrin ẹnya e mẹ wẹ, elu-elu kẹ ụnụ k'a rị e shi, ẹlẹ alị.

¹⁴ Aghakwọlẹ ni ihiẹn ọwụlẹ m rị a gwa ụnụ tannị pụ, kụye ẹka-nni mọbụ ẹka-ekpẹn, sọnmẹ mmọn-lẹ-iyi, femẹ wẹ.

Ọnụ-ẹsọn Wẹ Butọnị Ndị K'e Nupụ Isi

¹⁵ Kanị, omẹni ụnụ ehumẹnini Osolobuẹ wụ Chuku ụnụ isi, omẹni ụnụ e dọnrinni ẹnya sọn iwu ẹ lẹ uhi ẹ ndịnị ile m rị e tumẹni ụnụ tannị, ọnụ-ẹsọn ndịnị ile m jẹnkọ d'a kpọ ẹfan sikọ d'e sọn ụnụ, kpụ ụnụ ọkpụkpụ:

¹⁶ Ọnụ-ẹsọn k'e sọn ụnụ imẹ obodo shịa ẹfọ, sọn ụnụ alị-ọfịa.

¹⁷ Ọnụ-ẹsọn k'e sọn ụkpalị ụnụ lẹ afẹrẹ ụnụ gi a gwọ ihiẹn-oriri.

¹⁸ Ọnụ-ẹsọn k'e sọn ụmụ ụnụ mụ, sọn ihiẹn-ugbo ụnụ, sọn ụmụ-efin lẹ atụnrụn lẹ ewu ụnụ.

¹⁹ Ọnụ-ẹsọn k'e sọn ụnụ banhan, sọn ụnụ pụ.

²⁰ Osolobuẹ lẹ enwẹn ẹ k'e zi ọnụ-ẹsọn lẹ isusu lẹ ụya ye imẹ ihiẹn ile ụnụ buche ẹka, d'e ru n'e tikpọ wẹ ụnụ ru alị, makẹ eje-ihiẹn ụnụ mẹ ebe ụnụ nọ jụ m.

²¹ Osolobuẹ k'a tụsọnmẹ ụnụ emu d'e ru n'o tikpọpụchanrịn ụnụ alị ahụn ụnụ banyekọ d'e nwọnrin.

²² Osolobuẹ k'a tụ ụnụ eje-emu e rikpọnị, ẹhụ-ọkụn, emu ịhịan gi e nwun anwụn-anwụn; o k'a tụ ihiẹn-akụnkụn ụnụ okẹn uwowo lẹ ụkọ-mirin lẹ ndundu e gbu ihiẹn-ugbo lẹ ịkpọ-nkụn; o k'e gi ihiẹn ndịnị sọn ụnụ d'e ru nị ụnụ a lachanrịn iwi.

²³ Igwere kpumẹni ụnụ k'e ze kokoko kẹ igwe-bronzu, akpakalị ụnụ zọma ụkụ e ze kankankan kẹ igwe, onwọnni hụn k'a hụn mirin.

²⁴ Osolobuẹ k'e gi mirin nkẹ e zueni ụnụ họnrin uzunzun lẹ ntụn hụn k'a gha elu-igwere e hutu d'e runi ụnụ a lachanrịn iwi.

²⁵ Osolobuẹ k'a nị ndị iṅẹnrẹn ụnụ mẹri ụnụ. Ụnụ k'a ghaha azụụn ohu bịa d'a maye wẹ, kanị ụnụ k'a gbayịya azụụn ẹsa ebe ụnụ gbakọnị wẹ, ndị alị-eze ile rị elu-ụwa nụ ihiẹn mẹni ụnụ e be wẹ ọrịọ.

²⁶ Ozun ụnụ k'a wụrụ ihiẹn-oriri nnụnụ ile e ri ozun lẹ ihiẹn-oriri anụ-ọfịa, onwọnni onyẹ k'a chụnnị wẹ.

²⁷ Osolobuẹ k'a tụ ụnụ emu ihiẹn-ofifi ọ tụ ndị Ijiptu, mẹ ẹhụ mẹsọnmẹ ụnụ kpụtụ-kpụtụ, ẹtẹ rị e ru ẹbụn lẹ ụkọ-ẹhụ, hụn wẹ jẹnkọlẹni d'a saẹka zụọ.

²⁸ Osolobuẹ k'a tụ ụnụ ẹra, mẹ ẹnya kpu ụnụ ishi, mẹzikwọ obi gbayịya ụnụ.

²⁹ Ụnụ k'a rị a sụọ ishi efinnaị kẹ onyẹ ẹnya-mkpịn rị imẹ ishi; onwọnni ihiẹn ụnụ buche ẹka k'a bọnị ụnụ; wẹ k'a gha a bịangbu ụnụ, e zun ụnụ ohin ụhụọhịn-ụhụọhịn, onwọnni onyẹ k'a gbapụhanị ụnụ.

³⁰ Ị badọngụ okpoho, okẹnnyẹ ọzọ e mẹ mgba a. Ị tụngụ ụlọ, y'e bikọ a. Ị rụngụ alị vaịnị, y'a danmịnkọdẹ mkpụrụ a.

³¹ Wẹ k'a nọ idẹnya ị gbu efin i, kanị anụ a ahụakọ ị ọnụ kaka. Wẹ k'e gi ikẹn narịn ị jaki i, ewekinhẹnkọnị wẹ i ya. Wẹ k'e we atụnrụn ị ye ndị iṅẹnrẹn i, onwọnni onyẹ k'a gbapụhanị wẹ.

³² Wẹ sikọ d'e we ụmụ ị ikẹnnyẹ lẹ ikpoho ye ndị alị ọzọ, y'a tọ e lee ẹnya wẹ ụhụọhịn-ụhụọhịn, ẹnya a rọ ị — bụ y'a sakọ ẹka mẹ ihiẹn ọwụlẹ.

³³ Ndị ị marịnlẹni k'e ri ihiẹn gha alị ị pụha, ihiẹn ẹka ị rụnpụha. Onwọnni ihiẹn ị k'a hụn karị eje-mmẹkp'ẹhụ y'e we nwụn.

³⁴ Ihiẹn ndị ẹnya ị k'a hụn k'a pụ ị ẹra.

³⁵ Osolobuẹ k'e mẹ ihiẹn-ofifi a tụrụ ọda wẹ jẹnkọlẹni d'a s'ẹka zụọ figbarị ị mkpụkụ lẹ ụkụ, o k'a gha ọbụkụ figbarị i d'e rudẹ okpokomisi.

³⁶ Osolobuẹ k'a chụ ụnụ lẹ eze ụnụ hụn ụnụ tumẹ shi alị ụnụ lẹ ndị nẹdi ụnụ marịnlẹni. Ụnụ k'a nọ ebẹhụ fe mmọn, mmọn ndị wẹ gi osisi lẹ ọmụma mẹmẹ.

³⁷ Ụnụ k'a wụrụ ihiẹn w'e beni ọrịọ lẹ ihiẹn-ẹmụ imẹ igunrun ndị alị ile Osolobuẹ k'a chụshi ụnụ.

³⁸ Ị k'a kụnye mkpụrụ bu ọda ugbo, kanị ẹkẹrẹ k'ị k'a hụn ghọrị, makẹni igurube k'e ripụ a.

³⁹ Ị k'a kụn alị vaịnị, rụn a, kanị y'a rakọ manya a, y'e rikọ ogbe ẹ, makẹni ọwụwụ k'e wiwipụ vaịnị ndị hụ.

⁴⁰ Olivu k'e jun alị ụnụ ile, kanị ụnụ ahụnkọ ofigbọn-olivu gi mẹ ihiẹn ọwụlẹ, makẹni olivu ndị ahụn k'e dan ifie.

⁴¹ Ị k'a mụ ikẹnnyẹ lẹ ikpoho, kanị anọkọ wẹ i ẹka, makẹni wẹ k'a kpụnrụn wẹ.

⁴² Igurube k'e rukpumẹ osisi i lẹ ihiẹn-akụnkụn rị alị ị, ripụ wẹ.

⁴³ Abịamabịa bi imẹ igunrun ụnụ k'a gha a pali ọpali-ọpali a karị ị, kanị ị k'a gha a dannyụn ọdanyụn-ọdanyụn.

⁴⁴ Wẹ k'e zinye i, kanị y'a hụnkọ zinye wẹ. Wẹ k'a wụrụ isi, kanị ị k'a wụrụ ọdụndụn.

Ọnụ-ẹsọn Cheni Ọnụ-ẹsọn

⁴⁵ Ọnụ ẹsọnnị ile k'e sọn i. Wẹ k'a chụsọn i, kunrun i, d'e runi e gbupụ wẹ i. Makẹni, ị jụ igọn Osolobuẹ wụ Chuku ụnụ ntịn, sọn iwu lẹ uhi o tumẹni ụnụ.

⁴⁶ Ihiẹn ndịnị ile k'a wụrụ ihiẹn-ahịma lẹ ihiẹn a tụ ẹnya wẹ gi a gwa ụnụ lẹ ụmụ ụnụ oku jẹnrin-ejẹn.

⁴⁷ Makẹni ụnụ ashịapụnị ẹfọ gi ịghọghọ fe Osolobuẹ wụ Chuku ụnụ ogẹn o gi masịnị ụnụ,

⁴⁸ ụnụ k'e gi ẹgụn ihiẹn-oriri, ẹgụn mirin, ọtọ lẹ ogbẹnnyẹ mgbeleke fe ndị iṅẹnrẹn hụn Osolobuẹ k'e zi d'e mẹ ụnụ ihiẹn. Wẹ k'a kpọma ụnụ ẹgan igwe olu, d'e ru n'o tikpọchanrịn ụnụ.

⁴⁹ Osolobuẹ k'e wẹhẹni ụnụ ndị alị ohu tegbu enwẹn ẹ, alị rị isi-njẹndemẹ ụwa, hụn k'a zụnbanhan d'a jụrụ ụnụ kẹ ugọn a jụrụ ihiẹn, alị ụnụ jẹnkọlẹni d'a ghọta asụsụ wẹ,

⁵⁰ alị nwọnlẹni ihiẹn wẹ e tu, ghalẹni a gbaye ẹgẹdi mọbụ e mẹ omikẹn nwata.

⁵¹ Ndị-agha wẹ k'e ripụ ụmụ anụ ụnụ lẹ ihiẹn ụnụ kụn ugbo ụnụ, d'e ru n'e tikpọchanrịn wẹ ụnụ. Alatọkọnị wẹ ụnụ ọka ọwụlẹ mọbụ manya ọhụn mọbụ ofugbọn-olivu mọbụ ụmụ-efin mọbụ ụmụ-atụnrụn lẹ ụmụ-ewu ụnụ e we lachanrịn iwi.

⁵² Wẹ k'a maye obodo ụnụ ile d'e runi e tikpọchanrịn wẹ mgbọn ile zegbu enwẹn wẹ rịsọnmẹ imẹ alị ụnụ, mgbọn ndị ahụn ụnụ gi dọn ẹnya. Wẹ k'a maye obodo ile rị alị ahụn Osolobuẹ wụ Chuku ụnụ ye ụnụ.

⁵³ Ụnụ jẹnkọ d'e ri ụmụ ụnụ ikẹnnyẹ lẹ ikpoho Osolobuẹ wụ Chuku ụnụ ye ụnụ, yeni ihiẹn ẹnya k'a hụn ụnụ mgbe ndị iṅẹnrẹn ụnụ e gi kehunmẹ obodo ụnụ.

⁵⁴ Okẹnnyẹ kachanrịndẹ ẹka-alụlụa e nwọn, hụn ẹgozizi kachanrịn e mẹ imẹ ụnụ, k'a jọdẹ nwẹnẹ ẹ, nwunyẹ ẹ ya lẹ ya gba a sụọ lẹ ụmụ a họdụnị ẹfọ;

⁵⁵ o beyekọdẹ hụn ọwụlẹ anụ nwa a ọ rị e ri — makẹni ịya sụọ wụ ihiẹn-oriri o nwọn yeni ihiẹn-oriri jẹnkọ d'a kọnị ụnụ ogẹn ndị iṅẹnrẹn ahụn e gi kehunmẹ obodo ụnụ ile.

⁵⁶ Okpoho kachanrịn alụlụa a rị, hụn ẹgozizi kachanrịn e mẹ imẹ ụnụ, hụn ghalẹni as'ẹka a zọkpọdẹ akp'ẹjan, k'a jọ di ẹ ya lẹ ịya a sụọ lẹ ụmụ a ikẹnnyẹ lẹ ikpoho ẹfọ,

⁵⁷ zuemẹni wẹ iki lẹ nwa ọ mụpụhahụ, kẹni o ri wẹ nzuzue, makẹni ihiẹn-oriri ọzọ arịzị a o k'e ri ọrọgbọ hụ ile ụnụ jẹnkọ d'a rị eje-ọnọdị mgbe ndị iṅẹnrẹn ụnụ e gi kehunmẹ obodo ụnụ ile.

⁵⁸ Omẹni ụnụ edọnrinni ẹnya sọn ihiẹn ndị rị imẹ iwuni, hụn wẹ deye imẹ ẹkụkwọnị, kẹni ụnụ gbaye Ẹfannị nwọn ọghọ, hụn w'a tụ egun ẹ, “Osolobuẹ” hụn wụ Chuku ụnụ,

⁵⁹ Osolobuẹ k'e zihẹni ụnụ lẹ ụmụ ụnụ eje-nsọngbu a tụ egun, hụn k'e kẹnrẹn ọda-ọda, bie ọda-ọda, ya lẹ emu k'a kụbie ụnụ.

⁶⁰ O k'a tụ ụnụ emu ndị ahụn ile ọ tụ ndị Ijiptu, emu ndị ahụn a tụ ụnụ egun ọda, a nyanrịn wẹ ụnụ ẹhụ.

⁶¹ Osolobuẹ k'e wẹhẹzini ụnụ emu lẹ nsọngbu ile rịnị, kẹ ndị wẹ deyedẹlẹni imẹ Ẹkụkwọ Iwuni, gi ẹ sọn ụnụ d'e runi ụnụ a lachanrịn iwi.

⁶² Ẹkẹrẹ sụọ k'a họdụ imẹ ụnụ ile bu nwan ọda kẹ kokisẹ igwere, makẹni ụnụ egọnni Osolobuẹ wụ Chuku ụnụ ntịn.

⁶³ Kẹ o dọn sụọ Osolobuẹ ụsụọ mẹ ụnụ gha ihun, ba ụba, ẹrịra k'o k'a sụọzị a wiwi ụnụ ihiẹn, tikpọ ụnụ. O k'e huepụ ụnụ alịnị ụnụ banyekọ nwan d'e weri.

⁶⁴ O ru ẹ, Osolobuẹ k'e feyịya ụnụ ye imẹ alị ile rị elu-ụwa, gha isi ẹ ohu d'e ru isi ẹ hụn ẹbọ, ụnụ a nọ ebẹhụ fe mmọn-lẹ-iyi hụn ụnụ lẹ ndị nẹdi ụnụ marịnlẹni, mmọn-lẹ-iyi ndị wẹ gisọnmẹ osisi lẹ ọmụma tụ!

⁶⁵ Imẹ alị ndị ahụn o k'e feyịya ụnụ, ẹhụ efukọ ụnụ, ụnụ ahụnkọ ebe ụnụ a nọ zu ikẹn. Osolobuẹ k'e mẹ obi ferisọnmẹ ụnụ, mẹ ẹnya rọ ebe ụnụ rị e lee ẹnya eyemẹka, mẹ ndụn olilẹnya gụ ụnụ.

⁶⁶ Obi k'e kọnrinsọnmẹ ụnụ elu, uhue k'a gha e hue ụnụ kẹ uhinhin kẹ efinnaị, egun ọnwụn k'a tọ a tụ ụnụ.

⁶⁷ Ụtụntụn, ụnụ sị, “Ọhị mẹdẹ nwan n'ọ gba!” Ẹnyasị, ụnụ sị, “Eki mẹdẹ nwan n'o fọn!” makẹni uhue rị e hue ụnụ ọda, ihiẹn-egun ụnụ rị e gi ẹnya a hụn a karị ụnụ ẹka.

⁶⁸ Ogẹn ahụn, Osolobuẹ k'e gi ụgbọ-mirin zikin ụnụ alị Ijiptu, ụnụ a banzị ụzọ-ijẹn hụn m te sị onwọnzini mgbe ụnụ e gi jẹn ẹ, ụnụ a nọ ebẹhụ e we enwẹn ụnụ e ye ndị iṅẹnrẹn ụnụ ṅọnrin gi ụnụ họnrin igbọn, kanị onwọnni onyẹ k'e kwe ṅọnrin ụnụ.