Ditrọnọmi 26 - Ika

Isi Nke Isin Kwasị Ọgụn Oyiye Ihiẹn-ugbo Ibuzọ

¹ Ụnụ banyegụ alị ahụn Osolobuẹ wụ Chuku ụnụ rị e ye ụnụ n'ọ wụrụ ukuu ụnụ, werigụ a, biri imẹ ẹ,

² y'a gha imẹ ihiẹn-ugbo ibuzọ ile alị ahụn Osolobuẹ wụ Chuku ụnụ rị e ye ụnụ mịpụha weberi, buche imẹ ụkpalị, bujẹn ebahụn Osolobuẹ k'a họrị nị Ẹfan a rị,

³ sị onyẹ nchụn-ẹjan hụn rị ọrụn ogẹn ahụn, “M rị e gi ihiẹnni m wẹhẹ tannị a gwa Osolobuẹ wụ Chuku, hụn ị rị a nọkin ẹnya a, n'e rugụọ m alị ahụn Osolobuẹ kun enwẹn ẹ kwe ndị nẹdi ẹnyi nkwa n'o k'e ye ẹnyi.”

⁴ Onyẹ nchụn-ẹjan ahụn k'a narịn ị ụkpalị hụ rị ị ẹka, bu ẹ che ihun ukpo nchụn-ẹjan Osolobuẹ wụ Chuku ụnụ;

⁵ y'a nọ ihun Osolobuẹ wụ Chuku i ebẹhụ sị, “Nẹdi m kanị wụ onyẹ Aram te rị a kwahunmẹni; omẹgụ ọ nọ shi alị Ijiptu, ya lẹ ndị bulẹni ọda, wẹ nọ biri ebahụn, họnrin okẹn alị hụn shi ikẹn, bu ọda.

⁶ Kanị ndị Ijiptu nọ mẹja ẹnyi, mẹshi ẹnyi ikẹn, ye ẹnyi okẹn ọrụn rụnma.

⁷ Ya ẹnyi nọ kwanghọsị Osolobuẹ, Chuku ndị nẹdi ẹnyi, Osolobuẹ nọ nụ olu ẹnyi, hụn ụya ẹnyi rị e ri, okẹn ọrụn ẹnyi rị a rụn lẹ ọbịangbu wẹ rị a bịangbu ẹnyi.

⁸ Ya Osolobuẹ nọ gi ẹka zeni lẹ ikẹn ọ kpa wepụha ẹnyi imẹ Ijiptu hụ, wẹ lẹ okẹn ihiẹn-egun lẹ ọrụn-atụmẹnya ọ rụn hụn o gisọnmẹ ghọsị ikẹn ẹ lẹ ahụnlele ile o rụn.

⁹ Ọ nọ wẹhẹ ẹnyi ebeni, ye ẹnyi alịnị, alị hụn mirin-ẹran anụ lẹ mirin-ẹnwụn jun, e hu.

¹⁰ M wẹhẹ nwan ihiẹn-ugbo ibuzọnị alị ahụn wepụha, alị hụ ịyụ wụ Osolobuẹ ye m.” I kugụ, y'e bu ụkpalị ahụn che ihun Osolobuẹ wụ Chuku i, kụn'a isi alị.

¹¹ Yụ lẹ ndị Livaị lẹ itumunyẹ bi imẹ obodo ụnụ e ri oriri, ghọghọ, makẹ ihiẹn-ọma ile Osolobuẹ wụ Chuku i ye yụ lẹ ezi-lẹ-ụlọ ị.

Ahụa Ụzọ-ohu-imẹ-ụzọ-iri

¹² Ahụa ẹtọ-ẹtọ k'a wụrụnị ụnụ ahụa ụzọ-ohu-imẹ-ụzọ iri hụn pụ-ichẹn. Ahụa hụ, ụnụ k'a gha e wepụha ụzọ-ohu-imẹ-ụzọ-iri ihiẹn ile ụnụ rụnpụha imẹ ugbo, we ẹ ye ndị Livaị, ndị ọbịa, ndị nwọnlẹni nẹdi lẹ nnẹ lẹ ikpoho di wẹ nwụnhụn, ni wẹ hụn ụzọ ri, rijun ẹfọ imẹ obodo ụnụ.

¹³ I mẹgụ a, y'a sị Osolobuẹ wụ Chuku i, “A ghagụọ m iwe m wepụ azụụn ahụn rị nsọ; e wegụọ m'a ye ndị Livaị, itumunyẹ, ndị nwọnlẹni nẹdi lẹ nnẹ lẹ ikpoho di wẹ nwụn: e mẹgụọ m k'i dọnchanrịn gwa m. Efieni m oku i mọbụ zọ hụn ọwụlẹ imẹ wẹ.

¹⁴ Emẹrụnị m ụzọ-ohu-imẹ-ụzọ-irini rị nsọ: erini m hụn ọwụlẹ rịn'a ogẹn m gi rị achọ mọbụ wepụha hụn ọwụlẹ ogẹn m gilẹni rị ọchan mọbụ we hụn ọwụlẹ kwanị ndị nwụnnị. E humẹgụọnị m Osolobuẹ wụ Chuku m isi; e mẹgụọ m ihiẹn ile ị sị m mẹ.

¹⁵ Gha nwan elu-igwee, ebe obibi i rị nsọ, lee ẹnya alị, n'ị gọzi ndị nke i wụ Izrẹlụ lẹ alị ahụn i ye ẹnyi kẹ i dọn kun enwẹn i kwe ndị nẹdi ẹnyi kanị nkwa, alị ahụn mirin-ẹran anụ lẹ mirin-ẹnwụn jun, e hu.”

Mẹ Ihiẹn Osolobuẹ S'ị Mẹ

¹⁶ Osolobuẹ wụ Chuku i rị a gwa ị tannị yụ sọn uhi lẹ iwu ndịnị; dọnrin ẹnya gi obi i ile lẹ umẹ-ndụn ị ile dọnmẹ wẹ.

¹⁷ Y'e kugụọ a tannị nị Osolobuẹ wụ Chuku i, n'i k'e sọn ụzọ a, nị i k'e sọn uhi ẹ lẹ ihiẹn ọ s'ị mẹ lẹ iwu ẹ ile, lẹni i k'e humẹn'ẹ isi.

¹⁸ Osolobuẹ nkẹ e kugụọ a tannị nị ụnụ wụ ndị nke ẹ pụ-ichẹn, k'o dọn kwe nkwa, lẹni ọ chọ nị ụnụ mẹchanrịn ihiẹn ile ọ sị ụnụ mẹ.

¹⁹ O kugụọ a n'o k'e bu ụnụ che ọnọdị wẹ k'e gi ja ụnụ mma, a nụ otiti ụnụ, ọnọdị ụnụ a nọ nwọn ọghọ karị ndị ile o ke, lẹni ụnụ k'a wụ ndị-nsọ Osolobuẹ wụ Chuku ụnụ, k'o dọn kwe nkwa.