Ditrọnọmi 25 - Ika

Isi Nke Isẹn Kwasị Ọgụn Mkpịnsịn W'a Fịan Onyẹ Mẹ Njọ

¹ Omẹni ikpe seni ịhịan lẹ ibe ẹ, wẹ bu ẹ jẹn ọgwa nị ndị e dọnzi oku han eṅẹn, hatu hụn ri eṅẹn, hangbu hụn ikpe ma eṅẹn.

² Omẹni hụn ikpe ma furu w'e gbu mkpịnsịn, ọka-ikpe sikọ d'e m'ẹ dinẹ alị, a nọ wẹ idẹnya ọka-ikpe fịan a ube mkpịnsịn ole furu eje-omumẹ hụn o mẹ.

³ Kanị a fịankarịkọ w'a ube ọgụnnaị. Wẹ fịankarị a ya, ya wụ nị e budanọlẹ wẹ ẹ idẹnya ịhịan ile.

⁴ Ekẹnmẹlẹ okẹn-efin ọnụ ebe ọ rị a zọchanpụhan'ị akp'ọka.

Ịmụdọnni Nwẹnẹ I Nwa-okẹnnyẹ

⁵ Omẹni umunẹ ikẹnnyẹ rị ụzọ ohu e bi, ohu imẹ wẹ a nwụnhụn bụ ọ mụnị okẹnnyẹ, nwunyẹ ẹ ejẹnkọ ikpụlọ ọzọ d'a lụ di. Nwẹnẹ di ẹ sikọ d'a lụma a n'o mẹzun'ẹ ihiẹn nwẹnẹ-di:

⁶ okẹnnyẹ ibuzọ okpoho ahụn k'a mụ sikọ d'a za ẹfan okẹnnyẹ ahụn nwụnhụnnị makẹ ẹfan a gha a gụ imẹ Izrẹlụ.

⁷ Kanị, omẹni hụn okẹnnyẹ achọnị n'ọ lụrụ nwunyẹ nwẹnẹ ẹ hụ nwụnnị, hụn okpoho sikọ d'e jẹn d'e kunrun ndị-ichẹn obodo hụ ebe wẹ rị e zu ọnụ-mgbọn obodo, sị wẹ, “Nwẹnẹ di m ekweni n'o mẹ ihiẹn ẹfan nwẹnẹ ẹ e gi rịsọnmẹ imẹ Izrẹlụ. Ọ sị o mẹkọnị m ihiẹn nwẹnẹ-di.”

⁸ Ndị-ichẹn obodo k'a kpọrịrị okẹnnyẹ hụ, gwa a oku. Ọ jụzị, sị, “Achọnị m nị m lụ a.”

⁹ Nwunyẹ nwẹnẹ ẹ ahụn nwụnnị k'e lihi ọtọ, jẹnburu ẹ, idẹnya ndị-ichẹn hụ, gbụnarịn a ụkụ akpụkụ ohu, jụ a ẹsọn ihun, sị, “Ihiẹnni wụ ihiẹn w'e mẹ okẹnnyẹ hụn kwelẹni mẹmẹni nwẹnẹ ẹ ikpụlọ.”

¹⁰ Ẹfan wẹ e gi nwan a marịn ikpụlọ okẹnnyẹ ahụn imẹ Izrẹlụ wụ “Ikpụlọ Onyẹ Wẹ Gbụnarịn Akpụkụ.”

Okpoho Dọdọn Ịhịan Ẹhụ-okẹnnyẹ

¹¹ Omẹni ikẹnnyẹ ẹbụọ rị a nụ ọgụn, nwunyẹ ohu imẹ wẹ a gbapụha d'a zụọyeni di ẹ, zu ẹka ye hụn ịya lẹ di ẹ rị a lụ ọgụn ẹhụ-okẹnnyẹ, dọdọn ẹ ya,

¹² bepụ n'a ẹka. Emẹlẹ ni omikẹn ẹ.

Emẹgbulẹ Ịhịan Ịgha A Zụ Afịa

¹³ Ebukwọlẹ mkpu runi lẹ hụn rulẹni imẹ ẹkpa ị.

¹⁴ Enwọnlẹ mkpu runi lẹ hụn rulẹni iwe i.

¹⁵ Ezigbo mkpu lẹ ihiẹn ndị wẹ gi a ma ihiẹn k'i sikọ d'e nwọn, kẹni i tọ imẹ alị ahụn Osolobuẹ wụ Chuku i rị e ye i.

¹⁶ Makẹni onyẹ ọwụlẹ e mẹ ihiẹn nọ ẹnịna, onyẹ ọwụlẹ e mẹgbu ịhịan, rụ arụ ẹnya Osolobuẹ wụ Chuku ụnụ.

Ẹka Ndị Izrẹlụ K'e Gi Sọn Ndị Amalẹki

¹⁷ Nyanhankwọ nị ihiẹn ndị Amalẹki mẹ ụnụ ụzọ ogẹn ụnụ gi gha Ijiptu pụha:

¹⁸ ogẹn ndụn gi gụgụ ụnụ, ẹhụ a rọgụ ụnụ, wẹ nọ ghaha azụụn maye ụnụ ọgụn, gbupụ ndị kpa azụụn, egun Osolobuẹ atụnị wẹ.

¹⁹ Osolobuẹ wụ Chuku ụnụ mẹrigụ ndị iṅẹnrẹn ile fihunmẹ ụnụ imẹ alị ahụn ọ rị e ye ụnụ n'ọ wụrụ ukuu ụnụ, mẹgụ ẹhụ fu ụnụ, gbupụ nị ndị Amalẹki elu-ụwa. Azọkwọlẹ ni!