Ditrọnọmi 24 - Ika

Isi Nke Ẹnọ Kwasị Ọgụn Iwu Gbashịarị Mkpechan

¹ Okẹnnyẹ lụrụ okpoho, o nwọn ikẹn mẹ ni o mẹgụ, ihiẹn okpoho ahụn a sụọzịn'a makẹni ọ hụn ihiẹn-ifẹnrẹn ebe okpoho ahụn rị. O de ẹkụkwọ-mkpechan weye okpoho ahụn, chụpụ a iwe ẹ,

² nị hụn okpoho a ghagụ iwe ẹ pụ lụma okẹnnyẹ ọzọ,

³ omẹgụ, ihiẹn okpoho hụ asụọzịnị di ẹ nke ẹbụọ, ya nwẹn e dezi ẹkụkwọ-mkpechan weye ẹ, chụpụ a iwe ẹ, mọbụ nị okẹnnyẹ hụn ẹbọnị a nwụnhụn,

⁴ ẹlẹ hụn di ẹ ibuzọ a hụ kpechann'a e gi lụmazị a — ebe o mẹ ni ọ rụgụọ. Ọhụn wụ arụ ẹnya Osolobuẹ. Ewẹhẹkwọlẹ ni njọ imẹ alị ahụn Osolobuẹ wụ Chuku ụnụ rị e ye ụnụ n'ọ wụrụ ukuu ụnụ.

Onyẹ Lụ Nwunyẹ Nke Ọhụn

⁵ Omẹni okẹnnyẹ lụ nwunyẹ nke ọhụn, e zijẹnkwọlẹ n'a agha mọbụ bu ọrụn ọzọ y'ẹ. O k'a dịnọ ụlọ ọrọgbọ ahụa, e mẹ ẹfọ a sụọ nwunyẹ ọ lụ ụsụọ.

Izin Egho

⁶ Egikwọlẹ ọlọ fieri ụgwọ, ọ sụọdẹ n'a ẹka a sụọ, makẹni ọhụn wụ igi ihiẹn ịhịan gi e bi fieri ụgwọ.

Izunrun Ịhịan

⁷ Wẹ hụn onyẹ zunrun onyẹ Izrẹlụ ibe ẹ, a kpa a kẹ igbọn mọbụ re ẹ, wẹ k'e gburịrị onyẹ ahụn zunrun ịhịan. Ụnụ k'e gi ọhụn wepụchanrịn eje-ihiẹn imẹ igunrun ụnụ.

Emu akpụkpọ-ẹhụ

⁸ Emu akpụkpọ-ẹhụ gha a kụ ịhịan, dọnrin ni ẹnya mẹchanrịn kẹ ndị Livaị ndị nchụn-ẹjan dọn gwa ụnụ. Ụnụ k'e dọnrin ẹnya mẹrịrị ihiẹn ndịnị m gwa wẹ mẹ.

⁹ Nyanhankwọ nị ihiẹn Osolobuẹ wụ Chuku ụnụ mẹ Miriam ụzọ kẹ ụnụ ghagụ alị Ijiptu pụha.

Onyẹ Gi Ụgwọ

¹⁰ Ị gha e zinye ibe i ihiẹn ọwụlẹ, hapụ a n'o gi ẹka a ye i ihiẹn o k'e gi gbama ibe, abanyekwọlẹ imẹ ụlọ iwe ẹ d'e gi ẹka ị weri ẹ.

¹¹ Nọdị ihun-ezi, nị onyẹ i rị e zinye ihiẹn gi ẹka a wepụha n'ị ihiẹn ọ rị e gi a gbama ibe.

¹² Omẹni onyẹ ahụn wụ ogbẹnnyẹ, anịlẹ ihiẹn ahụn o gi gbama-ibe rị ị ẹka eki e we fọn.

¹³ Anwụn rọ, y'e wekinn'ẹ ẹkwa a n'ọ hụn ụzọ gi ẹ ranhịn. Ogẹn ahụn, ọ sikọ d'a kpanmịn ị, ihiẹn i mẹ a wụrụ ihiẹn rị mma ẹnya Osolobuẹ wụ Chuku ụnụ.

Emẹgbukwọlẹ Onyẹ Rụnn'ị Ọrụn

¹⁴ Emẹgbukwọlẹ ogbẹnnyẹ elu n'a fụ, hụn i we ọrụn, kẹ onyẹ Izrẹlụ ibe i rọ kẹ abịamabịa bi imẹ obodo ụnụ ọwụlẹ.

¹⁵ A kụ a ụgwọ ọrụn a ụhụọhịn-ụhụọhịn anwụn gini d'a rọ, makẹni ogbẹnnyẹ rọ, ụgwọ-ọrụn ahụn k'ọ rị e lee ẹnya. Amamgbe ọ kwanghọsị Osolobuẹ ihiẹn i mẹ ẹ, ikpe a ma ị.

¹⁶ Egbukwọlẹ ni ndị nẹdi yeni njọ ụmụ wẹ mọbụ gbu ụmụ yeni njọ ndị nẹdi wẹ; njọ onyẹ-onyẹ kẹ w'e gi gbu ẹ.

Emẹjakwọlẹ Onyẹ ọwụlẹ

¹⁷ Anapụkwọlẹ ni abịamabịa mọbụ nwa nwọnlẹni nẹdi ihiẹn run'ẹ, mọbụ kịnarịn okpoho di ẹ nwụn ẹwuru ẹ gi fieri ụgwọ.

¹⁸ Nyanhankwọnị nị ụnụ te wụ igbọn imẹ alị Ijiptu, Osolobuẹ wụ Chuku ụnụ nọ gha ebẹhụ gbarị ụnụ. Ịya haịn m gi a sị ụnụ mẹ ihiẹnni.

Latọnị Nị Ndị Elu Rị a Fụ Ihiẹn Imẹ Ugbo

¹⁹ Ị gha a ghọ ihiẹn-ugbo i, nị o nwọn ukun ọka-witi i kẹnmẹtọ hụn ị latọ, ekinlẹ azụụn d'e buru ẹ. Hapụ a tọnị ndị abịamabịa, ndị nwọnlẹni nẹdi lẹ nnẹ lẹ ikpoho di wẹ nwụn, kẹni Osolobuẹ wụ Chuku ụnụ gọzi ọrụn-ẹka ị ile.

²⁰ I gha a fịantu olivu ebe i n'a ghọ a, aghọlẹ agalaba ohu mgbe ẹbụọ. La hụn họdụnị tọnị ndị abịamabịa, ndị nwọnlẹni nẹdi lẹ nnẹ lẹ ndị di wẹ nwụnhụn.

²¹ Ị gha a ghọ ogbe vaịnị imẹ alị vaịnị ị, aghọdọnzil'a. La hụn họdụnị tọnị ndị abịamabịa, ndị nwọnlẹni nẹdi lẹ nnẹ lẹ ikpoho di wẹ nwụnhụn.

²² Nyanhankwọ n'i te wụ igbọn imẹ alị Ijiptu. Ya haịn m gi a gwa ụnụ mẹ ihiẹnni.