Ditrọnọmi 23 - Ika

Isi Nke Ẹtọ Kwasị Ọgụn Ndị Jẹnkọlẹni D'e Sọn Ndị Nke Osolobuẹ Zu

¹ Onyẹ ọwụlẹ wẹ wara mọbụ bepụ ẹhụ-okẹnnyẹ esọnkọ ndị nke Osolobuẹ zu.

² Onwọnni onyẹ wẹ mụye ogbe k'e sọn ndị nke Osolobuẹ zu; ụmụ a esọnkọdẹ wẹ d'e ru agbọ nke iri.

³ Onwọnni onyẹ alị Amọnụ mọbụ onyẹ alị Mụabụ mọbụ nwa wẹ ọwụlẹ k'e sọn ndị nke Osolobuẹ zu d'e rudẹ ụmụ-ụmụ wẹ agbọ nke iri.

⁴ Makẹni ebuhẹnini wẹ ụnụ ihiẹn-oriri lẹ mirin kẹ ụnụ lala ogẹn ụnụ gi gha alị Ijiptu pụha, kama, e weridẹ wẹ Balaam nwa Bioru onyẹ Pẹtọ alị Aram-Naharaịm ọrụn n'ọ bụ ụnụ ọnụ,

⁵ Kanị Osolobuẹ wụ Chuku ụnụ egọnni Balaam ntịn, o gidẹ ngọzi nọkin ẹnya ọnụ ahụn wẹ te k'a bụ ọnụ, makẹni ihiẹn ụnụ sụọ Osolobuẹ wụ Chuku ụnụ.

⁶ Ụnụ e we nwụn, emẹkwọlẹ ni ihiẹn ọwụlẹ o gi rịnị wẹ mma.

⁷ Ajụkwọlẹ isọn onyẹ Ẹdọm mẹkọ, makẹni yụ lẹ ya wụ nwẹnẹ. Ajụkwọlẹ isọn onyẹ Ijiptu mẹkọ, makẹni ụnụ a nọgụọ alị wẹ nọkẹ itumunyẹ.

⁸ Ụmụ-ụmụ wẹ lẹ ndị sọnni wẹ nwọn ikẹn banyeni ndị nke Osolobuẹ.

Idọnmẹ Ebe Ẹnyi Rị Ọchan Kẹ Osolobuẹ Chọ

⁹ Ụnụ rị imẹ ọdụ ebe ụnụ jẹn d'a lụsọn ndị-iṅẹnrẹn ụnụ agha, sọkwọ nị ihiẹn ọwụlẹ rụnị.

¹⁰ Omẹni o nwọn ihiẹn gha okẹnnyẹ ọwụlẹ rị imẹ igunrun ụnụ ẹhụ pụha imẹ uhinhin, hụn mẹ ẹ rụ, okẹnnyẹ ahụn ya gha imẹ igunrun ụnụ pụ d'a nọdị ụsụọ.

¹¹ Kanị o rumẹ ẹnyasị, ọ wụ ẹhụ, anwụn rọgụ o kinhẹn imẹ agọ ahụn.

¹² E mẹmẹrin ni ebe ụnụ k'a gha e jẹn azụn-ụlọ ụsụọ agọ agha ụnụ.

¹³ Ihiẹn mẹ ẹkẹrẹ wẹ gi e gu alị k'a rịrị ibu onyẹ-onyẹ imẹ ụnụ, i jẹngụ azụụn-ụlọ, y'e gi ẹ guru ẹjan, y'e gbehutọ, kpumẹ ihiẹn ị nyụn.

¹⁴ Makẹni Osolobuẹ wụ Chuku ụnụ a ghahunmẹ imẹ agọ ụnụ, e che ụnụ nche, e we ndị-iṅẹnrẹn ụnụ e che ụnụ ẹka nị ụnụ mẹri wẹ. Agọ ụnụ sikọ d'a rịrịrị nsọ, amamgbe o legha ihiẹn ọwụlẹ rịlẹni mma ẹnya, gbakitọ ụnụ azụụn.

Igbọn Hụn Gbaburun'i

¹⁵ Omẹni igbọn ịhịan a gbaha d'e gbọnn'i, ewelẹ ẹ hụ chezi di-nwọnn'ẹ ẹ ẹka.

¹⁶ Ẹlẹ ọhụn sụọ, nịdẹ n'a biri ebe ọwụlẹ sụọn'a imẹ igunrun ụnụ, imẹ obodo ọwụlẹ ọ chọ. Eyekwọlẹ n'a mmẹkp'ẹhụ.

Ịgbaraja Ụlọ-mmọn

¹⁷ Onwọnkwọnị okpoho Izrẹlụ ọwụlẹ k'a wụ ịgbaraja ụlọ-mmọn; onwọnzikwọnị okẹnnyẹ Izrẹlụ ọwụlẹ k'a wụ ịgbaraja ụlọ-mmọn.

¹⁸ Ewẹhẹkwọlẹ ni egho-ọrụn ịgbaraja okpoho mọbụ okẹnnyẹ d'e mẹzu nkwa ọwụlẹ imẹ ụlọ Osolobuẹ wụ Chuku ụnụ, makẹni wẹ ẹbụbụọ rụ arụ ẹnya Osolobuẹ wụ Chuku ụnụ.

Ịna Ọmụnịnwa

¹⁹ Anakwọlẹ onyẹ Izrẹlụ ibe i ọmụnịnwa: kẹ egho kẹ ihiẹn-oriri kẹ ihiẹn ọzọ ọwụlẹ w'a na ọmụnịnwa a.

²⁰ I nwọn ikẹn na otumunyẹ ọmụnịnwa, kanị anakwọlẹ onyẹ Izrẹlụ ibe i, kẹni Osolobuẹ wụ Chuku ụnụ hụn ụzọ gọzi ihiẹn ile i buche ẹka imẹ alị ahụn ụnụ banyekọ d'e weri.

Ikwe Osolobuẹ Nkwa

²¹ Omẹni i kwe Osolobuẹ wụ Chuku ụnụ nkwa, ebielẹ d'a ku a, makẹni Osolobuẹ wụ Chuku ụnụ k'a dọkwọ ị ya, ogẹn ahụn ikpe njọ a ma ị.

²² Omẹni y'e kweni nkwa, ẹlẹ njọ.

²³ Dọnrin ẹnya mẹ ihiẹn ọwụlẹ i gi ọnụ ị ku, makẹni ịyụ gi ọnụ ị kwe Osolobuẹ wụ Chuku ụnụ nkwa, awanị w'a ye i olu.

Iri Ihiẹn Rị Ugbo Ịhịan

²⁴ I banye alị vaịnị ibe i, i nwọn ikẹn ra ogbe ole ị chọ n'ị ra, ka ebuchelẹ hụn ọwụlẹ imẹ ụkpalị ị;

²⁵ i banye alị ọka-witi ibe i, i nwọn ikẹn gi ẹka ghọrị, ka egikwọlẹ ọpịa beri ọka rị ugbo ibe i.