Ditrọnọmi 22 - Ika

Isi Nke Ẹbụọ Kwasị Ọgụn

¹ Ị hụn efin ibe i mọbụ atụnrụn a k'ọ kpahukọ, ewepụkwọl'a ẹnya, ka hụn a n'i wekinn'ẹ ya azụụn.

² Omẹni ebe onyẹ nwọnn'ẹ bi arị nsue mọbụ nị y'a marịn onyẹ ọ wụ, bu ẹ la iwe i, y'e bu ẹ tọ d'e ru mgbe onyẹ nwọnn'ẹ chọha a, y'e w'ẹ ye ẹ.

³ Mẹzikwọ ẹrịra omẹni jaki ibe i mọbụ ẹkwa wẹ mọbụ ihiẹn wẹ ọwụlẹ tuhu, hụn ụnụ hụn. Ewepụlẹ n'a ẹnya.

⁴ Ị hụn jaki ibe i mọbụ efin ẹ k'ọ dantọ ụzọ, efepụl'a ẹnya. Yen'ẹ ẹka zọma ụkụ alị, wuzo.

⁵ Okpoho eyilẹ ẹkwa ikẹnnyẹ; okẹnnyẹ eyilẹ ẹkwa ikpoho, makẹni onyẹ ọwụlẹ hụn e mẹ ihiẹnni a wụrụọlẹ ihiẹn Osolobuẹ wụ Chuku ụnụ a sọ.

⁶ Omẹni y'a hụn ẹkụ-nnụnụ rị mkpẹnrẹn ụzọ, ikẹnkwọ elu osisi mọbụ akpakalị hụn nnẹ nnụnụ kpuru nwa a mọbụ ẹkwan a rị imẹ ẹ, akịrịkwọlẹ nnẹ lẹ nwa.

⁷ I nwọn ikẹn nwụnrụn nwa a, ka, la nnẹ ẹ tọ, kẹn'ọ rịn'ị mma, n'ị hụn ụzọ tọ.

⁸ Ị tụn ụlọ ọhụn, gi ihiẹn gbọnhunmẹ elu ẹ, amamgbe ụlọ ị tụn e gbu ịhịan, omẹni ịhịan gha elu ẹ dan, o sehẹ ikpe-ọmụma.

⁹ Akụngbamakwọlẹ vaịnị lẹ ihiẹn ọzọ imẹ alị vaịn'ị; i m'ẹ, kẹ ihiẹn hụn ị kụn chen'ẹ kẹ mkpụrụ vaịnị rịn'a k'a rụ.

¹⁰ Ekẹngbamalẹ efin lẹ jaki gi dụkpọ alị ugbo.

¹¹ Wẹ kpagbama ẹṅẹnrẹn-atụnrụn lẹ linẹni, eyilẹ ẹkwa hụ.

¹² Kwa nị tasẹlụ wụ ịyọmịyọ ẹkwa ye ntịn ẹnịnọ ẹwuru ụnụ e yi.

Okẹnnyẹ Sị Ọ Lụkọzị Nwunyẹ Ẹ

¹³ Ikẹnkwọ okẹnnyẹ a lụgụ nwunyẹ, sọngụ a ranhịn, nị omẹgụ ihiẹn ẹ asụọzịn'a,

¹⁴ o kingbumẹ ẹ, yemẹ ẹ eje-ẹfan, a sị, “Mmẹ lụ okpohoni; kanị, ogẹn m gi sọn ẹ ranhịn, ahụnnị m ihiẹn ghọsị nị ya lẹ okẹnnyẹ aranhịntuni.”

¹⁵ Ihiẹnni mẹ, nẹdi lẹ nnẹ nwata-okpoho ahụn sikọ d'e wẹhẹrịrị ihiẹn ghọsị nị nwa wẹ amarịn okẹnnyẹ n'o d'a lụma di ẹ hụ d'a ghọsị ndị-ichẹn obodo ahụn ebe wẹ nọ e zu ọgwa ọnụ-mgbọn obodo.

¹⁶ Nẹdi nwata-okpoho ahụn k'a sị ndị-ichẹn, “M we nwa m ye okẹnnyẹni lụrụ, kanị ihiẹn ẹ asụọzịn'a nwan.

¹⁷ Ọ rị nwan e kingbu ẹ, a sị, ‘Ahụnnị m ihiẹn ghọsị nị nwa ị amarịn okẹnnyẹ ni m d'a lụma a.’ Ka lee ni ihiẹn ghọsị nị nwa m amarịn okẹnnyẹ n'o d'a lụrụ a.” Ebẹhụ kẹ ndị mụ nwata-okpoho ahụn k'a nọ nwan shịagbapụnị ndị-ichẹn obodo ẹkwa ahụn hụnyẹ lẹ nwa wẹ gi ranhịn.

¹⁸ Ndị-ichẹn ahụn k'e kwọndọn okẹnnyẹ ahụn, y'ẹ afụnfụn.

¹⁹ Wẹ k'e be ẹ akpụrụ egho siliva ọgụn-isẹn, wẹ ẹ ye nẹdi nwata-okpoho ahụn, makẹni okẹnnyẹni e yegụọ nwata-okpoho Izrẹlụ marịnlẹni okẹnnyẹ eje-ẹfan. O k'a wụsọnmẹ nwunyẹ ẹ, onwọnni ogẹn o gi kpechan a ya nwẹn e we nwụn.

²⁰ Kanị, omẹni ihiẹn okẹnnyẹ ahụn ku wụ ezioku, nị ahụnnị wẹ ihiẹn ghọsị nị nwata-okpoho amarịn okẹnnyẹ n'o d'a lụ di,

²¹ wẹ k'e wẹhẹ nwata-okpoho ahụn ọnụmụzọ iwe nẹdi ẹ, ikẹnnyẹ obodo ẹ a magbu ẹ. Makẹni, o mẹgụọ ihiẹn-ifẹnrẹn imẹ Izrẹlụ ebe ọ nọlẹni dọnmẹ enwẹn ẹ ogẹn o gi rị iwe nẹdi ẹ. Ọhụn kẹ ụnụ e gi wepụkwama eje-ihiẹnni imẹ igunrun ụnụ.

Ughẹrẹ

²² Omẹni wẹ nwụn okẹnnyẹ ebe ya lẹ nwunyẹ ịhịan rị a ranhịn, wẹ ẹbụbụọ sikọ d'a nwụnrịrị: kẹ okẹnnyẹ sọnn'ẹ ranhịn kẹ okpoho hụ lẹ enwẹn ẹ, ụnụ e gi ẹ wepụkwama eje-ihiẹnni imẹ Izrẹlụ.

²³ Okẹnnyẹ nọ imẹ obodo kunrun okpoho wẹ badọngụ, sọn ẹ ranhịn,

²⁴ ụnụ k'e werirịrị wẹ ẹbụbụọ shi ọnụ-mgbọn obodo ahụn, magbu wẹ. Wẹ k'a magbu hụn okpoho makẹni ọ hụ imẹ obodo, o yini oro nị wẹ d'e yen'ẹ ẹka; hụn okẹnnyẹ wụ nị o mẹrụọlẹ nwunyẹ ịhịan. Ụnụ k'e gi ẹrịra wepụkwama eje-ihiẹnni imẹ igunrun ụnụ.

²⁵ Kanị, omẹni imẹ ugbo mọbụ ọfịa kẹ hụn okẹnnyẹ nọ kunrun nwata-okpoho wẹ badọngụ, karị a ẹka, mẹ mgba a, ya wụ nị hụn okẹnnyẹ ahụn mẹ ihiẹnni sụọ k'a nwụn.

²⁶ Emẹlẹ ni nwata-okpoho ahụn ihiẹn ọwụlẹ; onwọnni njọ o mẹ w'e gi gbu ẹ. Okuni nọ kẹ ebe ịhịan nọ maye ibe ẹ, gbu ẹ:

²⁷ makẹni ugbo mọbụ ọfịa kẹ okẹnnyẹ ahụn nọ kunrun ẹ; nwata-okpoho ahụn wẹ badọngụ e yighọ oro, onwọnni onyẹ rị ebahụn k'a zụọpụhan'a.

²⁸ Okẹnnyẹ kunrun nwata-okpoho wẹ kelẹni badọn, karị a ẹka, mẹ mgba a, nị a nwụn wẹ wẹ,

²⁹ hụn okẹnnyẹ k'a kụrịrị nẹdi nwata-okpoho egho-ọrụn akpọhịn iri kwasị ọgụnnaị; nwata-okpoho ahụn k'e họnrịrị nwunyẹ ẹ, makẹni o mẹrụọlẹ a. Onwọnni ogẹn okẹnnyẹ hụ e gi kpechan a ya lẹ enwẹn ẹ wụ okẹnnyẹ e we nwụn.

³⁰ Ịhịan alụkwọlẹ nwunyẹ nẹdi ẹ, amamgbe ọ gba nẹdi ẹ ọtọ.