Ditrọnọmi 21 - Ika

Isi Nke Ohu Kwasị Ọgụn Ozun Wẹ Marịnlẹni Onyẹ Gbun'ẹ

¹ Wẹ hụn onyẹ wẹ gbutọ ọfịa mọbụ ugbo imẹ alị ahụn Osolobuẹ wụ Chuku ụnụ rị e ye ụnụ bụ amarịn wẹ onyẹ gbun'ẹ,

² ndị-isi ụnụ lẹ ndị ọka-ikpe ụnụ k'e jẹn d'a ma ẹgbata rị gha ozun ahụn d'e ru obodo ndị rịsọnmẹ ẹhụ ebahụn.

³ Ndị-isi obodo hụ ozun ahụn ka a nọkunmẹ sikọ d'e weri nwa-efin hụn kelẹni rụntu ọrụn, wẹ kelẹni yimẹtu agbụn-ọrụn,

⁴ du ẹ d'e ru ọdanmgbugbu wẹ gukpọtulẹni alị a mọbụ kụntu ihiẹn, ọdanmgbugbu mirin rị e huni rị imẹ ẹ, a nọ wẹ ọdanmgbugbu ahụn kpagi nwa-efin ahụn olu.

⁵ Ndị nchụn-ẹjan, ụmụ Livaị, sikọ d'e jẹnpụha ihun, makẹni uwẹ kẹ Osolobuẹ wụ Chuku ụnụ họrị hụn k'a gha a rụn ọrụn Osolobuẹ, e gi ẹfan Osolobuẹ a gọzi ịhịan, a han eṅẹn ikpe ile lẹ ihiẹn ọwụlẹ wẹ mẹ ịhịan.

⁶ Ndị-isi obodo ozun ahụn ka a nọkunmẹ sikọ nwan d'a kwọpụ ẹka kpu nwa-efin hụ wẹ kpagi olu imẹ ọdanmgbugbu ahụn,

⁷ e sị wẹ, “Ẹka ẹnyi arị ihiẹn gbu onyẹni; ẹnya ẹnyi eruni kẹ wẹ rị e gbu ẹ.

⁸ Osolobuẹ, dodo narịn ndị nke i wụ Izrẹlụ ị gbapụha ẹjannị ẹnyi gi a gbarị isi ẹnyi; amalẹ ndị nke i ikpe yeni ọnwụn onyẹni nwọnlẹni ihiẹn o mẹ.” Ọhụn kẹ ụnụ e gi gbarị isi ụnụ makẹ ọchụn ahụn wẹ gbu.

⁹ Ẹrịra kẹ ụnụ e gi wepụ ikpe-ọmụma hụn igbu onyẹ nwọnlẹni ihiẹn o mẹ e wẹhẹ imẹ igunrun ụnụ, ebe o mẹni ụnụ e mẹgụọ ihiẹn rị Osolobuẹ mma ẹnya.

Ịlụrụ Okpoho Wẹ Nwụnlụa Agha

¹⁰ Ụnụ jẹn agha d'a lụsọn ndị-iṅẹnrẹn ụnụ, nị Osolobuẹ wụ Chuku ụnụ e mẹ ụnụ mẹri wẹ, n'o nwọn ndị ụnụ nwụnlụa,

¹¹ ị hụn okpoho ma mma-ẹhụ imẹ ndị wẹ nwụnlụa, n'ọ la ị ẹnya, i nwọn ikẹn lụrụ a.

¹² Webanhan a iwe i, y'e mẹ ẹ kọpụ ntutu ẹ, o ghepụ mbụọ a,

¹³ bu ẹkwa o yi kẹ wẹ nwụnrụn a che nkọ, ọ nọ iwe i kwangụ nẹdi ẹ lẹ nnẹ ọrọgbọ ifọn ohu, ogẹn ahụn ị k'a sa ẹka du ẹ ranhịn, họnrin di ẹ, ya nwẹn e họnrin nwunyẹ i.

¹⁴ O mẹ nwan nị ihiẹn ẹ asụọn'ị, hatu ẹ n'ọ la, ebe ọ chọ n'o jẹn ya jẹnmẹ. Orire y'e rekọ a; igbọn y'a gbakọ a, ebe o mẹ ni y'e budangụọ a.

Ihiẹn Ru Nwa-ibuzọ

¹⁵ Omẹni okẹnnyẹ lụ inyẹnmẹ ẹbụọ, ihiẹn ohu hụ a sụọ a, ihiẹn hụn ẹbọ ara sụọ a, bụ wẹ ẹbụbụọ mụn'a ikẹnnyẹ, kanị hụn ihiẹn ẹ rịlẹni a sụọ a mụn'a okẹnnyẹ ibuzọ,

¹⁶ o kemẹni ụmụ a ikẹnnyẹ ukuu ẹ, y'e wekwọlẹ ihiẹn ru nwa-ibuzọ hụn wụ nwa okpoho hụ ihiẹn ẹ rịlẹni a sụọ a ye nwa okpoho ahụn ihiẹn ẹ a sụọ a.

¹⁷ O sikọ d'a ghọsịrịrị nị hụn ibuzọ wụ nwa-ibuzọ a, ọsụọn'a nị nwunyẹ ẹ hụn sụọlẹn'a mụ a; o k'e ye ẹ ụzọ-ẹbụọ ihiẹn o ye ndị ọzọ. Nwa a ahụn wụ ihiẹn ibuzọ ghọsị ikẹn nẹdi ẹ, ihiẹn ru nwa ibuzọ wụ nke ẹ.

Nwa Pu Ndị mụn'a Imi

¹⁸ Omẹni ịhịan nwọn nwa isi-ikẹn, hụn a pa oku wẹ, hụn ghalẹni e humẹni nẹdi ẹ lẹ nnẹ ẹ isi; wẹ yedẹ afụnfụn, o gọnkọ ntịn,

¹⁹ nẹdi ẹ lẹ nnẹ ẹ sikọ d'e kwọndọn ẹ ẹka, w'ẹ d'e kunrun ndị-ichẹn ọgwa obodo ẹ.

²⁰ A sị wẹ ndị-ichẹn hụ, “Nwa ẹnyini wụ onyẹ isi-ikẹn, hụn a pa oku ẹnyi. Ara gbaye ẹnyi. Onyẹ okẹn ihiẹn-oriri lẹ onyẹ-manya k'ọ wụ.”

²¹ Ogẹn ahụn, ikẹnnyẹ ile rị obodo nwata ahụn k'e gi ọmụma magbu ẹ. Ụnụ sikọ d'e wepụchanrịnrịrị eje-ihiẹn ahụn imẹ igunrun ụnụ. Izrẹlụ ile k'a nụ a, egun a tụ wẹ.

Iwu Ichẹn-ichẹn

²² Omẹni ịhịan mẹ njọ hụn wẹ gi m'a ikpe-ọnwụn, nị ọnụ e hogbu ẹ elu osisi,

²³ ahatukwọlẹ ni ozun ẹ ye elu osisi ahụn eki e we fọn. Ụnụ sikọ d'e lirịrị a ụhụọhịn ahụn, makẹni onyẹ wẹ hogbu elu osisi a wụrụọlẹ onyẹ Osolobuẹ bụ ọnụ. Emẹrụkwọlẹ ni alị ahụn Osolobuẹ wụ Chuku ụnụ rị e ye ụnụ n'ọ wụrụ ukuu ụnụ.