Ditrọnọmi 20 - Ika

Isi Nke Ọgụn Ijẹn-Agha

¹ Ụnụ jẹn d'a lụsọn ndị-iṅẹnrẹn ụnụ agha, nị ụnụ a hụn ẹshin lẹ ụgbọ-anyịnyan wẹ kpọnhẹn lẹ ndị-agha ka ndị-agha ụnụ ọda, atụlẹ ni egun wẹ, makẹni, Osolobuẹ wụ Chuku ụnụ hụn gha alị Ijiptu wepụha ụnụ jẹnkọ d'a nọyeni ụnụ.

² Ụnụ jẹnkọnị d'e jẹnmẹ agha, onyẹ nchụn-ẹjan e jẹnpụha ihun, d'a gwa ndị-agha oku.

³ O k'a sị: “Ndị Izrẹlụ, gọn ni ntịn-o! Ụnụ jẹnkọ nwan d'a lụsọn ndị-iṅẹnrẹn ụnụ agha. Anịlẹ ni obi nahịn ụnụ; atụlẹ ni egun; anịlẹ ni wẹ rọn ụnụ egun mọbụ mamanị wẹ piripiri.

⁴ Makẹni, Osolobuẹ wụ Chuku ụnụ kẹ ụnụ lẹ ya wị! O k'a lụnị ụnụ ọgụn: o k'a lụsọn ndị-iṅẹnrẹn ụnụ, ye ụnụ mmẹri!”

⁵ Ndị-isi agha sikọ d'a sị ndị-agha, “Imẹ ụnụ, onyẹ tụn ụlọ bụ o ke kpọpụ a? Ya lamakwọ, amamgbe ọ nwụntọ agha, onyẹ ọzọ a kpọpụ ụlọ ọ tụn!

⁶ Onyẹ rụn alị vaịnị nke ọhụn bụ o ke rimẹ ẹ? Ya lamakwọ, amamgbe onyẹ ahụn a nwụnhụn imẹ agha, onyẹ ọzọ e ri ẹ!

⁷ O nwọn onyẹ badọn okpoho bụ o k'e lụ a? Ya lamakwọ, amamgbe ọ nwụnhụn imẹ agha, onyẹ ọzọ a lụrụ a!”

⁸ Ndị isi-agha ahụn a bịa d'e wechen'ẹ, sị, “O nwọn onyẹ egun rị a tụ mọbụ obi rị a nahịn? Ya lamakwọ, amamgbe obi a nahịnmazị ndị-agha ibe ẹ.”

⁹ Ndị isi-agha gwachanrịngụ ndị-agha oku ndịnị, e tumẹsọnmẹni wẹ wẹ ndị k'a kị itu-agha ndị rịn'a.

Ịlụsọn Obodo Rịlẹni Nsue Agha

¹⁰ Ụnụ bịa d'a lụsọn obodo agha, ụnụ e buzọ sị ndị rịn'a we enwẹn wẹ ye ụnụ kẹni udọn rị.

¹¹ Wẹ kweri, nị a kpọpụnị wẹ ụnụ ọnụ-mgbọn wẹ, ndị ile rịn'a e họnrin igbọn ụnụ, femẹ ụnụ.

¹² Wẹ sị achọnị wẹ udọn, nị e che wẹ ụnụ ọgụn, ụnụ e kehunmẹ obodo ahụn.

¹³ Osolobuẹ wụ Chuku ụnụ yegụnị ụnụ ẹka mẹri wẹ, gbuchanrịn nị ikẹnnyẹ ile rịn'a.

¹⁴ Nke ikpoho, ụmụ-ndu, ihiẹn-uriri lẹ ihiẹn ndị ọzọ ile họdụ imẹ obodo ahụn, ụnụ nwọn ikẹn weri wẹ, a wụrụ wẹ ihiẹn ụnụ welụa agha. Ụnụ nwọn ikẹn weri ihiẹn ụnụ narịn ndị-iṅẹnrẹn ụnụ agha — makẹni Osolobuẹ ye ụnụ ya.

¹⁵ Ẹrịra kẹ ụnụ k'e mẹ obodo ile rịlẹni ụnụ nsue, obodo ile rịlẹni alị ndịnị nọkunmẹ ụnụ.

Ịlụsọn Obodo Rị Ụnụ Nsue Agha

¹⁶ Kanị, omẹni obodo ndị rịsọnmẹ alị ndị hụn Osolobuẹ wụ Chuku ụnụ rị e ye ụnụ n'ọ wụrụ ukuu ụnụ rọ, edọnmẹkwọlẹ ni ihiẹn ọwụlẹ e kwọnni.

¹⁷ Gbuchanrịn nị wẹ — ndị Hẹti, ndị Amọ, ndị Kenaanị, ndị Pẹrẹzi, ndị Hivu lẹ ndị Jebusu; gbupụchanrịn nị wẹ kẹ Osolobuẹ wụ Chuku ụnụ dọn gwa ụnụ.

¹⁸ Ụnụ gbupụlẹni wẹ, wẹ k'a kuzi ụnụ arụ ile w'e mẹ wẹ gi e fe mmọn wẹ, mẹ ụnụ mẹ Osolobuẹ wụ Chuku ụnụ njọ.

¹⁹ Omẹni o tegụọ ụnụ kehunmẹ obodo ebe ụnụ rị a lụ a agha kẹni ụnụ weri ẹ, egikwọlẹ ni anyụn gbutumẹ osisi ndị rịn'a, makẹni ụnụ nwọn ikẹn rị mkpụrụ wẹ. E gbutulẹni wẹ. Osisi rị ọfịa wụzị ịhịan ụnụ e gi maye wẹ ọgụn?

²⁰ Kanị, ụnụ nwọn ikẹn gbutu osisi ndị wẹ ghalẹni e ri mkpụrụ wẹ, gi tụnrụn ihiẹn ụnụ gi e kehunmẹ wẹ, d'e ru mgbe obodo ụnụ rị a lụsọn agha dan.