Ditrọnọmi 2 - Ika

Isi Nke Ẹbụọ Ọwahunmẹ Ndị Izrẹlụ Wahunmẹmẹ Imẹ Atụ

¹ Ẹnyi nọ nwan, kin azụụn, dọn ihun atụ, ghasọnmẹ ụzọ hụn shi Ohimin-ufie kẹ Osolobuẹ dọn gwa m. Ẹnyi nọ tọ a wahunmẹ alị Sẹẹ hụn rị elu ugu, bie ntan, bie imọn.

² Ya Osolobuẹ nọ sị m,

³ “Ebe ụnụ wahunmẹru imẹ alịnị rị elu uguni e highọ; dọn ni nwan ihun ẹbamịn-ugu.

⁴ Gwa ndị Izrẹlụ ihiẹn ndịnị, gwashi wẹ ya ikẹn: ‘Ụnụ e d'a gha azụụn nke umunẹ ụnụ, ebọn Isọ, ndị bi alị Sẹẹ. Egun ụnụ k'a tụ wẹ; ka kpachanpụkwọ nị ẹnya ọhụnma-ọhụnma.

⁵ Amayekwọlẹ ni wẹ ọgụn, nị ẹlẹ m k'e ye ụnụ alị wẹ ọwụlẹ — kẹ hụn k'e rudẹ ọb'ụkụ ohu. E yegụọ m Isọ alị ahụn rị elu ugu Sẹẹ weri.

⁶ Gi ni egho ṅọnnarịn wẹ ihiẹn ọwụlẹ ụnụ sikọ d'e ri lẹ mirin ụnụ k'a ra.’ ”

⁷ Osolobuẹ wụ Chuku ụnụ a gọzigụọ ọrụn-ẹka ụnụ ile. O lepụgụọ ụnụ ẹnya hụnnị ile ụnụ rị e jẹnhunmẹ imẹ atụnị shịagbu enwẹn ẹ. Osolobuẹ wụ Chuku ụnụ a nọyegụọnị ụnụ ọrọgbọ ahụa ọgụnnaịnị, onwọnni ihiẹn kọnị ụnụ.

⁸ Ya ẹnyi nọ ghakpẹn umunẹ ẹnyi ndị ebọn Isọ, ndị bi alị Sẹẹ. Ẹnyi nọ latọ ụzọ shi Araba hụn gha Ẹlatị lẹ Eziọnụ-Gẹba pụha, hụn te ka nsue, ẹnyi nọ ghasọnmẹ ụzọ atụ Mụabụ.

⁹ Ya Osolobuẹ nọ sị m, “Eyekwọlẹni ndị Mụabụ, ụmụ Lọtụ, nsọngbu mọbụ maye wẹ ọgụn, nị ẹlẹ m k'e ye ụnụ ebe ọwụlẹ imẹ alị wẹ. E wegụọ m alị Arẹ ye ụmụ Lọtụ weri.”

¹⁰ (Ndị Ẹm te bi ebahụn: wẹ kin akwanran, bu ọda, sue usue kẹ ndị Anakị, ebọn adụn-aran.

¹¹ Wẹ weri wẹ kẹ ndị Rẹfa, ebọn adụn-aran, kẹ wẹ dọn e weri ndị Anakị, kanị “ndị Ẹm” kẹ ndị Mụabụ a kpọ wẹ.

¹² Nke alị Sẹẹ rị elu ugu, ndị Hori te bi ẹ, kanị ebọn Isọ chụpụ wẹ, gbupụ wẹ, bikin alị wẹ, nọkẹ kẹ ndị Izrẹlụ dọn mẹ imẹ alị ahụn Osolobuẹ ye wẹ weri.)

¹³ Osolobuẹ nọ sị, “Buli ni nwan nị ụnụ fetu Ọdanmgbugbu Zẹrẹdi.” Ya ẹnyi nọ fetu ọdanmgbugbu ahụn.

¹⁴ Ọrọgbọ ahụa ẹbụọ arịa ọgụnnaị kẹ ẹnyi nọpụ gha Kadẹshi-Bania d'e ru ebe ẹnyi nọ fetu Ọdanmgbugbu Zẹrẹdi. Ogẹn hụ, ndị ahụn ile rugụ ijẹn agha a nwụnchanrịngụọ nọkẹ kẹ Osolobuẹ dọn kun enwẹn ẹ gwa wẹ.

¹⁵ Osolobuẹ bunụmanị wẹ d'e ru nị o gbupụchanrịn wẹ ile imẹ igunrun ndị Izrẹlụ.

¹⁶ Ogẹn onyẹ ikpanzụụn imẹ ndị hụ ru ogo ijẹn agha hụn Osolobuẹ sị ahụnkọ wẹ alị hụ gi nwụnhụngụ,

¹⁷ Osolobuẹ nọ sị m,

¹⁸ “Tannị kẹ ụnụ sikọ d'a gha alị ndị Mụabụ pụha; ụnụ jẹnkọ d'a ghashi alị Arẹ.

¹⁹ Ụnụ ru ebe ndị Amọnụ, ebọn Lọtụ rị, eyekwọlẹni wẹ nsọngbu mọbụ ma wẹ agha, ni ẹlẹ m k'e ye ụnụ alị ọwụlẹ wụ nke ndị Amọnụ. E wegụọ m'a ye ebọn Lọtụ weri.”

²⁰ (W'a gụnzị alị ndị Amọnụ ye alị ndị Rẹfa, ebọn adụn-aran; uwẹ te bi ebahụn, kanị “ndị Zamzum” kẹ ndị Amọnụ a kpọ wẹ.

²¹ Wẹ kin akwanran, bu ọda, sue usue kẹ ndị Anakị wụ adụn-aran. Kanị, Osolobuẹ gbupụ wẹ kẹni ndị Amọnụ bikin ebahụn.

²² Osolobuẹ mẹzini ebọn Isọ, ndị Ẹdọm, hụn bi Ugu Sẹẹ ẹrịra ogẹn o gi gbupụnị wẹ ndị Họ kẹni uwẹ ndị Ẹdọm bikin alị wẹ. Ụmụ Isọ bi nwan ebẹhụ ndị Hori te bi d'e ru tannị.

²³ Ọ rịzị kẹ nke ndị Avụ te bi ụmụ-alị rịsọnmẹ mkpẹnrẹn Ohimin Uku d'e rukwọrị Gaza; ndị Kaftọ hụn gha alị ohimin wụ Kriti bịa gbupụ wẹ, bikin alị wẹ.)

Kẹ Izrẹlụ Dọn Mẹri Sihọnụ Eze Hẹsh'bọnụ

²⁴ Buli ni nwan nị ụnụ d'e fetu Ọdanmgbugbu Iyi udu-mirin Anọnụ. Lee n'ẹ, e wegụọ m Sihọnụ onyẹ Amọ hụn wụ eze Hẹsh'bọnụ lẹ alị a ye ụnụ weri. Werimẹ ni alị a! Lụsọnn'ẹ agha!

²⁵ Gha tannị jẹnmẹ, m k'e mẹ egun ụnụ tụma alị ile rị okpuru igwere. Wẹ jẹnkọ d'a nụ ukwere ụnụ, ẹhụ a mama wẹ nni, obi erukọzị wẹ alị.

²⁶ Ya m nọ nọ atụ Kẹdẹmọtụ zi ozi jẹnni Sihọnụ wụ eze Hẹsh'bọnụ d'a sị a nị ẹnyi gi udọn ghafe, sị,

²⁷ “Nị mmẹ lẹ ndị nke m ghafe alị ụnụ; ụzọ-ụzọ kẹ ẹnyi k'a gha; ẹnyi akụyekọ ẹka-nni mọbụ ẹka-ekpẹn.

²⁸ Oṅiṅọn kẹ ẹnyi jẹnkọ d'e ṅọn ihiẹn-oriri ẹnyi k'e ri lẹ mirin ẹnyi k'a ra. Nị ẹnyi hụ gi ụkụ ghafe —

²⁹ kẹ ụmụ Isọ bi Sẹẹ dọn mẹni ẹnyi, uwẹ lẹ ndị Mụabụ bi Arẹ; nị ẹnyi hụ ghafe ẹnyi e we fetu Jọdanị, banye alị Osolobuẹ wụ Chuku ẹnyi rị e ye ẹnyi.”

³⁰ Kanị Sihọnụ wụ eze Hẹsh'bọnụ ekweni nị ẹnyi gha alị a, makẹni Osolobuẹ wụ Chuku ụnụ a kpọkingụọ a obi, mẹ ẹ gba isi-akwanran, n'ọ hụn ụzọ bu ẹ che ụnụ ẹka mẹri, k'o dọn nwan rị tannị.

³¹ Osolobuẹ nọ sị m, “Lee ẹ! E bumẹgụọ m Sihọnụ lẹ alị a che ụnụ ẹka. Mẹrimẹ n'ẹ nwan, weri ni alị a.”

³² Ogẹn Sihọnụ lẹ ndị agha a gi nwan pụha Jahazị d'a lụsọn ẹnyi agha,

³³ Osolobuẹ wụ Chuku ẹnyi nọ w'ẹ ye ẹnyi mẹri; ẹnyi nọ gbu ẹ, ya lẹ ụmụ a lẹ ndị-agha a ile.

³⁴ Ogẹn ahụn kẹ ẹnyi gi weri obodo ẹ ile, gbuchanrịn ndị alị a: kẹ ikẹnnyẹ kẹ ikpoho kẹ ụmụ-ẹka. Onwọnni onyẹ ẹnyi latọ.

³⁵ Kanị anụ lẹ ihiẹn ndị ọzọ sụọ kẹ ẹnyi kpọnrin imẹ obodo ndị hụ ẹnyi tikpọ.

³⁶ Onwọnni obodo karị ẹnyi ẹka, ghakwọrị obodo Arụa rị mkpẹnrẹn Iyi Anọnụ lẹ isi-obodo hụ hụn rị imẹ Ọdanmgbugbu Iyi ahụn d'e ru Gilẹdị, Osolobuẹ wụ Chuku ẹnyi wechanrịn wẹ ile ye ẹnyi.

³⁷ Kanị, nke ndị Amọnụ, ihiẹn Osolobuẹ wụ Chuku ẹnyi gwa ẹnyi kẹ ụnụ mẹ: ụnụ emẹtụnị alị ọwụlẹ wụ nke ndị Amọnụ ẹka kaka, kẹ hụn rị mkpẹnrẹn Iyi Jabọkụ ebe alị hụ ru nkọ hụ kẹ obodo ndị rịsọnmẹ ẹgbẹrẹ ugu alị wẹ.