Ditrọnọmi 19 - Ika

Isi Nke Mmitenẹi Obodo Mgbaban

¹ Ogẹn Osolobuẹ wụ Chuku ụnụ e gi tikpọgụ ndị alị ndị ahụn ọ rị e ye ụnụ alị wẹ, hụn ụnụ gi chụpụgụ wẹ, biri obodo wẹ lẹ ụlọ wẹ,

² họtọ nị obodo ẹtọ. Wẹ k'a rịsọnmẹ etintin azụụn ichẹn-ichẹn alị ahụn Osolobuẹ wụ Chuku ụnụ n'e ye ụnụ nị ụnụ weri.

³ Besọnmẹ ni ụzọ pụ wẹ, ụnụ kebegụ alị ahụn Osolobuẹ wụ Chuku ụnụ rị e ye ụnụ n'o họnrin ukuu ụnụ azụụn ẹtọ hụn obodo ndịnị rịsọnmẹ etintin wẹ, nị onyẹ ọwụlẹ gbu ịhịan hụn ụzọ a gbashi hụn ka a nsue imẹ wẹ.

⁴ Ọnwan wụ iwu gbashịarị onyẹ gbu ibe ẹ, gbashi ebahụn d'e ghe isi, omẹni ẹlẹ ọ kpachanpụ ẹnya gbu ẹ, ẹlẹ o rotọ a erotọ.

⁵ Ikẹnkwọ ịhịan lẹ ibe ẹ jẹn ọfịa d'e gbu osisi, nị isi-anyụn a fịọpụ ebe ọ rị e fe anyụn a e gbu osisi, tu hụn ya lẹ ịya wị, gbu ẹ. Onyẹ ahụn k'a s'ẹka gbashi ohu imẹ obodo ndị ahụn gi ghe isi ẹ.

⁶ Amamgbe onyẹ e gbugwarịnị ebọn onyẹ hụn o gbu e gi olulu chụ a, kunrun ẹ, omẹni obodo ahụn ọ gbakọ e tekẹ, gbu ẹ, bụ o te mẹni ihiẹn w'e gi gbu ẹ, ebe o mẹ ni ẹlẹ o rotọ a gbu hụn o gbu.

⁷ Ịya haịn m gi sị ụnụ họtọnị enwẹn ụnụ obodo ẹtọ.

⁸ Ogẹn lalanị, Osolobuẹ wụ Chuku ụnụ weshịagụ alị ụnụ k'o dọn kụn ẹfan a kwe ndị nẹdi ụnụ kanị nkwa, yechanrịn ụnụ alị ahụn ile o kwe wẹ nkwa a,

⁹ ụnụ e wepụhazị obodo ẹtọ cheni. O sikọ d'e weshịa a omẹni ụnụ hụ e dọnrin ẹnya e mẹchanrịn ihiẹn ndịnị ile m rị a gwa ụnụ tannị, hụn wụ ịnị ihiẹn Osolobuẹ wụ Chuku ụnụ a sụọ ụnụ lẹ ịgha ụzọ a ogẹn ile.

¹⁰ Họtọ nị obodo ndị ahụn amamgbe wẹ gha e gbu onyẹ mẹlẹni njọ, ẹdeke a rị ụnụ ẹka imẹ alị ahụn Osolobuẹ wụ Chuku ụnụ rị e ye ụnụ n'ọ wụrụ ukuu ụnụ.

¹¹ Kanị omẹni ịhịan rị e we iwe ibe ẹ, hụarị che ẹ, maye ẹ, gbu ẹ, gbashi hụn ọwụlẹ imẹ obodo ndịnị,

¹² ndị-ichẹn obodo wẹ k'e zi wẹ chọjẹn ẹ, gha obodo ahụn welụa a, w'ẹ ye onyẹ e gbugwarịnị ebọn hụ n'o gbu ẹ.

¹³ Emẹkwọlẹ ni omikẹn ẹ: finchanpụ nị ikpe-ọmụma igbu ịhịan mmakalaka e wẹhẹ imẹ Izrẹlụ, kẹni ọ rịnị ụnụ mma.

Ihiẹn-okẹn

¹⁴ Ehuezụkalẹ ihiẹn-okẹn ibe i hụn ndị nẹdi ụnụ butọgụnị ụnụ imẹ ukuu ru i ẹka alị ahụn Osolobuẹ wụ Chuku ụnụ rị e ye ụnụ weri.

Ịshịa-ẹri

¹⁵ Omẹni ịhịan mẹ njọ mọbụ eje-ihiẹn, egikọ wẹ ẹri onyẹ ohu sụọ shịa ma a ikpe. Madụ ẹbụọ mọbụ ẹtọ sikọ d'a shịagụrịrị ẹri wẹ kebe gi oku hụ dọn.

¹⁶ Omẹni ịhịan bu iwe ịhịan obi shịagbu ẹ ẹri,

¹⁷ mmadụ ẹbụọ ahụn ikpe seni sikọ d'a pụharịrị ihun Osolobuẹ, ihun ndị nchụn-ẹjan lẹ ndị ọka-ikpe rị ọrụn ogẹn ahụn.

¹⁸ Ndị ahụn sikọ d'a han eṅẹn jẹnkọ d'a chọkpọ alị oku hụ; wẹ hụn a nị ọshẹri ahụn tụ ntụ, buokin nwẹnẹ ẹ ọnụ,

¹⁹ ụnụ e mẹ ẹ ihiẹn o te chọ n'o mẹ nwẹnẹ ẹ. Ụnụ k'e wepụchanrịnrịrị eje-ihiẹn ahụn imẹ igunrun ụnụ.

²⁰ Ndị họdụnị k'a nụ ihiẹnni, egun a tụma wẹ, onwọnzini ogẹn eje-ihiẹn nọ ẹrịra e gizi mẹ imẹ igunrun ụnụ.

²¹ Emẹkwọlẹ ni omikẹn imẹ ihiẹnni: Onyẹ gbu ịhịan, wẹ gbugwarị a; onyẹ tikpọ ịhịan ẹnya, wẹ tikpọgwarị a ẹnya; onyẹ tikwọn ịhịan eze, wẹ tikwọngwarị a eze; onyẹ mẹ ịhịan ihiẹn ẹka, wẹ mẹgwarị a ya ẹka; onyẹ mẹ ịhịan ihiẹn ụkụ, wẹ mẹgwarị a ya ụkụ.