Ditrọnọmi 18 - Ika

Isi Nke Mmẹsatọ Ihiẹn Ru Ndị Nchụn-ẹjan Lẹ Ndị Livaị

¹ Ndị nchụn-ẹjan lẹ ndị Livaị ibe wẹ họdụnị, ya wụ ebọn Livaị ile, enwọnkọ alị mọbụ ukuu nke wẹ imẹ Izrẹlụ. Oyiye ndị Izrẹlụ gi ọkụn e ye Osolobuẹ kẹ w'e gi e bi, makẹni ọhụn k'a wụ ukuu wẹ.

² Esọnkọ wẹ ndị Izrẹlụ ibe wẹ nwọn ukuu; Osolobuẹ wụ ukuu wẹ, k'o dọn kwe wẹ nkwa.

³ Ihiẹn ndịnị k'a gha e ru ndị nchụn-ẹjan ẹka imẹ efin mọbụ atụnrụn ndị Izrẹlụ gi chụn ẹjan: ẹka a, agban a lẹ ihiẹn ile rị imẹ ẹfọ a.

⁴ Ụnụ k'a gha e ye wẹ ọka ibuzọ ụnụ, manya-ọhụn lẹ ofigbọn-olivu ibuzọ ụnụ lẹ ẹṅẹnrẹn ibuzọ ụnụ kọpụha ẹhụ atụnrụn ụnụ —

⁵ makẹni Osolobuẹ wụ Chuku ụnụ a ghagụọ imẹ ebọn ụnụ ile họrị wẹ lẹ ụmụ wẹ nị wẹ hụn ụzọ e gi ẹfan Osolobuẹ e wuzo, a rụnn'a ọrụn ogẹn ile.

⁶ Onyẹ Livaị hụn gha obodo ọwụlẹ o bi imẹ Izrẹlụ pụha, bịa ebẹhụ Osolobuẹ họrị, makẹni ọ hụ a dụ a n'ọ rụn ebẹhụ,

⁷ o sọn ndị Livaị ibe ẹ rị ihun Osolobuẹ ebẹhụ a rụn ọrụn hụ wẹ gi Ẹfan Osolobuẹ wụ Chuku ụnụ a rụn,

⁸ ihiẹn ọwụlẹ pụhanị, ya lẹ ibe ẹ e ke ẹ ahanmahan, ọ sụọkwọn'a nị ezi-lẹ-ụlọ a hụ e wẹhẹn'ẹ egho wẹ re ihiẹn.

Ịgba-ẹfa Lẹ Ịgwọ-ọgụn Wụ Arụ

⁹ Ụnụ ban alị ahụn Osolobuẹ wụ Chuku ụnụ rị e ye ụnụ, elerikwọlẹ ni arụ ndị ahụn alị ndị rị ebahụn rị e mẹ:

¹⁰ y'e enwọnkwọlẹ onyẹ ọwụlẹ imẹ igunrun ụnụ gi nwa a okẹnnyẹ mọbụ okpoho chụn ẹjan w'a dụn ọkụn mọbụ onyẹ a gba ẹfa mọbụ onyẹ a kọwa oro ihiẹn kẹ wẹ e mẹ mọbụ onyẹ nwọn mmọn o gi a hụn ụzọ mọbụ onyẹ a gwọ ọgụn;

¹¹ mọbụ onyẹ gi ọgụn a rẹrẹrị ihiẹn mọbụ ohẹnrẹn mọbụ onyẹ e sọn ndị-mmọn e ku mọbụ onyẹ a ma ozun.

¹² Onyẹ ọwụlẹ hụn e mẹ ihiẹn ndịnị rụ arụ ẹnya Osolobuẹ. Ufiri ụrụ ndịnị kẹ Osolobuẹ wụ Chuku ụnụ k'e gi chụpụ ndị alị ndịnị nị ụnụ biri.

¹³ Enwọnkwọlẹ ni ihiẹn w'e gi kọrịanị ụnụ ebe Osolobuẹ wụ Chuku ụnụ rị.

Onyẹ Amụma Ahụn Pụ-ichẹn

¹⁴ Alị ndịnị ụnụ k'e weri alị wẹ e gọn ndị-ihẹnrẹn lẹ ndị a gba ẹfa ntịn, kanị nke ụnụ rị ichẹn, Osolobuẹ wụ Chuku ụnụ sị ụnụ emẹlẹ ẹrịra.

¹⁵ Osolobuẹ wụ Chuku ụnụ k'a gha imẹ umunẹ ụnụ wepụhanị ụnụ onyẹ-amụma nọ kẹ mmẹ; ụnụ k'e gọnrịrị onyẹ-amụma ahụn ntịn.

¹⁶ Makẹni ịya kẹ ụnụ rịọ Osolobuẹ wụ Chuku ụnụ ụhụọhịn hụ ụnụ lẹ ịya zu Ugu Horẹbụ (Ugu Saịnaị), ụnụ sị, “Dodo, anịlẹ ẹnyi nụzị olu Osolobuẹ wụ Chuku ẹnyi mọbụ hụnzị okẹn ọkụnnị, amamgbe ẹnyi a nwụnhụn.”

¹⁷ Osolobuẹ nọ sị m, “Ihiẹn wẹ ku hụghọ mma.

¹⁸ M k'a gha imẹ ndị nke wẹ wepụhanị wẹ onyẹ-amụma nọ kẹ ịyụ; m k'e bu oku m che ẹ ọnụ, ọ gwachanrịn wẹ ihiẹn ile m gwa a.

¹⁹ Onyẹ ọwụlẹ gọnlẹni ntịn oku-ọnụ m onyẹ-amụma ahụn k'e gi ẹfan m ku, mmẹ lẹ enwẹn m jẹnkọ d'a jụ onyẹ hụ ya.

²⁰ Kanị, nke onyẹ-amụma ọwụlẹ hụn k'e gi ẹfan m ku ihiẹn m zilẹn'ẹ mọbụ hụn gi ẹfan mmọn-lẹ-iyi ku, wẹ k'e gburịrị a.”

²¹ Ikẹnkwọ ụnụ a sị enwẹn ụnụ, “Nanị ẹnyi e dọn marịn ozi ghalẹni ẹka Osolobuẹ bịa?”

²² Onyẹ-amụma gi ẹfan Osolobuẹ bu amụma bụ o mẹni, ọ bụnnị, ịya wụ nị ihiẹn o ku aghanị ẹka Osolobuẹ bịa, o ku ihiẹn rị a obi. Atụlẹ ni egun ẹ.