Ditrọnọmi 17 - Ika

Isi Nke Mmẹsa

¹ Egikwọlẹ efin mọbụ atụnrụn ẹhụ zulẹni oke mọbụ nwọn nsọngbu ọwụlẹ chụnyeni Osolobuẹ wụ Chuku ụnụ ẹjan, makẹni arụ k'ọ wụ ẹnya a.

² Ikẹnkwọ a hụn wẹ okẹnnyẹ mọbụ okpoho bi imẹ igunrun ụnụ, imẹ obodo ohu imẹ ndị Osolobuẹ wụ Chuku ụnụ rị e ye ụnụ, n'ọ rị e mẹ ihiẹn rịlẹni mma ẹnya Osolobuẹ wụ Chuku ụnụ, gi ẹ tikpọ iwu ẹ, iwu ahụn kwọngbama ụnụ lẹ Osolobuẹ,

³ e fe mmọn-lẹ-iyi, a kpọnị wẹ isi alị, a kụnị ẹnyanwụn mọbụ ifọn mọbụ kokisẹ rị elu-igwere isi alị, ihiẹn m sị ụnụ emẹlẹ.

⁴ Wẹ bịa d'a gwaghọsị ụnụ ya, ụnụ sikọ d'a chọkpọgụrịrị alị a ọhụnma-ọhụnma. Omẹni ezioku rọ nị ihiẹn-ifẹnrẹn nọ ẹrịra rị e mẹ imẹ Izrẹlụ,

⁵ ụnụ e we okẹnnyẹ mọbụ okpoho ahụn mẹ eje-ihiẹnni shi ọnụ-mgbọn alị ụnụ, nọ ebahụn magbu ẹ.

⁶ Ẹri mmadụ ẹbụọ mọbụ ẹtọ shịa kẹ wẹ gi e gbu ịhịan; egikọ wẹ ẹri onyẹ ohu sụọ gbu ịhịan.

⁷ Wẹ jẹnkọnị d'e gbu ẹ, ndị hụ shịagbu ẹ ẹri k'e buzọ ma a ọmụma, ịhịan ile kebe buche ẹka. Ụnụ sikọ d'e wepụrịrị eje-ihiẹn ahụn imẹ igunrun ụnụ, wepụchanrịn a.

Ikpe Zeni

⁸ Wẹ buhẹni ụnụ ikpe bụ ọ nịnị ụnụ dọnzi imẹ ọgwa ụnụ, kẹ ikpe izighẹ rọ, kẹ wẹ rị a zụọ ihiẹn kẹ wẹ maye ịhịan mọbụ kpari ẹ, bu ni wẹ shi ebahụn Osolobuẹ wụ Chuku ụnụ k'a họrị.

⁹ Jẹnburu ni ndị Livaị lẹ ọka-ikpe ahụn rị ogẹn ahụn d'a chọ kẹ w'e mẹ ikpe ahụn. Wẹ sikọ d'a han eṅẹn.

¹⁰ Eṅẹn ọwụlẹ wẹ hannị ụnụ ebahụn Osolobuẹ k'a họrị, ụnụ sikọ d'e weri ẹ. Dọnrinkwọ nị ẹnya mẹ ihiẹn ile wẹ sị ụnụ mẹ.

¹¹ Gi ni ihiẹn ọwụlẹ wẹ sị ụnụ mẹ lẹ eṅẹn ọwụlẹ wẹ hannị ụnụ rụn ọrụn. Agharịkwọlẹ ni ihiẹn wẹ sị ụnụ mẹ d'a danshi ẹka-nni mọbụ ẹka-ekpẹn.

¹² Onyẹ pa oku ọka-ikpe mọbụ onyẹ nchụn-ẹjan hụn e wuzo ebahụn a rụnnị Osolobuẹ wụ Chuku ụnụ ọrụn, wẹ k'e gburịrị a. Ụnụ k'e wepụchanrịnrịrị eje-ihiẹn ahụn imẹ Izrẹlụ.

¹³ Ịhịan ile k'a nụ a, egun a tụ wẹ, e fekọzị wẹ isi.

Eze

¹⁴ Ogẹn ụnụ e gi banyegụ alị ahụn Osolobuẹ wụ Chuku ụnụ rị e ye ụnụ, birigụ a, nị ukun e rugụ ụnụ alị imẹ ẹ, nị ụnụ a sị, “Nị ẹnyi tumẹni eze nọkẹ ndị alị ọzọ nọhunmẹni ẹnyi,”

¹⁵ hụnkwọ n'a nị eze hụn Osolobuẹ wụ Chuku ụnụ họrị kẹ ụnụ tumẹ n'ọ kị ụnụ. O k'a wụrịrị nwẹnẹ ụnụ kẹti-kẹti. Etumẹkwọlẹ ni otumunyẹ, onyẹ wụlẹni onyẹ Izrẹlụ ibe ụnụ n'ọ kịma ụnụ.

¹⁶ Hụn e sọnn'ẹ, eze hụ enwọnkwọlẹ ẹshin ọda-ọda mọbụ mẹ ndị alị ụnụ kinzi alị Ijiptu d'a chọma ẹshin, makẹni Osolobuẹ a sịgụọ ụnụ, “Ekinkwọlẹ ni ụzọ ahụn;”

¹⁷ y'a lụkwọlẹ inyẹnmẹ bu ọda, amamgbe obi ẹ a gha ebe Osolobuẹ rị pụ; y'a kpatọkwọlẹ siliva lẹ goru ọda.

¹⁸ Ọ weri ọnọdị ukpo-eze alị-eze ẹ, ọ narịn ndị nchụn-ẹjan, ndị ebọn Livaị, Ẹkụkwọ-Iwuni, deri ẹ ye ẹhụhụọ, kwọndọn.

¹⁹ O sikọ d'e kwọndọn ẹ, a gụn a o we nwụn, n'ọ hụn ụzọ marịn kẹ wẹ dọn a gbaye Osolobuẹ wụ Chuku ẹ, dọnrin ẹnya e sọn ihiẹn ile rị imẹ Iwuni lẹ uhi ndịnị,

²⁰ makẹ ọ gha e ro nị ịya ka umunẹ ẹ, amamgbe ọ gha Iwu danpụ, danshi ẹka-nni mọbụ ẹka-ekpẹn. Ogẹn ahụn, ịya lẹ ụmụ a kịbie alị-eze ẹ imẹ Izrẹlụ.