Ditrọnọmi 16 - Ika

Isi Nke Mmisin Mmẹmmẹ-Nghafe

¹ A nyanhan nị ifọn Abibu, e gi ẹ e mẹni Osolobuẹ wụ Chuku ụnụ Mmẹmmẹ-nghafe, makẹni ifọn Abibu k'o nọ gi abalị wepụha ụnụ imẹ alị Ijiptu.

² Nọ nị ebe Osolobuẹ k'a họrị nị Ẹfan a k'a rị gbuni Osolobuẹ wụ Chuku ụnụ atụnrụn ohu mọbụ ewu ohu mọbụ efin ohu.

³ Egikwọlẹ ni brẹdi yisti rị ri ẹ, ka ri ni brẹdi yisti rịlẹni, brẹdi ụya; rin'ẹ akp'ọhịn ẹsa, makẹni ọhụn ghọsị nị ụnụ rị a hụhụ ogẹn ụnụ gi gha alị Ijiptu pụ. E mẹn'ẹ nị ụnụ hụn ụzọ a nyanhan ogẹn ụnụ gi gha alị Ijiptu pụ, ụnụ e we nwụn.

⁴ Anịkwọlẹ ni yisti rị ebe ọwụlẹ imẹ alị ụnụ ọrọgbọ akpọhịn ẹsa ahụn. Anịlẹ ni anụ ahụn ụnụ gbu ogẹn ẹnyasị ụhụọhịn ibuzọ Mmẹmmẹ ahụn bọ-ọra.

⁵ Ẹlẹkwọ imẹ obodo ile rị alị Osolobuẹ wụ Chuku ụnụ ye ụnụ kẹ ụnụ a nọ gbu anụ Mmẹmmẹ-nghafe —

⁶ ebahụn o k'a họrị nị Ẹfan a rị sụọ kẹ ụnụ sikọ d'a nọ mẹ ẹ. Ebahụn kẹ ụnụ a nọ gbu anụ Mmẹmmẹ-nghafe ogẹn ẹnyasị, anwụn rọgụ, ụhụọhịn ahụn ụnụ gi gha alị Ijiptu pụha.

⁷ Nọ nị ebahụn Osolobuẹ wụ Chuku ụnụ k'a họrị hụnmari ẹ. Eki fọn ụtụntụn, ụnụ a lashi iwe ụnụ.

⁸ Ri ni brẹdi yisti rịlẹni akpọhịn isin, nke akp'ọhịn ẹsa rịn'a ụnụ e zu ihun Osolobuẹ wụ Chuku ụnụ; arụnlẹ ni ọrụn ụhụọhịn hụ.

Mmẹmmẹ Izuka-nke-ẹsa (Mmẹmmẹ Ịghọ Ihiẹn-ugbo)

⁹ Gụnpụ nị izuka ẹsa gha ụhụọhịn ụnụ bemẹ ọka bidọn,

¹⁰ ụnụ e mẹni Osolobuẹ wụ Chuku ụnụ Mmẹmmẹ Izuka-nke-ẹsa, ụnụ e wẹhẹsọnmẹn'ẹ oyiye ghapụha ụnụ obi k'o yehan ụnụ d'e ye ẹ ọghọ;

¹¹ ụnụ a nọ ihun Osolobuẹ wụ Chuku ụnụ ghọghọ, ebahụn o k'a họrị Ẹfan a k'a rị, ụnụ lẹ ụmụ ụnụ ikẹnnyẹ lẹ ikpoho, idibo ụnụ ikẹnnyẹ lẹ ikpoho, ndị Livaị, ndị abịamabịa, ndị nwọnlẹni nẹdi lẹ ikpoho di wẹ nwụn.

¹² Nyanhankwọ n'ị te wụ igbọn imẹ alị Ijiptu, dọnrin ẹnya sọnchanrịn iwu ndịnị.

Mmẹmmẹ Ibi-imẹ-ọdụ

¹³ Ụnụ ghọgụhụ ihiẹn-ugbo, kụkpọgụ ọka, pịngụ vaịnị, ụnụ e gi akpọhịn ẹsa mẹ Mmẹmmẹ Ibi-imẹ-ọdụ.

¹⁴ Ghọghọ nị ọhụnma-ọhụnma ụnụ gha e mẹ Mmẹmmẹ ahụn, ụnụ lẹ ụmụ ụnụ ikẹnnyẹ lẹ ikpoho, idibo ụnụ ikẹnnyẹ lẹ ikpoho lẹ ndịnị wẹ hụn bisọnmẹ imẹ obodo ụnụ: ndị Livaị, ndị abịamabịa, ndị nwọnlẹni nẹdi lẹ ikpoho di wẹ nwụn.

¹⁵ Gi ni akp'ọhịn ẹsa ahụn mẹni Osolobuẹ wụ Chuku ụnụ Mmẹmmẹ — ebahụn Osolobuẹ k'a họrị. Makẹni, Osolobuẹ wụ Chuku ụnụ k'e gi ihiẹn-ugbo gọzi ụnụ ọda-ọda, gọzi ọrụn ẹka ụnụ ile, hụn ụnụ e gi ghọghọ.

¹⁶ Ya wụ, mgbe ẹtọ ahụa kẹ ikẹnnyẹ ụnụ k'a gha a bịa ihun Osolobuẹ wụ Chuku ụnụ ebahụn o k'a họrị; ogẹn Mmẹmmẹ brẹdi yisti rịlẹni, ogẹn Mmẹmmẹ Izuka-nke-ẹsa lẹ ogẹn Mmẹmmẹ Ibi-imẹ-ọdụ. Y'e nwọnkwọlẹ onyẹ k'a gba ẹka bịa ihun Osolobuẹ:

¹⁷ onyẹ-onyẹ imẹ ụnụ k'e wẹhẹrịrị oyiye — kẹ Osolobuẹ wụ Chuku ụnụ gọzihan a.

Ndị E Dọnzi Oku

¹⁸ Imẹ ebọn ụnụ rị ichẹn-ichẹn, tumẹsọnmẹni ndị e dọnzi oku lẹ ndị-isi imẹ obodo ọwụlẹ Osolobuẹ wụ Chuku ụnụ rị e ye ụnụ; uwẹ nwọn ọrụn idọnzini wẹ oku ọhụnma.

¹⁹ Ahanjalẹ ni eṅẹn mọbụ gbeyeni ịhịan. Anakwọlẹ ni egho-azụụn, makẹni egho-azụụn e kpukin onyẹ marịn ihiẹn ẹnya, e mẹ onyẹ kụrụ ọtọ a fịhutọ oku onyẹ ezi-omumẹ.

²⁰ Kwadọn ni eṅẹn furuni; kwadọn ni eṅẹn furuni sụọ; kẹni ụnụ hụn ụzọ rị ndụn nwọnrin alị ahụn Osolobuẹ wụ Chuku ụnụ rị e ye ụnụ.

Ife Mmọn-lẹ-Iyi

²¹ Ezumẹkwọlẹ ni osisi Ashẹra ahụn ndị alị ahụn a rụa ye ụsụọ ukpo nchụn-ẹjan ụnụ rụnnị Osolobuẹ wụ Chuku ụnụ;

²² etumẹlẹ ni ọmụma rụama kẹ wẹ e mẹ, makẹni ihiẹn ndịnị e ze Osolobuẹ wụ Chuku ụnụ ize.