Ditrọnọmi 14 - Ika

Isi Nke Mmẹnọ Ndị Rị Ichẹn

¹ Ụmụ Osolobuẹ wụ Chuku ụnụ kẹ ụnụ wụ, egilẹ ni nwan ufiri onyẹ nwụnnị be enwẹn ụnụ ihiẹn mọbụ kọpụ ntutu ụnụ ibe ihun,

² makẹni ụnụ wụ ndị Osolobuẹ wụ Chuku ụnụ họpụha, dọn ụnụ nsọ. Imẹ alị ile rị ichẹn-ichẹn rị elu-ụwa, Osolobuẹ a họrịgụọ ụnụ nị ụnụ wụrụ ndị nke ẹ pụ-ichẹn.

Ihiẹn-oriri Rụnị Lẹ Hụn Rụlẹni

³ Erikwọlẹ ni ihiẹn ọwụlẹ Osolobuẹ sị ụnụ sọ.

⁴ E lee ni anụ ndị ụnụ k'e ri: efin, atụnrụn lẹ ewu;

⁵ ele, mgbadan, ele-jaki, ewu-ọfịa, ewu-ugu, mgbadan mpịn a sue lẹ atụnrụn-ugu.

⁶ Ri ni anụ ọwụlẹ ụkụ a wachanrịn ẹbụọ hụn e rizi ọnụ.

⁷ Kanị, imẹ anụ ndị ahụn e ri ọnụ mọbụ ndị ụkụ wẹ wachanrịn, erilẹ ni ndịnị: anyịnyan-mkpukpuke, oke-ebo lẹ ẹlẹtu-ọmụma, makẹni ọsụọn'a nị w'e ri ọnụ, ụkụ wẹ awabeni; wẹ wụrụnị ụnụ ihiẹn rụnị;

⁸ ezin rụzịkwọ arụ: ụkụ a a waghọ kanị ara rị ọnụ. Erikwọlẹ ni anụ wẹ mọbụ mẹtụ ozun wẹ ẹka.

⁹ Imẹ ihiẹn ile rị imẹ mirin, ụnụ nwọn ikẹn ri hụn ọwụlẹ nwọn ẹzuzu o gi e gu mirin lẹ okpukpu —

¹⁰ ka erikwọlẹ ni ihiẹn ọwụlẹ nwọnlẹni wẹ ẹbụbụọ; wẹ wụrụnị ụnụ ihiẹn rụnị.

¹¹ Ụnụ nwọn ikẹn ri nnụnụ ọwụlẹ rụlẹni.

¹² Ka erikwọlẹ ni ndịnị: ugọn, udele, udele-ogi,

¹³ egbe-ufie, egbe-ogi, ụdị egbe ọwụlẹ,

¹⁴ nnụnụ-ogi ọwụlẹ e yi oro kẹ uroko,

¹⁵ ozuzu kpụ mpịn, “amisu”, nnụnụ-ohimin nwọn ụkụ ọdọgụnma, anwụnkwọ ile,

¹⁶ ozuzu-nta, ozuzu-uku, ozuzu-ọchan,

¹⁷ ozuzu atụ, anwụnkwọ e ri azụn rị imẹ mirin, ọdọgụnma e ri azụn rị mirin sụọ,

¹⁸ stọkụ, ụdị ụgbala ile, hupo ugbele-isi ẹ sueshi azụụn lẹ ụsụ.

¹⁹ Otutu ile a rị igwee e fe, wẹ wụrụnị ụnụ ihiẹn rụnị; erilẹ ni wẹ.

²⁰ Ka, ri ni otutu ọwụlẹ rụlẹni.

²¹ Ụnụ hụn ozun anụ, erilẹ n'ẹ. Ụnụ nwọn ikẹn w'ẹ ye abịamabịa bi imẹ igunrun ụnụ: ya nwẹn nwọn ikẹn ri ẹ; ụnụ nwọnzikwọ ikẹn re ẹ ye abịamabịa. Ụnụ nwẹn wụ ndị Osolobuẹ wụ Chuku ụnụ wepụha; ụnụ wụ ndị nke ẹ pụ ichẹn. Egilẹ ni mirin-ẹran ewu shi nwa a.

Iye Ụzọ-ohu-imẹ-ụzọ-iri

²² Hụnkwọ n'a nị ụnụ e wepụha ohu-imẹ-iri ihiẹn-ugbo ụnụ ahụa-ahụa.

²³ We ni ụzọ-ohu-imẹ-ụzọ-iri hụ jẹn ebe Osolobuẹ wụ Chuku ụnụ k'a họrị nị ya kẹ Ẹfan a k'a rị, ụnụ a nọ ihun ẹ ebẹhụ ri ụzọ-ohu-imẹ-ụzọ-iri hụ — ọka lẹ manya-ọhụn lẹ ofigbọn-olivu ụnụ lẹ okẹn ibuzọ efin lẹ atụnrụn lẹ ewu ụnụ, kẹni ụnụ hụn ụzọ gi ẹ mụnrụn ịgbaye Osolobuẹ wụ Chuku ụnụ ogẹn ile.

²⁴ Kanị, omẹni ebahụn e tekẹ, nị y'a sakọ ẹka bujẹn ụzọ-ohu-imẹ-ụzọ-iri ihiẹn Osolobuẹ wụ Chuku ụnụ gi gọz'i (makẹni ebe hụn Osolobuẹ wụ Chuku ụnụ họrị nị ya kẹ Ẹfan a k'a rị e tekẹ),

²⁵ y'a gwarị re ụzọ-ohu-imẹ-ụzọ-iri ahụn, weri egho ẹ shi ebahụn Osolobuẹ wụ Chuku ụnụ k'a họrị.

²⁶ Gi egho ahụn ṅọnrin ihiẹn ọwụlẹ sụọn'ị. Ọsụọn'a efin mọbụ atụnrụn mọbụ manya nkpụrụ-osisi mmaka mọbụ manya wẹ bama — ihiẹn ọwụlẹ ị chọ. Ịyụ lẹ ezi-lẹ-ụlọ ị a nọ ihun Osolobuẹ wụ Chuku ụnụ ebahụn gi ẹ ri oriri, ghọghọ.

²⁷ Azọkwọlẹ ni ndị Livaị bi imẹ obodo ụnụ, makẹni onwọnni alị mọbụ ukuu wẹ keye wẹ.

²⁸ Njẹndemẹ ahụa ẹtọ ọwụlẹ, wẹhẹ ni ụzọ-ohu-imẹ-ụzọ iri ihiẹn-ugbo ahụa nke ẹtọ rịn'a, dọnmẹsọnmẹ imẹ obodo rị ichẹn-ichẹn ụnụ bi,

²⁹ nị ndịnị wẹ hụn bi imẹ obodo ụnụ bịa d'e ri, rijun ẹfọ: ndị Livaị (makẹni ekeyeni wẹ ndị Livaị alị mọbụ ukuu nke ẹka wẹ), ndị abịamabịa, ndị nwọnlẹni nẹdi lẹ ikpoho di wẹ nwụn; lẹzi kẹni Osolobuẹ wụ Chuku ụnụ hụn ụzọ a gọzi ihiẹn ile ụnụ buche ẹka.