Ditrọnọmi 13 - Ika

Isi Nke Mmẹtọ Ife Mmọn-Lẹ-Iyi

¹ Onyẹ-amụma mọbụ onyẹ-nrọ a a bụn pụha imẹ igunrun ụnụ, ku ihiẹn-nghọsị mọbụ ihiẹn a tụ ẹnya,

² nị ihiẹn-nghọsị ahụn mọbụ ihiẹn ahụn a tụ ẹnya ọ gwa ị e mẹ, n'ọ s'ị nwan, “Nị ẹnyi sọnmẹ mmọn-lẹ-iyi; nị ẹnyi fe wẹ,” mmọn lẹ iyi hụn Osolobuẹ sị ụnụ efelẹ,

³ egọnkwọlẹ ntịn oku onyẹ-amụma hụ mọbụ onyẹ hụ nrọ a a bụn. Osolobuẹ wụ Chuku ụnụ rịkwọ e lele i n'ọ marịn kẹ y'e gighọ obi i ile lẹ umẹ-ndụn ị ile nwọn ihiẹn-ọsụsụọ a.

⁴ Osolobuẹ wụ Chuku ụnụ kẹ ụnụ k'e sọn; ịya kẹ ụnụ k'a tụ egun ẹ. E mẹ ni ihiẹn ọ sị ụnụ mẹ, ụnụ a gbaye ẹ, fe ẹ, kwọnkẹnmẹ ẹ.

⁵ Wẹ k'e gburịrị onyẹ-amụma ahụn mọbụ onyẹ ahụn nrọ a a bụn, makẹni ọ sị wẹ nupụ isi okpuru Osolobuẹ wụ Chuku ụnụ, Onyẹ hụn gha Ijiptu wepụha ụnụ, gha alị ụnụ nọ wụ igbọn gbarị ụnụ! Hụnyẹ a chọgụọ n'o wepụ ụnụ imẹ ihiẹn Osolobuẹ wụ Chuku ụnụ sị ụnụ mẹ. Ụnụ k'e wepụrịrị eje-ihiẹn ahụn imẹ igunrun ụnụ, wepụchanrịn.

⁶ Omẹdẹni nwẹnẹ ẹfọ ị mọbụ nwa ị okẹnnyẹ mọbụ nwa ị okpoho mọbụ nwunyẹ i hụn ihiẹn ẹ a sụọ ị mọbụ ọwụ ị kẹnkẹnkẹn e gi nzuzue rẹrẹ i, sị ị, “Nị ẹnyi jẹn d'e fe mmọn-lẹ-iyi”, ọ chọkọ n'o mẹ i fe mmọn-lẹ-iyi ndị o mẹ ni kẹ ịyụ kẹ ndị nẹdi i ghalẹni e fe,

⁷ mmọn ndị fihunmẹni ụnụ e fe — ọsụọn'a alị ndị rị ẹhụ nsue ọsụọn'a alị ndị rị ebe teni, ebe-lẹ-ebe wẹ rịlẹ elu ụwa,

⁸ ekwerilẹ; egọndẹlẹ ẹ ntịn. Emẹkwọlẹ omikẹn ẹ. Edọnmẹkwọl'a ndụn mọbụ kpumẹ ẹ.

⁹ I sikọ d'e gburịrị a. Wẹ jẹnkọnị d'e gbu ẹ, ẹka ị k'e burịrị ụzọ ban a, ẹka ịhịan ile kebe ban a.

¹⁰ Magbu n'ẹ, makẹni o te chọ n'o mẹ i gbakitọ Osolobuẹ wụ Chuku ụnụ azụụn, Onyẹ hụn gha Ijiptu, alị ụnụ nọ wụ igbọn, wepụha ụnụ.

¹¹ Ogẹn ahụn, Izrẹlụ ile k'a nụ a, egun a tụ wẹ; onwọnkọzị onyẹ rị imẹ ụnụ k'e mẹ eje-ihiẹn nọ ẹrịra.

¹² Ikẹnkwọ ụnụ a nụ kẹ wẹ rị e ku oku obodo ohu imẹ ndị ahụn Osolobuẹ wụ Chuku ụnụ rị e ye ụnụ nị ụnụ biri,

¹³ nị o nwọn ndị-ejẹ gha imẹ igunrun ụnụ kpapụ, dufie ndị bi obodo wẹ, sị, “Nị ẹnyi jẹn ni d'e fe mmọn-lẹ-iyi”, a chọ nị wẹ mẹ wẹ fe mmọn-lẹ-iyi ndị ahụn ụnụ ghalẹni e fe,

¹⁴ ụnụ sikọ d'a jụkpọ ọnụ, chọkpọ alị a. Ụnụ chọpụha nị ezioku rọ, nị a ghọsịchanrịngụọ wẹ nị e mẹghọ wẹ arụ ahụn imẹ igunrun ụnụ,

¹⁵ ụnụ k'e girịrị ọpịa-agha gbuchanrịn wẹ ile bi obodo ahụn. Tikpọpụ n'a; gbukwama nị kẹ ịhịan kẹ anụ rịn'a.

¹⁶ Kpọnkikomẹ ni ihiẹn ile rị obodo ahụn kpọnye etintinnaị ogbe obodo hụ, ụnụ a dụnpụchanrịn kẹ obodo kẹ ihiẹn ndị ahụn ile ọkụn, nị wẹ ile họnrin ẹjan wẹ dụnnị Osolobuẹ wụ Chuku ụnụ ọkụn. Obodo hụ k'a rị mkpọkọ-mkpọkọ jẹnrin-ejẹn; atụndọnzikọ w'a.

¹⁷ Ewerikwọlẹ ihiẹn ọwụlẹ Osolobuẹ sị o k'e tikpọ, kẹni Osolobuẹ bubehi olulu ahụn ọ rị e bu. Ogẹn hụ, o mẹni ụnụ ebere, o gi omikẹn sọn ụnụ, mẹ ụnụ ba ụba, gi e mẹzu nkwa o kun enwẹn ẹ kwe ndị nẹdi ụnụ,

¹⁸ o mẹzu ẹ, makẹni ụnụ hụ e humẹni Osolobuẹ wụ Chuku ụnụ isi, e mẹchanrịn ihiẹn ile o ku hụn m rị a gwa ụnụ tannị, e mẹ ihiẹn rị a mma ẹnya.