Ditrọnọmi 12 - Ika

Isi Nke Mmẹbụọ Ebe Osolobuẹ Họrị Kẹ W'a Nọ A Chụn ẹjan

¹ Ndịnị wụ uhi lẹ iwu ndị ụnụ k'e dọnrin ẹnya e sọn imẹ alị ahụn Osolobuẹ wụ Chuku ndị nẹdi ụnụ ye ụnụ nị ụnụ weri; e sọn ni iwu ndịnị ụnụ e we nwụn.

² Tikpọpụchanrịn nị ebe ile alị ichẹn-ichẹn ụnụ k'e weri alị wẹ a nọ e fe mmọn-lẹ-iyi wẹ — kẹ ndị rịsọnmẹ ugu jẹn elu, kẹ ndị rịsọnmẹ elu òke kẹ ndị rị okpuru osisi ile nwọn igungun ghalẹni a gbụ ẹhụhụọ.

³ Tikpọpụ nị ukpo wẹ nọ a chụn ẹjan, kụkpọpụchanrịn nị ọmụma-nsọ wẹ, dụnpụ nị osisi ndị ahụn wẹ zumẹ wẹ gi a ghọ Ashẹra ọkụn; kụtu ni mmọn ndị ahụn wẹ kpụ, ụnụ e kpọnchanpụchanrịn wẹ ebe wẹ te rịsọnmẹ kẹni wẹ zọchanrịn ẹfan wẹ.

⁴ Efekwọlẹ ni Osolobuẹ wụ Chuku ụnụ kẹ ndịnị dọn e fe mmọn-lẹ-iyi wẹ.

⁵ Kama, ebahụn Osolobuẹ wụ Chuku ụnụ sikọ d'a họrị imẹ ebọn ụnụ ile nị ya kẹ Ẹfan a k'a rị kẹ ụnụ k'e jẹn d'e fe ẹ. Ebahụn kẹ ụnụ k'e jẹnrịrị d'e fe ẹ;

⁶ ebẹhụ kẹ ụnụ k'e wejẹn oyiye ụnụ — kẹ ndị w'a dụn ọkụn kẹ ẹjan ndị ọzọ, kẹ ụzọ-ohu-imẹ-ụzọ-iri ụnụ kẹ ụtụ ụnụ kẹ oyiye ụnụ gi e mẹzu nkwa kẹ oyiye ndị ghasọnmẹ ụnụ obi pụha, kẹ oyiye nwa-ibuzọ efin lẹ atụnrụn lẹ ewu ụnụ.

⁷ Ihun Osolobuẹ wụ Chuku ụnụ ebahụn kẹ ụnụ lẹ ikpụlọ ụnụ k'a nọrịrị ri oriri, mẹ mmẹmmẹ ya lẹ wẹ wị hụn ụnụ gi a ghọsị nị Osolobuẹ wụ Chuku ụnụ a gọzigụọ ihiẹn ụnụ buche ẹka.

⁸ Ẹlẹkwọ hụnnị ẹnyi rị e mẹ kikẹnni kẹ ụnụ k'e mẹ ogẹn hụ — hụnnị onyẹ-onyẹ rị e mẹ k'ọ sụọ a kikẹnni

⁹ makẹni ụnụ e k'e ru ebe izu-ikẹn ahụn, alị ahụn Osolobuẹ wụ Chuku ụnụ rị e ye ụnụ.

¹⁰ Kanị, ụnụ k'e fetu Iyi Jọdanị d'e biri alị ahụn Osolobuẹ wụ Chuku ụnụ rị e ye ụnụ n'ọ wụrụ ukuu ụnụ, o mẹ ẹhụ fu ụnụ, ụnụ e biri udọn-lẹ-ndọnkwa, ndị-iṅẹnrẹn ụnụ ile fihunmẹni ụnụ eyekọ ụnụ mmakp'ẹhụ.

¹¹ Ogẹn ahụn, ebahụn Osolobuẹ wụ Chuku ụnụ họrị nị ya kẹ Ẹfan a k'a rị kẹ ụnụ k'a rị e jẹn, e wejẹn oyiye ile m rị a gwa ụnụ: kẹ hụn ụnụ a dụn ọkụn kẹ ẹjan ụnụ ndị ọzọ kẹ ụzọ-ohu-imẹ-ụzọ-iri kẹ ụtụ ụnụ kẹ ihiẹn ile rị mma ụnụ kwe Osolobuẹ nkwa a —

¹² ụnụ a nọzị ihun Osolobuẹ wụ Chuku ụnụ ebẹhụ mẹ mmẹmmẹ rịn'a, ụnụ lẹ ụmụ ụnụ ikẹnnyẹ lẹ ikpoho, idibo ụnụ ikẹnnyẹ lẹ ikpoho lẹzi ndị Livaị rị obodo ụnụ makẹni ekeyeni wẹ ndị Livaị alị mọbụ ukuu nke ẹka wẹ.

¹³ Hụnkwọ n'a nị ụnụ achụnnị ẹjan ebe-lẹ-ebe ụnụ hụn.

¹⁴ Nọ nị ebahụn Osolobuẹ sikọ d'a họrị imẹ ebọn ohu rị alị ụnụ a chụn ẹjan ụnụ, ụnụ a nọ a e mẹ ihiẹn ile m gwa ụnụ mẹ.

¹⁵ Kanị, ụnụ nwọn ikẹn nọ imẹ obodo ụnụ ọwụlẹ gbu anụ ri, ri ẹ kẹ ụnụ chọ, kẹ wẹ e mẹ mgbadan lẹ ele, anụ ọwụlẹ Osolobuẹ wụ Chuku ụnụ gi gọzi ụnụ. Kẹ onyẹ rụnị kẹ onyẹ rụlẹni nwọn ikẹn ri ẹ;

¹⁶ ka erikwọlẹ ni ẹdeke ẹ — hu n'ẹ ye alị rịkẹ mirin.

¹⁷ Anọkwọlẹ ni imẹ obodo ụnụ rị ichẹn-ichẹn ri ụzọ-ohu-imẹ-ụzọ-iri ọka ụnụ lẹ manya ọhụn ụnụ lẹ ofigbọn-olivu ụnụ mọbụ nwa ibuzọ efin lẹ atụnrụn lẹ ewu ụnụ mọbụ ihiẹn ọwụlẹ ụnụ kwe Osolobuẹ nkwa a mọbụ oyiye hụn ghapụha ụnụ obi mọbụ ụtụ ụnụ.

¹⁸ Kaka! Ihun Osolobuẹ wụ Chuku ụnụ sụọ, ebahụn o k'a họrị, kẹ ụnụ a nọ ri wẹ, ụnụ lẹ ụmụ ụnụ ikẹnnyẹ lẹ ikpoho, idibo ụnụ ikẹnnyẹ lẹ ikpoho lẹ ndị Livaị rịsọnmẹ obodo ụnụ; ụnụ a nọ ihun Osolobuẹ wụ Chuku ụnụ ebẹhụ ghọghọ makẹ ihiẹn ụnụ rụnpụha.

¹⁹ Ogẹn ụnụ k'e biri alị ụnụ hụ, hụnkwọ n'a nị onwọnni ogẹn ụnụ e gi jụ ndị Livaị tọgbọ ụnụ e we nwụn.

²⁰ Osolobuẹ wụ Chuku ụnụ mẹgụ alị ụnụ shịa ẹfọ k'ọ dọn kwe ụnụ nkwa, nị anụ a gụnma ị, nị y'a sị, “K'ọ rị m, e ri m anụ”, i nwọn ikẹn ri k'ọ sụọn'ị.

²¹ Omẹni ebe Osolobuẹ wụ Chuku ụnụ họrị Ẹfan a k'a rị e tekẹ ebe ị rị, i nwọn ikẹn weri efin mọbụ atụnrụn hụn Osolobuẹ ye i gbu kẹ m dọn gwa ụnụ, nọ imẹ obodo ụnụ ri k'ọ sụọ ị.

²² Ri ni wẹ nọkẹ sị mgbadan mọbụ ele rọ; kẹ ndị rụnị kẹ ndị rụlẹni nwọn ikẹn ri ẹ.

²³ Ka hụnkwọ n'a nị ụnụ erini ẹdeke ẹ, makẹni ẹdeke ẹ wụ ndụn a: erilẹni anụ lẹ ndụn a.

²⁴ Erilẹ ni ẹdeke; hu n'ẹ ye alị nọkẹ mirin.

²⁵ Erikwọlẹ n'a, kẹni ihiẹn rịnị ụnụ lẹ ụmụ ụnụ lalanị mma. Makẹni, omẹni ụnụ erin'ẹ, ụnụ rị e mẹ ihiẹn rị mma ẹnya Osolobuẹ.

²⁶ Kanị, omẹni ihiẹn ndị ahụn wẹ e ye Osolobuẹ lẹ oyiye ọwụlẹ i k'e gi mẹzu nkwa i kwe ẹ, we wẹ jẹn ebahụn Osolobuẹ k'a họrị.

²⁷ Nọ ukpo nchụn-ẹjan Osolobuẹ wụ Chuku ụnụ sụọ chụn ẹjan ị ile w'a dụn ọkụn — kẹ anụ a kẹ ẹdeke ẹ. Hu ni ẹdeke anụ ndị ụnụ gi chụn ẹjan ye ẹhụ ukpo nchụn-ẹjan Osolobuẹ wụ Chuku ụnụ; kanị, ụnụ nwọn ikẹn ri anụ wẹ.

²⁸ Dọnrinkwọ nị ẹnya e dọnmẹchanrịn iwu ndịnị m rị e ye ụnụ tannị, kẹni ọ hụn ụzọ rịsọnmẹni ụnụ lẹ ụmụ ụnụ lalanị mma, makẹni ụnụ dọnmẹ wẹ, ụnụ rị e mẹ ihiẹn rị Osolobuẹ wụ Chuku ụnụ mma lẹ ihiẹn furuni ẹnya a.

²⁹ Osolobuẹ wụ Chuku ụnụ jẹnkọ d'e gbupụnị ụnụ ndị alị ahụn ụnụ shikọ nwan d'a narịn alị wẹ. Kanị ụnụ chụpụgụ wẹ biri alị wẹ,

³⁰ nị Osolobuẹ e tikpọgụnị ụnụ wẹ, kpachanpụkwọ ẹnya makẹ ị gha dan ọnyan, ebe ị rị a jụ banyeni mmọn-lẹ-iyi wẹ, a sị, “Nanị kẹ ndị alị ndịnị dọn e fedẹ mmọn wẹ? Nị ẹnyi femẹ ẹrịra.”

³¹ Efekwọlẹ ni Osolobuẹ wụ Chuku ụnụ kẹ wẹ dọn e fe mmọn-lẹ-iyi wẹ; makẹni, wẹ gha e fe mmọn-lẹ-iyi wẹ, w'e mẹsọnmẹ eje-ihiẹn ile Osolobuẹ a sọ: w'a dụndẹ ụmụ wẹ ikẹnnyẹ lẹ ikpoho ọkụn, e gi wẹ a chụnyeni mmọn-lẹ-iyi wẹ ẹjan!

³² Hụnn'a nị ụnụ e mẹchanrịn ihiẹn ile m sị ụnụ e mẹ; ewechelẹ ni n'ẹ mọbụ webelụa a.