Ditrọnọmi 11 - Ika

Isi Nke Mmanaị Ihiẹn Osolobuẹ Ya Sụọ Ị; Mẹ Ihiẹn Ọ Sị Ị Mẹ

¹ Ihiẹn Osolobuẹ wụ Chuku i ya sụọ ị, y'e mẹferi ihiẹn ọ chọ lẹ uhi ẹ lẹ iwu ẹ lẹ ihiẹn ọ sị ị mẹ.

² Nyanhankwọ nị nwan nị ẹlẹ ụmụ ụnụ hụn afụnfụn ndị ahụn Osolobuẹ wụ Chuku ụnụ gi dọsọnmẹ ụnụ ẹka-ntịn lẹ ọghọ a lẹ ikẹn ẹ hi-ogbe lẹ ikẹn ọ kpa;

³ ẹlẹ wẹ hụn ahịma ndị ọ ghọsịsọnmẹ lẹ ihiẹn ndị o mẹsọnmẹ imẹ Ijiptu: kẹ hụn o mẹ Fẹro eze Ijiptu kẹ hụn o mẹ alị a ile;

⁴ ẹlẹ wẹ hụn ihiẹn o mẹ ndị-agha Ijiptu: kẹ ẹshin wẹ kẹ ụgbọ-anyịnyan wẹ, ogẹn o gi gi mirin Ohimin-ufie rukpumẹ wẹ ebe wẹ chụkọ ụnụ, tikpọchanrịn wẹ.

⁵ Ẹlẹ ụmụ ụnụ hụn ihiẹn ndị o mẹsọnmẹni ụnụ imẹ atụ ụnụ e we ru nwan ebeni

⁶ lẹ ihiẹn o mẹ Datanị lẹ Abiram wụ ụmụ Ẹliabụ onyẹ ebọn Rubẹni, ndị hụn o mẹ alị shịapụ ọnụ imẹ igunrun ndị Izrẹlụ ile, luepụ wẹ ẹbụbụọ lẹ ikpụlọ wẹ lẹ ọdụ wẹ bi lẹ ihiẹn ile wẹ nwọn.

⁷ Ẹnya ụnụ hụn okẹn ihiẹn ndịnị ile Osolobuẹ mẹ, ẹlẹ ụmụ ụnụ.

⁸ Mẹsọnmẹkwọ nị nwan ihiẹn ile m rị a gwa ụnụ tannị kẹni ụnụ hụn ndụn banye d'e weri alị ahụn ụnụ fetukọ Iyi Jọdanị d'e weri

⁹ lẹni isi ụnụ hụn ụzọ ru ẹnyasị imẹ alị ahụn Osolobuẹ kun enwẹn ẹ kwe ndị nẹdi ụnụ kanị nkwa n'o k'e ye wẹ lẹ ụmụ wẹ, alị mirin-ẹran anụ lẹ mirin-ẹnwụn jun, e hu.

¹⁰ Alị hụ ụnụ banyekọ d'e weri anọnị kẹ alị Ijiptu ụnụ gha pụha, hụn ụnụ a kụngụ ihiẹn e gi ụkụ a hanye ẹ ote-mirin nọkẹsị ugbo mkp'ẹhụhụọ rọ.

¹¹ Kanị, alị hụn ụnụ fetukọ Iyi Jọdanị d'e weri wụ alị ugu lẹ ọdanmgbugbu, hụn a ra mirin gha igwere e zue;

¹² alị Osolobuẹ wụ Chuku ụnụ e lepụ ẹnya k'ọ wụ; ẹnya Osolobuẹ wụ Chuku ụnụ ara pụ a gha mbidọn ahụa d'e ru njẹndemẹ ẹ.

¹³ O mẹ nwan nị ụnụ e wepụha obi mẹ ihiẹn ndịnị m rị a gwa ụnụ tannị: inwọn ihiẹn-ọsụsụọ Osolobuẹ wụ Chuku ụnụ lẹ igi obi ụnụ ile lẹ umẹ-ndụn ụnụ ile fe ẹ;

¹⁴ Osolobuẹ sị, “M k'e zi mirin zueye alị ụnụ udu-mirin, kẹ mirin ibuzọ wụ mirin ahụa kẹ mirin ikpanzụụn, kẹni ụnụ hụn ọka, manya lẹ ofigbọn-olivu.

¹⁵ M k'e mẹ ẹfịfịa rujun ọfịa kẹni anụ ụnụ hụn ri. Ụnụ sikọ d'e ri, rijun ẹfọ.”

¹⁶ Kpachanpụkwọ nị ẹnya, amamgbe w'a dọrị ụnụ d'e femẹ mmọn-lẹ-iyi, kụmanị wẹ isi alị.

¹⁷ Ogẹn ahụn, Osolobuẹ e gi olulu sọn ụnụ, kpọkin igwere, mẹ mirin ezuẹlẹ; alị emẹkọ ihiẹn, ụnụ a nwụnkẹnrin imẹ alị-ọma ahụn Osolobuẹ rị e ye ụnụ.

¹⁸ Bu ni oku ndịnị m rị a gwa ụnụ che obi, e ro wẹ; kẹn ni wẹ ye ẹka n'ọ wụrụ ihiẹn a gba ama, ụnụ e kẹn wẹ ye ezimezi ihun.

¹⁹ Kuzi ni ụmụ ụnụ ya, e ku oku ẹ ebe ụnụ nọdị alị imẹ ụlọ lẹ ebe ụnụ ghakọ ụzọ, ebe ụnụ dinẹ alị lẹ ebe ụnụ lihi ọtọ.

²⁰ De ni wẹ ye elu ọnụmụzọ iwe ụnụ lẹ ọnụ-mgbọn ụnụ,

²¹ kẹni ụnụ lẹ ụmụ ụnụ hụn ụzọ tọ imẹ alị ahụn Osolobuẹ kun enwẹn ẹ n'o k'e ye ndị nẹdi ụnụ kanị, biri ebẹhụ igwere lẹ ụwa rị okpuru ẹ e we gụ.

²² Ụnụ dọnrin ẹnya mẹ ihiẹn ndịnị ile m rị a gwa ụnụ mẹ: inwọn ihiẹn-ọsụsụọ Osolobuẹ wụ Chuku ụnụ, ịghasọnmẹ ụzọ a ile lẹ ikwọnkẹnmẹn'ẹ —

²³ Osolobuẹ a chụpụnị nwan ụnụ ndị alị ndịnị, ụnụ a napụ alị ndị ka ụnụ ọda kanahịn ụnụ ẹhụ ihiẹn wẹ, o wụrụ nke ụnụ.

²⁴ Ebe ọwụlẹ ụnụ zọye ụkụ k'a wụrụ nke ụnụ; alị ụnụ k'a gha atụ rị ẹbamịn ndịdan-mirin ru Lẹbanọnụ rị ẹbamịn-ugu, gha Iyi-Yufretisi rị ẹbamịn ọwụwa-ẹnyanwụn d'e ru Ohimin-uku Mẹditerenia rị ẹbamịn ọdịdan ẹnyanwụn.

²⁵ Onwọnni onyẹ k'a s'ẹka che ụnụ ọgụn. Osolobuẹ wụ Chuku ụnụ k'e mẹ k'o dọn kwe ụnụ nkwa, bu egun ụnụ, okẹn egun, che ndị ile rị alị hụ ẹnya ebe-lẹ-ebe ụnụ jẹn.

²⁶ Lee n'ẹ, m rị e butọnị ụnụ ngọzi lẹ abụmọnụ tannị nị ụnụ họrị —

²⁷ ngọzi rọ omẹni ụnụ e mẹ ihiẹn m rị a gwa ụnụ tannị hụn Osolobuẹ wụ Chuku ụnụ sị ụnụ mẹ;

²⁸ ịbụ-ọnụ rọ omẹni ụnụ emẹni ihiẹn Osolobuẹ wụ Chuku ụnụ sị ụnụ mẹ, omẹni ụnụ a latọ ihiẹn ndịnị m rị a gwa ụnụ tannị sọnmẹ mmọn-lẹ-iyi ụnụ marịnlẹni.

²⁹ Osolobuẹ wụ Chuku ụnụ webangụ ụnụ imẹ alị ahụn ụnụ bankọ d'e weri, nọ nị Ugu-Gẹrizim hị ngọzi ndịnị, ụnụ a nọ Ugu-Ẹbalụ hị ịbụ-ọnụ ndị ahụn.

³⁰ (Ugu ndịnị rị nfetu Jọdanị, ẹbamịn ọdịdan ẹnyanwụn Jọdanị, azụụn anwụn nọ a rọ; wẹ nọkunmẹ okẹn-osisi Mọrẹ, ẹgbẹrẹ hụ ndị Kenaanị bi imẹ atụ Araba ru azụụn ahụn, ẹhụ Gil'galụ.)

³¹ Ụnụ e d'e fetu nwan Iyi Jọdanị, banye d'e weri alị ahụn Osolobuẹ wụ Chuku ụnụ rị e ye ụnụ. Ụnụ werigụ a, biri ebahụn,

³² hụnkwọ n'a nị ụnụ sọn uhi lẹ iwu ndịnị m rị e butọnị ụnụ tannị.