Ditrọnọmi 10 - Ika

Isi Nke Iri Osolobuẹ E Yezi Ndị Izrẹlụ Oghere

¹ Ogẹn ahụn, Osolobuẹ nọ sị m, “Tụpụha ibe-ọmụma ẹbụọ nọ kẹ ndị ibuzọnẹi, y'e nyinhẹn elu uguni d'e kunrun m. Gizikwọ osisi rụn ẹkpẹti.

² M k'e de ihiẹn rị ibe-ọmụma ndị ibuzọ ahụn i tikpọ ye elu ndị ọhụnnị. Omẹgụ y'e bu wẹ che imẹ ẹkpẹti ahụn.”

³ Ya m nọ gi osisi akashịa rụn ẹkpẹti, m nọzị tụpụha ibe-ọmụma ẹbụọ hụn nọ kẹ ndị ibuzọ ahụn; m nọ nwan nyinrin elu-ugu ahụn, m gihụ ibe ọmụma ẹbụọ ahụn ẹka.

⁴ Osolobuẹ nọ de ihiẹn ohu ahụn o de elu ibe-ọmụma ẹbụọ mbụ hụ ye elu ibe-ọmụma ẹbụọnị, Iwu iri hụ o ye ụnụ k'ọ gha imẹ ọkụn e ku oku, ụhụọhịn hụ ụnụ zu ukun Ugu ahụn. Osolobuẹ nọ we wẹ ye m.

⁵ Ya m nọ gha elu ugu ahụn hidan, bu ibe-ọmụma ẹbụọ ahụn che imẹ ẹkpẹti ahụn m rụn, kẹ Osolobuẹ dọn gwa m; wẹ hụkwọ nwan ebahụn.

⁶ (Ndị Izrẹlụ a gha ebẹhụ Ọmị ndị Jakanị rịsọnmẹ buli, shi Mosẹra. Ebahụn kẹ Ẹrọnụ nwụntọ, wẹ nọ li ẹ, Ẹliẹza nwa a nọ nọkin ẹnya a, wụrụ onyẹ-isi nchụn-ẹjan.

⁷ Wẹ nọ gha ebahụn buli, shi Gud'goda, gha ebẹhụ shi Jọt'bata hụn nwọnsọnmẹ ụmụ-iyi.

⁸ Ogẹn ahụn kẹ Osolobuẹ gi họpụha ndị Livaị nị wẹ bumẹ Ẹkpẹti Nkwerigbama Osolobuẹ, nị w'e wuzo ihun Osolobuẹ a rụn ọrụn a, e gi ẹfan a a gọzi ịhịan, kẹ wẹ dọnkwọ nwan e mẹ tannị.

⁹ Ya haịn wẹ gilẹni keye ndị Livaị ukuu kẹ wẹ dọn keye umunẹ wẹ ndị Izrẹlụ; Osolobuẹ wụ ukuu wẹ, nọkẹ kẹ Osolobuẹ wụ Chuku ụnụ dọn gwa wẹ.)

¹⁰ Nke m, akp'ọhịn ọgụnnaị kẹ m nọdị elu ugu ahụn, uhinhin lẹ efinnaị, kẹ m dọn nọ a mbụ. Osolobuẹ nọzịkwọ nụ arịrịọ m ogẹn ahụn k'o dọn nụ a mbụ; makẹni ẹlẹ uche ẹ n'o gbupụ ụnụ.

¹¹ Osolobuẹ sị m, “D'e duru ndịnị nị wẹ hụn ụzọ banye d'e weri alị ahụn m kun enwẹn m kwe ndị nẹdi wẹ nkwa nị m k'e ye wẹ ya.”

Tụ Egun Osolobuẹ

¹² Euu ndị Izrẹlụ, kị Osolobuẹ wụ Chuku ụnụ chọ nwan ẹka ụnụ karị ịtụ-egun Osolobuẹ, isọn ụzọ a ile, inwọn ihiẹn-ọsụsụọ a, igi obi i ile lẹ umẹ-ndụn i ile e fe Osolobuẹ wụ Chuku i,

¹³ lẹ imẹ ihiẹn ndị ọ sị w'e mẹ lẹ uhi ẹ hụn m rị e ye ụnụ tannị makẹ ọrịrịmma ụnụ?

¹⁴ Osolobuẹ wụ Chuku ụnụ nwọnchanrịn elu-igwere kẹ ebahụn kachanrịn elu e jẹn elu-igwere, ya lẹ ụwa lẹ ihiẹn ile rịn'a,

¹⁵ bụ Osolobuẹ sị ndị nẹdi ụnụ kanị k'ọ chọ, bu wẹ che obi, nke wụ nị, imẹ alị ile, ụnụ ụmụ wẹ k'ọ họrị, k'o dọn rị tannị.

¹⁶ Kwa nị nwan obi ụnụ ugu, bubehi isi-ikẹn.

¹⁷ Makẹni, Osolobuẹ wụ Chuku ụnụ wụ Chuku ka mmọn-lẹ-iyi ile, Nna ndị nna; Chuku ahụn hi ogbe, hụn e mẹ ihiẹn a tụ egun; ara gbeyeni ịhịan, ara na egho azụụn.

¹⁸ Ịya e kinni onyẹ nwọnlẹni nẹdi lẹ nnẹ lẹ okpoho di ẹ nwụn ọnụ wẹ; o nwọn ihiẹn-ọsụsụọ abịamabịa, e ye ẹ ihiẹn-oriri lẹ ẹkwa.

¹⁹ E nwọn ni ihiẹn-ọsụsụọ abịamabịa, makẹni ụnụ lẹ enwẹn ụnụ te wụ abịamabịa imẹ alị Ijiptu.

²⁰ Tụ nị egun Osolobuẹ wụ Chuku ụnụ, e fe ẹ. Kwọnkẹnmẹn'ẹ, e kun ẹfan a sụọ.

²¹ Ịya kẹ ụnụ k'a gha a ja mma; ịya wụ Chuku ụnụ — Onyẹ hụn rụn okẹn ọrụn atụmẹnya ndị ahụn a tụ egun ụnụ gi ẹnya ụnụ hụn.

²² Ndị nẹdi ụnụ rịhụ madụ iri kwasị ọgụn ẹtọ sụọ kẹ wẹ shi alị Ijiptu, kanị Osolobuẹ wụ Chuku ụnụ e mẹgụọ nwan ụnụ bu ọda kẹ kokisẹ rị elu-igwere.