Ditrọnọmi 1 - Ika

Isi Nke Ohu Osolobuẹ E Sị Wẹ Gha Ugu Horẹbụ Buli

¹ Oku ndịnị kẹ Mozizi gwa ndị Izrẹlụ ile ogẹn wẹ gi rị imẹ atụ Araba, ihun alị Sufu, ẹbamịn ọwụwa ẹnyanwụn Iyi Jọdanị. Sufu rị ẹgbata Paranị lẹ obodo ndịnị: Tofẹlụ, Labanị, Hazẹrọtụ lẹ Di-zahabụ.

² Akp'ọhịn mmanaị kẹ wẹ te gi a gha ugu Horẹbụ e ru Kadẹshi-Bania omẹni ịhịan ghashi ụzọ Ugu Sẹẹ, Ugu Ẹdọm.

³ Kanị o ruọlẹ ahụa ọgụnnaị wẹ rị ụzọ. Ụhụọhịn ibuzọ imẹ ifọn nke mmanaị ahụa hụ kẹ Mozizi gi gwa ndị Izrẹlụ oku ndịnị, gwachanrịn wẹ ihiẹn ile Osolobuẹ sị a gwa wẹ.

⁴ Ihiẹnni mẹ ogẹn o gi mẹrigụ kẹ Sihọnụ eze Amọ nọ Hẹsh'bọnụ a kị kẹ Ọgụ eze Bashanị nọ Ash'tarọtụ a kị hụn o mẹri imẹ Ẹdrẹi.

⁵ Ebẹhụ wẹ rị nfetu iyi Jọdanị, ẹgbẹrẹ Mụabụ, kẹ Mozizi nọ kọwamanị wẹ ihiẹn ndịnị ọ chọ nị wẹ marịn, nyanhan, sị wẹ:

⁶ Osolobuẹ wụ Chuku ẹnyi gwa ẹnyi kẹ ẹnyi rị Ugu Horẹbụ, sị, “Ebe ụnụ nọru uguni e higụọ.

⁷ Buli ni nwan, nị ụnụ shi alị ndị Amọ rị elu ugu d'e mẹri ẹ, ịya lẹ alị ndịnị nọkunmẹn'ẹ: atụ Araba lẹ ọdanmgbugbu Iyi Jọdanị rịn'a, alị ugu ndị nọkunmẹ Araba, alị ndị rị nkpọtu ugu ndịnị ẹbamịn ọdịdan ẹnyanwụn wẹ, alị ndị rị alị ọkpọ-nkụn Nẹgẹvụ ẹbamịn ndịdan-mirin, lẹzi alị ndị rịsọnmẹ mkpẹnrẹn Ohimin uku Mẹditerenia: d'e mẹri nị alị ndị Kenaanị ile lẹ alị Lẹbanọnụ d'e rukwọrị Iyi uku Yufretisi.

⁸ Lee ẹ, e wegụọ m alị ahụn ile ye ụnụ. Banye ni d'e weri alị ahụn biri — alị ahụn Osolobuẹ kun enwẹn ẹ n'o k'e ye ndị nẹdi ụnụ wụ Ebraham, Aziki lẹ Jekọpụ lẹ agbọ wẹ ile lalanị.”

Kẹ Mozizi Dọn Tumẹ Ndị K'e Yen'ẹ Ẹka Du

⁹ Mozizi nọzị sị ndị Izrẹlụ, ogẹn ahụn ẹnyi gi rị ugu Saịnaị, m gwa ụnụ, sị, “Mmẹ sụọ asakọ ẹka bu ụnụ ile.

¹⁰ Osolobuẹ wụ Chuku ụnụ e mẹgụọ ụnụ bukẹmẹ ọda, nke wụ nị, ụnụ e bugụọ nwan ọda kẹ kokisẹ rị igwere —

¹¹ Osolobuẹ wụ Chuku ndị nẹdi ụnụ ya dodo mẹ ụnụ busọnmẹkwọ ụzọ nnụ ole-lẹ-ole, gọzikwọ ụnụ k'o dọn kwe nkwa!

¹² Kanị, nanị kẹ mmẹ sụọ a dọn bu mkpa ụnụ ile lẹ ibu ụnụ ile lẹ ikpe ụnụ ile?

¹³ Imẹ ebọn Izrẹlụ ọwụlẹ, họpụha nị nwan ndị nwọn uche, ndị a ghọtanị, ndị nwọn ezigbo ẹfan, nị m tumẹ wẹ ndị-isi ụnụ.”

¹⁴ Ụnụ nọ sị m, “Ihiẹn ị chọ n'ị mẹ rị mma.”

¹⁵ Ya m nọ tumẹ ndị sikọ d'a kị ebọn ụnụ ile, ndị nwọn uche lẹ ezigbo ẹfan, tumẹsọnmẹ wẹ ndị a kị madụ nnụ-uku nnụ-uku, ndị a kị ọgụn-isẹn ọgụn-isẹn, ndị a kị madụ iri kwasị ọgụnnaị, iri kwasị ọgụnnaị lẹ ndị rị a kị madụ iri-iri.

¹⁶ Ogẹn hụ, m nọ ye ndịnị jẹnkọ d'a hannị ụnụ eṅẹn iwu, sị wẹ, “Ikpe bịa, nụ nị ọnụ ndị rị e kpeni, ụnụ a han ezigbo eṅẹn. Ọsụọn'a ikpe seni onyẹ Izrẹlụ lẹ onyẹ Izrẹlụ ibe ẹ, ọsụọn'a onyẹ Izrẹlụ lẹ onyẹ alị ọzọ bi imẹ igunrun ụnụ.

¹⁷ Egbeyelẹni ni hụn ọwụlẹ; nụ nị ọnụ onyẹ-onyẹ — kẹ onyẹ-uku kẹ onyẹ-nta. Atụlẹ ni egun onyẹ ọwụlẹ, makẹni Osolobuẹ ya sị wẹ a han eṅẹn. Ikpe ọwụlẹ karị ụnụ ẹka, ụnụ e wẹhẹni m'ẹ nị m gi ẹka m dọnzi ẹ.”

¹⁸ Ya m nọ gizikwọ ogẹn ahụn gwa ụnụ ihiẹn ile ụnụ k'e mẹ.

Ndị Wẹ Zi D'e Lele Alị

¹⁹ Ẹnyi nọ mẹ ihiẹn Osolobuẹ wụ Chuku ẹnyi gwa ẹnyi, gha ugu Horẹbụ, ugu Saịnaị, buli, dọn ihun alị ndị Amọ hụn rị elu òke — ghakọ atụ hụ shịagbu enwẹn ẹ, hụn a tụ ẹgụn, hụn ụnụ gi ẹnya ụnụ hụn; ẹnyi nọ ru ẹgbẹrẹ Kadẹshi-Bania.

²⁰ M nọ sị ụnụ, “Ụnụ e rugụọ nwan elu òke hụ ndị Amọ bi, hụn Osolobuẹ wụ Chuku ẹnyi rị e ye ẹnyi.

²¹ Lee n'ẹ, Osolobuẹ wụ Chuku ụnụ e bugụọ alị hụ tọnị ụnụ. Jẹn ni nwan d'e weri ẹ kẹ Osolobuẹ wụ Chuku ndị nẹdi ụnụ dọn gwa ụnụ. Atụlẹ ni egun; elelẹ ni ẹnya azụụn.”

²² Ya ụnụ ile nọ bịa d'e kunrun m, sị, “Nị ẹnyi zi ịhịan jẹn d'e lelegụ kẹ alị ahụn nọ, nị wẹ gwa ẹnyi ụzọ ẹnyi a gha, gwa ẹnyi kẹ obodo ndị ẹnyi shikọ nọsọnmẹ.”

²³ Ihiẹn ụnụ ku a ban m ẹnya, ya m nọ họrị madụ mmẹbụọ imẹ ụnụ, ohu-ohu imẹ ebọn ile.

²⁴ Wẹ nọ buli, jẹnmẹ alị ahụn rị elu òke, e ru wẹ Ọdanmgbugbu Ẹsh'kọlụ, ya wẹ nọ gi nzuzue lele ẹ;

²⁵ wẹ nọ ghọrị mkpụrụ osisi rị alị ahụn welụanị ẹnyi, sị, “Alị hụ Osolobuẹ wụ Chuku ẹnyi rị e ye ẹnyi a rịka mma.”

A Pa Wẹ Oku Osolobuẹ

²⁶ Kanị, ụnụ ekweni jẹn; ụnụ a pa oku Osolobuẹ, Chuku ụnụ.

²⁷ Ụnụ e dẹnnwịnwịn imẹ ọdụ ụnụ, kpemẹ, sị, “Ihiẹn ẹnyi asụọnị Osolobuẹ haịn o gi gha alị Ijiptu wepụha ẹnyi n'ọ hụn ụzọ we ẹnyi che ẹka ndị Amọ gbupụ.

²⁸ Jẹnmẹ elebe?! Umunẹ ẹnyi e kugụọ ihiẹn ndụn gi gụ ẹnyi. Wẹ sị, ‘Ndị ahụn ka ẹnyi e ze, ka ẹnyi usue; obodo ndị ahụn shịa ashịa, mgbọn wẹ rusọnmẹdẹ elu-igwere! Ẹnyi a hụngụọdẹ ndị adụn-aran ebahụn!’ ”

²⁹ M nọ sị ụnụ, “Amazilẹ ni piripiri; atụlẹ ni egun wẹ.

³⁰ Osolobuẹ hụn wụ Chuku ụnụ, hụn rị ụnụ ihun, jẹnkọ d'a lụnị ụnụ ọgụn, k'o dọn lụnị ụnụ ọgụn imẹ alị Ijiptu idẹnya ụnụ ile,

³¹ lụzịkwọnị ụnụ ya imẹ atụ. Ụnụ a hụnghọ kẹ Osolobuẹ wụ Chuku ụnụ dọn pa ụnụ kẹ nẹdi a pa nwa a, ọrọgbọ ahụn ile ụnụ gi rị ụzọ kẹ ụnụ lala ụnụ e we ru ebeni.”

³² Kẹ ihiẹnni ile o mẹ, ụnụ egikwọnị nwan Osolobuẹ wụ Chuku ụnụ dọn ẹnya,

³³ bụ ịya buruni ụnụ ụzọ ijẹn ụnụ: uhinhin ọ pụha kẹ ọkụn jẹn elu duru ụnụ; efinnaị, ọ pụha kẹ orukpu jẹn elu duru ụnụ; a chọtọnị ụnụ ebe ụnụ e ziẹntọ, a ghọsị ụnụ ụzọ.

³⁴ Ogẹn Osolobuẹ gi nụ ihiẹn ụnụ ku, olulu nọ bu ẹ, ọ nọ kun enwẹn ẹ, sị,

³⁵ “Onwọnni akpụ onyẹ ohu imẹ eje-agbọnị k'a hụn alị ọma ahụn m kun enwẹn m nị m k'e ye ndị nẹdi wẹ kanị,

³⁶ mmanị Kalẹbụ nwa Jefunẹ. O k'a hụn a; m k'e ye ya lẹ ụmụ a alị ahụn ọ zọye ụkụ, makẹni o wepụhachanrịn obi ẹ ile sọn Osolobuẹ.”

³⁷ Osolobuẹ gi ufiri ụnụ buni m olulu, sị m, “Yụ nwẹn abankọzịkwọ a.

³⁸ Kanị, Joshụa nwa Nọnụ hụn e yen'i ẹka k'a banye ẹ. Gba a umẹ, makẹni ya nwọn du ndị Izrẹlụ d'e weri ẹ.

³⁹ Ẹlẹdẹ ọhụn sụọ: ụmụ ụnụ ndị ntịtị ahụn ụnụ sị wẹ k'a nwụnrụn agha, ụmụ ụnụ ndị ahụn kelẹni marịn mma lẹ njọ, uwẹ k'a banye alị ahụn. M k'e we ẹ ye wẹ nwọnrin.

⁴⁰ O mẹ nke ụnụ, hutọ nị nwan dọn ihun atụ, ụzọ Ohimin-ufie.”

⁴¹ Ụnụ nọ sị, “Ẹnyi e mẹọlẹ Osolobuẹ njọ nkesi. Nị ẹnyi jẹn nwan d'a lụ ọgụn ahụn Osolobuẹ wụ Chuku ẹnyi sị ẹnyi lụ!!” Ya onyẹ-onyẹ imẹ ụnụ nọ kịrị ihiẹn-ọgụn a, e ro nị wẹ k'e gihụ ẹrịra jẹn d'e mẹri alị ahụn rị elu òke.

⁴² Kanị, Osolobuẹ nọ sị m, “Sị wẹ: Ejẹnkwọlẹ d'a lụ ọgụnnị, nị ẹlẹ m k'a nọyekwọnị ụnụ. Ndị iṅẹnrẹn ụnụ k'e mẹri ụnụ.”

⁴³ Ya m nọ gwa ụnụ, kanị, ụnụ egọnni m ntịn. Ụnụ nọ pa oku Osolobuẹ, bọnmẹrin shi alị ahụn rị elu òke d'a lụ agha.

⁴⁴ Ya ndị Amọ bisọnmẹ elu òke ahụn nọ pụha d'a lụsọn ụnụ; wẹ nọ chụ ụnụ ụkụ-akpalẹ-alị nọkẹ ebe ẹkpa ẹnwụn nọ a chụ ịhịan, gha alị Sẹẹ gbu ụnụ d'e rukwọrị Homa.

⁴⁵ Ụnụ nọ lụaha, kwanghọsịma Osolobuẹ, kanị o gọndẹni ntịn ẹkwan ụnụ n'a kwan; o feyedẹni ụnụ ẹnya.

⁴⁶ Ịya haịn ụnụ gi tọ alị Kadẹshi, nọ ọnịnọ hụ ile ụnụ nọ ebẹhụ.