Daniẹlụ 9 - Ika

Isi Nke Itenẹi Ekpere Daniẹlụ Mẹni Alị Izrẹlụ

¹ Imẹ ahụa ibuzọ Dariọsụ kịma — Dariọsụ onyẹ Mẹdịa, nwa Ahazẹrusu hụn wẹ tumẹ onyẹ ọkịkị alị-eze Babilọnụ —

² imẹ ahụa ibuzọ ọ kịma, mmẹ wụ Daniẹlụ nọ gi ihiẹn wẹ de imẹ Ẹkụkwọ-nsọ, ihiẹn hụn Osolobuẹ gi onyẹ-amụma wụ Jerimaya ku, ghọta nị ahụa iri kwasị ọgụn-ẹtọ kẹ Jerusalẹm k'e mẹ mkpọkọ-mkpọkọ.

³ Ya m nọ bu ihun zinmẹ Di-nwọnni-ẹnyi wụ Chuku, mẹmẹ ekpere, rịọma a, e bu ọnụ, e yi ẹkwa-achọ wẹ gi a kwan ụya, e kpọn m ntụn ye isi nke onyẹ ihiẹn mẹ.

⁴ M nọ mẹ ekpere jẹnni Osolobuẹ wụ Chuku m, e kupụha njọ ẹnyi, sị, “Dodo, Di-nwọnni-ẹnyi, Chuku uku, hụn w'a tụ egun ẹ, hụn e nwọnsọnmẹ ihiẹn-ọsụsụọ ndị ihiẹn ẹ a sụọ hụn rị e mẹ ihiẹn o ku,

⁵ ẹnyi e mẹgụọ njọ, ẹnyi e mẹfiegụọ. Ẹnyi a kpachanpụgụọ ẹnya mẹ njọ, e nupụ isi okpuru i; ẹnyi a latọgụọ ihiẹn ị sị ẹnyi mẹ lẹ iwu ndị i yesọnmẹ.

⁶ Ẹnyi egọnni idibo i ndị-amụma ntịn — ndị amụma ị, hụn gi ẹfan ị gwa ndị-nze ẹnyi lẹ ndị-isi ẹnyi lẹ ndị nẹdi ẹnyi lẹ ndị alị ẹnyi ile oku.

⁷ “Di-nwọnni-ẹnyi, y'e emẹni eje-ihiẹn; ẹnyi mẹ, ẹnyi ile gi nwan rị e ri ụya tannị — ẹnyi ndị Juda lẹ ndị Jerusalẹm lẹ ndị Izrẹlụ ile, kẹ ndị rị ẹhụ nsue kẹ ndị rị ụz'ote imẹ alị ile hụn ị gi ufiri nnupụ-isi ẹnyi feyịya ẹnyi ye.

⁸ Euu, Osolobuẹ, ẹnyi rị nwan e ri ụya, ẹnyi lẹ ndị-nze ẹnyi lẹ ndị-isi ẹnyi lẹ ndị nẹdi ẹnyi — makẹ njọ ẹnyi mẹ i.

⁹ Di-nwọnni-ẹnyi hụn wụ Chuku ẹnyi wụ onyẹ omikẹn lẹ onyẹ mgbagharị, ọ sụọn'a nị ẹnyi e nupụgụọ isi okpuru ẹ —

¹⁰ ẹnyi emẹni ihiẹn Osolobuẹ wụ Chuku ẹnyi sị ẹnyi mẹ mọbụ sọn iwu ndị ọ gha ẹka ndị-amụma a ye ẹnyi.

¹¹ Izrẹlụ ile a dangụọ iwu i, gbakitọ ị azụụn, ekweni wẹ mẹ ihiẹn ị sị wẹ mẹ. “Ya kẹ ọnụ-ẹsọn lẹ ihiẹn ile Osolobuẹ kun enwẹn ẹ n'o k'e mẹ, hụn wẹ deye imẹ Iwu Mozizi wụ odibo Osolobuẹ, gi nwan hukpu ẹnyi, makẹni ẹnyi e mẹọlẹ ị njọ.

¹² Y'e mẹgụọ ihiẹn ị sị i k'e mẹ ẹnyi lẹ ndị ọkịkị ẹnyi ebe ị nọ mẹ ẹnyi okẹn ihiẹnni. Elu ụwanị ile rị okpuru igwere, emẹtuni wẹ alị ọzọ ihiẹn wẹ mẹ Jerusalẹm.

¹³ Kẹ wẹ dọnhụ de ẹ imẹ Iwu Mozizi, ẹrịra kẹ okẹn ihiẹnni ile dọn nwan mẹ ẹnyi, bụ ẹnyi eke mẹkwọ ihiẹn yụ wụ Osolobuẹ Chuku ẹnyi e gi mẹyeni ẹnyi — hụn wụ ịlatọ njọ ẹnyi lẹ igọn ezioku i ntịn.

¹⁴ Osolobuẹ elezini ẹnya azụụn d'e mẹ ẹnyi ihiẹnni o mẹ ẹnyi, makẹni Osolobuẹ wụ Chuku ẹnyi wụ onyẹ ezioku imẹ ihiẹn ile o mẹ — kanị ẹnyi emẹkwọnị nwan ihiẹn ọ sị ẹnyi mẹ.

¹⁵ “Dodo nwan, Di-nwọnni-ẹnyi wụ Chuku ẹnyi, hụn gi ikẹn hi-ogbe gha Ijiptu wepụha ndị nke i, gi ẹ nwọnrin ẹfan d'e ru tannị, ẹnyi e mẹọlẹ njọ, ẹnyi e mẹọlẹ ihiẹn jọgbu enwẹn ẹ.

¹⁶ Euu Osolobuẹ, gi ufiri ezi-omumẹ i mẹ nwan kẹ i dọn e mẹ — y'a latọ olulu lẹ ọnụma i gi nwan rị e sọn Jerusalẹm, hụn wụ obodo i, ugu nsọ ị, makẹni njọ ẹnyi lẹ ụrụ ndị nẹdi ẹnyi e mẹgụọ Jerusalẹm lẹ ndị nke i wụrụ ihiẹn ndị nọkunmẹni ẹnyi gi a mụ ẹmụ.”

¹⁷ “Euu Chuku ẹnyi, nụ nwan ekpere lẹ arịrịọ odibo i. Di-nwọnni-ẹnyi, dodo, gi ufiri yụ lẹ enwẹn i gi ẹnya rị mma lee Ụlọ-nsọ ị hụn mẹ nwan mkpọkọ-mkpọkọ.

¹⁸ Chuku, dodo, gọn ntịn n'ị nụ; lee ẹnya n'ị hụn kẹ obodo hụn rị a za Ẹfan ị mẹ nwan mkpọkọ-mkpọkọ. Ẹlẹni ẹnyi wụ ndị ezi-omumẹ haịn ẹnyi gi a rịọ ị, kanị ufiri okẹn omikẹn i.

¹⁹ Di-nwọnni-ẹnyi, dodo gọn ntịn! Di-nwọnni-ẹnyi, dodo gbagharị! Di-nwọnni-ẹnyi, dodo nụ nwan, nị ị hụn ụzọ mẹ ihiẹn banyen'ẹ! Chuku m, dodo, makẹ ufiri i, ebielẹ — makẹni Ẹfan ị kẹ obodo i lẹ ndị nke i a za.”

Iri Kwasị Ọgụn-ẹtọ Ụzọ Ẹsa

²⁰ Hụn ahụn m rị e ku, e mẹ ekpere, e kupụha njọ m lẹ njọ ndị nke m wụ Izrẹlụ, a rịọ Osolobuẹ wụ Chuku m banyeni ugu nsọ a —

²¹ hụn ahụn m rịkwọ e mẹ ekpere, Gebrẹlụ, okẹnnyẹ ahụn m hụn imẹ ọhụn m isi ibuzọ nọ pụha ọpụha a tụ egun; ibẹka ogẹn wẹ gi a chụn ẹjan ẹnyasị k'o gi pụha.

²² Ọ nọ gwa m oku, sị m, “Daniẹlụ, m bịa nwan d'e mẹ i ghọta ihiẹnni.

²³ Ogẹn i gihụ mẹmẹ ekpere hụ kẹ Osolobuẹ gi za. Azịza hụ kẹ m wẹhẹni i nwan, makẹni Osolobuẹ ara gi i gu egu. Leban nwan ẹnya ozi hụ, nị ị hụn ụzọ ghọta ọhụn ahụn:

²⁴ “Ogẹn Chuku kayeni ndị nke i lẹ obodo nsọ ụnụ wụ ‘iri kwasị ọgụn-ẹtọ ụzọ ẹsa’ hụn wẹ e gi ta afụnfụn njọ, hụn Osolobuẹ e gi wepụ njọ, hụn o gi mẹ ihiẹn wẹ e gi wepụ njọ, webanhan ezi-omumẹ itẹbitẹ, mẹzu ihiẹn ọ ghọsị ndị-amụma lẹ ihiẹn ndị amụma ku, tumẹ ebe kachanrịn nsọ.

²⁵ “Marịn nwan ihiẹnni m jẹnkọ d'e ku; ghọta a ọhụnma: Gha ogẹn wẹ k'e gi ye iwu sị wẹ dọnzi Jerusalẹm, tụndọnzi ẹ, d'e ru ogẹn Onyẹ hụ Osolobuẹ tumẹ e gi bịa, ogẹn Onyẹ ọkịkị hụ e gi bịa, k'a wụ ‘ẹsa ụzọ ẹsa cheni ẹsa ụzọ ẹbụọ-kwasị-ọgụn-ẹtọ’. Wẹ k'a tụndọnzi ẹ, tụndẹ ọgbara-ogbe lẹ mgbọn ye ẹ, kanị wẹ k'a hụn nsọngbu wẹ gha a rụn a.

²⁶ ‘Ẹsa ụzọ ẹbụọ-kwasị-ọgụn-ẹtọ hụ’ ghafegụ, e gbu wẹ Onyẹ hụ Osolobuẹ tumẹ bụ onwọnni ihiẹn ọ latọ. Ndị-agha hụn wẹ lẹ onyẹ ọkịkị ohu k'a wị bịa k'e tikpọ obodo nsọ lẹ Ụlọ-nsọ hụ. Isi njẹndemẹ k'a bịa idẹnmizi kẹ okẹn mirin rị e huni: Agha k'a lụsọnmẹ d'e ru njẹndemẹ, Osolobuẹ e kugụọ a nị okẹn ntikpọ jẹnkọ d'a rị.

²⁷ Onyẹ-ọkịkịnị lẹ ndị bu ọda k'e kwerigbama ọrọgbọ ‘ẹsa.’ ‘Ẹsa’ hụ ruọlẹ ahanmahan o k'a kụsị ẹjan w'a chụnị Osolobuẹ lẹ oyiye ndị w'e ye Osolobuẹ. O k'e bu ihiẹn e mẹrụnị tumẹ azụụn ohu imẹ Ụlọ-nsọ, gi ẹ sehẹ ntikpọ — d'e runi Osolobuẹ e mẹ ẹ ihiẹn ọ sị o k'e mẹ, nke ẹ a gụ.”