Daniẹlụ 8 - Ika

Isi Nke Ẹsatọ Daniẹlụ A Hụn Ọgụn Ebulu Lẹ Mkpịn

¹ Imẹ ahụa nke ẹtọ Eze wụ Bẹlụshaza kịma, mmẹ wụ Daniẹlụ nọ hụn ọhụn. Ẹlẹkwọ nke ibuzọnẹi m hụn.

² Imẹ ọhụn ahụn, m hụn enwẹn m imẹ isi-obodo wụ Susa, hụn rị imẹ Ẹgbẹrẹ Ẹlam. Imẹ ọhụn ahụn, m rị mkpẹnrẹn mirin, mkpẹnrẹn Ote-mirin Ulaị.

³ E lee m ẹnya, e lee ebulu nwọn mpịn ẹbụọ wuzo mkpẹnrẹn Ote-mirin hụ, mpịn a ẹbụọ ahụn sue esue. Mpịn ohu ka ibe ẹ usue kanị ịya kpa azụụn suepụha.

⁴ M hụ e lee ebunu hụ k'ọ rị a zụnshi ẹbamịn ọdịdan-ẹnyanwụn lẹ ẹbamịn-ugu lẹ ẹbamịn ọwụwa-ẹnyanwụn. Onwọnni anụ sa ẹka che ẹ ọgụn, onwọnzikwọnị hụn sa ẹka napụ a ihiẹn o gi. O mẹ k'ọ sụọ a, e bushi enwẹn ẹ elu.

⁵ Ebe m nọ e ro ihiẹnni, mkpịn ohu nwọn okẹn mpịn ẹgbata ẹnya ẹbụbụọ nọ gha ẹbamịn ọdịdan-ẹnyanwụn pụha, fetuchanrịn ụwa ile bụ ụkụ a arị a hụatụ alị.

⁶ Ọ nọ jẹnburu ebunu hụ nwọn mpịn ẹbụọ m hụn wuzo mkpẹnrẹn Ote-mirin, gi okẹn ọnụma zụnburu ẹ.

⁷ A hụn m'a k'ọ maye ebulu hụ ọkụn-ọkụn, sụn a mpịn, sụngi ẹ mpịn ẹbụọ hụ. Ebulu ahụn asanị ẹka sọn ẹ lụ ọgụn; mkpịn hụ a sụntu ẹ, zọkpụkpọ a, onwẹni onyẹ s'ẹka gbapụha ebulu hụ ẹka a.

⁸ Mkpịn hụ nọ bushimẹ enwẹn ẹ elu, kanị k'o dọn rị e kẹnrẹn, mpịn a hụn kanị nọ kpagipụ, okẹn mpịn ẹnọ nọ gha ọnọdị hụn ahụn kpagini pụha, sueshisọnmẹ azụụn ẹnọ ufere igwere gha e fe.

⁹ Mpịn ọzọ nọzị gha imẹ ohu imẹ wẹ ẹnọ pụha; mpịn ahụn mẹ ntịn k'ọ pụha, kanị, o suepụha, ka ẹhụ, kpama ikẹn, kpa a ru ẹbamịn-ugu lẹ ẹbamịn ọwụwa-ẹnyanwụn lẹ Alị Hụ Ma mma.

¹⁰ O sue d'e ru n'ọ sụntụ ihiẹn ndị rị elu-igwere, nutusọnmẹ kokisẹ ndị o nutu ye alị, zọkpụkpọ wẹ.

¹¹ O bushi enwẹn ẹ elu, bunụmadẹni Onyẹ kị ndị-agha elu-igwee; gbọndọn wẹ achụyelẹn'ẹ ẹjan w'a chụsọnmẹ ụhụọhịn-ụhụọhịn, welụa Ụlọ-nsọ a alị.

¹² Wẹ nọ gi ufiri nnupụ-isi ha igunrun ndị nsọ yen'ẹ, nịzịkwọ a kụsị ẹjan w'a chụsọnmẹ ụhụọhịn-ụhụọhịn. Ihiẹn ile o mẹ hụ a ghan'a; a tụ wẹ ezioku ye alị.

¹³ Ya m nọ nụ kẹ onyẹ-nsọ ohu rị e ku oku, onyẹ-nsọ ọzọ nọ sị a, “Nanị ọhụnnị e biehan d'e mẹ — ọhụn ahụn gbashịarịnị ẹjan w'a chụsọnmẹ ụhụọhịn-ụhụọhịn lẹ arụ ahụn k'e buhẹ ntikpọ, lẹzi ọlatọ wẹ k'a latọn'a Ụlọ-nsọ lẹ igunrun ndị nsọ o k'a zọkpụkpọ?”

¹⁴ Ọ nọ sị m, “O k'a nọ ẹnyasị lẹ ụtụntụn ọgụn-mmisẹn kwasị nnụ-isẹn (2,300); ogẹn ahụn kẹ w'e gi dọnzi Ụlọ-nsọ hụ rụnị.”

Kẹ Wẹ Dọn Kọwa Ọhụn Ahụn

¹⁵ Kẹ mmẹ wụ Daniẹlụ rị e lee ihiẹn ahụn m hụn, a nwan nị m ghọta a, e lee onyẹ ohu nọ kẹ ịhịan wuzo m ihun.

¹⁶ M nọ nụ olu okẹnnyẹ rị a gha Ote-mirin Ulaị a hị, “Gebrẹlụ, gwa okẹnnyẹ hụ ihiẹn ọhụn ahụn wụ.”

¹⁷ Mgbe Gebrẹlụ gi nọzụnhan ebe m wuzo, egun nọ tụma m, m nọ dan alị, fiẹnrin mọmọmọ. Ọ nọ sị m, “Nwa ịhịan, ghọta nị ọhụnnị wụ ihiẹn jẹnkọ d'e mẹ ogẹn ikpanzụụn.”

¹⁸ Ogẹn o gi gwa m okuni, m nọ sọhị fiẹnrin mọmọmọ. Ya ọ nọ mẹtụ m ẹka, weli m elu.

¹⁹ Ọ sị: “M jẹnkọ nwan d'a gwa ị ihiẹn k'e mẹ ihun, ogẹn Osolobuẹ e gi ghọsị ọnụma a — makẹni ọhụn ahụn rị e ku oku ogẹn njẹndemẹ wẹ kayegụ:

²⁰ Ebulu hụ ị hụn nwọn mpịn ẹbụọ wụ ndị-nze Mẹdịa-lẹ-Pẹshịa.

²¹ Mkpịn hụ ẹṅẹnrẹn ẹ tụ wụ eze ndị Griki, okẹn mpịn ahụn rị a ẹgbata ẹnya ẹbụọ wụ eze ibuzọ ndị Griki.

²² Mpịn ẹnọ hụ nọkin ẹnya ohu hụ kpagipụnị wụ alị-eze ẹnọ k'a gha alị a pụha ọ kịgụ, kanị Enwọnkọ wẹ ikẹn kẹ ịya.

²³ “O rumẹ njẹndemẹ ọkịkị wẹ, mgbe ndị rị e nupụ isi e gi nupụgụ isi, eze ohu wụ obi-ọmụma lẹ ẹro lẹ enwẹn ẹ k'a pụha.

²⁴ O k'e kẹnrẹn ọda-ọda, kanị ẹlẹ ikẹn ya lẹ enwẹn ẹ k'o k'e gi kẹnrẹn. O k'e se okẹn ntikpọ a tụ ẹnya, ihiẹn ile o mẹ a ghachanrịnn'a. O k'e tikpọdẹ ndị dikẹn lẹ ndị-nsọ.

²⁵ O k'e gi ndufie gha ihun ọhụnma-ọhụnma, weri ẹ n'o nwọnni onyẹ hankẹ ya. Ogẹn wẹ gi e ro nị nsọngbu arịa kẹ o k'e gi gbu ndị bu ọda, bunụmanị Onyẹ a kị ndị-ọkịkị. Wẹ k'e gbu ẹ, kanị ẹlẹ ẹka ịhịan k'e gbu ẹ.

²⁶ “Ọhụn gbashịarịnị ẹjan w'a chụn ẹnyasị lẹ ụtụntụn wụ ezioku, ka zuemẹgụ ọhụn ahụn, makẹni ihiẹn jẹnkọ d'e mẹ ihun-ihun rọ.”

²⁷ Ndụn nọ gụchanrịn mmẹ wụ Daniẹlụ, emu nọ kụ m, mẹ m dinẹ ụhụọhịn ole-lẹ-ole. E lihi m, rụnmazị ọrụn eze. Ọhụn ahụn mẹhunmẹ m ọda-ọda; ọ nịnị ghọta.