Daniẹlụ 7 - Ika

Isi Nke Ẹsa Daniẹlụ A Rọhụn Eje-anụ Ẹnọ Ogẹn Daniẹlụ Gi Rọ Nrọ Hụ

¹ Ahụa ibuzọ Bẹlụshaza wụ eze Babilọnụ kịma, Daniẹlụ rọ nrọ, hụnsọnmẹ ihiẹn ndị ọ hụn imẹ nrọ hụ ebe o dinẹ elu bẹdi ẹ. Ọ nọ be ihiẹn ndị hụ ọ rọhụn nkeke detu.

Eje-anụ Ẹnọ Hụ

² Daniẹlụ sị: “Imẹ nrọ hụ m rọ imẹ uhinhin, e lee m ẹnya, e lee kẹ ufere rị a ghasọnmẹ ẹbamịn ẹnọ ọ gha e fe imẹ igwere e fe, e gberụrụ okẹn ohimin.

³ Ẹregede eje-anụ ẹnọ nọ gha imẹ ohimin hụ pụha, wẹ ẹnịnọ rịsọnmẹ ichẹn-ichẹn.”

⁴ “Nke ibuzọ nọ kẹ ẹwọrọ, kanị nku ugọn k'o nwọn. Ebahụn m rị e lee ẹ, nku ẹ ndị hụ nọ kwapụ, ọ nọ gha alị lihi, gi ụkụ a ẹbụbụọ wuzo kẹ ịhịan, wẹ nọ ye ẹ obi o gi e ro iroro kẹ ịhịan.

⁵ “Eje-anụ hụn mẹ ẹ ẹbụọ nọ pụha: ọ nọ kẹ eje-anụ wụ biẹ. Ọ kị ụkụ a lẹ ẹka a rị azụụn ohu shi elu, akpụ osẹn anụ ẹtọ rị a ọnụ, o gi eze tadọn wẹ. Wẹ nọ sị a, ‘Lihi n'i ri anụ rijun ẹfọ!’

⁶ “Ọhụn a ghagụ, m nọ nee ẹnya: e lee eje-anụ ọzọ rị m ihun, ọnwan nọ kẹ Liopadị! Nku ẹnọ rị a ụgba-azụụn. Nku ndị ahụn nọsọnmẹ kẹ nke nnụnụ. Eje-anụ hụnnị nwọn isi ẹnọ, wẹ ye ẹ ikẹn n'o gi kị.

⁷ “Ọhụn e mẹgụ, imẹ nrọ ahụn m rọ imẹ uhinhin, e lee m ẹnya ihun m ebahụn, e lee eje-anụ hụn mẹ wẹ ẹnọ; hụnnị wụ ihiẹn-egun; ndụn a rịka a! Eze igwe hi ogbe k'o nwọn; ọ dọkịka ihiẹn danban a ẹka, e ripụ, a zọkpụkpọ hụn ọwụlẹ họdụnị. Ọ rị ichẹn ebe eje-anụ ndị hụ bu ẹ ụzọ pụha rị; mpịn iri k'o nwọn.

⁸ “Ebe m rị e lekpọ mpịn iri ahụn, e lezi mpịn ọzọ gha imẹ wẹ pụha: hụnnị mẹ ẹkẹrẹ; mpịn ẹtọ imẹ ndị ibuzọ hụ nọ huepụn'a. Mpịnnị nwọn ẹnya nọ kẹ nke ịhịan lẹ ọnụ o gi rị a nyan isi. Ihiẹn Chuku Mẹ Eje-anụ Ndị Ahụn.

⁹ “Ebe m nọzị e lee ẹnya, E butọsọnmẹ wẹ ukpo-eze, Onyẹ hụ Nwọnlẹni Mbidọn nọ weri oche. Ẹwuru ọchan o yi hụ e nwun zaị kẹ sno; ntutu rị a isi hụzị e nwun kẹ oruru ọchan. Ukpo ẹ hụ e nwụn ọkụn, ụkụ ukpo ẹ gi a gba hụzịkwọ e nwun ọkụn.

¹⁰ Iyi nọ kẹ ọkụn hụ e hu — a gha ebe onyẹ hụ dịnọ ukpo hụ rị a pụha. Mmadụ nnụ-uku ole-lẹ-ole hụ e jẹnn'ẹ ozi; ijẹri ole-lẹ-ole rị ihun ẹ e che. Ọgwa e zugụọ nị wẹ kinmẹ ikpe, wẹ nọ shịapụsọnmẹ ẹkụkwọ.

¹¹ “M hụkwọ e lee makẹ oku ile mpịn ahụn rị e gi a nyan isi. M hụ e lee ẹ d'e runi e gbu wẹ eje-anụ hụ, tikpọ a, tụ ozun ẹ ye imẹ ọkụn ahụn rị e nwunni.

¹² (E te napụgụọlẹ wẹ eje-anụ ndị hụn bu ụzọ pụha ikẹn wẹ, kanị a nịghọ wẹ wẹ biyezi ẹkẹrẹ.)

“Nwa Nke Ịhịan”

¹³ “Imẹ nrọ m uhinhin hụ, e lee m ẹnya, m nọ hụn onyẹ nọ kẹ ịhịan, ‘nwa nke ịhịan’, k'ọ rị orukpu igwere lala. Ọ nọ buru Onyẹ hụ Nwọnlẹni Mbidọn, wẹ nọ du ẹ shi ihun ẹ.

¹⁴ Wẹ nọ ye ẹ ikẹn lẹ ọghọ lẹ ọkịkị hụn ihiẹn ile gi a rị okpuru ẹ; ndị ile rị ichẹn-ichẹn, ndị alị ile lẹ asụsụ ile hụ e fe ẹ. Ọkịkị a wụ ọkịkị jẹnrin ejẹn hụn jẹnkọlẹni d'a gụ. Alị-eze ẹ wụ hụn wẹ jẹnkọlẹni d'e tikpọ.

A Kọwanị Wẹ Daniẹlụ Nrọ Hụ

¹⁵ “Obi eruzini mmẹ wụ Daniẹlụ alị, makẹni ihiẹn m rọhụn rị e sọngbu m.

¹⁶ M nọ nọkunmẹ onyẹ ohu imẹ ndị wuzo ebẹhụ, imẹ nrọ hụ, jụ a ihiẹn ihiẹn ndịnị ile wụ. “Ya ọ nọ gwa m, kọwachanrịnnị m ihiẹn wẹ ile wụ:

¹⁷ ‘Ẹregede eje-anụ ẹnọ ndị ahụn wụ alị-eze ẹnọ hụn k'a pụha elu-ụwa.

¹⁸ Kanị omẹgụ, ọkịkị lẹ alị-eze jẹnkọ d'a ban ndị-nsọ Onyẹ hụ Kachanrịnnị ẹka, ọ wụrụ nke wẹ, wụrụchanrịn, jẹnrin ejẹn.’

¹⁹ “M nọ chọ nị m marịnzịkwọ ihiẹn eje-anụ ahụn mẹ wẹ ẹnọ wụ, hụn ahụn rị ichẹn ebe ndị họdụnị rị, hụn wụ okẹn ihiẹn egun, hụn nwọn eze-igwe lẹ mbụọ igwe-bronzu; eje-anụ ahụn hụn a dọkịka ihiẹn danban a ẹka, e ripụ, a zọkpụkpọ hụn ọwụlẹ họdụnị.

²⁰ M chọzịkwọ nị m marịn ihiẹn mpịn iri hụ rị a isi wụ, lẹ ihiẹn mpịn nẹi suepụhacheni wụ, hụn ahụn akpụrụ-ẹtọ imẹ wẹ danpụnị — mpịn nẹi ka ndị ọzọ njọ, hụn nwọn ẹnya, nwọn ọnụ o gi e kukarị enwẹn ẹ.

²¹ Ebẹhụ m rị e lee ile, mpịnnị nọ mayemẹ ndị-nsọ ọgụn, e mẹri wẹ,

²² d'e ru mgbe Onyẹ hụ Nwọnlẹni Mbidọn gi bịa d'a hanyeni ndị-nsọ Onyẹ hụ kachanrịnnị eṅẹn, ogẹn nọ ru hụn wẹ gi nwọnrin ọkịkị lẹ alị-eze.

²³ “Ọ nọ ye m nkọwanị: ‘Eje-anụ ahụn mẹ wẹ ẹnọ wụ alị-eze nke ẹnọ hụn k'a pụha elu-ụwa. O k'a rị ichẹn imẹ alị-eze ndị ọzọ; o k'e ripụ ụwa ile, a zọkpụkpọ a, a dọkịka a.

²⁴ Mpịn iri hụ wụ eze iri hụn k'a gha anị-ezeni pụha. Wẹ kịgụ, eze ọzọ k'a pụha; o k'a rị ichẹn ebe ndị bu ẹ ụzọ pụha rị; o k'e mẹri ndị-nze ẹtọ.

²⁵ O k'e kuja oku Onyẹ hụ Kachanrịnnị, a bịangbu ndị-nsọ a, mẹmẹ n'o gbehutọ ogẹn mmẹmmẹ ichẹn-ichẹn lẹ iwu. Wẹ k'e we ndị-nsọ che ẹ ẹka n'o mẹshi wẹ ikẹn ahụa ẹtọ lẹ mkpikpi.

²⁶ “ ‘Kanị ọgwa Onyẹ hụ Nwọnlẹni Mbidọn k'e zu, kin ẹ ikpe, a napụ w'a ikẹn ẹ, tikpọchanrịn a jẹnrin ejẹn.

²⁷ Ogẹn ahụn kẹ wẹ jẹnkọ d'e gi we ọkịkị ile lẹ ikẹn lẹ ọghọ alị-eze ile rị okpuru igwere ye ndị-nsọ, ya wụ, ndị nke Onyẹ hụ Kachanrịnnị. Anị-eze lẹ ọkịkị a k'a tọ jẹnrin ejẹn, ndị ọkịkị ile k'e fe ẹ, e mẹ ihiẹn o ku.’

²⁸ “Ọnwan wụ ebe ihiẹnni jẹndemẹ. Mmẹ nwẹn wụ Daniẹlụ, obi eruni m alị kaka; ihun m e fọnni kaka — kanị m nọ bu ihiẹnni tọ obi m.”