Daniẹlụ 6 - Ika

Isi Nke Isin A Tụ Wẹ Daniẹlụ Yeni Ẹwọrọ Kẹ Eze Dọn Bushi Daniẹlụ Elu

¹ Eze wụ Dariọsụ sị ọ rịka mma n'o tumẹ ndị-ọkịkị ọgụn isin hụn k'a kịn'a azụụn ile rị alị-eze ẹ

² lẹ ndị-nkịkwama ẹtọ hụn k'a gha a kịkwama wẹ; onyẹ ohu imẹ ndị-nkịkwama ẹtọ hụ wụ Daniẹlụ. Ndị-ọkịkị k'a gha a gwa ndị-nkịkwama kẹ wẹ dọn rị a rụn — makẹ ihiẹn eze gha e wiwi.

³ Ya kẹ Daniẹlụ nọ rụn ọrụn ọhụnma rụnkarị ndị-ọkịkị hụ lẹ ndị-nkịkwama hụ ile, nke wụnị eze nọ sị n'o k'e tumẹ ẹ onyẹ a kịkwamachanrịn alị-eze hụ ile.

Kẹ Ibe Daniẹlụ Dọn Chọ A Njọ

⁴ Ya kẹ ndị-nkịkwama ẹbụọ hụ họdụnị lẹ ndị-ọkịkị ile nọ chọma ihiẹn alị-eze hụn Daniẹlụ rụnlẹni ọhụnma, kanị ahụnnị wẹ ihiẹn wẹ e gi kpe ẹ, a hụnnị wẹ nkọrịanị. Ahụnnị wẹ eje-ihiẹn ọwụlẹ ẹka a, makẹni ọ wụ ịhịan esi, ahụnnị wẹ ebe ọ nọ la azụụn mọbụ rụn ọrụn a zizizi.

⁵ Ọ nọbe, ikẹnnyẹ hụ nọ sị, “Ẹnyi ahụnkọkwọ ihiẹn ẹnyi e gi kpe okẹnnyẹni wụ Daniẹlụ ikpe, manị oku iwu Chuku ẹ.”

⁶ Ya ndị-nkịkwama ẹbụbụọ hụ họdụnị lẹ ndị-ọkịkị hụ nọ zu d'e kunrun eze, sị a, “Eze ẹnyi Dariọsụ, isi i chei!

⁷ Ẹnyi ndị-nkịkwama lẹ ndị e lepụsọnmẹ ọrụn ichẹn-ichẹn ẹnya lẹ ndị-ọkịkị lẹ ịhaịmẹ lẹ ndị gọvanọ e kwerigbamagụọ nị eze ti iwu, hụn a nị ịhịan ile dọnmẹ ya wụ iwi. Iwu hụ wụ nị onyẹ kpọku mmọn ọwụlẹ mọbụ onyẹ ọwụlẹ mmanị ịyụ wụ eze gha kikẹnni d'e ru ifọn ohu, wẹ tụ hụnyẹ ye imẹ olu ẹwọrọ.

⁸ Eze-Agụ, dodo, ti nwan iwu hụ, y'e detu ẹ n'ọ wụrụ hụn wẹ ghalẹni e gbehutọ — n'ọ wụrụ iwu ndị Mẹdịa-lẹ-Pẹshịa wẹ ghalẹni e gbehutọ.”

⁹ Ya Eze wụ Dariọsụ nọ biye ẹka iwu hụ.

Daniẹlụ Sị O K'a Kpọkurịrị Osolobuẹ

¹⁰ Mgbe Daniẹlụ gi nwan marịn nị e tigụọ wẹ iwu hụ, de ẹ, ma ọkwa a, ọ nọ lashi iwe ẹ. Mgbe ẹtọ imẹ ụhụọhịn ọ hụ e jẹn mmughẹ ẹ rị ibe elu hụn windo ẹ bu ihun zinmẹ ibẹka Jerusalẹm, e gbu osekpu, e mẹ ekpere, a kpanmịn Chuku ẹ, k'o dọn e mẹ mbụ.

¹¹ Ya ndị hụ ile nọ nwan zu, bịa, hụn Daniẹlụ k'ọ rị e mẹ ekpere, a rịọ Chuku ihiẹn.

¹² Wẹ nọ buru eze d'a gwa a oku iwu ahụn o ti, sị, “Eze-Agụ, ẹlẹ i ti iwu, ma ọkwa a, nị onyẹ kpọku mmọn ọwụlẹ mọbụ onyẹ ọwụlẹ manị ịyụ wụ eze gha kikẹnni d'e ru ifọn ohu, wẹ tụ a ye imẹ olu ẹwọrọ?”

¹³ Ya wẹ nọ sị eze, “Eze-Agụ, Daniẹlụ, hụn wụ onyẹ ohu imẹ ndị wẹ gha Juda kpụnhan, ara gọn i ntịn; o dọnmẹzikwọnị nwan iwuni i ti detu. Echẹn k'o mẹ ekpere mgbe ẹtọ ụhụọhịn k'o dọn e mẹ.”

¹⁴ Ogẹn eze gi nụ ihiẹnni, ẹfọ asụọn'a ụsụọ kaka. Ọ nọ sị enwẹn ẹ n'o k'a gbapụharịrị Daniẹlụ — ọ nọ nwan ikẹn ẹ ile anwụn e we rọ n'ọ ghapụha a.

¹⁵ Ya wẹ nọ zuzi buruzi eze, sị a, “Eze-Agụ, nyanhankwọ kẹ iwu Mẹdịa-lẹ-Pẹshịa nọ, n'o nwọnni iwu mọbụ uhi eze biye ẹka hụn w'e hutọ.”

¹⁶ Ya eze nọ zi wẹ, wẹ nọ wẹhẹ Daniẹlụ, tụ a ye imẹ olu ẹwọrọ. Eze sị Daniẹlụ, “Chuku i, hụn y'e fe ogẹn ile ya dodo gbapụha ị!”

¹⁷ Wẹ nọ buhẹ ọmụma, gi ẹ dọkin ọnụ olu hụ, eze nọ gi ọla-ẹka a lẹ nke ndị-isi biye ẹ ẹka kẹ w'e mẹ ẹ hụn wẹ gi gbọndọn ịhịan e hutọlẹ ọnọdị Daniẹlụ.

¹⁸ Eze nọ lakin obi-eze ẹ; o rini ihiẹn-oriri uhinhin ahụn, ọ nịnị wẹ mẹn'ẹ ihiẹn ọwụlẹ ẹfọ gi a sụọ a ụsụọ. Ọ ranhịnnị.

Chuku A Zụọpụha Daniẹlụ

¹⁹ Hụn eki gihụ fọnmẹ, eze nọ lihi, shi olu ẹwọrọ hụ ozigbo-ozigbo.

²⁰ O ru ẹhụ olu hụ, ọ nọ gi uhue rị e huen'ẹ kpọcheni Daniẹlụ, sị, “Daniẹlụ-o, odibo Chuku ahụn rị ndụn, Chuku i, hụn y'e fe ogẹn ile a saghọ ẹka gbapụha ị ẹka ẹwọrọ?”

²¹ Daniẹlụ nọ za a, sị, “Eze, isi i chei!

²² Chuku m zi mmọn-ozi ẹ, ọ nọ kpumẹ ọnụ ẹwọrọ ndịnị. Onwọnni ihiẹn wẹ mẹ m, makẹni ọ hụngụọ nị emẹni m njọ, onwọnzikwọnị eje-ihiẹn m mẹ yụ wụ eze.”

Eze E Mẹgwarịnị Daniẹlụ

²³ Ẹfọ nọ sụọ eze ụsụọ ọda-ọda, ọ nọ zi wẹ d'a dọpụha Daniẹlụ imẹ olu hụ. A dọpụha wẹ Daniẹlụ, wẹ nọ hụn a n'o nwọnni ebe ọ rụ ẹhụ, makẹni o gi Chuku ẹ dọn ẹnya.

²⁴ Eze nọ zi wẹ, wẹ nọ jẹn d'e wẹhẹ ndị ahụn gi iwe Daniẹlụ rị e weni wẹ kpe Daniẹlụ, tụ wẹ ye imẹ olu ẹwọrọ hụ — wẹ lẹ inyẹnmẹ wẹ lẹ ụmụ wẹ. W'e ke rudẹ alị olu ahụn kẹ ẹwọrọ ndị hụ maye wẹ, kpagichanrịn ọkpụkpụ ile rị wẹ ẹhụ.

Eze E Ye Chuku Daniẹlụ Ọghọ

²⁵ Ya eze nọ de ẹkụkwọ jẹnni ndị ile rị ichẹn-ichẹn, ndị alị ile lẹ asụsụ ile rị alị-eze ahụn: “Ya masịnị ụnụ ọda-ọda!

²⁶ “M rị e ti iwu nị ndị ile rị Ẹgbẹrẹ ọwụlẹ imẹ alị-eze m jẹnkọ d'a tụ egun Chuku Daniẹlụ, a gbaye ẹ. Makẹni ịya wụ Chuku hụn rị ndụn; o k'a rị jẹnrin ejẹn; etikpọkọ wẹ alị-eze ẹ; ọkịkị a agụkọ.

²⁷ Ọ gbapụha ịhịan, a zụọpụha; o mẹ ihiẹn a ghọsị ẹka a lẹ ihiẹn a tụ ẹnya imẹ elu-igwee lẹ enu-ụwa. Ọ gbapụhagụọ Daniẹlụ ọnụ ẹwọrọ.”

²⁸ Ẹrịra kẹ ihiẹn dọn ghanị Daniẹlụ ogẹn Dariọsụ lẹ Saịrọsị gisọnmẹ kị alị-eze Pẹshịa.