Daniẹlụ 4 - Ika

Isi Nke Ẹnọ Osisi Nebukadineza Rọhụn

¹ Mmẹ wụ eze Nebukadineza rị e de ozini e jẹnni ndị ile rị ichẹn-ichẹn, ndị alị ile lẹ asụsụ ile, hụn bi ụwa ile: Ụwa ya rịwayeni ụnụ mma!!

² M chọ nị m gwa ụnụ ihiẹn a tụ ẹnya lẹ ahụnlele hụn Chuku Kachanrịnnị mẹni m, makẹni ọ sụọ m nị m ku ẹ.

³ Ọ ghọsịkakwọ ẹka-o! Ọ rụnkakwọ ihiẹn a tu ẹnya!! Alị-eze ẹ wụ alị-eze itẹbitẹ; ọkịkị a k'e ru agbọ ile.

⁴ Mmẹ wụ Nebukadineza rị obi-eze m e bi, ẹhụ hụ e fu m, m hụ a gha ihun.

⁵ M nọ rọ nrọ hụn tụ m egun; ihiẹn ndị m hụn imẹ nrọ ebe m dinẹ elu bẹdi m a ranhịn tụ m egun ọda-ọda.

⁶ Ya m nọ sị wẹ d'a kpọhanị m ndị ile a hụn ụzọ imẹ alị Babilọnụ, ni wẹ kọwanị m nrọ hụ.

⁷ Mgbe ndị-ihẹnrẹn ile lẹ ndị a gwọ ọgụn lẹ ndị a hụn ụzọ lẹ ndị a gba ẹfa gi bịa, m nọ ziẹnni wẹ nrọ hụ, kanị asanị wẹ ẹka kọwanị m ihiẹn ọ wụ.

⁸ O mẹgụ, Daniẹlụ nọ bịa ihun m — Daniẹlụ hụn ẹnyi gụn Bẹlụtẹshaza, ẹfan mmọn m; Daniẹlụ hụn mmọn rị nsọ rị imẹ ẹ. Ya kẹ m nọ ziẹnn'ẹ nrọ hụ.

⁹ E sị m'a, “Bẹlụtẹshaza onyẹ-isi ndị a hụn ụzọ, a marịnghọ m nị mmọn rị nsọ rị imẹ i, nị onwọnni ihiẹn-omimi a fụ ị ọrụn ọkọwa. Lee nrọ m rọ; gwa m ihiẹn ọ wụ.

¹⁰ Lee ihiẹn m rọhụn ebe m dinẹ elu-bẹdi m: e lee m ẹnya, e lee osisi ohu rị ahanmahan ụwa — o sue ọda-ọda.

¹¹ Osisi hụ e sue họnrin okẹn-osisi, ze, ọnụnụ a sụntụ igwere; ndị ile rịdẹ ebe ụwa ru hụ e legha a.

¹² Ẹhụhụọ a a shịa; mkpụrụ jun ẹ; elu ẹ kẹ ihiẹn ịhịan ile e ri rị; okpuru ẹ kẹ anụmanụ ile bi; agalaba a kẹ nnụnụ kụyesọnmẹ ẹkụ wẹ; ịya kẹ ihiẹn ile gha e nwẹhẹn ihiẹn-oriri.

¹³ “Imẹ nrọ hụ m rọ elu bẹdi m, e lee m ẹnya, e lee onyẹ-ozi ohu hụn wụ mmọn-ozi nsọ k'ọ gha elu-igwee lala.

¹⁴ Ọ nọ gi okẹn olu yi, ‘Gbutu ni osisi hụ; kwapụchanrịn nị agalaba a; gbụpụchanrịn nị ẹhụhụọ a; zịzapụ nị mkpụrụ a. Anụmanụ ndị rị okpuru ẹ wẹ gbapụ, nnụnụ ndị rị agalaba a wẹ fepụ.

¹⁵ Wẹ hapụ ukun ẹ lẹ mkpọgụn a; wẹ gi igwe-mmaka lẹ igwe-bronzu limẹ ukun ẹ ebahụn ọ rị, ebẹhụ ẹfịfịa fihunmẹ ẹ. Igirigi ya ghama elu-igwere e ziẹnkpu ẹ, ya sọn anụmanụ biri imẹ ẹfịfịa rị alị.

¹⁶ Wẹ napụ a uche ịhịan, ye ẹ uche anụmanụ ọrọgbọ ahụa ẹsa.

¹⁷ “ ‘Ndị-ozi hị ihiẹnni; ndị-nsọ sị ihiẹnni mẹ, kẹni ịhịan ile rị ụwa marịn nị alị-eze ile ịhịan pumẹ rịchanrịn okpuru Onyẹ hụ Kachanrịnnị, nị o we wẹ e ye onyẹ ọwụlẹ ọ chọ, e wedẹ wẹ e ye onyẹ kachanrịn ntịn a kị.’

¹⁸ Ịya wụ nrọ hụn mmẹ wụ eze Nebukadineza, rọ. Bẹlụtẹshaza, kọwanị m nwan ihiẹn ọ wụ, makẹni onwọnni kaka akpụ onyẹ ohu imẹ ndị a hụn ụzọ imẹ alị-eze m hụn s'ẹka kọwanị m ihiẹn o wụ. Kanị, ị k'a saẹka, makẹni mmọn ahụn rị nsọ rị imẹ i.”

Kẹ Daniẹlụ Dọn kọwa Ihiẹn Osisi Hụ wụ

¹⁹ Ya ndụn nọ gụchanrịn Daniẹlụ hụn w'a kpọzị Bẹlụtẹshaza ẹkẹrẹ ogẹn, nkọwa hụn ban a obi tụ a egun. Ya kẹ eze nọ sị, “Bẹlụtẹshaza, anịlẹ nrọ hụ mọbụ ihiẹn ọ wụ tụ ị egun.” Bẹlụtẹshaza nọ sị, “Di-nwọnni-m, k'ọ rị m nrọnị a nọ isi ndị iṅẹnrẹn i bụn — ẹlẹ ịyụ, nkọwa a a nọ isi ndị rị e we iwe i bụn — ẹlẹ isi i!

²⁰ “O mẹ nke osisi ahụn ị hụn, osisi ahụn sueni, họnrin okẹn-osisi zeni, ọnụnụ a rị a sụntụ igwere, osisi ahụn ụwa ile rị e legha —

²¹ osisi ahụn ẹhụhụọ a shịa, mkpụrụ jun, hụn rị a mịpụhanị ịhịan ile ihiẹn w'e ri, anụmanụ hụ e bi okpuru ẹ, nnụnụ hụ a kụ ẹkụ e ye agalaba a —

²² Eze-Agụ, ịyụ wụ osisi hụ! Y'e họnringụọ okẹn-ịhịan zeni — y'e mẹkẹnmẹkẹ okẹn-ịhịan nọkẹ kẹ okẹn osisi hụ dọn sụntụ igwere; ọkịkị ị a ghagbarịgụọ ụwa ile.

²³ “Eze-Agụ, imẹ nrọ hụ, ị nọ hụn onyẹ-ozi, onyẹ-nsọ, k'ọ gha elu-igwee lala, a sị, ‘Gbutu ni osisi hụ, kẹni ogwe ẹ lẹ ihiẹn rịn'a nwụnhụn. Ka la nị ukun ẹ tọ alị, gi igwe-mmaka lẹ igwe-bronzu limẹ ẹ tọ imẹ irurue; mkpọgụn a ya nọdị imẹ anị ebẹhụ. Igirigi y'a gha elu-igwere e ziẹnkpu ẹ; ya bi kẹ anụmanụ ọrọgbọ ahụa ẹsa.’

²⁴ “Eze-Agụ, lee ihiẹn nrọ hụ wụ; hụnnị wụ ihiẹn Onyẹ Hụ Kachanrịnnị ku n'o k'e mẹ eze nwọnni m:

²⁵ wẹ k'a chụpụ ị ebe ịhịan rị d'e sọn anụmanụ biri; i jẹnkọ d'e ri irurue kẹ efin, igirigi a gha elu-igwere ziẹnkpu i. Ahụa ẹsa k'i k'a rị ọnọdị hụ, d'e ru nị o we i ẹnya nị alị-eze ile ịhịan pumẹ rịchanrịn okpuru Onyẹ Hụ Kachanrịnnị, lẹni o we wẹ e ye onyẹ ọ chọ.

²⁶ Hụn ahụn ọ gwa wẹ hatu ukun osisi hụ lẹ mkpọgụn a ghọsị nị alị-eze i k'e mẹzi nke i o wegụ ị ẹnya nị Elu-igwee rị a kị.

²⁷ Eze-Agụ, dodo weri nwan ọdụn m k'a dụn ị: mẹbehi njọ, mẹmẹ ezi-omumẹ; la ẹfọ-njọ tọ n'i mẹmẹni ndị rị e ri ụya ẹfọma. Ikẹnkwọ y'a ghasọnmẹ ihun.”

Nebukadineza E Serikwọ Afụnfụn Hụ

²⁸ Kanị ihiẹnni ile mẹchanrịn Eze wụ Nebukadineza.

²⁹ Ifọn mmẹbụọ a gharịgụ, ebe eze rị e jẹnhunmẹ elu obi-eze rị Babilọnụ,

³⁰ ọ nọ sị, “E lee okẹn Babilọnụ m gi ikẹn m hi ogbe tụn wụ ọnwan?! Mmẹ tụn a n'ọ wụrụ isi-obodo eze lẹni m gi ẹ nwọn ọghọ eze!”

³¹ Oku hụ e ke gụ a ọnụ kẹ olu ohu gha elu-igwee bịa, sị: “Eze wụ Nebukadineza, wẹ rị nwan a sị ị nị: Eze a pụgụọ ị ẹka.

³² Wẹ sikọ d'a chụpụ ị ebe ịhịan bi, y'e sọn anụmanụ biri; i jẹnkọ d'e ri irurue kẹ efin. Ahụa ẹsa k'i k'a rị ọnọdị hụ d'e ru ni y'e ku ẹ nị alị-eze ile ịhịan pumẹ rịchanrịn ẹka Onyẹ Hụ kachanrịnnị lẹni o we ẹ e ye onyẹ ọ chọ.”

³³ Ozigbo hụ oku ahụn nọ bụn isi Nebukadineza. Ihiẹn nọ nurun ẹ gha ebe ịhịan rị pụ, o ri irurue kẹ efin, igirigi igwere e ziẹnkpu ẹ. Ọ rị ọnọdị hụ d'e runi ẹṅẹnrẹn ẹ e sue nọkẹ ugbele ugọn, mbụọ a nọ rị kẹ mbụọ nnụnụ.

Nebukadineza E Ku Ẹ Nị Chuku Ka

³⁴ Ogẹn hụ e zugụ, mmẹ wụ Nebukadineza nọ bu ẹnya zinmẹ elu-igwee, ẹnya nọ dọn m. M nọ ja Onyẹ Hụ kachanrịnnị mma; a gbaye m onyẹ hụ rị ndụn jẹnrin ejẹn, ye ẹ ọghọ. Ọkịkị a wụ ọkịkị itẹbitẹ; alị-eze ẹ k'a rị agbọ ile.

³⁵ Ndị ile bi elu-ụwa enwọn kẹ wẹ han ebe ọ rị. Ihiẹn sụọn'a k'o mẹ — kẹ ebe ikẹn ndị rị elu-igwee rị kẹ ebe ndị rị elu-ụwa rị. Onwọnni onyẹ a sa ẹka e gbọndọn ẹ mọbụ sị a: “K'i mẹni ihiẹnni?”

³⁶ Ogẹn hụ ẹnya gi dọn m, wẹ nọzị yekin m ikpẹn m lẹ ọghọ m, ọghọ ya lẹ alị-eze m wị. Ịhaịmẹ m lẹ ndị-isi nọ chọha m, wekin m ukpo-eze m, m nọ karịdẹ kẹ m rị mbụ.

³⁷ Mmẹ wụ Nebukadineza rị nwan a ja Eze elu-igwee mma, e bushi ẹ elu, e ye ẹ ọghọ makẹni ihiẹn ile o mẹ rị mma; ụzọ a ile zinrin ezinrin. Ọ sa ẹka e wetu ndị hụn e bọnmẹni alị.