Daniẹlụ 3 - Ika

Isi Nke Ẹtọ Shẹdrakị, Mishakị Lẹ Abẹdnego Sị Akụkọ Wẹ Isi-alị

¹ Eze wụ Nebukadineza gi goru kpụ ihiẹn. Usue ẹ wụ ọb'ụkụ iri kwasị ọgụn-ẹnọ, akpa a wụ ọb'ụkụ itenẹi. Ọ nọ bu ẹ tumẹ alị-aradan rị Dura, Ẹgbẹrẹ Babilọnụ.

² Ọ nọ zi wẹ d'a kpọgbama ndị Nnọkin-ẹnya eze imẹ Ẹgbẹrẹ ichẹn-ichẹn, ndị-isi ọrụn ichẹn-ichẹn lẹ ndị gọvanọ; ndị ndụnmọdụn, ndị iho-aza e kwọndọn ẹkpa eze, ndị e dọnzi oku kanị, ndị e dọnzi oku nta lẹ ndị ọzọ ile gi ọkwa imẹ Ẹgbẹrẹ ile rị alị-eze ẹ kẹni wẹ bịa ebe o k'a nọ kpupụ ihiẹn ahụn ọ kpụ.

³ Ndị Nnọkin-ẹnya eze imẹ Ẹgbẹrẹ ile nọ zu ebahụn Eze wụ Nebukadineza k'a nọ kpupụ ihiẹn hụ ọ kpụ, uwẹ lẹ ndị-isi ọrụn ichẹn-ichẹn lẹ ndị gọvanọ; ndị ndụnmọdụn, ndị iho-aza kwọndọnsọnmẹ ẹkpa eze, ndị e dọnzi oku kanị, ndị e dọnzi oku nta lẹ ndị ọzọ ile gi ọkwa imẹ Ẹgbẹrẹ ile rị alị-eze ahụn; wẹ nọ wuzo ihun ihiẹn ahụn ọ kpụ.

⁴ Onyẹ a hịnị nọ gi okẹn oro sị, “Ụnụ ndị ile rị ichẹn-ichẹn, ndị alị ichẹn-ichẹn lẹ ndị asụsụ ichẹn-ichẹn! Lee ni ihiẹn wẹ sị ụnụ mẹ:

⁵ hụn ụnụ gihụ nụ ukwere opi, ẹkpịrị, ụbọ-zita, ụbọ-layẹ, ụbọ-hapụ, ẹrere lẹ ụdị ihiẹn-egu ndị ọzọ ile kikẹnni, ụnụ k'a danrịrị nị ihiẹn goruni eze wụ Nebukadineza kpụ, gbaye ẹ.

⁶ Onyẹ danlẹnin'a alị gbaye ẹ, a tụ w'a ye imẹ okẹn ọkụn rị e nwunni ozigbo.”

⁷ Hụn wẹ gihụ nụ nwan ukwere opi, ẹkpịrị, ụbọ-zita, ụbọ-layẹ, ụbọ-hapụ, ẹrere lẹ ụdị ihiẹn-egu ndị ọzọ ile, ndị ahụn ile rị ichẹn-ichẹn, ndị alị ichẹn-ichẹn lẹ asụsụ ichẹn-ichẹn, nọ dannị ihiẹn goru hụ eze wụ Nebukadineza kpụ alị, gbaye ẹ.

⁸ Ogẹn hụ kẹ ụfọdụ ndị itu ndị a hụn ụzọ nọ pụha d'e kpe ndị Ju.

⁹ E sị wẹ eze wụ Nebukadineza, “Agụ, isi i chei!

¹⁰ Ịyụ wụ eze e tigụọ iwu — nị onyẹ nụ ukwere ọdụ (opi), ẹkpịrị, ụbọ-zita, ụbọ-layẹ, ụbọ-hapụ, ẹrere lẹ ụdị ihiẹn-egu ndị ọzọ ile, o sikọ d'a danrịrị nị ihiẹn hụ wẹ gi goru kpụ, gbaye ẹ;

¹¹ nị onyẹ danlẹnin'a alị gbaye ẹ, a tụ w'a ye imẹ okẹn ọkụn rị e nwunni.

¹² Kanị Eze-Agụ, o nwọnghọ ndị Ju i tumẹ nị w'e lepụn'i ihiẹn ẹnya imẹ Ẹgbẹrẹ Babilọnụnị — Shẹdrakị lẹ Mishakị lẹ Abẹdnego; w'a ra gọndẹ i ntịn. W'a ra fe mmọn i; agbayezikwọnị wẹ nwan ihiẹn goru ahụn ị kpụ.”

¹³ Ya kẹ Nebukadineza nọ gi iwe lẹ ọnụma sị wẹ d'e wẹhẹ Shẹdrakị lẹ Mishakị lẹ Abẹdnego. Ya wẹ nọ wẹhẹ wẹ ihun eze.

¹⁴ Nebukadineza nọ sị wẹ, “Shẹdrakị lẹ Mishakị lẹ Abẹdnego, ezioku rọ nị ụnụ ara fe mmọn m, ụnụ agbayezikwọnị nwan ihiẹn goru hụ m kpụ?

¹⁵ Ụnụ nụ nwan ukwere ọdụ, ẹkpịrị, ụbọ-zita, ụbọ-layẹ, ụbọ-hapụ, ẹrere lẹ ụdị ihiẹn-egu ndị ọzọ ile, nị ụnụ e kweri dannị ihiẹn ahụn m kpụ alị, gbaye ẹ, nsọngbu arịkọ. Kanị, omẹni ụnụ agbayen'ẹ, wẹ k'a tụ ụnụ ye imẹ okẹn ọkụn rị e nwunni ozigbo. Nị m hụn mmọn hụ k'a sa nwan ẹka zụọpụha ụnụ ẹka m.”

¹⁶ Shẹdrakị, Mishakị lẹ Abẹdnego nọ sị eze, “Nebukadineza, ẹlẹ hụn ẹnyi e gi kinrinmẹ ọnụ ẹnyi ebe ị rị imẹ okuni.

¹⁷ Omẹni, Chuku ẹnyi rị e fe a chọghọ n'ọ zụọpụha ẹnyi imẹ ọkụnnị lẹ ẹka ị, o k'a gbapụha ẹnyi ẹka ị, Agụ.

¹⁸ Kanị, ọ sụọn'a n'ọ zụọpụhakọ ẹnyi, marịn nwan nị ẹnyi efekọ mmọn ị mọbụ gbaye ihiẹn goruni ị kpụ.”

A Tụ Wẹ Wẹ Ye Okẹn ọkụn Rị E Nwunni

¹⁹ Ya kẹ Nebukadineza nọ gi okẹn olulu sọn Shẹdrakị, Mishakị lẹ Abẹdnego, ihun asụọzịn'a ẹmụ kaka. Ọ nọ sị wẹ kpọyekẹnmẹ ọkụn hụ, n'ọ nụkarị k'o dọn rị a nụ mbụ ụzọ ẹsa.

²⁰ Ọ nọ sị ndị ka akwanran e nwọn imẹ ndị-agha a kẹnmẹ Shẹdrakị, Mishakị lẹ Abẹdnego, tụ wẹ ye imẹ okẹn ọkụn ahụn rị e nwunni.

²¹ Ya wẹ nọ kẹnmẹ ikẹnnyẹ ndị hụ lẹ ẹwuru wẹ — kẹ hụn tueru anị kẹ hụn e ru mkpụkụ kẹ ẹkwa wẹ gi fụma isi kẹ ẹkwa ọzọ wẹ yisọnmẹ — tụ wẹ wẹ ye imẹ okẹn ọkụn ahụn rị e nwunni.

²² Ebe wẹ rị a hụhụ nị wẹ mẹ ẹ kẹ eze dọn ku ẹ lẹ makẹni ọkụn hụ e kẹnrẹnkẹ, uzun ọkụn ahụn nọ gbu ndị agha hụ ogẹn wẹ gi buhẹ Shẹdrakị, Mishakị lẹ Abẹdnego,

²³ wẹ ẹtịtọ lẹ enwẹn wẹ lẹ ihiẹn wẹ gi kẹnkẹnmẹ wẹ nọ danye imẹ okẹn ọkụn ahụn rị e nwunni.

²⁴ Idẹnmizi, eze wụ Nebukadineza nọ hụn ihiẹn tụ a ẹnya ọda-ọda, ọ nọ felihi ọtọ; ọ sị ịhaịmẹ ẹ, “Ẹlẹ ikẹnnyẹ ẹtọ kẹ wẹ kẹnmẹ tụye imẹ ọkụn ahụn?!” Wẹ nọ sị, “Eze-Agụ, madụ ẹtọ rọ nụ.”

²⁵ Ọ nọ sị, “Lee n'ẹ, m rị a hụn ikẹnnyẹ ẹnọ rị e jẹnhunmẹ imẹ ọkụn — ekẹnmẹni wẹ wẹ, onwọnni ihiẹn mẹni wẹ; hụn mẹ wẹ ẹnọ nọ kẹ mmọn.”

²⁶ Nebukadineza nọ nwan nọkunmẹ ọnụmụzọ ebe okẹn ọkụn hụ nọ e nwun, ọ nọ weshi olu elu hị, “Shẹdrakị, Mishakị lẹ Abẹdnego, idibo Chuku Hụ Kachanrịnnị, pụha nị! Bịa nị ebeni!” Ya kẹ Shẹdrakị, Mishakị lẹ Abẹdnego nọ pụha imẹ ọkụn ahụn.

²⁷ Ndị ahụn ile nọ fihunmẹ wẹ — kẹ ndị Nnọkin-ẹnya eze imẹ ẹgbẹrẹ ichẹn-ichẹn kẹ ndị-isi ọrụn ichẹn-ichẹn kẹ ndị gọvanọ kẹ ndị ịhaịmẹ eze. Wẹ nọ hụn a nị onwọnni ihiẹn ọkụn hụ mẹ wẹ ẹhụ, ntutu wẹ adụnnị ọkụn kaka; ẹkwa wẹ adụnnị ọkụn kaka; ishin ọkụn arịdẹ wẹ ẹhụ kaka.

²⁸ Ya Nebukadineza nọ yi, “Ịja mma y'a rịnị Chuku Shẹdrakị, Mishakị lẹ Abẹdnego, hụn zi mmọn-ozi ẹ d'a gbapụha idibo ẹ, idibo ẹ hụn gi ẹ dọn ẹnya, pa oku eze, kweri ọnwụn, hụn nkẹ w'e gi fe mọbụ gbaye mmọn ọwụlẹ wezụka Chuku wẹ.

²⁹ M rị nwan e ti iwu nị onyẹ alị ọwụlẹ mọbụ asụsụ ọwụlẹ hụn k'e kuja oku Chuku Shẹdrakị, Mishakị lẹ Abẹdnego wẹ sikọ d'a jakịka a, kụtuchanrịn ụlọ a, o họnrin mkpọkọ-ụlọ — makẹni onwọnni mmọn ọzọ k'a s'ẹka gbapụha ịhịan ẹnịna.”

³⁰ Ya eze nọ bushi ọkwa Shẹdrakị, Mishakị lẹ Abẹdnego elu imẹ ẹgbẹrẹ Babilọnụ hụ.