Daniẹlụ 2 - Ika

Isi Nke Ẹbụọ Nrọ Nebukadineza Rọ

¹ Hụn mẹ ẹ ahụa ẹbụọ eze wụ Nebukadineza kịma, o nwọn nrọ ọ rọ, obi eruzin'ẹ alị, ụran e buruzin'ẹ.

² Ya eze wụ Nebukadineza nọ sị wẹ kpọ ndị-ihẹnrẹn ile a hụn ụzọ lẹ ndị a gwọ ọgụn lẹ ndị a gba ẹfa lẹ ndị ile a hụn ụzọ, nị wẹ bịa d'a gwa a nrọ ọ rọ. A bịa wẹ, wẹ nọ wuzo ihun eze;

³ ọ nọ sị wẹ, “O nwọn nrọ m rọ obi eruzini m alị; m chọ nị m marịn ihiẹn ọ wụ.”

⁴ Ndị hụ a hụn ụzọ nọ gi asụsụ ndị Aram sị eze, “Eze, isi i chei! Dodo, ziẹnni idibo i nrọ hụ, nị ẹnyi kọwan'ị ihiẹn ọ wụ.”

⁵ Eze nọ sị ndị hụ, “Lee n'ẹ, a kwademẹchanrịngụọ m ihiẹn m jẹnkọ d'e mẹ: omẹni ụnụ agwanị m ihiẹn m rọhụn, kọwanị m ihiẹn ọ wụ, m k'a sị wẹ jakịka ọnụ, kụkpọchanrịn iwe ụnụ ile ru alị, e họnrinsọnmẹ wẹ mkpọkọ-ụlọ.

⁶ Kanị, ụnụ gwa m ihiẹn m rọhụn, kọwanị m ihiẹn ọ wụ, ụnụ e nwẹhẹn ihiẹn bu ọda ẹka m lẹ ụgwọ-ọrụn lẹ ọghọ w'a hụn ẹnya. Gwa nị m nwan ihiẹn m rọhụn, ụnụ a kọwanị m ihiẹn ọ wụ.”

⁷ Wẹ nọ sịzị eze, “Eze y'a dodo ziẹnni idibo ẹ nrọ a, nị ẹnyi kọwan'a ihiẹn ọ wụ.”

⁸ Eze nọ sị wẹ, “A marịngụọ m nị ụnụ rịhụ e gbu ogẹn makẹni ụnụ a marịngụọ nị ekuhutọkọ m ọnụ:

⁹ Omẹni ụnụ agwanị m ihiẹn m rọhụn, ihiẹn ohu sụọ rị e che ụnụ. Ụnụ e kwerigbamagụọ nị ụnụ tụ m ntụ, dufie m, e ro ni ihiẹn k'e gbehutọ. Gwa nị m nwan nrọ hụ, nị m marịn nị ụnụ k'a s'ẹka kọwanị m ihiẹn ọ wụ.”

¹⁰ Ndị ahụn a hụn ụzọ nọ sị eze, “Onwọnni onyẹ rị elu-ụwa k'a s'ẹka mẹ ihiẹn eze rị a sị ẹnyi mẹ. Onwọntuni eze ọwụlẹ — k'o mẹlẹ okẹn ịhịan, k'ọ kpalẹ ikẹn — sịtu ohẹnrẹn mọbụ onyẹ a gwọ ọgụn mọbụ onyẹ a hụn ụzọ ya mẹ ihiẹn nọ ẹnịna.

¹¹ Ihiẹn eze rị a sị ẹnyi mẹ e zekẹkwọ. Onwọnni onyẹ k'a gwa eze ya mmanị mmọn, bụ arị wẹ ebeni ịhịan rị.”

¹² Ya kẹ iwe nọ bịa eze ọda-ọda, ọ nọ gi ọnụma sị wẹ gbuchanrịn ndị ile a hụn ụzọ imẹ alị-eze Babilọnụ.

¹³ Ya uhi hụ nọ ghabarị, nị wẹ k'e gbu ndị ile a hụn ụzọ; e zi wẹ ịhịan d'a chọ Daniẹlụ lẹ ndị ọwụ a nị wẹ gbu wẹ.

¹⁴ Mgbe Arịọkụ onyẹ-isi ndị ụlakpa eze gi e che ẹhụ gi pụha n'o gbumẹ ndị Babilọnụ a hụn ụzọ, ya Daniẹlụ nọ gi akọ-lẹ-uche lẹ nghọta sọn ẹ ku.

¹⁵ Ọ sị Arịọkụ, “Kị haịn eze gi ti iwuni zegbu enwẹn ẹ?” Arịọkụ nọ kọwanị Daniẹlụ ihiẹn rị e mẹni.

¹⁶ Ya Daniẹlụ nọ buru eze, sị a ye ẹ ogẹn, n'ọ hụn ụzọ kọwan'a nrọ hụ.

Osolobuẹ A Ghọsị Daniẹlụ Ihiẹn Nebukadineza Rọhụn

¹⁷ Ya Daniẹlụ nọ lashi iwe ẹ, gwa ibe ẹ wụ Hanania, Mishẹlụ lẹ Azaria ihiẹn rị e mẹni.

¹⁸ Ọ nọ sị wẹ rịọ Chuku rị elu-igwee n'o mẹni wẹ omikẹn ebe ihiẹn-omimini rị, amamgbe w'e gbu ya nwẹn wụ Daniẹlụ lẹ ibe ẹ cheni ndị a hụn ụzọ rị Babilọnụ.

¹⁹ O ru imẹ abalị, Osolobuẹ nọ ghọsị Daniẹlụ ihiẹn-omimi ahụn imẹ ọhụn. Daniẹlụ nọ ja Chuku rị elu-igwee mma,

²⁰ sị: Ịja-mma ya rịnị ẹfan Chuku jẹnrin ejẹn; amamihiẹn lẹ ikẹn wụ nke ẹ.

²¹ Ịya e hutọ ogẹn lẹ mgbe ihiẹn gi e mẹ; ịya e tumẹ ndị-nze, a chụpụzịkwọ ndị-nze. Ịya e ye onyẹ nwọn uche amamihiẹn, e ye onyẹ marịn ihiẹn nghọta.

²² Ịya e wepụha ihiẹn mini lẹ ihiẹn zuerini ifọn, ịya marịn ihiẹn rị imẹ ishi, ịya lẹ ukpẹ wị bi.

²³ Chuku ndị nẹdi m — m rị a kpanmịn ị, a ja ị mma: makẹni y'e yegụọ m amamihiẹn lẹ ikẹn, y'a ghọsịgụọ m ihiẹn ẹnyi rịọ ị, y'e mẹgụọ ẹnyi marịn ihiẹn eze rị a chọ.

Kẹ Daniẹlụ Dọn Kọwanị Eze Nrọ A

²⁴ Ya kẹ Daniẹlụ nọ buru Arịọkụ hụn eze tumẹ n'o gbu ndị a hụn ụzọ rị Babilọnụ, sị a, “Egbulẹ ndị a hụn ụzọ rị alị Babilọnụ; we m jẹnni eze, m k'a kọwan'a nrọ a.”

²⁵ Ya Arịọkụ nọ we Daniẹlụ jẹnni eze ozigbo, sị a, “A hụngụọ m okẹnnyẹ ohu imẹ ndị hụ wẹ gha Juda kpụnhan hụn k'a s'ẹka gwa eze ihiẹn nrọ a wụ.”

²⁶ Eze nọ sị Daniẹlụ hụn ẹfan a wụzị Bẹlụtẹshaza, “N'ị s'ẹka gwa m ihiẹn m rọhụn lẹ nkọwa a?”

²⁷ Daniẹlụ nọ sị eze, “Onwọnni onyẹ a hụn ụzọ mọbụ onyẹ a gwọ ọgụn mọbụ ohẹnrẹn mọbụ onyẹ a gba ẹfa hụn k'a s'ẹka kọwanị eze ihiẹn-omimini ọ rị a chọ n'ọ marịn;

²⁸ kanị, o nwẹghọ Chuku rị elu-igwee hụn e wepụha ihiẹn zuerini ifọn. Ọ ghọsịgụọ yụ wụ Eze wụ Nebukadineza ihiẹn k'e mẹ ihun. Lee nwan nrọ ị, ihiẹn ị rọhụn ebe i dinẹ elu bẹdi i:

²⁹ “Kẹ yụ wụ eze dinẹ ebahụn, obi i nọ shi ihiẹn ndị k'e mẹ ihun, onyẹ hụn a ghọsị ịhịan ihiẹn-omimi n'ọ ghọsị ị ihiẹn k'e mẹni.

³⁰ Mmẹ nwẹn, ọ ghọsị m ihiẹn-omimini — ẹlẹni mmẹ ka ndị ọzọ ile rị ndụn amamihiẹn e nwọn, kanị, ọ ghọsị m'a kẹni yụ wụ eze marịn ihiẹn ọ wụ, lẹni i hụn ụzọ ghọta ihiẹn ahụn bansọnmẹ i obi.

³¹ “Imẹ nrọ hụ, ịyụ wụ eze lee ẹnya, ị nọ hụn ẹregede ihiẹn wẹ kpụ mawuru ihun i ebẹhụ — ihiẹn higbu enwẹn ẹ ogbe, e gbukepụ ọda-ọda, onyẹ hụn a egun a tụma a.

³² Ezigbo goru wẹ buchelẹni ihiẹn ọzọ kẹ wẹ gi kpụ isi ihiẹn hụ; siliva kẹ wẹ gi kpụ obi ẹ lẹ ẹka a ẹbụbụọ; igwe-bronzu kẹ wẹ gi kpụ ẹfọ a lẹ ọgbọdọgbọ a;

³³ igwe mmaka kẹ wẹ gi kpụ ịgọnrọn lẹ ẹfọ-ụkụ a; gizi igwe-mmaka lẹ ụrụa kpụ ụkụ-alị a ẹbụbụọ.

³⁴ Hụn ahụn ị rị e lee ẹ, wẹ nọ bepụha ọmụma ohu, kanị ẹlẹ ịhịan bepụha a — ọmụma hụ nọ ti ihiẹn hụ wẹ kpụ; ụkụ-alị a ẹbụbụọ wẹ gi igwe lẹ ụrụa mẹmẹ k'o ti, kụkpọpụ wẹ.

³⁵ Wẹ ile, kẹ igwe-mmaka kẹ ụrụa kẹ igwe-bronzu kẹ siliva kẹ goru nọ kụkpọpụ, nọchanrịn kẹ ẹfịfịa-ọka rị alị ebe wẹ nọ a kụkpọ ọka imẹ ọhọhị; ya kẹ ufere nọ fepụ wẹ, kaka akpụ-ohu ahọdụnị. Kanị ọmụma nwẹn ti ihiẹn ahụn wẹ kpụ nọ họnrin ẹregede ugu, shịagbarị ụwa ile.

³⁶ “Ịya wụ nrọ hụn ị rọ; nị ẹnyi kọwanị nwan eze ihiẹn ọ wụ.

³⁷ Agụ, ịyụ wụ eze hụn rị a kị ndị-nze. Chuku hụn rị elu-igwee e yegụọ ị ọkịkị lẹ ikẹn lẹ ndị-agha lẹ ọghọ;

³⁸ o bugụọ kẹ ịhịan kẹ anụmanụ kẹ nnụnụ che ị ẹka — ebe-lẹ-ebe wẹ a rịlẹ; o tumẹgụọ ị onyẹ-ọkịkị wẹ ile. Ịyụ wụ isi hụ wẹ gi goru kpụ.

³⁹ “Ị kịgụ, alị-eze ọzọ hụn ị ka jẹnkọ d'a pụha. O mẹgụ, alị-eze hụn mẹ ẹtọ — hụn wụ igwe-bronzu — sikọ d'a pụha, o k'a kị ụwa ile.

⁴⁰ O mẹchanrịngụ, alị-eze nke ẹnọ, hụn ze kẹ igwe k'a pụha. O k'e tikpọ alị-eze ndị ọzọ, gweriẹn wẹ — kẹ igwe dọn e tikpọ ihiẹn ile ọ kụ, gweriẹn ẹ.

⁴¹ K'i dọn hụn ụkụ-alị a lẹ mkpịnsịn-ụkụ a, nị wẹ wụ ụrụa lẹ igwe, ẹrịra kẹ alị-eze hụ sikọ d'e kebe, kanị ikẹn igwe jẹnkọ d'a rịzịkwọ a — nọkẹ k'i dọn hụn igwe wẹ gwọgbama ya lẹ ụrụa.

⁴² K'o dọn mẹni mkpịnsịn-ụkụ a wụ igwe lẹ ụrụa, ẹrịra kẹ alị eze hụ kẹ nwọnsọnmẹ ebe ọ nọ ze lẹ ebe ọ nọlẹni ze.

⁴³ K'i dọn hụn nị wẹ gwọgbama igwe lẹ ụrụa, ẹrịra kẹ ịhịan k'a dọn gi ọlụlụ-di-lẹ-nwunyẹ nọgbamahụ mmaka, kanị k'o dọn mẹ nị igwe lẹ ụrụa ara mẹ ohu, emẹkọ wẹ ohu.

⁴⁴ “Ogẹn ndị-nze ndịnị k'e gi rị a kị, Chuku hụn rị elu-igwee k'e pumẹ alị-eze hụn wẹ jẹnkọlẹni d'e tikpọ mọbụ latọnị ndị ọzọ. O k'e tipịpịa alị-eze ndị hụ ile — arịkọzị wẹ; kanị ya nwẹn sikọ d'a rị jẹnrin ejẹn.

⁴⁵ Ịya wụ ọmụma ahụn ị hụn wẹ gha ugu bepụha bụ ẹlẹ ịhịan bepụha a — ọmụma ahụn tigungwọn igwe lẹ igwe-bronzu lẹ ụrụa lẹ siliva lẹ goru. “Chuku hụ kanị a ghọsịgụọ eze ihiẹn sikọ d'e mẹ ihun. Ọnwan wụ nrọ ị k'i dọnchanrịn rọ a; ọnwan wụ nkọwa a — ịrụ-ụka arịa.”

Eze E Bushi Daniẹlụ Lẹ Ndị-ọwụ A Elu

⁴⁶ Ya eze wụ Nebukadineza nọ kụnị Daniẹlụ isi alị, gbaye ẹ; ọ nọ sị wẹ chụnyeni Daniẹlụ ẹjan, mụyen'ẹ nsẹnsi.

⁴⁷ Eze nọ sị Daniẹlụ, “Eziẹ, Chuku i ka mmọn ile; ịya a kị ndị-nze; ịya e wepụha ihiẹn-omimi ifọn, makẹni y'a sagụọ nwan ẹka wepụha ihiẹn-omimini ifọn.”

⁴⁸ Eze nọ ye Daniẹlụ ọkwa uku, ye ẹ ihiẹn ọda-ọda, tumẹ ẹ n'ọ kịma ẹgbẹrẹ Babilọnụ hụ ile, bu ndị ile a hụn ụzọ imẹ Babilọnụ che okpuru ẹ.

⁴⁹ Daniẹlụ a rịọ eze, eze nọ kweri tumẹ Shẹdrakị, Mishakị lẹ Abẹdnego nị w'e lepụsọnmẹ ihiẹn ẹnya Ẹgbẹrẹ Babilọnụ hụ — Daniẹlụ nkẹ nọ nọdị ọgwa kẹti-kẹti eze a rụn ọrụn a.