Daniẹlụ 11 - Ika

Isi Nke Mmanaị

¹ “Imẹ ahụa ibuzọ Dariọsụ eze Mẹdịa kịma, mmẹ turu e yen'ẹ ẹka, e che ẹ nche.

Ndị-nze Alị Siria Lẹ Ndị-nze Alị Ijiptu

² “Nị m mẹ i nwan marịn ezioku: “Eze ẹtọ k'a pụhazị imẹ alị-eze Pẹshịa, nke ẹnọ hụn k'a pụhanị k'a kachanrịn ọdanfịn e hi. O gigụ akụ-lẹ-ụba a werichanrịn ọkịkị, o mẹ ịhịan ile d'e bunụmanị alị-eze ndị Griki.

³ Ogẹn ahụn, okẹn eze ohu k'a pụha, hụn k'e gi ọkịkị kpa ikẹn ọda-ọda, mẹ k'ọ sụọn'a.

⁴ Ọ kịgụ, alị-eze ẹ hụ hi ogbe e kebe, e keyịya w'a azụụn ẹnọ ufere igwere gha e fe, kanị ẹlẹ ụmụ a k'e nwẹrin ẹ, alị-eze hụ enwọnkọ ikẹn ahụn ya nwọn te kpa, makẹni ohuepụ kẹ wẹ k'e huepụ alị-eze uku hụ, we ẹ ye ndị ọzọ.

⁵ “Eze kị alị rị ẹbamịn-ndịdan k'e kẹnrẹn, kanị ọkị-agha a ohu k'a ka a e kẹnrẹn, kịma. Ọkị-agha hụ k'a kpa ikẹn, o k'a kpa ikẹn ọhụnma-ọhụnma.

⁶ Ahụa ole-lẹ-ole ghafegụ, a kịgbama wẹ. Nwa-okpoho eze alị rị ẹbamịn-ndịdan k'e jẹn d'a bannị eze alị rị ẹbamịn-ugu, kanị nke okpoho ahụn a bụnsọnmẹkọ ebẹhụ, eze hụ nkẹ lẹ ọkịkị a ebiekọ. Wẹ k'e re okpoho ahụn, gbu ya lẹ ndị duhẹn'ẹ lẹ nẹdi ẹ cheni hụn e yen'ẹ ẹka.

⁷ “Onyẹ ebọn okpoho ahụn sikọ d'a pụha, rikin nẹdi ẹ eze, kịma alị rị ẹbamịn-ndịdan. O k'a lụsọn ndị-agha eze alị rị ẹbamịn-ugu agha, banyedẹ ebe zeni w'a gbaban, lụsọn wẹ agha, mẹri.

⁸ O jẹnkọ d'e kpọnrinzikwọ mmọn wẹ, ihiẹn ile wẹ gi igwe rị ichẹn-ichẹn mẹmẹ w'e fe lẹ ihiẹn siliva lẹ goru rị mkpa, kpọnshi Ijiptu. O k'e yeni eze alị rị ẹbamịn-ugu hụ efe ahụa ole-lẹ-ole.

⁹ “Eze alị rị ẹbamịn-ugu sikọ d'a bịa d'a maye alị-eze rị ẹbamịn-ndịdan, kanị o k'e kinhụ azụụn alị a.

¹⁰ Mmụ a k'a kwademẹ agha, wegbama igunrun hi ogbe ndị jẹnkọ d'a lụ agha, e huru wẹ kẹ okẹn mirin wẹ ghalẹni a sa ẹka e gbọndọn lụ ọgụn ahụn d'e rukwọrị obi-eze eze alị rị ẹbamịn-ndịdan.

¹¹ “Ogẹn ahụn, eze alị rị ẹbamịn-ndịdan k'e gi ọnụma jẹn d'a maye eze alị rị ẹbamịn-ugu, mẹri ya lẹ igunrun ndị-agha o k'a kịpụha d'e che ẹ ọgụn.

¹² Eze alị rị ẹbamịn-ndịdan kpụnrụngụ ndị-agha hụ, ẹhụ k'a tụma a ọda-ọda, o gbu mmadụ nnụ-uku bu ọda; kanị, o mẹrisọnmẹkọ.

¹³ Makẹni, eze alị rị ẹbamịn-ugu k'e kpọngbamazị ndị agha ka ndị ibuzọ ọda. Ahụa ole-lẹ-ole ghagụ, ọ kịpụha igunrun ndị-agha hi-ogbe wẹ kwademẹgụ agha ọhụnma-ọhụnma d'a lụ agha.

¹⁴ “O ru ogẹn hụ, ndị bu ọda k'e bunụmanị eze alị rị ẹbamịn-ndịdan. Ụfọdụ ndị nke i k'e gi ikẹn mẹ ẹ, bunụman'a ebe wẹ rị a chọ nị wẹ mẹzu ọhụnnị, kanị ọ ghakọnị wẹ.

¹⁵ Ogẹn ahụn, eze alị rị ẹbamịn-ugu jẹnkọ d'a bịa d'e kehunmẹ obodo ohu wẹ tụnhunmẹ mgbọn, ọ rụn ihiẹn wẹ e nyinrin a lụsọn ndị rịn'a agha ye mgbọn obodo hụ; o mẹri ẹ, weri ẹ. Ndị-agha eze alị rị ẹbamịn-ndịdan asakọ ẹka che ẹ ọgụn, ndị-agha wẹ kachanrịndẹ ọgụn a lụ ahụnkọdẹ ndụn wuzo.

¹⁶ Hụn mayeni k'e mẹmẹ k'ọ sụọn'a; onwọnni onyẹ k'a s'ẹka che ẹ ọgụn. O k'e werichanrịn ọnọdị imẹ Alị hụ Ma mma, ọ banchanrịn a ẹka hụn o gi tikpọ a.

¹⁷ O k'a kwademẹ n'o gichanrịn ikẹn ile alị-eze ẹ nwọn weri ẹ. O k'e gi ufiri ẹ sọn eze hụn ẹbọ mẹgbamama, we nwa a ye eze hụ lụrụ. Kanị, ihiẹn o romẹ abụnkọ mọbụ yen'ẹ ẹka.

¹⁸ “O bunụmanị alị ndị rị mkpẹnrẹn Ohimin, weri ndị bu ọda imẹ wẹ, kanị ọkị-agha ohu jẹnkọ d'a kụsị ụya ahụn ọ rị e ye wẹ e ri, we ẹ ye ya nwẹn ri.

¹⁹ Ọnwan mẹgụ, ọ lakinchanrịn alị a d'e bunụmanị obodo ndị rị mkpa wẹ gi e dọn ẹnya ebẹhụ, kanị o k'a kpọgburu dan, a hụnkọzị w'a.

²⁰ “O ru, onyẹ jẹnkọ d'e rikin ẹ eze k'e zi onyẹ ohu d'a nama ịhịan ile ụgwọ-isi n'o gi mẹ ọghọ alị-eze ẹ rịsọnmẹ. O gini d'e mẹ e mẹ nke ẹ a gụ — kanị ẹlẹ iwe mọbụ agha k'e buhẹ ọnwụn a.

²¹ “Onyẹ nwọnlẹni ihiẹn ọ wụ, hụn wẹ kinlẹni eze k'a nọkin ẹnya a. Hụnyẹ k'a maye alị-eze ahụn ogẹn ihiẹn gi rịnị wẹ mma, gi akọ weri ẹ.

²² O k'e gbu igunrun ndị-agha bugbu enwẹn wẹ ọda, uwẹ lẹ onyẹ hụn wụ ezigbo eze wẹ hụn wẹ gi iwu tumẹ.

²³ Ya lẹ wẹ kwerigbamagụ, o mẹ wẹ ẹro, gi akpụ madụ ole sụọ werichanrịn ọkịkị.

²⁴ Mgbe ẹhụ e gi fumẹ azụụn ndị hụn ka ọdanfịn e mẹ imẹ alị-eze hụ, o jẹn d'a maye wẹ idẹnmizi, o mẹ ihiẹn nẹdi ẹ lẹ ndị nẹdi ẹ kanị mẹlẹni, kesọnmẹni ndị sọnkọn'a ihiẹn o gbukwarị lẹ akụ-lẹ-ụba o kpọnlụa. O k'e gi izu-umẹ werisọnmẹ ebe rị ichẹn-ichẹn wẹ tụnhunmẹ mgbọn; kanị o biekọ.

²⁵ “O k'e gi ndị agha bu ọda zekẹnmẹ, gba enwẹn ẹ umẹ d'a maye eze alị rị ẹbamịn-ndịdan. Eze hụ k'e gi igunrun ndị agha bugbu enwẹn wẹ ọda hụn zeni che ẹ ọgụn, kanị ọ sakọ ẹka mẹri makẹni e zugụọnị w'a eje-umẹ.

²⁶ Ndị wẹ lẹ eze e rigbamadẹ ezigbo ihiẹn-oriri ẹ k'e tikpọ a; wẹ k'e mẹrichanrịn ndị-agha a, gbu ndị bu ọda.

²⁷ Ndị-nze ẹbụbụọnị chọkọ isi ibe wẹ k'a nọdị ụzọ ohu e rigbama, a tụtarị ntụ, kanị onwọnkọ isi, makẹni nke wẹ k'a gụkwọ tan ogẹn ẹ ru.

²⁸ Eze alị rị ẹbamịn-ugu k'e gi okẹn akụ-lẹ-ụba lakin alị a, kanị obi ẹ ile jẹnkọ d'a rị a chọ ihiẹn o k'e mẹ Ofufe Nkwerigbama-nsọ. O k'e mẹ ẹ ihiẹn o kebe lakin alị a.

²⁹ “Ogẹn ru, o jẹnkọ d'a mayezi alị rị ẹbamịn-ndịdan, kanị ọ ghakọ k'o dọn gha mbụ.

³⁰ O nwọn ndị k'e gi ụgbọ-mirin ndị Kitim bịa d'e gbọndọn ẹ, ndụn a gụ a. O sikọ d'a lama, ọ kụyegụ d'e gi olulu ẹ mẹ ihiẹn o k'e mẹ Ofufe Nkwerigbama-nsọ. Omẹgụ, o k'e kinhẹnzi d'e mẹyemẹni ndị k'a latọ Ofufe nkwerigbama-nsọ.

³¹ “Ndị-agha a k'a pụha d'e mẹrụ Ụlọ-nsọ, ebẹhụ Izrẹlụ gi e dọn ẹnya, kagbu ẹjan w'a chụnyeni Osolobuẹ ụhụọhịn-ụhụọhịn, a bịa wẹ d'e tumẹ arụ ahụn hụn e buhẹ ntikpọ.

³² O k'e gi ọnụ-ọma wiwikẹnmẹ ndị tikpọ nkwerigbama Osolobuẹ, kanị ndị hụn marịn Chuku wẹ k'e che ẹ ọgụn, kpa ikẹn.

³³ “Ndị marịn ihiẹn jẹnkọ d'e dumẹ ndị bu ọda, a kuzi wẹ, kanị wẹ k'e gi ọpịa-agha lẹ ọkụn gbu ndị ahụn marịn ihiẹn ẹkẹrẹ ogẹn, a nwụnrụn wẹ, a kwarị ihiẹn wẹ.

³⁴ Wẹ dan, ẹkẹrẹ eyemẹka k'a bịanị wẹ, kanị ndị bu ọda gilẹni ezioku bịa sikọ d'a bannị wẹ.

³⁵ Imẹ ndị hụ marịn ihiẹn, o nwọn ndị k'a kpọgburu imẹ okukwe wẹ, e gi wẹ ẹ chanchan wẹ kẹ w'a chanchan goru, dọn wẹ nsọ, mẹ wẹ zu oke d'e ru ogẹn ọgụgụ, makẹni o k'a bịarịrị o ru ogẹn ẹ.

Eze Hụn K'e Bushi Enwẹn Ẹ Elu

³⁶ “Eze alị rị ẹbamịn-ugu k'e mẹ k'ọ sụọn'a. O k'a sị ya ka mmọn ile lẹ ihiẹn ile w'e fe, kujama oku Chuku hụn ka mmọn ile. Ihiẹn k'a rị a ghan'a d'e ru mgbe Osolobuẹ e gi ghọsịgụ ọnụma a hụn ọ rị e gi ẹ a ghọsị, makẹni ihiẹn Osolobuẹ kutọgụ sikọ d'e mẹrịrị.

³⁷ Onwọnni ihiẹn o k'a kpọ mmọn-lẹ-iyi ndị nẹdi ẹ wẹ mọbụ hụn a sụọ ikpoho mọbụ mmọn-lẹ-iyi ọwụlẹ, o k'a sị nị ịya kachanrịn wẹ ile.

³⁸ Hụn nke o gi gbaye wẹ, ọ gbaye mmọn obodo ndị w'a gbaban ogẹn agha — mmọn hụn ndị nẹdi ẹ wẹ marịnlẹni, gi goru lẹ siliva lẹ ọmụma ndị rị mkpa lẹ ihiẹn ndị a ṅanrannị ye ẹ ọghọ.

³⁹ O k'e gi ẹfan mmọn ọzọ ahụn mayesọnmẹ ebe kachanrịn e ze hụn ndị alị ichẹn-ichẹn a gbaban ogẹn agha. O k'e yesọnmẹ ndị nabanhann'a okẹn ọghọ, ye wẹ ndị bu ọda kị, keyesọnmẹ wẹ alị o mẹri gi kụ wẹ ụgwọ.

⁴⁰ “O ru ogẹn njẹndemẹ, eze alị rị ẹbamịn-ndịdan k'e buli d'a lụsọn ẹ agha, kanị eze alị rị ẹbamịn-ugu nkẹ k'e kpọnrin igunrun ụgbọ-ẹshin lẹ ndị-agha e gi ẹshin a lụ lẹ ụgbọ-mirin zụnburu ẹ, tikpọkọ alị bu ọda nọkẹ okẹn mirin rị e huni.

⁴¹ O sikọ d'a mayezi Alị Ahụn Ma mma. Alị bu ọda k'a dan, kanị wẹ k'a gbapụha Ẹdọm, Mụabụ lẹ ndị ndu Amọnụ ẹka a.

⁴² O k'e mẹ ọkịkị a ru alị bu ọda; alị Ijiptu a wanahịnkọ.

⁴³ Goru lẹ siliva lẹ akụ-lẹ-ụba ndị ọzọ ile rị alị Ijiptu k'a ban a ẹka; ndị Libia lẹ ndị Ẹtiopịa k'a rị okpuru ẹ.

⁴⁴ Kanị ozi hụn k'a gha ẹbamịn ọwụwa ẹnyanwụn lẹ ẹbamịn-ugu bịa k'a tụ a egun, o gi okẹn ọnụma buli d'e tikpọ ndị bu ọda, tikpọ wẹ ru alị.

⁴⁵ O k'a rụn obi-eze o k'e bi ẹkẹrẹ ogẹn ye ẹgbata Ohimin lẹ Ugu nsọ hụ ma mma. Kanị ọnwụn k'e gbu ẹ, onwọnni onyẹ k'e yen'ẹ ẹka.