Daniẹlụ 10 - Ika

Isi Nke Iri Daniẹlụ A Hụn Mmọn-Ozi

¹ Nke ahụa ẹtọ Saịrọsị wụ eze Pẹshịa kịma, o nwọn ihiẹn Osolobuẹ ghọsị Daniẹlụ. W'a kpọzị Daniẹlụ Bẹlụtẹshaza. Ihiẹn ọ ghọsị Daniẹlụ wụ ezioku, oku okẹn agha rọ. Imẹ ọhụn kẹ Daniẹlụ nọ ghọta ihiẹn hụn ọ ghọsị a.

² Ogẹn hụ, mmẹ wụ Daniẹlụ emẹshịanị ẹhụ ọrọgbọ izuka ẹtọ.

³ Erini m ezigbo ihiẹn-oriri ọwụlẹ; onwọnni anụ mọbụ manya hụatụ m ụgb'ọnụ, akwọzịkwọnị m udẹn d'e runi izuka ẹtọ hụ a ghafe.

⁴ Nke akpọhịn ẹnọ-kwasị-ọgụn imẹ ifọn ibuzọ, ebe m wuzo mkpẹnrẹn Iyi uku wụ Tigrisi,

⁵ e lee m ẹnya, e lee okẹnnyẹ ohu yi ẹwuru linẹni lẹ akpụkpọ ukun ezigbo goru alị Ufazị.

⁶ Ẹhụ a hụ e gbukepụ kẹ ọmụma krisolaịtị, ihun ẹ hụ e be kẹ amụma, ẹnya a hụ e nwun kẹ ukpẹ-ọwa, ụkụ lẹ ẹka a hụ e gbukepụ kẹ igwe-bronzu wẹ fichan ọhụnma-ọhụnma, olu ẹ hụ a han kẹ ebe igunrun ịhịan rị a zụn ụzụn.

⁷ Mmẹ wụ Daniẹlụ sụọ hụn ọhụn hụ; ndị mmẹ lẹ wẹ wị ahụnn'a, kanị egun a nwụnkwọ wẹ — nke wụnị a gbapụ wẹ d'a hụarị.

⁸ Ya ọ nọ họdụ mmẹ sụọ ebẹhụ m bu ẹnya tụma okẹn ihiẹnni m rị a hụn; ndụn a gụchanrịn m, e tirapụ m ẹnya, akpụ ndụn ohu arịzị m.

⁹ Ya m nọ nụ k'ọ rị e ku oku. Ebẹhụ m rị e gọn ẹ ntịn, m nọ sọhị, fiẹnrin mọmọmọ.

¹⁰ Ẹka ohu nọ mẹtụ m, weli mmẹ lẹ ẹhụ rị a ma m nni, bu m mkpụkụ lẹ ọb'ẹka che alị.

¹¹ Ọ sị, “Daniẹlụ, ịyụ hụn wụ okẹn ịhịan ẹnya Osolobuẹ. Lebankẹnmẹ oku m k'a gwa ị ẹnya. Lihi nwan ọtọ, makẹni wẹ zi m d'e kunrun i.” Ogẹn o gi gwa m ihiẹnni, m nọ lihi ọtọ — mmẹ lẹ ẹhụ rị a ma m nni.

¹² Ya ọ nọ kumẹ, sị, “Atụlẹ egun, Daniẹlụ. Kete ụhụọhịn ahụn i bu obi che ihiẹnni n'ị ghọta, bu enwẹn i che alị ihun Chuku, Chuku a nụgụọ ihiẹn i ku, ya kẹ m bịanị nwan.

¹³ Kanị mmọn hụn rị a kị alị-eze Pẹshịa gbọnkin m ụzọ ọrọgbọ akpọhịn ohu-kwasị-ọgụn. Ya Maịkẹlụ, hụn wụ onyẹ ohu imẹ ndị-isi ndị mmọn-ozi nọ bịa d'e yeni m ẹka, makẹni mmọn rị a kị alị-eze Pẹshịa te gbọndọn m ebẹhụ.

¹⁴ M bịa nwan d'a gwa ị ihiẹn k'e mẹ ndị nke i ihun, makẹni ogẹn ihiẹn ị hụn imẹ ọhụnnị e gi mẹ eke ru.”

¹⁵ Ebe ọ rị a gwa m ihiẹnni, m nọ hulụa isi, we ihun kọma alị, asanị m ẹka ku oku.

¹⁶ Ya onyẹ nọ kẹ ịhịan nọ mẹtụ m ẹka ụgb'ọnụ. M nọ shịapụ ọnụ, oku nọ nị m ku. M nọ sị hụn wuzo m ihun, “Diọkpa, uhue ihiẹnni m hụn e d'e gbu m, akpụ ndụn ohu arịzị m.

¹⁷ Nanị kẹ mmẹ wụ odibo i a dọn saẹka sọn i ku oku, Diọkpa? Ndụn a gụchanrịngụọ m, arịdẹ m a saẹka e kwọn ọhụnma.”

¹⁸ Ya onyẹ ahụn nọ kẹ ịhịan nọzị mẹtụ m ẹka, mẹ ndụn ban m.

¹⁹ Ọ nọ sị, “Atụlẹ egun, ịyụ hụn wụ okẹn-ịhịan ẹnya Osolobuẹ. Udọn ya rịn'ị! Ndụn ya ban ị; ndụn ya ban i.” Ogẹn o gi gwa m oku, ya ndụn nọ ban m. M nọ sị, “Di ọkpa kumẹ, makẹni y'e mẹọlẹ ndụn ban m.”

²⁰ Ya ọ nọ sị m, “Y'a marịnghọ ihiẹn haịn m gi bịa d'e kunrun i? Eziẹ, m kinkọ nwan azụụn d'a lụsọn mmọn rị a kị Pẹshịa ọgụn, m rịzịkwọ a hụn mmọn a kị Grisi kẹ ọ rị a chọ n'ọ bịa.

²¹ Kanị, m k'a gwagụ ị ihiẹn wẹ deye imẹ Ẹkụkwọ Ezioku.” “Onwọnni onyẹ e yeni m ẹka a lụsọn wẹ agha wezụka Maịkẹlụ, mmọn-ozi ụnụ.”