Azaya 9 - Ika

Isi Nke Itenẹi A Mụgụọnị Wẹ Ẹnyi Eze K'a Kị Jẹnrin Ejẹn

¹ Kanị, ụya eriferikọ ndị ụya te rị e ri. Osolobuẹ e welụaghọ alị Zẹbulọnụ lẹ alị Naf'tali alị mbụ, kanị ihun, o sikọ d'e ye uwẹ wụ Galili ọghọ — Galili hụn ndị alị ọzọ jun, hụn rị ụzọ Ohimin, obodo hụ rị mkpẹnrẹn Iyi Jọdanị —

² ndị hụn rị a gha imẹ ishi k'a hụn okẹn ukpẹ; ukpẹ k'e nwunkpu ndị bi alị onyinyọn ọnwụn.

³ I k'e mẹ alị Izrẹlụ ba ụba, mẹ ịghọghọ wẹ waye; wẹ k'a rị a ghọghọ ihun i kẹ ịhịan a ghọghọ wẹ gha e we ihiẹn-ugbo, kẹ w'a ghọghọ wẹ gha e keri ihiẹn wẹ gbukwarị imẹ agha.

⁴ Makẹni, k'i dọn mẹri ndị Midianị ogẹn mbụ, ẹrịra k'i k'e tibepụ ẹgbụn gini wẹ, gungwọnpụ ihiẹn wẹ gi fiẹdọn wẹ uvun, kpagipụ mkpịnsịn ndị rị a kịgbuni wẹ.

⁵ Akpụkụ ile ndị-agha gi lụ ọgụn lẹ ẹwuru-agha ile mẹ ẹdeke-ẹdeke sikọ imẹ ọkụn, wẹ sikọ d'e họnrin ihiẹn ọkụn gi a dụn.

⁶ Makẹni a mụgụọnị wẹ ẹnyi nwa, e yegụọ wẹ ẹnyi nwa-okẹnnyẹ; ịya jẹnkọ d'a kị. Wẹ k'a kpọ a Onyẹ-ndụnmọdụn Hụn Pụ-ichẹn, Chuku Hụn wụ Dikẹn, Nẹdi Itẹbitẹ, Eze-Udọn.

⁷ Ọkịkị a lẹ Ọrịrịmma o k'e wẹhẹ agụkọ. O k'a nọ ukpo-eze Defidi kị alị-eze Defidi, e gi ezigbo-eṅẹn lẹ ezi-omumẹ a kwadọn ẹ, e kwọndọn ẹ — gha ogẹn ahụn jẹnmẹ, jẹnrin ejẹn. Adụdụ Osolobuẹ Onyẹ nwọn ikẹn ile k'a han ihiẹnni mẹ.

Olulu Chuku Rị E Buni Izrẹlụ

⁸ Osolobuẹ e zigụọ ozi jẹnni ụmụ Jekọpụ, ozi ihiẹn o k'e mẹ wẹ wụ ndị Izrẹlụ.

⁹ Ịhịan ile a marịnghọ — kẹ ndị Ifrem kẹ ndị bi isi-obodo wẹ wụ Sameria — ndị rị e kukarị enwẹn wẹ makẹ mpache wẹ, a sị,

¹⁰ “Hụn dannị wụhụ ụlọ ẹjan mmaka, kanị ọmụma wẹ be ọhụnma kẹ ẹnyi k'e gi tụndọnzi ẹ; osisi sikamọ mmaka kẹ wẹ gbutu, kanị ẹnyi jẹnkọ d'e gi okẹn osisi sida nọkin ẹnya wẹ.”

¹¹ Kanị Osolobuẹ e tumẹgụọnị wẹ ndị-iṅẹnrẹn Rẹzini, hụn k'a maye Rẹzini hụ wẹ gi e dọn ẹnya; ọ kpasugụọ ndị-iṅẹnrẹn wẹ nị wẹ hụn ụzọ d'a maye wẹ.

¹² Ndị Aram gha ibe ọwụwa-ẹnyanwụn bịa lẹ ndị Filistia gha ndịdan-ẹnyanwụn bịa a shịapụchanrịngụọ ọnụ ripụ Izrẹlụ. Kanị, ihiẹnni ile arọkwọnị Osolobuẹ olulu, o wetukwọnị ẹka o gi e mẹshi wẹ ikẹn.

¹³ Kanị ehutọnị wẹ nwan buru Osolobuẹ hụn fịan wẹ ihiẹn, arịọnị wẹ Osolobuẹ, Onyẹ-nwọn ikẹn ile.

¹⁴ Ufiri ẹ, Osolobuẹ k'e gi akpọhịn ohu bepụ Izrẹlụ kẹ isi kẹ ọdụndụn, kẹ iguru kẹ ẹfịfịa:

¹⁵ ndị-ichẹn lẹ ndị-ndu wụ isi, ndị-amụma rị a kuzi ntụ wụ ọdụndụn.

¹⁶ Ndị-ndu wẹ rị e dufie wẹ, e dula wẹ iwi.

¹⁷ Ufiri ẹ, Osolobuẹ eleni ikorọbịa wẹ ẹnya ihun, o mẹdẹni omikẹn ụmụ-ẹka nwọnlẹni nẹdi lẹ nnẹ lẹ ikpoho di wẹ nwụn, makẹni ndịnị ile wụ ndị eje-omumẹ ghalẹni a tụ egun Osolobuẹ; ọnụ ile rị e ku eje-ihiẹn! Kanị, ihiẹnni ile arọkwọnị Osolobuẹ olulu, o wetukwọnị ẹka o gi e mẹshi wẹ ikẹn.

¹⁸ Eziẹ, eje-obibi rị a dụn kẹ ọkụn; ọ dụnpụ ogun-lẹ-ọkịnkan; ọ mụdẹ ọkụn e ye ẹgboko kin ẹnya, hụn ẹnwụnrụn a gidẹ a lọshi elu.

¹⁹ Ọnụma Osolobuẹ ihiẹn ile rị okpuru ẹ e mẹgụọ alịnị kpọpụ nkụn, ndị alịnị e họnrin nkụn; onwọnni onyẹ e dọnmẹ ibe ẹ ndụn.

²⁰ E bu wẹ ihiẹn rị ibe ẹka-nni ri — ẹgụn hụkwọ a gụn wẹ; e ri wẹ hụn rị ibe ẹka-ekpẹn — ẹfọ ejunkwọnị wẹ. Onyẹ-onyẹ e ri anụ nwẹnẹ ẹ:

²¹ Manasẹ e ri Ifrem, Ifrem e ri Manasẹ; wẹ ẹbụọ e bunụmanị Juda. Kanị, ihiẹnni ile arọkwọnị Osolobuẹ olulu, o wetukwọnị ẹka o gi e mẹshi wẹ ikẹn.