Azaya 7 - Ika

Isi Nke Ẹsa Umunẹ Wẹ Lẹ Alị Siria A Bịa D'a Lụsọn Ndị Juda Agha

¹ Ogẹn Ahazị nwa Jọtam nwa Uzịa gi wụ eze Juda, Rẹzini wụ eze Aram lẹ Pẹka nwa Rẹmalịa eze Izrẹlụ nọ bịa d'a lụsọn obodo Jerusalẹm agha. Kanị omẹgụ, asanị wẹ ẹka maye wẹ.

² Ogẹn ozi gi ru ndị ebọn Defidi rị a kịnị ẹhụ, nị ndị Aram a banyegụọnị ndị Ifrem umunẹ wẹ, ndị Izrẹlụ Ẹbamịn-ugu, obi nọ feri eze wụ Ahazị lẹ ndị nke ẹ, ẹhụ nọ mama wẹ nni kẹ osisi rị ẹgboko ufere rị e mẹhunmẹ.

³ Ya Osolobuẹ nọ sị Azaya, “Jẹnmẹ, yụ lẹ Shịa-Jashubu nwa ị, d'a hụn eze wụ Ahazị. Ụnụ k'a hụn a isi uroro-amị hụ mirin gha e huye Ọgọdọ-mirin ahụn rị Ibe-elu, hụn rị ụzọ wẹ gha e jẹn Ogige Ọsụ-ẹkwa.

⁴ Sị a, ‘Hụn a n'i kwọndọn enwẹn i; atụlẹ egun; obi anahịnlẹ i makẹ mkpikpi nkụn ẹbụọ ndịnị rị e tinyụnnị hụn bịa d'a maye ụnụ; obi anahịnlẹ i nị Rẹzini lẹ alị a wụ Aram lẹ nwa Rẹmalịa rị e buni ụnụ olulu.

⁵ Ndị Aram lẹ Ndị Ifrem lẹ nwa Rẹmalịa e zugụọn'ị umẹ, sị,

⁶ “Nị ẹnyi shi ni alị Juda; ẹnyi k'a kụtu mgbọn ẹ, ẹnyi a banye ẹ weri ẹ, ẹnyi e tumẹ Nwa Tabilu eze wẹ.”

⁷ “ ‘Kanị, lee ihiẹn Onyẹ-nwọnni ẹnyi wụ Osolobuẹ ku: Ihiẹnni wẹ romẹ aghakọ; o mẹkọ!

⁸ Makẹni ikẹn Aram wụhụ Damaskọsụ isi-alị a; ikẹn Damaskọsụ nkẹ wụ Rẹzini eze wẹ. Ndị Ifrem nkẹ k'a lachanrịn iwi ahụa isẹn kwasị ọgụn-ẹtọ gini d'e zu, wụbehi alị.

⁹ Ikẹn ndị Ifrem wụhụ Sameria isi-alị wẹ, ikẹn Sameria nkẹ wụhụ nwa Rẹmalịa eze wẹ. Omẹni ụnụ egini okukwe turu, ụnụ asakọ ẹka turu.’ ”

Ahịma Osolobuẹ Ghọsị Ahazị

¹⁰ Osolobuẹ nọzị sị eze Juda wụ Ahazị,

¹¹ “Sị Osolobuẹ wụ Chuku i ghọsị ị ahịma n'i gi ẹ marịn nị ihiẹnni k'e mẹ, ọsụọn'a hụn ị k'a hụn ebe kachanrịn e mi, ọsụọn'a hụn ị k'a hụn ebe kachanrịn elu e jẹn.”

¹² Kanị, Ahazị nọ sị, “Egun anịkọkwọ m jụ a; anwankọkwọ m Osolobuẹ.”

¹³ Ya Azaya nọ sị, “Gọn ni ntịn, ụnụ ndị ikpụlọ Defidi! Ebe ụnụ chọru ihiẹn rị ịhịan ọnụ eke hi? Ụnụ k'a chọmazị ihiẹn rị Chuku m ọnụ?

¹⁴ Osolobuẹ lẹ enwẹn ẹ jẹnkọ nwan d'a ghọsị ụnụ ahịma: Lee ẹ, nwagbọọ kelẹni marịn okẹnnyẹ jẹnkọ d'a tụrụ imẹ, mụ okẹnnyẹ, a gụn w'a Imanuẹlụ

¹⁵ Nwata hụ k'e ri mirin-ẹran kpụkpụrụnị lẹ mirin-ẹnwụn hụn jẹnkọ d'e jun ụzọ ile ogẹn o gi ru ogo ịmarịn njọ lẹ mma,

¹⁶ makẹni, nwata hụ gini d'a marịn ihiẹn ru ebe ọ nọ saẹka jụ ihiẹn rịlẹni mma, họrị ihiẹn rị mma, alị ndị-nze ẹbụbụọnị ị rị a tụ egun wẹ a lagụọ iwi.

¹⁷ “Osolobuẹ jẹnkọ d'e wẹhẹni yụ lẹ ndị nke i lẹ ikpụnọ nẹdi i ogẹn jọgbu enwẹn ẹ — ụdị wẹ hụntulẹni kete Ifrem wụ Izrẹlụ Ẹbamịn-ugu ghalẹ okpuru Juda pụ: o k'e wẹhẹ eze Asiria d'a maye ụnụ.”

¹⁸ O ru ogẹn ahụn, Osolobuẹ k'e gi ọfịfị wẹhẹ alị Ijiptu, nzinzin hụ rị njẹndemẹ iyi lẹ ẹnwụn hụ wụ alị Asiria.

¹⁹ Wẹ ile k'a bịa d'a kpụjunsọnmẹ ote-mirin rịsọnmẹ elu ugu lẹ oghe rịsọnmẹ ọmụma lẹ ọfịa mẹ ogun-ogun lẹ mgbugbu ile wẹ nọ e ye anụ mirin.

²⁰ Ogẹn ahụn, Osolobuẹ jẹnkọ d'a gha alị rị nfetu Iyi Yufretisi wẹhẹ ẹbeke-isi, hụn wụ eze Asiria, gi ẹ kọpụchanrịn ịhịan ntutu lẹ ẹṅẹnrẹn-ụkụ, gizi ẹ kpụnpụ ịhịan ẹtu.

²¹ Ogẹn ahụn, ịhịan k'a lịlịma n'o dọnmẹdẹ agbanaị-efin lẹ ewu ẹbụọ ndụn,

²² e gi mirin-ẹran wẹ e mẹmẹrin mirin-ẹran kpụkpụrụnị e ri. Ndị ile k'a họdụ alịnị k'a gha e ri mirin-ẹran anụ kpụkpụrụnị lẹ mirin-ẹnwụn.

²³ Ogẹn hụ, ogun-lẹ-ọkịnkan sụọ kẹ wẹ jẹnkọ d'a hụn ebe ile wẹ te nọ a hụn isi vaịnị nnụ-uku w'e re akpụrụ siliva nnụ-uku.

²⁴ Wẹ k'a gha e bujẹndẹ ụta lẹ ọbara ebẹhụ d'a chụ nta, makẹni alịnị ile k'e họnrin ọfịa ogun-lẹ-ọkịnkan jun.

²⁵ O mẹ nke elu-òke ile wẹ te gidẹ omumọ a rụn ugbo, egun ogun-lẹ-ọkịnkan anịkọ ụnụ rudẹ wẹ; wẹ k'a wụrụ ebe efin nọ a kpahunmẹ lẹ ebe atụnrụn nọ a gbahunmẹ.