Azaya 66 - Ika

Isi Nke Isin Kwasị Ọgụn-ẹtọ Ikpe-ọmụma Lẹ Ihiẹn-ọhụn Lalanị Onwọnni Ihiẹn Wẹ K'e Ye Osolobuẹ

¹ Lee ni ihiẹn Osolobuẹ ku, ọ sị, “Elu-igwee wụ ukpo-eze m; elu-ụwa wụ ebe m'a tụkwasị ụkụ. Elee ụlọ k'i k'a tụnnị m nwan? Elebe wụ ebẹhụ m k'e bi?

² Ẹlẹ ẹka m mẹmẹ wẹ, haịn wẹ gi rị?” Ya kẹ Osolobuẹ ku. Onyẹni kẹ m'a kpọ ịhịan: onyẹ hụn e welụa enwẹn ẹ alị njọ a e gbu mgbu obi, hụn a nụ oku m, e mẹhunmẹ.

Ihunnaị

³ Onyẹ hụn gi okẹn-efin chụnyeni m ẹjan hụzị e gbu ọchụn; onyẹ hụn a chụnyeni m ẹjan nwa-atụnrụn, hụzị a kpagi nkitẹ olu e ye mmọn; onyẹ hụn e ye m oyiye-ọka hụzị a chụnyeni mmọn ẹdeke ezin; onyẹ hụn a mụyeni m nsẹnsi hụzị a ja mmọn-lẹ-iyi mma. Hụn sụọnị wẹ kẹ wẹ e mẹ, arụ ile wẹ e mẹ a sụọgbu wẹ.

⁴ Mmẹ nwẹn sikọ d'e mẹshi wẹ ikẹn; m k'e mẹ ihiẹn w'a tụ egun ẹ kunrun wẹ. Makẹni, kẹ m kpọ oku, onwọnni onyẹ zanị; kẹ m ku oku, onwọnni onyẹ gi ẹ dọn. Ihiẹn rịlẹni mma ẹnya m kẹ wẹ e mẹ, ihiẹn e ze m ize kẹ wẹ a họrịsọnmẹ.

⁵ Nụ nị nwan oku Osolobuẹ, ụnụ ndị a nụ oku ẹ, e mẹhunmẹ! Umunẹ ụnụ hụn rị e ze ize ụnụ, e nu ụnụ e ye ụsụọ makẹ ufiri ẹfan m, a sịgụọ, “Osolobuẹ ya ghọsịkwọ ikẹn ẹ, kẹni ẹnyi hụn ịghọghọ ụnụ!” Kanị, uwẹ kẹ ifẹnrẹn jẹnkọ d'e mẹ.

⁶ Gọn ntịn ụzụn rị a zụn imẹ obodo; gọn ntịn ụzụn rị a pụ imẹ Ụlọ-nsọ! Osolobuẹ rọ: ọ rị e mẹgwarị ndị-iṅẹnrẹn ẹ.

Osolobuẹ K'e Mẹ Ihiẹn Ọhụn

⁷ O ke kẹrẹni imẹ mẹmẹ ẹ, ọ mụ! O ke kẹrẹni ukun tụrụmad'a, ọ mụ okẹnnyẹ!

⁸ Onyẹ nụtu ihiẹn nọ ẹnịna? Onyẹ hụntu ụdị ihiẹnni? Nị wẹ sa ẹka gi akpọhịn ohu pumẹ alị? Nị wẹ saẹka gi njube-ẹnya ohu pumẹ alị? Bụ, imẹ ginihụ d'e mẹmẹdẹ Zayọnụ, ọ mụ ụmụ a.

⁹ Osolobuẹ sị, “M'e mẹ ọmụmụ e rugụ ịhịan anịnị m'a mụ a? M'e mẹ ọmụmụ e ru ịhịan a kpọkin m ebe nwa gha a pụha? Ya kẹ Osolobuẹ ku.

¹⁰ Du ni nwan Jerusalẹm ghọghọ; gi ni ufiri ẹ nwọnmẹ anwịnrịn — ụnụ ile ihiẹn ẹ a sụọ! Du n'ẹ ghọghọ ọhụnma-ọhụnma ụnụ ndị rị a kwann'a ẹkwan.

¹¹ Makẹni ụnụ k'a ra ẹran, rajun ẹfọ, ẹran a hụn wẹ gi a hụhụ ịhịan kẹ nwa; ụnụ k'a ra a ọda-ọda, ẹran a hụn a gba ọda-ọda a sụọgbu ụnụ.”

¹² Makẹni Osolobuẹ sị, “Lee n'ẹ, m k'e mẹ ihiẹn rịchanrịnnị Jerusalẹm mma kẹ mirin dọn e jun iyi; e mẹ m ẹfe (akụ-lẹ-ụba) alị ichẹn-ichẹn jun ẹ nọkẹ okẹn-mirin. Ụnụ k'a ra ẹran a, ọ parị ụnụ ẹka, pa ụnụ che ọgbọdọgbọ.

¹³ Kẹ nnẹ dọn a hụhụ nwa kẹ m k'a dọn hụhụ ụnụ ẹkwan, ẹkwan ụnụ rị a kwannị Jerusalẹm.

¹⁴ Ogẹn ụnụ e gi hụn ihiẹnni, ẹfọ k'a sụọ ụnụ ụsụọ, ụnụ a tụlụa kẹ irurue pupụhazị alị. Osolobuẹ k'a ghọsị ndị idibo ẹ ikẹn ẹ, ghọsị ndị-iṅẹnrẹn ẹ olulu ẹ.

¹⁵ Lekwọn'a, Osolobuẹ gi ọkụn lala, ụgbọ-ẹshin ẹ nọ kẹ okẹn ufere, ọ lala d'e gi okẹn olulu ghọsị iwe rị a obi, ọ lala d'e gi ọkụn jụgbọ ọjụgbọ a.

¹⁶ Makẹni Osolobuẹ sikọ d'e gi ọkụn lẹ ọpịa-agha a ye ụwa ile afụnfụn; Osolobuẹ k'e gbu ndị bu ọda.

¹⁷ “O mẹ nke ndị hụn e fe ẹhụ hụ wẹ e fe, e jẹn ugbo-nta d'a rụa mmọn, e sọnhunmẹ onyẹ rị e duni wẹ, e ri anụ ezin lẹ ọgwọ lẹ anụ ndị ọzọ m sị wẹ erilẹ; wẹ ile kẹ wẹ k'e tikpọ.” Ya kẹ Osolobuẹ ku.

¹⁸ “Mmẹ nwẹn, ufiri omumẹ wẹ lẹ ihiẹn wẹ rị e ro, m lala d'e wegbama ndị alị ile lẹ ndị asụsụ ile, a bịa wẹ d'a hụn ọghọ m.

¹⁹ M k'a kpaghọsị wẹ ikẹn m, e zi m ndị k'a nwụnhọdụnị shi alị ichẹn-ichẹn — alị Tashishi lẹ alị Pulu lẹ alị Ludu (ndị wẹ gi ịgba-ụta marịn) lẹ alị Tubalụ lẹ alị Javanị wụ Grisi lẹ alị ichẹn-ichẹn tegbu enwẹn wẹ, hụn kelẹni nụ otiti m mọbụ hụn ọghọ m. Uwẹ sikọ d'a gwa ndị alị ichẹn-ichẹn oku ọghọ m.

²⁰ Wẹ k'a gha alị ile ndị nke ụnụ rịsọnmẹ welụa wẹ Ugu nsọ m rị Jerusalẹm, gi wẹ kwanị mmẹ wụ Osolobuẹ. Wẹ k'e gi ẹshin lẹ ụgbọ-ẹshin lẹ ihiẹn ndị ọzọ wẹ gi e bu ịhịan bulụa wẹ, kẹ anyịnyan mulu kẹ anyịnyan-mkpukpuke.” Ya kẹ Osolobuẹ ku. Wẹ k'e wẹhẹ wẹ kẹ ndị Izrẹlụ dọn e gi afẹrẹ rụlẹni e buhẹni Osolobuẹ oyiye.

²¹ Osolobuẹ sị, “M k'a họrịzịkwọ ndị m k'a họrị imẹ wẹ kẹni wẹ wụrụ ndị nchụn-ẹjan m lẹ ndị Livaị e yeni ndị nchụn-ẹjan ẹka.”

²² Osolobuẹ sị, “Makẹni, kẹ igwere ọhụn lẹ ụwa ọhụn m jẹnkọ d'e ke k'a rịsọnmẹ ihun m, ẹrịra kẹ ẹfan lẹ ẹbozo ụnụ k'a rịsọnmẹ.”

²³ Osolobuẹ sị, “Ịhịan ile rị elu-ụwa k'a rị a bịa d'e fe m gha ifọn d'e ru ifọn, gha Ụhụọhịn Ezumikẹn d'e ru Ụhụọhịn Ezumikẹn.

²⁴ Wẹ k'a gha a pụ d'e lee ozun ndị ahụn feni m isi, makẹni ọhọrị k'e rini wẹ anwụnkọ, ọkụn k'a rị a dụn wẹ etinyụnkọ. Wẹ k'a wụrụ ihiẹn-ize ẹnya ịhịan ile.”