Azaya 65 - Ika

Isi Nke Isẹn Kwasị Ọgụn-ẹtọ Ihiẹn Rị Ichẹn Ẹgbata Ndị Njọ Lẹ Ndị ezi-omumẹ

¹ “E wegụọ m enwẹn m ghọsị ndị jụlẹni ukwere m; a nịgụọ m ndị chọlẹni m hụn m. A sịgụọ m alị kpọkulẹni ẹfan m, ‘E lee m! E lee m!’

² A shịapụgụọ m ẹka m ẹbụbụọ kẹ ụhụọhịn han, e che ndị isi-ikẹn, hụn a ghasọnmẹ eje-ụzọ — e mẹ ihiẹn sụọnị wẹ,

³ ndịnị hụn a kpasu m iwe elee-m, elee-i, ghahanị ese w'a kwasọnmẹ imẹ ugbo-nta wẹ, a mụ nsẹnsi elu ukpo ụrụa ndị hụ;

⁴ e jẹn d'a nọdị ikpẹkpẹ a mụ ẹnya eki e we fọn. Ndịnị rị e ri anụ ezin, hụn mirin anụ rụnị rị ite wẹ.

⁵ Ndịnị hụn a sị, ‘Nọzụka! Anọkunmẹkwọlẹ m, nị mmẹ k'a ị nsọ a rị!’ Ndịnị wụ ẹnwụnrụn ọkụn rị e kunye m imi hụn ọkụn a ghalẹni a dụnbehi.

⁶ Lee ẹ, e detọgụọ m'a ihun m: Agbakọ m nkịtịn! M k'a kụzu wẹ ụgwọ njọ wẹ; kụ a ye wẹ ngadan.

⁷ Njọ ụnụ lẹ njọ ndị nẹdi ụnụ haịn m k'e gi mẹ ẹ.” Ya kẹ Osolobuẹ ku. “Makẹni ndị nẹdi ụnụ nkẹ a mụzịghọ nsẹnsi elu ugu, e fezighọ nị wẹ m isi elu òke; m k'a kụzu wẹ ụgwọ ihiẹn wẹ mẹ mbụ, kụ a ye wẹ ngadan.”

⁸ Kanị, Osolobuẹ sịzịkwọ, “Ịhịan hụn ọhịọ vaịnị mirin rị ogbe ẹ ọda-ọda, a sị wẹ, ‘Ewiwilẹ ẹ, ni ihiẹn rị mma hụzịghọ a,’ Ẹrịra kẹ m k'e mẹ makẹ ufiri idibo m — etikpọchanrịnkọ m ịhịan ile.

⁹ M k'a gha imẹ ebọn Jekọpụ wepụha ndị k'e bikin alị m; m k'a gha Juda wepụha ndị k'e weri ugu m ile. Ndị nke m k'e nwọnrin wẹ; idibo m k'e biri ebẹhụ.

¹⁰ Alị Sharọnụ k'a wụzị ebe atụnrụn nọ a kpa nni, Ọdanmgbugbu-Nsọngbu a wụrụ ebe efin a nọ e zu ikẹn — m k'e mẹni ndị nke m hụn e feni m ya.

¹¹ Kanị, ụnụ ile hụn gbakitọ Osolobuẹ azụụn, zọchanrịn ofufe ụnụ e fe m Ugu nsọ m; ụnụ ile hụn e fe Isi-ẹwẹrẹ, e butọn'a ihiẹn-oriri, e fe Okeri, e hugbaman'a manya, e mẹjunn'ẹ mkpu;

¹² Okeri m k'e ye ụnụ wụnị wẹ k'e gi ọpịa gbu ụnụ, ụnụ ile k'e welụa isi, a mabepụ wẹ ụnụ olu — makẹni kẹ m kpọ ụnụ, ụnụ azanị; a gwa m ụnụ oku, ụnụ egini dọn. Ụnụ nọ mẹ ihiẹn rịlẹni mma ẹnya m, ụnụ a hanrịn ihiẹn ghalẹni a sụọ m.”

¹³ Di-nwọnni-ẹnyi wụ Osolobuẹ sị nwan, “Lee n'ẹ, idibo m k'e rijun ẹfọ, kanị ụnụ k'a nọ ẹgụn! Lee n'ẹ, idibo m k'a rajun ẹfọ, kanị ẹkpịrị k'a kpọ ụnụ nkụn! Lee n'ẹ, idibo m k'a ghọghọ, kanị ifẹnrẹn k'e mẹgbu ụnụ!

¹⁴ Lee n'ẹ, idibo m k'a bụ ẹbụ-ịghọghọ makẹni obi rị a sụọ wẹ ụsụọ, Kanị ụnụ k'a gha e yi oro makẹni elu rị a fụ ụnụ; ụnụ k'a rị e goo yeni obi rị a gbawanị ụnụ.

¹⁵ Ọnyanhan wẹ k'a nyanhan ẹfan ụnụ wụ nị ndị nke m k'a gha e gi ẹfan ụnụ a bụ ọnụ! Di-nwọnni-ẹnyi wụ Osolobuẹ k'e gbuchanrịn ụnụ, kanị o jẹnkọ d'e ye idibo ẹ ẹfan ọzọ.

¹⁶ Ogẹn ahụn, onyẹ ọwụlẹ chọ nwan n'ọ gọzi ịhịan o gi ẹfan Chuku ezioku gọzi; onyẹ chọ n'o kun iyi, o kun ẹfan Chuku ezioku. Anyanhankọzị wẹ nsọngbu isi-ibuzọ, makẹni mmẹ nwẹn wụ Osolobuẹ arịzị a hụn wẹ.

Igwere Ọhụn Lẹ Ụwa Ọhụn

¹⁷ “Lee n'ẹ, m'e d'e ke igwere ọhụn lẹ ụwa ọhụn. Anyanhankọzị wẹ ndị mbụ; erokọdẹ wẹ wẹ.

¹⁸ Ka ghọghọma nị jẹnrin ejẹn, nwọnsọnmẹ anwịnrịn, makẹ ihiẹn m jẹnkọ d'e ke! Lee n'ẹ, m'e d'e ke Jerusalẹm n'ọ wụrụ ihiẹn ịghọghọ, ndị Jerusalẹm a wụrụ ndị wẹ gi a ghọghọ.

¹⁹ M k'e gi Jerusalẹm ghọghọ, ndị nke m k'a gha a sụọ m. Anụkọzị wẹ ẹkwan mọbụ ịkwan-ụya imẹ ẹ.

²⁰ Ụmụ-ẹka anwụnkọzị ebe wẹ pa wẹ ẹka, onyẹ ka-ẹhụ anwụnchukọzị. Onyẹ tọ ahụa ọgụn-isẹn nwụnhụn, e sị wẹ n'ọ tọnị; onyẹ hụn rulẹni nwa ahụa ọgụn-isẹn nwụnhụn, a sị wẹ ‘Wẹ bụ a ọnụ’.

²¹ Wẹ k'a tụn ụlọ, biri; wẹ k'a rụn ugbo-vaịnị, ri ihiẹn wẹ mị.

²² Atụngụkọzị wẹ ụlọ ndị ọzọ e biri; akụngụkọzị wẹ ihiẹn-ugbo, ndị ọzọ e ri ẹ. Kẹ osisi dọn a tọ ẹrịra kẹ ndị nke m k'a gha a tọ; ndị m họrị k'e ri ihiẹn wẹ rụn, ribie ẹ.

²³ Arụnkọ wẹ ọrụn ọlaliwi; amụkọ wẹ ụmụ k'a hụn uke. Makẹni wẹ k'a wụ ndị Osolobuẹ gọzi agọzi kẹ wẹ kẹ ụmụ wẹ.

²⁴ Wẹ gini d'a kpọku m, a za m wẹ; wẹ gini d'a rịọgụ, a nụgụọ m ekpere wẹ.

²⁵ Eje-anụ wụ wofu lẹ atụnrụn k'a kpagbama nni; ẹwọrọ k'a gha e ri ẹfịfịa nọkẹ efin; agwọ nkẹ k'a gha e ri ẹjan; arụkọ wẹ onyẹ ọwụlẹ ẹhụ mọbụ wiwi ihiẹn ebe ọwụlẹ elu Ugu nsọ m.” Ya kẹ Osolobuẹ ku.