Azaya 64 - Ika

Isi Nke Ẹnọ Kwasị Ọgụn Ẹtọ

¹ K'o furu y'a dọwapụ igwere, hidan — nkẹ ugu ile e mẹhunmẹ ihun i,

² kẹ ọkụn dọn e mẹ nkụn e nwunrun ọkụn e mẹ mirin a gbọ; hidan n'i mẹ ẹrịra kẹni ndị-iṅẹnrẹn i marịn onyẹ ị wụ, kẹni alị ichẹn-ichẹn maman'ị piripiri.

³ Ogẹn i gi rụn okẹn-ihiẹn ndị hụ ẹnyi tụlẹni ẹnya a, y'e hidanghọ hụn ugu gi mẹhunmẹ.

⁴ Gha alị lala, anụtuni wẹ n'o nwọn Chuku ọzọ nọ kẹ yụ, onwọntudẹni onyẹ o feban ntịn; ahụntuni wẹ Chuku ọzọ nọ kẹ yụ, hụn e mẹni ndị e chen'ẹ ihiẹn y'e mẹ.

⁵ Y'a nọkunmẹ ndị e gi obi ụsụọ e mẹ ihiẹn furuni, ndị a nyanhan ihiẹn i ku e gi ẹ e bi. Kanị, ogẹn ẹnyi gi tọ a pa oku i iwe nọ we i. Nanị ẹnyi e dọn nwan wanahịn?

⁶ Ẹnyi ile nọ nwan kẹ onyẹ rụnị, ezi-omumẹ ile ẹnyi rị e mẹ nọhụ kẹ nkanka ẹkwa wẹ gi sọ ezi; ẹnyi ile hụ e shinwụn nọkẹ ẹhụhụọ; njọ ẹnyi e buhuhu ẹnyi kẹ ufere.

⁷ Onwọnni onyẹ a kpọku i mọbụ a takẹnmẹdẹ n'o kwọnkẹnmẹ i; makẹni y'e bupụgụọ ẹnyi ihun, la ẹnyi tọ kẹni njọ ẹnyi mẹ ẹnyi ihiẹn.

⁸ Kanị Osolobuẹ, ịyụ wụ nẹdi ẹnyi. Ụrụa kẹ ẹnyi wụhụ, ịyụ wụ ọkpụ-ite; ẹnyi ile wụ ọrụn-ẹka ị.

⁹ Osolobuẹ, dodo, ebukẹlẹ olulu; atọlẹ a nyanhan njọ ẹnyi jẹnrin ejẹn. Dodo, lee ẹnyi ẹnya ihun, nị ndị nke i kẹ ẹnyi ile wụ.

¹⁰ Obodo i ile rị nsọ e họnringụọ nwan atụ. Zayọnụ wụdẹ nwan atụ; Jerusalẹm a gbagụọ okpokoro.

¹¹ Ụlọ-nsọ ẹnyi hụn wụ mma ẹnyi hụn ndị nẹdi ẹnyi kanị nọ ja ị mma, kẹ wẹ dụn nwan ọkụn, ihiẹn ile ẹnyi kpọ ihiẹn a wụrụgụọ mkpọkọ-mkpọkọ.

¹² N'ị hụngụ ihiẹn ndịnị ile, Osolobuẹ, y'e mẹhunmẹni? N'ị gbasọnmẹ nkịtịn, yesọnmẹ ẹnyi afụnfụn?