Azaya 63 - Ika

Isi Nke Ẹtọ Kwasị Ọgụn-ẹtọ Osolobuẹ E Gi Ẹka A Mẹ Ihiẹn Ọ Chọ N'o Mẹ

¹ Onyẹ wụ onyẹni gha Bozra rị alị Ẹdọm pụla? Onyẹ pụla ihiẹnni ẹwuru ẹ rị e nwun kẹ ihiẹn ẹdeke huye? Onyẹ wụ onyẹni kẹn ekikẹn ndị-nze, jẹnla ndụn-ndụn?! “Mmẹ Osolobuẹ rọ! M gi ẹ e ku nị a tụgụọnị m ụnụ ụya; mmẹ hụn a zụọpụhanị!”

² Kị ẹwuru i nọnị kẹ ihiẹn ẹdeke huye, nọkẹ onyẹ rị a zọ ogbe-vaịnị?

³ “A zọgụọ m vaịnị — mmẹ sụọ, onwọnni onyẹ alị ọwụlẹ yeni m ẹka. E gigụọ m olulu zọkpụkpọ wẹ, e gigụọ m ọnụma zọkpụkpọ wẹ, ẹdeke wẹ a gbayesọnmẹ m ẹwuru — ịya ratọsọnmẹ ẹwuru m.

⁴ Makẹni ọ rịọlẹ m obi nị m k'e mẹgwarị; makẹni ahụa m'e gi gbapụha e rugụọ.

⁵ E lee m ẹnya, ahụnnị m onyẹ k'e ye ẹka, ọ tụ m ẹnya nị onwọnni onyẹ ye m ndu, ya m nọ gi ẹka m wẹhẹ nzụọpụha, ọnụma m hụ e ye m ndu.

⁶ E gi m olulu zọkpọ ndị alị ichẹn-ichẹn, e gi m ọnụma mẹ wẹ ihiẹn, ọ tụma wẹ kẹ manya, e hu m ẹdeke wẹ ye alị.”

Ịja-mma Lẹ Ekpere

⁷ M k'e ku oku ẹfọma ile Osolobuẹ mẹ, ihiẹn ndị o mẹ hụn w'e gi ja a mma; m k'e ku ihiẹn ile Osolobuẹ mẹni ẹnyi — ẹghẹẹ, ihiẹn-ọma bu ọda o mẹni ikpụlọ Izrẹlụ, ihiẹn ndị o mẹ yeni omikẹn lẹ okẹn ẹfọma a.

⁸ O te sị, “Eziẹ, ndị nke m kẹ wẹ wụ, ụmụ m hụn jẹnkọlẹni d'e mẹ m ẹro.” Ya k'ọ nọ wụrụ Onyẹ-nzụọpụha wẹ.

⁹ Ọ nị ihiẹn ile rị e mẹtụrụnị wẹ e mẹtụrụ ya nwẹn; ọ nọyeni wẹ nọkẹ mmọn-ozi, zụọpụha wẹ. Ọ nọ gi ihiẹn-ọsụsụọ lẹ omikẹn gbapụha wẹ; ọ bushi wẹ elu, parịdẹ wẹ aparị — hụn ahụn ile ogẹn mbụ ahụn.

¹⁰ Kanị wẹ nọ femẹ isi, mẹ ize zemẹ Mmọn-nsọ Osolobuẹ. Ya Osolobuẹ nọ hutọ, họnrin eṅẹnrẹn wẹ — gidẹ ẹka a bunụmanị wẹ.

¹¹ Ya wẹ nọ nyanhan ogẹn mbụ, ogẹn Mozizi lẹ ndị ya lẹ wẹ wị, ya wẹ nọ jụma, “Elebe Onyẹ ahụn hụn we ndị nke ẹ ghafe ohimin rị nwan? Onyẹ ahụn gi onyẹ-ndu wẹ we wẹ ghafe ohimin. Elebe kẹ Onyẹ ahụn rị nwan? Onyẹ ahụn bu Mmọn-nsọ a che imẹ igunrun wẹ,

¹² Onyẹ hụn gi ẹka a hụn hi-ogbe mẹ Mozizi rụn ihiẹn ọ rụn; Onyẹ hụn kewanị wẹ mirin ohimin, kẹn'o gi ẹ nwọnrin ẹfan jẹnrin-ejẹn.

¹³ Onyẹ hụn we wẹ ghafe mirin ahụn mini?” Wẹ gha kẹ ẹshin ghakọ ebe fọnni ogẹn hụ — akpọgburuni wẹ;

¹⁴ kẹ obi e ruchanrịn efin rị alị aradan alị, ẹrịra kẹ Mmọn-nsọ Osolobuẹ dọn mẹ obi ruchanrịn wẹ alị. Ẹnịna k'i dọn du ndị nke i, kẹn'i gi ẹ nwọnrin ẹfan w'a gbaye ọda-ọda.

Ekpere Omikẹn Lẹ Mgbagharị

¹⁵ Dodo, gha nwan elu-igwee lee ẹnya, gha okẹn ukpo-eze i ahụn rị nsọ lee ẹnya alị!! Ọrịrịmma ẹnyi ara dụzịdẹ ị ra? Ebe ikẹn i rị nwan? Y'a ra gizi ẹfọma lẹ omikẹn sọn ẹnyi.

¹⁶ Kanị, yụ wụ nẹdi ẹnyi, ọsụọn'a Ebraham amarịn ẹnyi, ọsụọn'a Izrẹlụ sị ọ marịnzị onyẹ ẹnyi wụ — yụ wụ Osolobuẹ wụkwọ nẹdi ẹnyi; Onyẹ-mgbapụha ẹnyi wụ ẹfan ị ẹdẹi.

¹⁷ Euu Osolobuẹ, kị haịn i gi e mẹ ẹnyi a gha ụzọ ị a kpapụ, a kpọkin ẹnyi obi hụn ẹnyi gizilẹni a tụ egun i? Dodo, gi ufiri ẹnyi ndị idibo i kinhẹn, ufiri ebọn ẹnyi ndịnị wụ nke i!

¹⁸ Makẹni ndị nke i e te werigụọ alị nsọ ị ẹkẹrẹ ogẹn, kanị ndị-iṅẹnrẹn ẹnyi nọ nwan bịa d'a zọtịta Ụlọ-nsọ ị.

¹⁹ Ẹnyi nwẹn rị okpuru i gha alị lala; kanị wẹ nwẹn arịtuni okpuru i, azatuni wẹ ẹfan ị.