Azaya 61 - Ika

Isi Nke Ohu Kwasị Ọgụn-ẹtọ Osolobuẹ A Bịagụọ D'e Mẹni Ndị Nke Ẹ Ọhụnma

¹ Mmọn Di-nwọnni-ẹnyi wụ Osolobuẹ rị imẹ m, makẹni Osolobuẹ e tumẹgụọ m d'e zi ndị igbẹnnyẹ ozi rị mma. O zi m d'a kasị ndị ndụn gụ obi, d'a sị ndị wẹ kwọndọn lama, d'a sị ndị ngan pụha;

² o zi m d'a hị nị ahụa Osolobuẹ e gi mẹni ndị nke ẹ ọhụnma e rugụọ, nị ụhụọhịn Chuku ẹnyi e gi mẹgwarị ndị kwọndọnni wẹ e rugụọ; o zi m d'a rọkọ ndị ile rị a kwannị obi,

³ ọ sị m d'a tụnị ndị ụya rị e ri imẹ Zayọnụ ụya: mmẹ d'e kpumẹ wẹ okpu ma mma gi nọkin ẹnya ntụn wẹ bụọyesọnmẹ isi, mmẹ hu ịghọghọ kpu wẹ ẹhụ kẹ udẹn, gi nọkin ẹnya ẹkwan, mmẹ mẹ ọjịja-mma Osolobuẹ jun wẹ ọnụ, gi nọkin ẹnya agụngụn onyẹ ndụn gụ. Wẹ k'a kpọ wẹ okẹn-osisi rị a ghọsị ẹka Osolobuẹ, ihiẹn Osolobuẹ kụn n'o ghọsị ọghọ a.

⁴ Wẹ k'e dọnzi mkpọkọ-ụlọ ẹdẹi, rụndọnzi ebe gba okpokoro kete-kete; wẹ k'a tụndọnzi obodo ichẹn-ichẹn ndị gba okpokoro kete agbọ ole-lẹ-ole.

⁵ Itumunyẹ k'e duni ụnụ anụ; abịamabịa k'a rụnnị ụnụ ugbo lẹ alị vaịnị ụnụ.

⁶ Wẹ k'a kpọ ụnụ ndị nchụn-ẹjan Osolobuẹ, kpọ ụnụ ndị-ọrụn Chuku ẹnyi. Ụnụ k'a gha e ri akụ-lẹ-ụba alị ichẹn-ichẹn, e gidẹ akụ-lẹ-ụba wẹ a nyan isi.

⁷ Ndị nke m e nwọnrin ọghọ nwọncheni ẹlẹzi ifẹnrẹn, ukuu wẹ e ye wẹ ịghọghọ; ẹlẹzi ịfa, ukuu ụnụ a ba ụba ọhụnma-ọhụnma, ịghọghọ itẹbitẹ a wụrụ nke wẹ.

⁸ Makẹni ezioku a sụọ mmẹ wụ Osolobuẹ ụsụọ; ohin lẹ mmẹgbu e ze m ize. M sikọ d'e mẹ hụn runi m kụ wẹ ụgwọ-ọrụn, e tumẹ m nkwerigbama k'e kwọngbama mmẹ lẹ wẹ jẹnrin-ejẹn.

⁹ Wẹ k'a nụ ẹfan ẹbozo wẹ imẹ alị ndị ọzọ; ẹfan ụmụ wẹ k'a kpọgbarị imẹ alị ichẹn-ichẹn. Ndị ile hụnnị wẹ k'a marịn nị wẹ wụ ndị Osolobuẹ gọzi.

¹⁰ M rị a ghọghọ ọda-ọda makẹ Osolobuẹ; obi rị a sụọ m ụsụọ ọda-ọda makẹ Chuku m. Makẹni o yimẹgụọ m nzụọpụha kẹ ẹwuru, we ezi-omumẹ tụ m mgburu, gi wẹ ile chọ m mma kẹ okẹnnyẹ rị a gba ẹhụhụọ dọn e kpuru okpu ma mma lekẹ onyẹ nchụn-ẹjan, kẹ nwagbọọ rị a gba ẹhụhụọ dọn e yi ihiẹn-mma a.

¹¹ Ẹghẹẹ, kẹ ẹjan dọn e mẹ ihiẹn e pu, kẹ alị-ugbo dọn e mẹ mkpụrụ wẹ kụn imẹ ẹ e sue, ẹrịra kẹ Di-nwọnni-ẹnyi wụ Osolobuẹ jẹnkọ d'e mẹ ihiẹn o k'e mẹ, alị ile a hụn ezi-omumẹ ẹ, gi ẹ ja a mma.