Azaya 60 - Ika

Isi Nke Ọgụn-ẹtọ Ọghọ Hụn Lalanị Nị Zayọnụ

¹ Lihi ọtọ n'i nwunmẹ, nị ukpẹ i a bịagụọ — ọghọ Osolobuẹ a pụhaọlẹ ebe ị rị.

² Lee ẹ, ụwa ile a gbagụọ ishi; ẹkpa-ishi e kpumẹgụọ alị ndị ọzọ ile — kanị, Osolobuẹ a pụhaọlẹ imẹ i, Jerusalẹm, ọghọ a a pụhagụọ d'e kpuru ụnụ ndị Jerusalẹm.

³ Ndị alị ichẹn-ichẹn k'a bịa d'e kunrun ụnụ yeni ukpẹ ụnụ; ndị-nze k'a bịa d'e kunrun ụnụ makẹni eki e fọnpụgụọnị ụnụ.

⁴ Weshi ẹnya elu, n'i lehunmẹ: lee wẹ ile kẹ wẹ zu, lala d'e kunrun i! Ụmụ-ị-ikẹnnyẹ k'a gha ebe teni kinhẹn; ndị k'e welụa ụmụ-ị-ikpoho k'a padẹ wẹ ẹka lụa.

⁵ Ogẹn y'e gi hụn wẹ, ihun i k'e kechan kẹ ukpẹ, obi a sụọma ị ụsụọ, ịghọghọ e jun i obi. Akụ-lẹ-ụba wẹ e bu elu ohimin k'a wụrụ nke i; akụ-lẹ-ụba alị ichẹn-ichẹn k'a wụrụzịkwọ nke i.

⁶ Anyịnyan mkpukpuke k'e jun alị ị, okoro Anyịnyan mkpukpuke hụn ghasọnmẹ alị Midianị lẹ alị Efa bịa. Kẹ ndị hụn k'a gha alị Shẹba bịa bukọ goru lẹ nsẹnsi — a ja ẹfan Osolobuẹ mma wẹ lalanị.

⁷ Ewu lẹ atụnrụn alị Kẹda k'a bịazịkwọn'ị; ebulu alị Nẹbayọtụ k'a bann'ị erere; wẹ k'e gi wẹ chụn ẹjan elu ukpo nchụn-ẹjan m, a narịn m'a, m k'e yecheni Ụlọ-nsọ m ọghọ.

⁸ Elee ndị fela ihiẹnni nọkẹ orukpu igwere, lekẹ nduru lala ẹkụ wẹ?

⁹ Mmẹ kẹ alị ndị tegbu enwẹn wẹ rị ohimin burula! Ụgbọ-mirin uku Tashishi ndị ahụn rị wẹ ihun, wẹ bula ụmụ ị rị ebe teni — uwẹ lẹ siliva lẹ goru wẹ — d'a gbaye Osolobuẹ wụ Chuku ụnụ, Onyẹ-nsọ alị Izrẹlụ — makẹni o yeọlẹ ụnụ ọghọ.

¹⁰ Itumunyẹ k'a tụndọnzidẹ mgbọn ụnụ; ndị-nze wẹ k'a wụ ndị ọrụn ụnụ. E te giọlẹ m olulu mẹ ụnụ ihiẹn, kanị, m jẹnkọ nwan d'e lee ụnụ ẹnya rị mma, mẹ omikẹn ụnụ.

¹¹ Ọnụ-mgbọn Jerusalẹm jẹnkọ d'a rịsọnmẹ oghe; agụnmakọ w'a uhinhin lẹ efinaị, kẹni wẹ e bubanhan akụ-lẹ-ụba alị ile, a kpụnlụa ndị-nze wẹ ụnụ mẹri.

¹² Ẹghẹẹ, alị mọbụ alị-eze ọwụlẹ hụn jụ n'o fekọ ụnụ k'a la iwi — wẹ k'e gbuchanrịn ndị rịn'a.

¹³ Ọghọ alị Lẹbanọnụ k'a wụrụ nke ụnụ — osisi ẹ ile wụ paịnị lẹ osisi fẹ lẹ Saịprẹsị, kẹni ụnụ gi ẹ chọ Ụlọ-nsọ m mma. M k'e mẹ ebẹhụ m'a tụkwasị ụkụ n'o nwọn ọghọ.

¹⁴ Ụmụ ndị te bịangbu ụnụ k'a bịa d'a kụnị ụnụ isi-alị; ndị ile e legberi ụnụ k'a kụzịkwọnị ụnụ isi alị; wẹ k'a kpọ ụnụ Obodo Osolobuẹ, Zayọnụ hụn wụ nke Onyẹ-nsọ alị Izrẹlụ.

¹⁵ Ọsụọn'a n'a jụgụọ wẹ i nwan, e ze ize i — hụn wụnị onwọnzini onyẹ a gha imẹ i, m k'e mẹ ụnụ wụrụ ihiẹn-ọghọ k'a rị jẹnrin-ejẹn lẹ ihiẹn-ịghọghọ ebe agbọ ọwụlẹ pụhanị rị.

¹⁶ Alị-eze ichẹn-ichẹn k'e mẹdẹ ụnụ kẹ ụmụ wẹ rị e ye ẹran; ndị-nze k'e mẹni ụnụ kẹ ụmụ rị a ra ẹran, ụnụ e gi ẹ marịn nị mmẹ, Osolobuẹ, wụ Onyẹ hụn a zụọpụhanị ụnụ, Onyẹ mgbapụha ụnụ, Dikẹn ebọn Jekọpụ.

¹⁷ M k'e wẹhẹni ụnụ ezigbo goru gi nọkin ẹnya igwe-bronzu ụnụ, wẹhẹni ụnụ siliva gi nọkin ẹnya igwe mmaka ụnụ, M k'e ye ụnụ igwe-bronzu, ẹlẹ osisi, gi igwe nọkin ẹnya ọmụma. M k'e mẹ ọrịrịmma kịma ụnụ, mẹ ezi-omumẹ dumẹ ụnụ.

¹⁸ Anụkọzị wẹ ukwere egbu-lẹ-egbu imẹ alị ụnụ; ahụnkọzịkwọ wẹ ntikpọ lẹ owiwi ebe ọwụlẹ wụ nke ụnụ. Nzụọpụha k'e fihunmẹ ụnụ lekẹ mgbọn; ọnụ-mgbọn ụnụ a zama Ịja-mma Osolobuẹ.

¹⁹ Ụnụ egikọzị ẹnyanwụn legha ụzọ ogẹn efinaị; mọbụ gi ifọn legha ụzọ imẹ uhinhin. Mba. Osolobuẹ lẹ enwẹn ẹ k'a wụrụnị ụnụ ukpẹ jẹnrin-ejẹn; Chuku ụnụ k'a wụ ọghọ ụnụ.

²⁰ Anwụn ụnụ arọkọzị; ifọn ụnụ etibehikọ — makẹni Osolobuẹ lẹ enwẹn ẹ k'a wụrụnị ụnụ ukpẹ jẹnrin-ejẹn, ụnụ a kwanbehi ẹkwan.

²¹ Ndị nke ụnụ ile k'a wụchanrịn ndị ezi-omumẹ; wẹ k'e nwọnrin alịnị jẹnrin-ejẹn. A wụrụ wẹ ihiẹn m gi ẹka m kụn, ọrụn ẹka m — hụn k'e wẹhẹni m ọghọ.

²² Hụn nta imẹ ụnụ k'e họnrin okẹn ebọn; hụn kachanrịn ntịn e họnrin okẹn alị. Mmẹ wụ Osolobuẹ; ogẹn ru, m k'e mẹ ihiẹnni ozigbo-ozigbo.