Azaya 6 - Ika

Isi Nke Isin Kẹ Osolobuẹ Dọn Kpọ Azaya

¹ Ahụa ahụn Eze wụ Uzịa nwụn, m hụn Osolobuẹ k'ọ nọdị alị elu ukpo-eze hụn jẹn elu, nwọn ọghọ; ẹwuru-nze o yi shịagbarị imẹ Ụlọ-NSỌ.

² Ndị mmọn-ozi w'a kpọ Sẹrafụ rịsọnmẹ elu ibe isi ẹ; wẹ nwọnsọnmẹ nku isin-isin: wẹ gi ẹbụọ-ẹbụọ kpumẹ ihun wẹ, gi ẹbụọ-ẹbụọ kpumẹ ụkụ wẹ, gizi ẹbụọ-ẹbụọ e fe.

³ Wẹ hụ e yi, a sị ibe wẹ, “Nsọ! Nsọ!! Nsọ!! Osolobuẹ Ihiẹn Ile rị okpuru ẹ rị nsọ! Ọghọ a jun ụwa ile!”

⁴ Olu ẹ hụ e mẹhunmẹ Ọnụmụzọ Ụlọ-nsọ hụ; ẹnwụnrụn e jun imẹ Ụlọ-nsọ.

⁵ Ya m nọ yimẹ, “Ụya e gbuẹ m! Nke m a gụ! Makẹni, mmẹ hụn wụ onyẹ njọ ọnụ a rụ, hụn bizikwọ imẹ igunrun ndị njọ ọnụ wẹ rụ, e gigụọ ẹnya hụn Eze, Osolobuẹ Nwọn Ikẹn Ile!!”

⁶ Ya mmọn-ozi ohu imẹ wẹ nọ fehẹ, o gihụ ikeke-ọkụn o gi akpa weri elu ukpo nchụn-ẹjan.

⁷ Ọ nọ gi ikeke-ọkụn hụ mẹtụ m ọnụ, sị, “Ọnwan e mẹtụgụọ ị nwan ụgb'ọnụ: e wepụgụọ wẹ njọ ị; a gbagharịgụọ wẹ njọ ị.”

⁸ Ya kẹ m nọ nụ olu Osolobuẹ k'ọ sị, “Onyẹ kẹ m'e zi? Onyẹ k'e jẹnni ẹnyi?” M nọ sị, “Lee m ebeni. Zi m!”

⁹ Ọ nọ sị, “Jẹn d'a sị ndịnị: ‘A nụ nị ọnụnụ-ọnụnụ, aghọtalẹ ni; e lee ni olile-olile, eleghalẹ ni.’

¹⁰ Kpọkin ndịnị obi; kụkin wẹ ntịn, y'e kpumẹ wẹ ẹnya. Amamgbe w'e gi ẹnya wẹ legha ụzọ, gi ntịn wẹ nụ, gi obi wẹ ghọta, hutọ, nwọnrin nzụọrị.”

¹¹ Ya m nọ sị, “Onyẹ-nwọnni-ẹnyi, d'e ru ele mgbe?” Ọ nọ sị m: “D'e ru ni obodo ichẹn-ichẹn e tikpọchanrịn, onwọnzini onyẹ bi imẹ wẹ; d'e ru mgbe wẹ lachanrịn ụlọ wẹ tọ okpokoro, ndị ọzọ e wiwi ugbo wẹ, ripụ ihiẹn wẹ kụn;

¹² d'e ru mgbe Osolobuẹ chụgụ onyẹ ọwụlẹ shi ebe teni, alị a gbachanrịn okpokoro.

¹³ Ọsụọkwọn'a ohu imẹ iri sụọ họdụ alịnị, wẹ k'a dụn wẹ ọkụn. “Kanị, kẹ okẹn-osisi dọn a latọ mkpọgụn alị wẹ gbutugụ wẹ, ẹrịra kẹ mkpụrụ rị nsọ k'a dọn họdụ alịnị, wụrụ mkpọgụn hụ wẹ latọ.”