Azaya 59 - Ika

Isi Nke Ohu Arịa Ọgụn-ẹtọ Njọ Ụnụ E Kebegụọ Ụnụ Lẹ Chuku Ụnụ

¹ Lee ẹ, ẹlẹ ni ẹka Osolobuẹ e mẹkẹ mkpụrụ haịn o gilẹni a zụọpụha ụnụ mọbụ nị ntịn e kinkẹ ẹ haịn o gilẹni a nụ ekpere ụnụ.

² Njọ ụnụ e kebegụọ ụnụ lẹ Chuku ụnụ; njọ ụnụ haịn o gi bupụ ụnụ ẹnya, ya haịn o gilẹni e gọn ụnụ ntịn.

³ Ẹdeke ndị ụnụ gbu rịsọnmẹ ụnụ ẹka; eje-ihiẹn ụnụ mẹ a ghagbarịgụọ ụnụ mkpịnsịn-ẹka ile. Ọnụ ụnụ a tụnsọnmẹ ntụ; ire ụnụ e kusọnmẹ eje-ihiẹn.

⁴ Onwọnni onyẹ a chọ ezioku; onwọnni onyẹ e kinchanrịn ihiẹn mẹni. Ikpe wẹ rị e kin ghalẹni e ru alị kẹ wẹ gi e dọn ẹnya, a tụsọnmẹ ntụ; w'e rotọsọnmẹ eje-ihiẹn e mẹ.

⁵ Wẹ e rotọ eje-ihiẹn kẹ ẹjụ-alị dọn e bu ẹkwan ẹfọ lẹzi kẹ akpụkpa dọn a tan ntan-akpụkpa — onyẹ ri ẹkwan wẹ, ọ nwụnhụn, wẹ gbu ẹkwan wẹ, agwọ e gbuni a pụha.

⁶ Ntan-akpụkpa wẹ ara nị gi kpa ẹkwa — ihiẹn w'a kpa ara rudẹ wẹ fụrụ oyi. Eje-ihiẹn eje-ihiẹn kẹ wẹ e mẹ, e gi ẹka-ikẹn e sọn ibe wẹ.

⁷ Ụkụ a kẹrẹka wẹ ebe eje-ihiẹn rị, ara fụdẹ wẹ ọrụn igbu onyẹ nwọnlẹni ihiẹn o mẹ. Eje-ihiẹn sụọ kẹ w'e ro; ntikpọ lẹ nsọngbu kẹ w'e buhẹsọnmẹ.

⁸ Amarịn wẹ ihiẹn udọn wụ; mmẹgbu kẹ wẹ gi marịn wẹ; ụzọ nkikọn kẹ w'a gha — onwọnni onyẹ a gha ụzọ wẹ obi e ru alị.

⁹ Ya haịn Osolobuẹ gilẹni a tụnị ẹnyi ụya; ya haịn ihiẹn te furu n'o ru ẹnyi ẹka gilẹni e ru ẹnyi ẹka. Ẹnyi hụ a chọ ukpẹ, kanị ishi kẹ ẹnyi rị nwan a hụn; ẹnyi hụ e lee ẹnya nị eki fọnni ẹnyi, kanị imẹ ẹkpa-ishi kẹ ẹnyi rịkwọ nwan a gha.

¹⁰ Ẹnyi e bisọnmẹ ẹka ẹhụ-ẹjan jẹnkọ lekẹ ẹnya-mpịn e bisọnmẹ ẹka nọkẹ ndị nwọnlẹni ẹnya; a kpọgburu ebe eki rị elu, lekẹ sị ọhịhị a gbamagụọ. Imẹ igunrun ndị ẹhụ rị ikẹn, ẹnyi nọhụ kẹ ozun ndụn rịlẹni.

¹¹ Ẹnyi hụ e dẹn kẹ eje-anụ, e yi oro kẹ nduru; ẹnyi hụ e che nị Osolobuẹ tụnị ẹnyi ụya, ọ tụnịnị ẹnyi; ẹnyi hụ e che nzụọpụha ẹnyi, kanị nzụọpụha aridẹni nsue.

¹² Makẹni, eje-ihiẹn ẹnyi mẹ e bukẹ ọda ihun i, Osolobuẹ; njọ ẹnyi a shịagbugụọ ẹnyi ẹri. Njọ ẹnyi hụ a kpọ ẹnyi ihun ogẹn ile, ẹnyi e kwerighọ nị ẹnyi mẹ eje-ihiẹn ndị ẹnyi mẹ:

¹³ isi hụn ẹnyi nupụsọnmẹ okpuru Osolobuẹ lẹ ntụ ẹnyi gi sọn ẹ, kẹ ẹnyi dọn gbakitọ Chuku ẹnyi azụụn; a kwadọn nkịgbu lẹ nnupụ-isi, a kpachanpụ ẹnya a tụsọnmẹ ntụ.

¹⁴ Wẹ ile kẹ ẹnyi gi chụkin ezigbo eṅẹn azụụn, a chụzụka ezi-omumẹ; ezioku nkẹ hụ a lụ ọnwụn ọgbara-ogbe, ihiẹn kụrụ ọtọ ara s'ẹka banhandẹ ọgwa.

¹⁵ Ezioku arịzị; onyẹ jụ eje-ihiẹn, a chọma wẹ isi ẹ. Osolobuẹ e lee ẹnya, ọ fụ a — nị ezigbo eṅẹn arịa.

¹⁶ Ọ hụn a nị onwọnni onyẹ rịn'a, ọ tụ a ẹnya ọda-ọda nị onwọnni onyẹ e buche ọnụ nị wẹ dọnzi ihiẹn. Ya kẹ ọ nọ gi ẹka a wẹhẹ nzụọpụha. Ezi-omumẹ ẹ ye ẹ ndụn o gi mẹ ẹ.

¹⁷ O yiri ezi-omumẹ rịkẹ ẹwuru-igwe onyẹ-agha gi e gbọndọn obi; kpuru nzụọpụha nọkẹ okpu-igwe onyẹ-agha; yiri mmẹgwarị o k'e mẹgwarị ndị-iṅẹnrẹn ẹ lekẹ ẹwuru; olulu ọ rị e bu nọ a kẹ mgburu ọ tụye olu.

¹⁸ Ihiẹn onyẹ-onyẹ mẹ k'o k'e gi sọn ẹ: o k'e ye ndị iṅẹnrẹn ẹ afụnfụn, mẹshi ndị rị a lụsọn ẹ ọgụn ikẹn — o k'e yedẹ alị ndị rị mkpẹnrẹn ohimin teni afụnfụn ihiẹn wẹ mẹ.

¹⁹ Ịhịan ile a gbaye Osolobuẹ — kẹ ndị rị ẹbamịn ọdịdan-ẹnyanwụn ịhịan ile e ye ẹ ọghọ — kẹ ndị rị ẹbamịn ọwụwa-ẹnyanwụn, makẹni Osolobuẹ k'a bịa nọkẹ okẹn iyi rị e huni, okẹn iyi hụn ufere Osolobuẹ buhẹ.

²⁰ Onyẹ-mgbapụha k'a bịa obodo Zayọnụ, d'a zụọpụha ndị ebọn Jekọpụ k'e rogharịnị. Ya kẹ Osolobuẹ ku.

²¹ “Mmẹ nwẹn, ọnwan wụ nkwa m kwe wẹ: gha ogẹnni jẹnmẹ, Mmọn m hụn m buche imẹ ndụn ụnụ aghakọ imẹ ụnụ pụ; oku m hụn m buche ọnụ ụnụ aghakọ ụnụ ọnụ pụ, ọ ghakọ ọnụ ụmụ ụnụ pụ, ọ ghakọ ọnụ ụmụ-ụmụ ụnụ pụ, jẹnrin-ejẹn. Ya kẹ Osolobuẹ ku.”