Azaya 58 - Ika

Isi Nke Mmẹsatọ Kwasị Ọgụnnaị Ezigbo Ibu-ọnụ Hụn A Sụọ Chuku

¹ Gi ẹ yi oro! Agbakwọlẹ nkịtịn! Yi ẹ n'ọ han — nọkẹ opi! Gwapụ ndị nke m nnupụ-isi wẹ, gwapụ ikpụlọ Jekọpụ njọ wẹ!

² Makẹni, wẹ hụ e fe m ụhụọhịn-ụhụọhịn, e mẹ kẹ sị w'a chọka nị wẹ marịn m, nọkẹ sị wẹ wụ alị e mẹ ihiẹn rị mma, alị hụn latọlẹni ihiẹn Chuku ẹ sị a mẹ. Wẹ hụ a sị m gwa wẹ ihiẹn furu wẹ k'e mẹ, e mẹ nọkẹsị a chọka wẹ nị Chuku nọkunmẹ wẹ.

³ Wẹ hụ a sị, “Kị ẹnyi budẹni nwan ọnụ bụ onwọnni ihiẹn i kpọ a? Kị ẹnyi wetuni nwan enwẹn ẹnyi alị, bụ y'e feyedẹni ẹnya?” Kanị ụnụ gha e bu ọnụ ụnụ hụzị e mẹsọnmẹ ihiẹn gụnnị ụnụ, e mẹgbu ndị a rụnnị ụnụ ọrụn.

⁴ Ibu-ọnụ ụnụ wụ ibu-ọnụ oku lẹ ikpe, lẹ imẹ ibe ụnụ eje-ihiẹn. Ụnụ ebukọkwọ ụdị ọnụnị a tụ ẹnya nị wẹ k'a nụ olu ụnụ elu-igwee.

⁵ Ọnwan wụ ụdị ọnụ m sị ụnụ e bu? Ụhụọhịn ịhịan gihụ e ye enwẹn ẹ afụnfụn sụọ rọ? Ụhụọhịn wẹ gihụ e bu ihun a kọma alị kẹ achara lẹ iyihụ ẹkwa-achọ lekẹ onyẹ ihiẹn mẹ, e dinẹ ikpọn ntụn? Ọhụn kẹ ụnụ a kpọ ibu-ọnụ — ụhụọhịn ibu-ọnụ hụn rị mma ẹnya Osolobuẹ?

⁶ Ọnwan wụ ọnụ m sị ụnụ e bu: ịkpọpụ ndị wẹ rị e mẹ eje-ihiẹn ẹgan lẹ ịtọpụ ndị wẹ rị a kịgbu ẹgbụn, ịhatu ndị wẹ rị a bịangbu lẹ itibepụ agbụn ile rị wẹ olu. Ẹlẹ ịya?

⁷ Ịgha e ri ị hụ a nyanhan ndị ẹgụn rị a gụn lẹ iye ogbẹnnyẹ nwọnlẹni ụlọ ebe o k'a nọdị; Ị hụn onyẹ gba ọtọ, y'e jemẹ ẹ ẹkwa lẹ ịhụn a nị y'a gbakitọnị nwẹnẹ i azụụn. Ẹlẹ ịya?

⁸ I mẹ ẹrịra, ukpẹ i e nwunrun kẹ eki-ụtụntụn, y'a dịnhịnkẹnrin emu i; ezi-omumẹ i e buruni i ụzọ, ọghọ rị Osolobuẹ ẹhụ a kpanrịnn'ị azụụn e che i nche.

⁹ Ị kpọ Osolobuẹ oku, ọ za ị; Ị kwanma n'o yeni i ẹka, Osolobuẹ a sị ị, “Lee m ebeni!” Omẹni y'a kụsị mmẹgbu, gbabehi ibe ụnụ mkpịnsịn-ẹka ihun, kujabehi oku ịhịan,

¹⁰ omẹni y'e we ihiẹn nkẹ y'e ri ye ndị ẹgụn rị a gụn, e ye ndị wẹ rị a bịangbu ihiẹn rị wẹ mkpa, ogẹn ahụn ukpẹ i k'e nwunmẹ ebe ishi te rị, uhinhin i a nọ kẹ efinaị.

¹¹ Osolobuẹ k'e du i ogẹn ile; e ye i ihiẹn rị ị mkpa ọsụọn'a nị ị rị alị kpọchanrịn nkụn; o k'e mẹ ọkpụkpụ ị ze ọhụnma-ọhụnma. Ị k'a rị kẹ ugbo-nta w'a gba mirin ọhụnma, rị kẹ isi-mirin hụn mirin ẹ ghalẹni a gụ.

¹² Ndị nke i k'a rụndọnzi ihiẹn ndị wiwi ẹdẹi, tụnsọnmẹ ụlọ ye iyetọ mbụ-mbụ. Wẹ k'a gha a kpọ ị “Onyẹ e dọnzi mgbọn; onyẹ a tụnkinsọnmẹ ụlọ idumu.”

¹³ Omẹni y'a latọnị idọnmẹ Ụhụọhịn Ezumikẹn m nsọ, omẹni y'e gizini Ụhụọhịn-nsọ m mẹ ihiẹn sụọnị ị; omẹni y'e kumẹ oku Ụhụọhịn Ezumikẹn ọhụnma, e ye Ụhụọhịn hụ rị Osolobuẹ nsọ ọghọ, omẹni y'e mẹbehi ihiẹn rị ị obi kẹni i ye Ụhụọhịn-nsọ a ọghọ, mẹbehi k'ọ sụọ ị, kubehi oku nwọnlẹni isi.

¹⁴ Ogẹn ahụn kẹ ịghọghọ Osolobuẹ e gi ru i ẹka, e mẹ m i wụrụ onyẹ w'a gbaye ụzọ ile imẹ alịnị, mẹ i ri ukuu nẹdi ụnụ wụ Jekọpụ. Osolobuẹ e gigụọ ọnụ a ku ẹ!